"18 oktyabrda Almaniyanın Frankfurt şəhərində keçiriləcək "Avropada yaşayan siyasi mühacirlərin I konfransı"nı Avropada yaşayan siyasi mühacir həmvətənlilərimin bir yerə toplanmaq, təşkilatlanmaq istəyini həm onların Vətəndən uzaqda koordinasiyalı fəaliyyət göstərmələri, qürbət eldə bir-birlərinə arxa durmaları səbəbindən, həm də ölkəmizin ictimai-siyasi həyatında baş verənləri yaxından izləmək və taleyüklü məsələlərə operativ reaksiya vermək baxımından yüksək qiymətləndirirəm.
Ötən əsrin əvvəllərində yoxdan cümhuriyyət var eləmiş böyük oğullarımızın – Məmməd Əmin Rəsulzadənin, Əlimərdan bəy Topçubaşovun, Ceyhun Hacıbəylinin, Mirzə Bala Məmmədzadənin, Əhmədbəy Ağayevin, Əlibəy Hüseynzadənin və adını çəkmədiyim yüzlərlə cəlayi-vətən olmuş yurdsevər oğullarımızın mühacirətdəki fəaliyyətlərinin bugünkü mühacir qardaşlarımız üçün bir örnək olacağı qənaətindəyəm.
Hesab edirəm ki, Azərbaycan siyasi mühacirət hərəkatının 100 ilə yaxın şərəfli tarixi hər bir azərbaycanlıya qürur yaşatmaqla yanaşı, bizi o qədər də uzaq olmayan keçmişimizdən müəyyən dərslər çıxarmağa səsləyir. Bu, dünyanın dörd bir yanına səpələnmiş siyasi mühacirlərimizin olub-keçənlərdən dərs çıxarması - yaxşıları örnək alması, yanlışları təkrar etməməsi baxımından çox əhəmiyyətlidir.
Təşkilatlanma yolunda ilk addımlarını atan həmvətənlilələrimi Azərbaycanın Dövlət Müstəqilliyi haqqında Konstitusiya Aktının qəbul edilməsinin 24-cü ildönümü münasibəti ilə təbrik edir, qurultayın 18 oktyabrda keçirilməsini bir tarixi şans, uğur əlaməti kimi qiymətləndirir, mühacir qardaşlarımı Vətənimizin azad, demokratik gələcəyi yolunda məsuliyyətli qərarlar qəbul etməyə çağırıram".

Hörmətlə, Qubad İbadoğlu, Azərbaycan Demokratiya və Rifah (ADR) Hərəkatının sədri