17-02-2026, 17:08
Salyanda bu ailələrə 12 mənzil veriləcək
Salyanda şəhid ailələri və əlilliyi olan şəxslər üçün növbəti mənzil satınalması həyata keçiriləcək.
Azərbaycan Respublikasının Sosial Xidmətlər Agentliyi Salyan rayonunda həssas qrupların mənzil təminatını genişləndirməyə davam edir.
Agentlik tərəfindən elan olunmuş tender çərçivəsində şəhid ailələri və əlilliyi müəyyən olunmuş şəxslər üçün daha 12 mənzilin satın alınması planlaşdırılır.
Layihənin ehtimal olunan qiyməti 1.188.000,00 AZN təşkil edir.
17-02-2026, 17:06
Rusiya-ABŞ-Ukrayna danışıqları başlayıb - YENİLƏNİB
İsveçrənin Cenevrə şəhərində Ukrayna münaqişəsinin həlli üçün Rusiya, ABŞ və Ukraynanın iştirakı ilə danışıqlar başlayıb.
Danışıqlar sabah da davam etdiriləcək.
Rusiya nümayəndə heyətinə Prezidentin köməkçisi Vladimir Medinski rəhbərlik edir.
Ukraynalılara Prezident Volodimir Zelenskinin ofisinin rəhbəri Kiril Budanov baçılıq edir.
ABŞ-ı görüşdə Prezidentin xüsusi elçisi Stiv Uitkov və Amerika liderinin kürəkəni Cared Kuşner təmsil edir.
***
Bu gün İsveçrənin Cenevrə şəhərində Rusiya, Ukrayna və ABŞ arasında danışıqların üçüncü raundu başlayacaq.
Moskva ilə Kiyev arasındakı münaqişənin həlli ilə bağlı danışıqlar 17 və 18 fevralda keçiriləcək.
Tərəflər əvvəllər 23-24 yanvar və 4-5 fevral tarixlərində Əbu-Dabidə görüşmüşdülər.
İsveçrə Xarici İşlər Nazirliyi müzakirələrin bağlı qapılar arxasında keçiriləcəyini bəyan edib.
Rusiya nümayəndə heyətinə Prezidentin köməkçisi Vladimir Medinski rəhbərlik edəcək. Həmçinin xarici işlər nazirinin müavini Mixail Qaluzin və Baş Qərargahın Baş İdarəsinin rəisi admiral İqor Kostyukov da danışıqlara qatılacaq. Ümumiyyətlə Rusiyanın danışıqlar qrupu 15-20 nəfərdən ibarətdir.
Ukraynanı Prezident Volodimir Zelenskinin ofisinin rəhbəri Kiril Budanov, onun müavini Sergey Kıslıtsya, Ukrayna Milli Təhlükəsizlik və Müdafiə Şurasının katibi Rüstəm Umerov, Baş Kəşfiyyat İdarəsinin rəis müavini Vadim Skibitski, Ukrayna Silahlı Qüvvələrinin Baş Qərargah rəisi Andriy Hnatov və hakim Xalqın Xidmətçisi partiyası fraksiyasının rəhbəri David Araxamiya təmsil edəcək.
ABŞ-ı görüşdə Prezidentin xüsusi elçisi Stiv Uitkov və Amerika liderinin kürəkəni Cared Kuşner təmsil edir. Onlar həmçinin Cenevrədə İranın nüvə sazişi ilə bağlı dolayı danışıqlarda iştirak edirlər.
17-02-2026, 17:00
Magistratura imtahanlarının nəticələri AÇIQLANDI
Dövlət İmtahan Mərkəzi (DİM) ali təhsil müəssisələrinin magistraturalarına 15 fevral 2026-cı il tarixində keçirilmiş qəbul imtahanının qapalı və kodlaşdırıla bilən açıq tipli tapşırıqlar (95 tapşırıq) üzrə nəticələrini elan edib.
İmtahanın nəticələri ilə buradan tanış tanış ola bilərsiniz.
Bakalavrlar imtahanın nəticələri haqqında məlumatı, həmçinin mobil operatorlar (Azercell, Bakcell, Nar) vasitəsilə “iş nömrəsi”ni 7727 nömrəsinə göndərməklə də öyrənə bilərlər.
Yekun imtahan balı xarici dil fənləri üzrə esse tapşırıqları yoxlanıldıqdan sonra – 6 həftə ərzində təqdim olunacaq.
Xatırladaq ki, iştirakçılar qapalı və kodlaşdırıla bilən tapşırıqlar üzrə 95, esse üzrə isə maksimal 5 bal toplaya bilərlər.
İmtahanda iştirak etmək üçün qeydiyyatdan keçən 22780 bakalavrdan 519 nəfəri imtahana gəlməyib. İmtahan qaydalarını pozduğu üçün 2 nəfərin nəticəsi ləğv olunub.
