21-10-2024, 17:47
Pensiyaların ödəniləcəyi tarix açıqlandı
Azərbaycanın rayonlarında oktyabrın 20-28-i aralığında pensiyaların ödənilməsi nəzərdə tutulur.
Bu barədə Dövlət Sosial Müdafiə Fondundan bildirilib.
Qeyd olunub ki, müvafiq qrafikə əsasən, Bakı və Sumqayıt şəhərləri, Abşeron rayonu üzrə pensiya ödənişləri hər ayın 8-15-i, digər bölgələri üzrə, habelə güzəştli şərtlərlə pensiya təyin edilmiş şəxslərin pensiya ödənişləri isə ayın 20-28-i aralığında nəzərdə tutulub. Sosial ödənişlərin bank kartlarına köçürüləcəyi günlər barədə vətəndaşlara əvvəlcədən məlumat verilir.
21-10-2024, 17:26
Moldovada keçirilən referendumun ilkin nəticələri
Moldova Mərkəzi Seçki Komissiyası (MSK) Avropa İttifaqına daxil olmaqla bağlı Konstitusiya referendumunun protokollarının 99,05 faizini işləyib.
Referendum protokollarının ümumi səs sayından 99,05 faizi işləndikdən sonra müəyyən olunub ki, seçicilərin 50,30 faizi respublika Konstitusiya referendumunda “lehinə”, 49,70 faizi isə “əleyhinə” səs verib.
Moldova MSK-ın məlumatına görə, seçkilərdə 1 milyon 546 min 757 seçici iştirak edib ki, bu da seçici siyahılarında qeydə alınmış seçicilərin 51,4 faizini təşkil edir. Onlardan 1 478 958 milyon seçici referendumda bülleten almaq üçün seçici siyahılarında imza atıb ki, bu da 49,81 faiz təşkil edir.
Mərkəzi Seçki Komissiyasının sədri Anjelika Karaman brifinqdə qeyd edib ki, dairə seçki şuralarının protokollarını aldıqdan sonra komissiya seçkilərin nəticələri ilə bağlı Konstitusiya Məhkəməsinə hesabat təqdim edəcək, o da öz növbəsində 10 gün müddətində referendumun nəticələrini öz qərarı ilə təsdiq və ya təkzib edəcək.
21-10-2024, 17:07
Sahibə Qafarova Cahit Bağçını qəbul edib
Milli Məclisin sədri Sahibə Qafarova Türkiyə Respublikasının Azərbaycandakı səfiri Cahit Bağçını qəbul edib.
Bu barədə Milli Məclisdən məlumat verilib.
Bildirilib ki, Parlamentin sədri Sahibə Qafarovanı bu vəzifəyə yenidən seçilməsi münasibətilə təbrik edən səfir, ötən dövrdə Milli Məclisin ölkələrimiz arasında münasibətlərin daha da dərinləşməsinə mühüm töhfələr verdiyini söyləyib.
Azərbaycan və Türkiyə arasında dostluq və qardaşlıq münasibətlərinin "Bir millət, iki dövlət" şüarına əsaslanaraq, uğurla inkişaf etdiyini deyən Milli Məclisin sədri Sahibə Qafarova, ölkələrimizin və xalqlarımızın həm şad, həm də çətin günlərdə hər zaman birlikdə olduğunu vurğulayıb. Spiker qeyd edib ki, ölkə başçılarımızın dostluq və qardaşlıq münasibətləri bizim hər birimiz üçün örnək təşkil edir.
O qeyd edib ki, bu gün Azərbaycan və Türkiyə arasında mövcud olan qardaşlıq münasibətlərinə qısqanclıqla yanaşanlar var. Həmçinin, bəzi dairələr Azərbaycan və Türkiyəyə qarşı təzyiqlər göstərməyə, onların müstəqil, milli maraqlara söykənən siyasətlərinə təsir etməyə cəhd edirlər. Sahibə Qafarova bu cür cəhdlərin heç bir nəticə verməyəcəyini, dövlətlərimizin inkişaf yolunda inamla addımlamağa davam edəcəyini vurğulayıb.
