14-11-2023, 17:43
Azərbaycanla Mərakeş arasında Anlaşma Medmorandumları imzalandı
Rabatda keçirilən I Azərbaycan-Mərakeş Biznes Forumu çərçivəsində Azərbaycanın İqtisadiyyat Nazirliyi yanında Kiçik və Orta Biznesin İnkişafı Agentliyi (KOBİA), eləcə də İxracın və İnvestisiyaların Təşviqi Agentliyi (AZPROMO) ilə Mərakeşin müvafiq qurumları arasında Anlaşma Memorandumları imzalanıb.
Bunu xarici işlər naziri Ceyhun Bayramov "X" sosial şəbəkəsindəki hesabında bildirib.
Nazir açılış nitqi ilə çıxış etməsinə də diqqət çəkərək bundan məmnun olduğunu vurğulayıb. XİN başçısı onu da əlavə edib ki, Biznes-Forum qarşılıqlı faydalı imkanların araşdırılmasında mühüm mərhələ olacaq.
14-11-2023, 17:27
Hökumət Ödəniş Portalı mobil tətbiqinin fəaliyyətini dayandırır
Azərbaycandakı bankların, əksər bank olmayan ödəniş xidməti təchizatçılarının internet və mobil bankçılıq həllərinin Hökumət Ödəniş Portalına (HÖP) inteqrasiya edildiyi, bütün xidmət təşkilatları üzrə ödənişlərin bu platformalardan aparılması imkanı olduğu nəzərə alınaraq 10 yanvar 2024-cü ildən HÖP-ün internet səhifəsinin (//gpp.az) və mobil tətbiqinin fəaliyyəti dayandırılacaq.
Bu barədə Azərbaycan Mərkəzi Bankı məlumat yayıb.
"HÖP-ün internet səhifəsi və mobil tətbiqi vasitəsilə apardığınız ödənişləri bankların, həmçinin bank olmayan ödəniş xidməti təchizatçılarının bu portala inteqrasiya olunmuş internet və mobil xidmətləri vasitəsilə həyata keçirə bilərsiniz", - deyə məlumatda qeyd olunub.
14-11-2023, 17:19
XİN Başçısı Azərbaycan-Mərakeş Biznes Forumunda çıxış etdi
Mərakeşə rəsmi səfəri çərçivəsində xarici işlər naziri Ceyhun Bayramov Birinci Azərbaycan-Mərakeş Biznes Forumunda çıxış edib.
Bu barədə Azərbaycan XİN-in "X" hesbaında paylaşım edilib.
Bildirilib ki, forum hər iki ölkədə mövcud biznes və investisiya imkanları barədə praktiki fikir mübadiləsi aparmaq üçün yaxşı fürsət olub.
14-11-2023, 16:55
Növbəti köç karvanı Laçın şəhərinə çatdı
Noyabrın 14-də Bakı şəhərinin Qaradağ rayonundan yola salınan növbəti köç karvanı Laçın şəhərinə çatıb. Yeni köçürülən ailələrə mənzillərinin açarlarının təqdimat mərasimi keçirilib.
Mərasimdə Qaçqınların və Məcburi Köçkünlərin İşləri üzrə Dövlət Komitəsinin, Şərqi Zəngəzur İqtisadi rayonuna daxil olan Laçın rayonunda Azərbaycan Prezidentinin xüsusi nümayəndəliyinin və “Bakı Abadlıq Xidməti” MMC-nin nümayəndələri iştirak ediblər.
Köçürülən ailələr Laçın şəhərində vaxtilə yaşadıqları, işğala son qoyulduqdan sonra dövlətimizin başçısının göstərişi əsasında bərpa edilən və ya yenidən tikilən evlərdə məskunlaşacaqlar. Bu mərhələdə Laçın şəhərinə daha 10 ailə - 40 nəfər köçürülüb.
Bununla da Laçın şəhərində 325 ailə, yəni 1245 nəfərin daimi məskunlaşması təmin edilib.
14-11-2023, 16:18
Putin prezident seçkiləri haqqında qanuna dəyişikliyi təsdiq etdi
Rusiya lideri Vladimir Putin prezident seçkiləri haqqında qanuna dəyişiklikləri təsdiqləyib.
