Ədəbi aləmə 60-cı illərin axırlarında gələn şair-publisist, jurnalist, Azərbaycan Yazıçılar və Jurnalistlər birliklərinin üzvü Etibar Etibarlı (Aslanov Etibar Zəki oğlu) 2 aprel 1951-ci (1952) ildə Şamaxı rayonunun Kürdəmic kəndində anadan olmuşdur.
1968-ci ildə Şamaxı şəhər 1 nömrəli orta məktəbi bitirmişdir. Bir müddət rayon qəzetində işləmişdir. Uşaq yaşlarından şeirə həvəs göstərmişdir. İlk şeirləri 1964-cü ildə "Göyərçin" jurnalında, sonralar "Yeni Şirvan" rayon qəzetində dərc olunmuşdur. "Ulduz" jurnalının 1969-cu il 10-cu nömrəsində görkəmli şairimiz Nəbi Xəzri onun haqqında "Uğurlu yol" məqaləsi yazmış və E. Etibarlının iki səhifə həcmində şeirləri çap olunmuşdur. 1974-cü ildə M. F. Axundov adına Rus dili və Ədəbiyyatı İnstitutunu (indiki Slavyan Universiteti) bitirib, rayonda müıllim işləmişdir. Elə həmin vaxtllarda o, "Molodyoj Azerbaydjana" qəzetinin Şamaxı və Ağsu rayonları üzrə ştatdankənar müxbiri olmuş, sonrakı uzun illər ərzində isə jurnalist kimi rəsmi mətbuat orqanlarında fəaliyyətini davam etdirmişdir. O, keçmiş "Kommunist" qəzetinə işə dəvət olunmuşdur, daha sonra "Xalq qəzeti", "Mülkiyyət", "Respublika" kimi rəsmi qəzetlərdə, sonra isə AzərTAc -da (Dövlət İnormasiya Agentliyində) işləmişdir. Bu illər ərzində o, müxtəlif mövzularda müxtəlif səpgili yüzlərlə məqalə, oçerk və felyeton yazmış və yazıçı -publisist kimi də tanınmışdır.
Ağır xəstəliklə əlaqədar səkkiz dəfə cərrahi əməliyyata məruz qalsa da, yeddi il çarpayı dustağı olsa da ədəbi yaradıcılığını davam etdirən E. Etibarlı yüzlərlə şeirin, bir çox poemaların, M. Müşfiq haqqında "Gözdən yaş çıxarmı ürək yanmasa?" pyesinin, həmçinin şeir kitablarının müəllifidir. O, həm də epik-lirik poemalar müəllifi kimi tanınır. "Nisgil", "Taleyimdən keçənlər (irihəcmli), "Bir gecənin poeması", "Ağdama gedən yol","Dan üzü ağaranda" və s. kimi poemaları oxuculara bəllidir. E. Etibarlı mediada--qəzet və jurnallarda mütəmadi olaraq, kəskin ədəbi-tənqidi məqalələr yazmış (yazmaqda davam edir), ədəbi prosesə öz münasibətini bildirmişdir. Əsas məsələ odur ki, Etibar doğrudan da etibarlı qələm əhlidir. Qələm dostumuza maddi dayaq ola bilməsək də, ona yaradıcılıq uğurları və xəstəliyinə qarşı döyüş əzmi arzulayırıq.
Butov.az