Milli Məclisin sədri, bu vəzifəyə yenidən seçilməsindən sonra onu ilk olaraq, Numan Kurtulmuşun təbrik etdiyini, həmçinin, parlament seçkilərində TBMM-in müşahidə missiyasının ən böyük heyətlə təmsil olunduğunu xatırladaraq, bunları digər sahələrdə olduğu kimi, parlamentlərimiz arasında da əlaqələrin ən yüksək səviyyədə olmasının göstəricisi kimi qiymətləndirib.
Spiker TBMM sədri ilə bir neçə gün öncə keçirdiyi görüşü məmnunluqla xatırlayaraq, görüşdə gündəlikdə duran məsələlər haqqında səmərəli müzakirələrin aparıldığını bildirib. O, Azərbaycan-Türkiyə parlamentlərarası əlaqələr üzrə işçi qrupunun tam tərkibdə yenidən formalaşdığını bildirərək, qarşıdakı dövrdə də münasibətlərin daha da inkişafı üçün müvafiq səylərin davam etdiriləcəyini vurğulayıb.
Görüşdə Azərbaycan və Türkiyənin bir çox beynəlxalq təşkilatlarda olduğu kimi, Türk Dövlətləri Təşkilatında uğurla əməkdaşlıq etdiyi qeyd olunaraq, parlamentlərimizin də TürkPA çərçivəsində bu istiqamətdə fəaliyyətini davam etdirdiyi bildirilib.
Spiker Sahibə Qafarova Cahit Bağçının Türkiyə Respublikasının Azərbaycandakı səfiri kimi fəaliyyətini təqdir edərək, onun qanunverici orqanla da sıx təmaslar qurduğunu söyləyib.
Görüşdə qarşılıqlı maraq doğuran digər məsələlər haqqında da fikir mübadiləsi aparılıb.
21-10-2024, 17:03
Alatavada evlərin qanunsuz sökülməsi işləri dayandırıldı
Dövlət Şəhərsalma və Arxitektura Komitəsi Bakının Yasamal rayonunun 1-ci Alatava qəsəbəsi, 128B ünvanındaki yaşayış binasının sökülməsi ilə bağlı sosial şəbəkələrdə yayılmış görüntülərə mübasibət bildirib.
Qurumdan verilən məlumatda deyilir ki, bu ilin aprel ayından Komitə yanında Bakı Şəhər Memarlıq və Şəhərsalma Baş İdarəsinin şəhərsalma nəzarəti qaydasında keçirdiyi monitorinq nəticəsində həmin ərazidə müvafiq icazə sənədləri olmadan söküntü işlərinin aparılması faktı bir neçə dəfə akşar edilib.
Özbaşına fəaliyyətin dayandırılması istiqamətində lazımi tədbirlərin görülməsi üçün aidiyyəti icra hakimiyyəti orqanlarına rəsmi sorğular göndərilib. Bakı Şəhər Memarlıq və Şəhərsalma Baş İdarəsinin gördüyü operativ tədbirlər nəticəsində özbaşına söküntü işləri tamamilə dayandırılıb və ərazi ciddi nəzarətə götürülüb.
21-10-2024, 16:58
Şuşanın Baş planı təsdiqləndi
Şuşa şəhərinin 2040-cı ilədək inkişafına dair Baş planı təsdiqlənib.
Bununla bağlı Baş nazir Əli Əsədov qərar imzalayıb.
Baş plan Azərbaycan Respublikası Dövlət Şəhərsalma və Arxitektura Komitəsi tərəfindən hazırlanıb.
21-10-2024, 16:39
COP29-da qeydiyyatdan keçənlərin ilkin sayı açıqlandı
Bu ilin noyabrında Azərbaycanın ev sahibliyi edəcəyi COP29 konfransına müxtəlif ölkələrdən qatılacaq nümayəndə heyətlərinin qeydiyyat prosesi uğurla davam edir.
Bu barədə COP29 Əməliyyat Şirkətinin məlumatında bildirilib.
Qeyd edilib ki, cari tarixə olan məlumata əsasən, COP29-da iştirak üçün müvafiq qeydiyyat prosesindən keçən iştirakçıların sayı 32 000 nəfəri keçib.