Sənəd rəsmi hüquqi informasiya portalında dərc olunub.
Sənəddə hərbi vəziyyət olduğu halda prezident seçkilərinin keçirilməsi prosedurunun dəyişdirilməsi nəzərdə tutulub.
Sənədə əsasən, Mərkəzi Seçki Komissiyasına (MSK) hərbi vəziyyətin qüvvədə olduğu regionlarda “Rusiya vətəndaşlarının həyatı və sağlamlığı üçün təhlükə yarandıqda” dövlət başçısının seçkisini təxirə salmaq hüququ verilir.
MSK həmçinin hərbi vəziyyət dövründə seçkilər üçün xüsusi prosedur tətbiq edə və səsvermə vaxtını qısalda bilər.
MSK Müdafiə Nazirliyi, Federal Təhlükəsizlik Xidməti və ərazisində hərbi vəziyyət tətbiq edilmiş subyektin rəhbəri ilə məsləhətləşdikdən sonra seçkilərin təxirə salınması və ya keçirilməsi barədə qərar qəbul etməlidir.
Bundan əlavə, Rusiya Federasiyasının hüdudlarından kənardakı seçki məntəqələrində səsvermənin başlama və bitmə vaxtları, əgər onlar "Rusiya Federasiyası vətəndaşlarının həyatı və sağlamlığı üçün təhlükə" olduğunu hesab etdikdə, səfirliyin və ya konsulluğun qərarı ilə dəyişdirilə bilər.
14-11-2023, 16:05
Yeni il üçün orta aylıq əmək haqqı artacaq
“Ötən 5 il ərzində ölkəmizin sosial müdafiə sistemi xeyli təkmilləşmiş və güclənib. Aparılan islahatlar nəticəsində 2018-2023-cü illər ərzində orta aylıq əmək haqqı 70%, minimum əmək haqqı 2,7 dəfə, minimum pensiya 2.5 dəfə, orta aylıq pensiya 2.1 dəfə, sosial müavinətlər və təqaüdlər üzrə xərclər 5 dəfə, median əmək haqqı 2.1 dəfə, əmək haqqı fondu 2.6 dəfə artmış, ehtiyac meyarı yaşayış minimumuna çatdırılıb. Müzakirənizə təqdim olunan 2024-cü il üzrə Dövlət Sosial Müdafiə Fondunun büdcəsi haqqında Qanun layihəsi də sosial ədalət və sosial rifah prinsiplərinə xidmət edən ali niyyəti rəhbər tutaraq tərtib edilib.
Fondun 2024-cü il üçün gəlirləri və xərcləri bərabər olmaqla 6 milyard 919,9 milyon manat proqnozlaşdırılır. Bu cari ilin büdcəsinə nisbətən 651,9 milyon manat və ya 10,4% çoxdur”.
Bunu Əmək və sosial siyasət komitəsinin sədri Musa Quliyev “Dövlət Sosial Müdafiə Fondunun 2024-cü il üzrə büdcəsi haqqında” qanun layihəsinin müzakirəsi zamanı deyib.
“Fondun gəlirlərinin 5 mlrd. 288,1 milyon manatının, yaxud 76,4%-nin məcburi dövlət sosial sığorta haqları üzrə daxilolmalar hesabına formalaşması nəzərdə tutulur.
Məcburi dövlət sosial sığorta haqları üzrə daxilolmaların 64,0%-i qeyri-büdcə sektorunun, 36,0%-i isə büdcədən maliyyələşən təşkilatların hesabına təmin ediləcəkdir.
Orta aylıq əmək haqqının cari ilin sonuna 930 manat təşkil edəcəyi proqnozlaşdırılır ki, bu da gələn ildə pensiyaların orta hesabla 11% artırılmasını təmin etməyə imkan yaradacaqdır. 2024-cü ildə Fondun büdcəsinin balanslaşdırılması məqsədi ilə dövlət büdcəsinin öhdəliklərinin maliyyələşdirilməsi üçün dövlət büdcəsindən ayrılan vəsait 1 milyard 392 milyon manat proqnozlaşdırılır ki, bu da 2023-cü il üzrə təsdiqlənmiş transfert məbləğindən 75,8 milyon manat və ya 5,2% azdır”,- komitə sədri bildirib.