İmtahan iştirakçılarının nəticələri ilə bağlı apellyasiya müraciətlərinə yekun imtahan balı elan olunduqdan sonra baxılacaq. Öncədən məlumat verildiyi kimi, yalnız tapşırıqların məzmunu və yazı işi ilə bağlı müraciətlər nəzərə alınacaq. Cavab kartındakı mәlumatlar optik qurğu vasitәsilә oxunduğu üçün təlimata uyğun olmayan formada qeyd olunmuş cavablar, o cümlədən cavabın optik qurğu tərəfindən səhv kimi nəzərə alınması ilə nəticələnən düzəlişlərə (məsələn, qapalı sualda iki dairənin qaralanması və s.) baxılmayacaq.
17-02-2026, 16:47
Kənd Təsərrüfatı Nazirliyində CİDDİ POZUNTULAR
Kənd Təsərrüfatı Nazirliyinin 2026-2029-cu illər üzrə təqdim etdiyi məlumatlara əsasən, müvafiq bölmə çərçivəsində 8 proqramın icrası proqnozlaşdırılır. Hesablama Palatası tərəfindən aparılan təhlillər aqrar sahədə prioritetlərin müəyyənləşdirilməsi və vəsaitlərin bölgüsü ilə bağlı uyğunsuzluqları üzə çıxarıb.
Son illər heyvanların baş sayında davamlı azalma müşahidə olunsa da, “Heyvandarlıq sahəsinin inkişafı proqramı” üzrə 2026-cı ildə 71,7 milyon manat vəsait nəzərdə tutulur. Bu, cari ilin gözlənilən icra xərcləri ilə müqayisədə 3,6 milyon manat və ya 4,8 faiz azdır. Qeyd edilir ki, 2024-cü ildə sözügedən proqramın icrasına 59,8 milyon manat xərclənib. Bu məbləğ “Bitkiçilik sahəsinin inkişafı proqramı”na ayrılmış vəsaitdən 6 dəfə az olub.
Məlumata görə, təhlillər bəzi tədbirlər üzrə indikatorların inkişaf dinamikasını əks etdirmədiyini də göstərir. Belə ki, dən üçün günəbaxan əkin sahəsinin 12 950 hektardan 13 200 hektara qədər artırılması planlaşdırılır. Lakin məhsul istehsalının 31 303 tondan 30 360 tona enməsi hədəf kimi müəyyən edilib.
Bundan əlavə, xüsusi təhlükəli heyvan xəstəlikləri nəticəsində məhv edilmiş iribuynuzlu və xırdabuynuzlu heyvanların sayının 2025-ci illə müqayisədə müvafiq olaraq 50 və 100 baş artaraq 750 və 1 600 başa çatacağı proqnozlaşdırılır. Hesablama Palatasının qənaətinə görə, bu göstəricilər aqrar sahədə inkişaf meyllərini xarakterizə etmir.
17-02-2026, 16:43
Cenevrədəki İran-ABŞ danışıqları başa çatıb - YENİLƏNİB
İran və ABŞ arasında dolayı danışıqların ikinci mərhələsi İsveçrənin Cenevrə şəhərində başa çatıb.
İran mediasının məlumatına görə, dolayı danışıqlar başa çatdıqdan sonra hər iki ölkənin danışıqlar qrupları məkanı tərk ediblər.
Danışıqlar Omanın İsveçrədəki səfirliyində keçirilib.
***
Bu gün İsveçrədəki Oman səfirliyində İran və ABŞ arasında dolayı danışıqlar keçirilir.
İran KİV-i danışqıların artıq başladığı barədə məlumat yayıb.
***
Beynəlxalq Atom Enerjisi Agentliyinin baş direktoru Rafael Qrossi İranın xarici işlər naziri Abbas Arakçi ilə görüşüb.
Tərəflər 17 fevralda Cenevrədə Omanın vasitəçiliyi ilə keçirilməsi planlaşdırılan ABŞ-İran nüvə danışıqlarını müzakirə ediblər.
Qrossi sosial mediada yazıb:
"Cenevrədə keçirilməsi planlaşdırılan vacib danışıqlara hazırlıq məqsədilə İranın xarici işlər naziri Arakçi ilə ətraflı texniki müzakirə apardım".
Xatırladaq ki, bu gün İran və ABŞ arasında dolayı danışıqlar İsveçrədəki Oman səfirliyində keçiriləcək.
17-02-2026, 16:23
Kür çayı daha bir can aldı
Fövqəladə Hallar Nazirliyinin "112" qaynar telefon xəttinə Kür çayının Salyan şəhəri ərazisindən keçən hissəsində 1 nəfərin batması barədə məlumat daxil olub.
Bu barədə FHN-in Mətbuat xidmətindən məlumat verilib.
Məlumatla əlaqədar Nazirliyin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupu axtarışlara cəlb olunub.
Əlavə məlumat veriləcək.
17-02-2026, 16:10
İran Hörmüz boğazını bağlayır
İran hərbi təlimlər zamanı Hörmüz boğazının bir hissəsini bir neçə saatlıq bağlayacaq.
Bu barədə İranın “Fars” agentliyi məlumat yayıb.