"Beynəlxalq iqlim konfransında iştirakla bağlı qeydiyyat prosesinə bu ilin 24 iyun tarixindən etibarən başlanılıb. Dünyanın müxtəlif ölkələrindən konfransda iştiraka dair göstərilən maraq qeydiyyatdan keçənlərin sayının da günbəgün artımı ilə müşaiyət edilir.
COP tədbirlərinə xas olan əksər deleqasiyaların tədbirə daha yaxın tarixlərdə qeydiyyat üçün müraciət etmə tendensiyası nəzərə alınaraq, davam edən qeydiyyat prosesi ərzində bu rəqəmlərin yaxın həftələrdə daha da artması gözlənilir.
Qeyd edək ki, 11-22 noyabr tarixlərində Bakıda keçiriləcək COP29 konfransı beynəlxalq iqlim siyasətinin formalaşmasında əsas platforma olaraq, dünya miqyasında iqlim dəyişmələrinə qarşı mübarizə məsələlərinin müzakirə mərkəzi olacaq. Dünyanın bir sıra ölkələrindən bu müzakirələrdə iştirak etmək üçün onminlərlə nümayəndənin Bakıda qarşılanması üçün yekun hazırlıq işləri davam etdirilir", - məlumatda vurğulanıb.
21-10-2024, 16:37
Fətullah Gülənin varisi kim olacaq? - Şəbəkə Azərbaycanda da örgütlənmişdi
Uzun illərdir ABŞ-ın Pensilvaniya şatatında yaşayan türkiyəli ilahiyyatçı, FETÖ terror təşkilatının 83 yaşlı başçısı Fətullah Gülən ölüb. Gülənə yaxın mənbələr xarici KİV-ə onun Pensilvaniya ştatında dəfn olunacağını bildirib.
Bu arada xarici media Gülənin yerinə kimin keçəcəyindən də bəhs etməkdədir. Bu da səbəbsiz deyil: “Gülən şəbəkəsi” milyardlarla dollar gəlirə sahibdir və təşkilat bu vəsaiti idarə edəcək şəxsi mütləq müəyənləşdirməlidir.
Məlumatlara görə, “Gülən şəbəkəsi” təkcə Afrikadakı məktəblərdən ildə 250 milyon dollar gəlir əldə edir.
CNNtürk xəbər verir ki, FETÖ təşkilatının ümumi büdcəsi 200 milyard dollara bərabərdir. Adı çəkilən media qurumu hesab edir ki, təşkilat ABŞ qanadı tərəfindən idarə olunacaq.
"Əgər parçalanma olmasa, öz aralarında barışsalar, 200 milyard dollara sahib olan strukturun rəhbəri Mustafa Özcan və ya Cevdet Türkyolu olacaq”, - CNNtürk yazıb.
Fətullah Gülənin ölümündən sonra onun yerinə gətiriləcək şəxslər sırasında örgüt başçısına daha yaxın olan Cevdet Türkyolu (Gülənin katibi), Mustafa Özcan (örgütün "pul kassası"), Osman Şimşek (Gülənin sosial media məsulu), Ekrem Dumanlının (şəbəkənin media məsulu) kimi şəxslərin adı çəkilir.
Fətullah Gülən 2016-cı ildə Türkiyədəki dövlət çevrilişinə cəhddə iştirakda ittiham olunduqdan sonra onun rəhbərlik etdiyi FETÖ örgütü rəsmi Ankara tərəfindən terror təşkilatı elan edilib.
Fətullah Gülənin himayəsilə 2016-cı ilin iyulunda dövlət çevrilişinə cəhd iki gün davam etmiş və həmin qarşıdurma nəticəsində 250-dən çox insan həlak olmuş, 2,2 min nəfər yaralanmışdı.
Ankara dəfələrlə ABŞ-dan Gülənin təhvil verilməsini tələb edib, həmçinin FETÖ tərəfdarlarının sonuncusu məhkəmə qarşısına çıxarılana qədər təqib edəcəyini bəyan edib.
Türkiyədə mütəmadi olaraq Gülən tərəfdarlarına qarşı əməliyyatlar keçirilir.
