İran İslam Respublikası hökumətinin mövqeyini əks etdirən “İRNA” agentlyinin saytında geosiyasət sahəsində ekspert adlandırılan Hüseyn Seyfəddinli ilə aparılmış müsahibənin mətni “İranın Qarabağ münaqişəsində fəal olmağa hamıdan çox səlahiyyəti vardır” adı altında dərc edilib. Bu ekspertin demə, hətta “Azərbaycan Respublikası və Dağlıq Qarabağın geosiyasi perspektivi” adlı kitabı da var.
Dostların dediyinə görə bu şəxs azərbaycanlıdır. Həmin şəxs İranda Cənubi azərbaycanlıların etno-milli maraqlarına, milli/türk kimliyinə və Azərbaycan Respublikasına qarşı hərtərəfli iftira və böhtan dolu, qərəzli ideoloji mübarizə aparan bədnam “azəriha” saytının fəal yazarlarından biridir.
Adam kiməsə quyruq bulayaraq müəıyyən status əldə etmək istiqamətində hərəkət etdikdə daim ağalarına xoş gələn sözlər deməklə son nəticədə onların da həqiqəti görməməsinə səbəb olur. Belə olmasa idi, İranda Azərbaycan Respublikası üzrə mütəxəssis olan, həqiqi, sanballı, obyektiv mövqedən çıxış edən, yəni alim adına layiq olan mütəxəssislər olduğu halda, öz millətinə xəyanət edən bir şəxsə “İRNA” kimi hökumət mövqeyini əks etdirən bir agentliyin saytında geniş yer verməzdilər. Azərbaycan Respublikası üzrə dırnaqarası bu mütəxəssis münaqişənin guya tarixindən danışarkən deyir ki, Dağlıq Qarabağ Azərbaycan SSR-nin tərkibində Muxtar Respublika(?) idi. SSRİ qanunlarından(?) biri “Xalqların öz müqəddaratını təyin etmək hüququ” idi. Həmin qanun respublikalara icazə verirdi ki, istədikləri vaxt SSRİ-nin tərkibindən çıxsınlar. Şərh etməyə ehtiyac yoxdur ki, Qarabağ adda inzibati-ərazi qurumu yox idi, Dağlıq Qarabağ respublika yox, vilayət/şəhristan idi. SSRİ-də “müqəddəratını təyin etmə” qanunu adda bir şey yox idi. Müqəddaratını təyin etmə milli məsələnin həlli prinsiplərindən biri idi və s. Qarabağ(?) Muxtar Respublikasının(?) tarixən Azərbaycan SSR-nin tərkibində olmaqdan o qədər də “xoşu” gəlmirdi. Bu respublika(?) SSRİ-nin dağılması ərəfəsində həmin qanuna (?) istinad edərək SSRİ (?) tərkibindən çıxdı və müstəqilliyini(?) elan etdi. Bəli, nə az-nə çox, birbaşa SSRİ-nin tərkibindən çıxdı. Əlifbanı bilmək heç də pis olmazdı.
Bu əllamə bir şeyə diqqət edir ki, guya Qarabağ (?) Bakıdan və Irəvandan daha tez müstəqilliyini (?) elan edib. Ekspertlikdən xəbəri olmayan, xalqı adına ləkə olan bu satqın daha sonra yazır: “Azərbaycan Respublikası öz “ərazi bütövlüyünü qorumaq” adlandırdığı şeyi qorumaq üçün ora silahlı qüvvələrini göndərdi. Nəticədə tam miqyaslı müharibə baş verdi və Azərbaycan daha çox ərazilər itirdi”.
Bu “əllamə”nin şərəfsizliyinin həddi-hüdudu yoxdur. Ona görə də həmin tarixi hadisəırdən danışarkən Ermənistanın adını bir dəfə də olsun çəkmir.
Bu şəxsin satqınlıqla çörək qazandığı, ona görə elementar faktları təhrif etdiyi və saxtalaşdırdığı qətiyyən təəccüb doğurmur. Bu, öz xalqına xəyanət edənlərin getməli olduğu yoldur. Burası məlumdur. Lakin “İRNA” kimi agentliyin belə dırnaq arası ekspertlərə meydan verməsinin səbəbi aydın deyil. İranda tarixi həqiqətləri bilən savadlı adamlar az deyil. Agentlik belə materialı dərc etməklə kimi aldatmaq istəyir? Hansı məqsədə xidmət edir?
Qeyd edildiyi kimi, “İRNA” hökumətin agentliyidir, həmişə hökumət dəyişəndə onun daxili və xarici hadisələrə yanaşması da dəyişir, hökumətin mövqeyini təbliğ və müdafiə etməklə məşğul olur. Prezident H.Ruhaninin başçılıq etdiyi və İranda mühafizəkarların hərtərəfli təzyiqi altında olan və cəmi 5-6 ay ömrü qalan hökumətin belə qərəzli insanlara meydan verməsinin səbəbi aydın deyil.
Vidadi Mustafa.
Redaksiyadan: Hörmətli Vidadi müəllim, yazırsınız ki, “İRNA” kimi agentliyin belə dırnaq arası ekspertlərə meydan verməsinin səbəbi aydın deyil. Zənnimcə bu səsəb çox aşkardır: "Azərbaycan Ordusu BMT-nin Qarabağa aid qətnamələrinin icrasına başlayıb. Beynəlxalq birlik Azərbaycanın haqqını etiraf edib, ərazi bütövlüyünü tanıyır və xalqımızın Vətən müharibəsi apardığını anlayır. Azərbaycana açıq düşmənçiliyinin təhlükəsindən çəkinən İran isə sadəcə oyun formasını dəyişib. Yalladığı quyruq bulayanları Azərbaycanımızın kölgəsinə hürdürür..."