Agentlik bildirib ki, bu gün "Hörmüz boğazının ağıllı idarə olunması" dəniz təlimləri zamanı təhlükəsizlik və naviqasiya qaydalarına riayət olunmasını təmin etmək üçün Hörmüz boğazının bəzi hissələri bir neçə saatlıq bağlanacaq.
İran fevralın 16-da Yaxın Şərqdəki gərginlik və ABŞ-ın bölgədəki hərbi iştirakının artması fonunda "Hörmüz boğazının ağıllı idarə olunması" dəniz təlimlərinə başlayıb.
17-02-2026, 16:01
Pakistanda terror: 11 ölü, 7 yaralı
Pakistanın Xayber-Paxtunxva əyalətində baş verən terror aktı nəticəsində xeyli hərbçi həlak olub.
Bu barədə Pakistan mətbuatı çərşənbə axşamı yerli hakimiyyət orqanlarına istinadən məlumat yayıb.
Qəzet Pakistan Silahlı Qüvvələrinin mətbuat xidmətinə istinadən "Xayber-Paxtunxva əyalətinin Bajaur rayonundakı nəzarət məntəqəsində partlayan avtomobil bombası nəticəsində 11 təhlükəsizlik işçisi həlak olub", - deyə bildirib.
Qadınlar və uşaqlar da daxil olmaqla daha 7 nəfər yaralanıb.
Pakistan hakimiyyəti teraktın arxasında ölkədə qadağan olunmuş "Təhriki Taliban Pakistan" hərəkatının tərəfdarlarının durduğuna inanır.
Məlumata görə, görülən tədbirlər nəticəsində 12 terrorçu öldürülüb.
Qəzet qeyd edir ki, Xayber-Paxtunxva əyalətində terror aktlarının sayı son bir ildə artıb. Pakistanın Təhlükəsizlik Araşdırmaları Mərkəzinin hesabatına görə, əyalətdə ötən ölənlərin sayı 2024-cü ildəki 1620 nəfərdən 2025-ci ildə 2331 nəfərə çatıb.
17-02-2026, 15:45
"Traktor"un baş məşqçisi istefa verib
Təbrizin "Traktor" klubunun xorvatiyalı baş məşqçisi Draqan Skoçiç istefa verib.
Bu barədə klubun mətbuat xidməti məlumat yayıb.
57 yaşlı mütəxəssis vəzifəsindən öz istəyi ilə gedib.
D.Skoçiç 2024-cü ildən "Traktor" klubunu çalışdırırdı. Komanda 204/2025 mövsümündən onun rəhbərliyi altında İran Pro Liqasının qalibi olub.
Məlumata görə, Təbriz klubunun sükanı arxasına müvəqqəti olaraq Mohammad Rabiei gətirilib. Onunla mövsümün sonunadək nəzərdə tutulan müqavilə imzalanıb.
Hazırda isə "Traktor" 35 xalla İran çempionatında 2-ci yerdə gedir.
17-02-2026, 15:28
Şəhidləri təhqir edən ərəblər deportasiya olunacaq
Şəhidlər xiyabanında nalayiq hərəkətlər etməkdə təqsirləndirilən 3 Səudiyyə Ərəbistanı vətəndaşının (Alzaman Mahdi Ali, Alghabr Mohammad Hussain, Alghabr Mahdi Mohammad) barəsində olan hökmdən verilən appelyasiya şikayəti üzrə məhkəmə prosesi keçirilib.
Bu gün Bakı Apellyasiya Məhkəməsində hakim Əfqan Ələkbərovun sədrliyi ilə keçirilən prosesdə qərar qəbul edilib.
Qərara əsasən, Səbail Rayon Məhkəməsinin hökmü dəyişdirilib. Təqsirləndirilən şəxslərin cəzası 2 ildən 6 aya endirilib. Deportasiya qərarı qüvvədə saxlanılıb.
Qeyd edək ki, Sabail rayon Məhkəməsinin hökmünə əsasən, Alzaman Mahdi Ali, Alghabr Mohammad Hussain və Alghabr Mahdi Mohammad hər biri 2 il müddətinə azadlıqdan məhrum edilib. Hökmə əsasən, onlar cəzalarını ümumi rejmli cəzaçəkmə müəssisəsində çəkməli, cəzalarını çəkdikdən sonra ölkə ərazisindən məcburi şəkildə çıxarılmalıdırlar.
Xatırladaq ki, ötən il avqustun 17-də 3 nəfər əcnəbi şəxsin Şəhidlər xiyabanında nalayiq hərəkətlər etməklə çəkdikləri videogörüntünü sosial şəbəkələrdə paylaşmaları barədə araşdırmalar aparılıb. Araşdırmalar zamanı həmin şəxslərin avqustun 13-də Bakı şəhərinə turist kimi 5 günlük gəldikləri, çəkdikləri videonu sosial şəbəkələrdə yaydıqları müəyyən edilib.
Faktla bağlı Cinayət Məcəlləsinin 245-ci (Qəbir üzərində təhqiredici hərəkət) maddəsi ilə cinayət işi başlanılıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!