Hazırda dünyanın müxtəlif ölkələrində “Gülən şəbəkəsi”nin himayəsi altında çalışan məktəblər, universitetlər, media orqanları və digər qurumlar fəaliyyət göstərir.
Xarici mətbuat yazır ki, bu gün 150-dən çox ölkədə Gülən tərəfdarları tərəfindən açılan təxminən 1400 məktəb fəaliyyət göstərir.
Siyasi ekspert Elxan Şahinoğlu Fətullah Gülənin ölüm hadisəsini şərh edib.
Onun sözlərinə görə, bu olay yeni mövzular gündəmə gətirəcək.
“Aydındır ki, örgütün liderinin Türkiyədə dəfn olunması mümkün deyil. Böyük ehtimalla onu yaşadığı ABŞ-ın Pensilvaniya ştatının və ya başqa ştatın müsəlman qəbiristanlığında basdıracaqlar”.
E.Şahinoğlu bildirib ki, ikinci məsələ örgütün fəaliyyətini hansı şəkildə davam etdirəcəyidir:
“Fətullah Gülən ağır xəstəliyi səbəbilə varisini əvvəlcədən seçməmiş deyil. Həmin varis ya onun qohumlarından, ya da Pensilvaniyadakı yaxın ətrafından biri olacaq. Həmin varis şəbəkəni ayaqda saxlamağa və topladıqları milyardlarla dolları idarə etməyə çalışacaq. O, FETÖ içində Gülən qədər populyar olmacayağından örgütdə fikir ixtilafının dərinləşməsi istisna deyil”.
Ekspert düşünür ki, Türkiyənin müvafiq strukturları Gülənin ölümündən istifadə etməklə örgütü ümumiyyətlə çökdürməyə çalışacaqlar:
“Asan olmayacaq. Çünki örgütün ABŞ, Avropa, hətta Afrikada müxtəlif mərkəzləri fəaliyyət göstərir ki, hamısı gəlir gətirir. Vaxtilə Azərbaycanda da örgütlənmişdilər, indinin özündə də Fətullah Güləni “hocamız” deyə qiymətləndirənlər var. Onlarla çox mübahisəm olub, hər dəfəsində də “hoca”nın hərbi çevrilişə cəhddə və nəticədə yüzlərlə insanın həlak olmasında heç bir rolunun olmadığını vurğulamağa çalışıblar. Sanki yadplanetlilər hərbi çevrilişə cəhd edib və insanlara atəş açıblar...”.
21-10-2024, 15:58
Naxçıvanda ilk qar
Naxçıvan Muxtar Respublikasına mövsümün ilk qarı yağıb.
Muxtar respublikanın Ekologiya və Təbii Sərvətlər Nazirliyinin Hidrometeorologiya Mərkəzindən verilən məlumata görə, Şahbuz rayonun Batabat və Kükü, Ordubad rayonunun Nurgüt və Dırnıs istiqamətlərində qar yağıb. Qarlı hava şəraiti davam edir.
21-10-2024, 15:45
Azərbaycanla Moldova arasında Saziş təsdiqləndi
“Azərbaycan Respublikası Hökuməti ilə Moldova Respublikası Hökuməti arasında readmissiya haqqında Saziş” təsdiq edilib.
Prezident İlham Əliyev bununla bağlı qanunu imzalayıb.
Saziş 2024-cü il mayın 24-də Bakı şəhərində imzalanıb.
20-10-2024, 18:14
İran Əfqanıstan və Pakistanla sərhəddə divar çəkir
İran Pakistan və Əfqanıstanla həmsərhəd olan 5 əyalətdə divar tikintisinə başlayıb.
Bu barədə "Eghtesaad24" İran sərhəd polisinin komandiri, briqada generalı Əhməd Əli Qudarziyə istinadən məlumat yayıb.
O bildirib ki, divar təhlükəsizlik təhdidlərini azaltmaq, arzuolunmaz miqrasiyanın və qaçaqmalçılığın qarşısını almaq üçün lazımdır.
General vurğulayıb ki, Əfqanıstan və Pakistanla sərhəddə divar tikintisi prioritet məsələdir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!