14-11-2023, 15:53
İrəvan qlobal problemlərin həlli üçün Londonla əlaqə saxlamağa hazırdır
Ermənistanın xarici işlər naziri Ararat Mirzoyan İrəvanın Böyük Britaniya ilə hərtərəfli və genişləndirilmiş tərəfdaşlıq sazişi imzalamaq niyyətini açıqlayıb.
Bu barədə "Sputnik Armenia" məlumat yayıb.
Ermənistan XİN rəhbəri Londonda keçirilən qəbulda bildirib ki, bu, münasibətləri yeni səviyyəyə qaldıracaq.
"Ölkələr artıq siyasi və iqtisadi əməkdaşlığın möhkəmlənməsinə nail olub, strateji dialoq qurublar. İrəvan qlobal problemlərin həlli və ümumi maraqların təşviqi üçün Londonla əlaqə saxlamağa hazırdır", - Mirzoyan belə deyib.
14-11-2023, 15:41
Fransa ilə əməkdaşlığımız davam edəcək - Arman Yeqoyan
"Heç bir razılaşma və ya bəyanatla Ermənistan heç bir dövlətə ekstraterritorial dəhliz verməyə borclu deyil".
Bunu Ermənistan parlamentinin Avrointeqrasiya üzrə daimi komissiyasının sədri Arman Yeqoyan jurnalistlərlə keçirdiyi brifinqdə deyib.
"Rusiyanın Federal Təhlükəsizlik Xidmətinin sərhədçilərinin yola nəzarət etməsinə gəlincə, mətni oxuyun. Fransa ilə əməkdaşlığımız davam edəcək və burada qeyri-qanuni heç bir şey yoxdur. İstənilən dövlətin öz ordusunu istədiyi kimi silahlandırmaq hüququ var", - deyə Yeqoyan söyləyib.
14-11-2023, 15:25
Əkin sahəsindən qəbir aşkarlandı
Ağdamda əkin sahəsində qəbir aşkarlanıb.
Rayonun Mirəşəlli kəndində kənd sakini Ceyhun Kərimovun əkin sahəsində traktorla şumlama işləri aparılarkən ərazidən böyük daş parçası çıxıb və əkin sahəsində məzara olduğu məlum olunub.
Ağdam rayonu icra başçısının Əhmədağalı kənd inzibati ərazi dairəsi üzrə nümayəndəsi Məhərrəm Əliyev bildirib ki, əraziyə hüquq mühavizə orqanları baxış keçirib.
Ehtimal olunur ki, aşkar olunan qəbir eramızdan əvvələ aid uzunluğu 1.90 metr eni 0.60 metr olan antiq qəbirdir.
14-11-2023, 15:13
İmtahandan keçməyən müəllimlər digər işlə təmin olundu
Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələrindən 141 müəllim təkrar sertifikatlaşdırma imtahanından müvafiq keçid balını toplaya bilməyib. Bu baxımdan onların əmək müqaviləsinə “Dövlət ümumi təhsil müəssisələrində işləyən təhsilverənlərin sertifikatlaşdırma Qaydası” və Azərbaycan Respublikasının Əmək Məcəlləsinin müvafiq bəndinə uyğun olaraq 4 sentyabr 2023-cü il tarixində xitam verilib.
İdarədən bildirilib ki, Elm və Təhsil Nazirliyinin müvafiq əmri ilə təkrar sertifikatlaşdırma prosesinin nəticəsinə əsasən, əmək müqaviləsi ləğv edilmiş təhsilverənlərlə işin təşkili məqsədilə BŞTİ-də komissiya yaradılıb. Komissiya 5 sentyabr 2023-cü il tarixində fəaliyyətə başlayıb və bu müddət ərzində təkrar sertifikatlaşdırmadan keçməyən müəllimlərlə görüş təşkil olunub, onların ailə tərkibi və sosial vəziyyəti barədə məlumatlar araşdırılıb. Hazırki dövrə kimi həmin şəxslərdən sosial baxımdan həssas qrupa aid 50 nəfər təhsil müəssisələrində digər vəzifələrdə işlə təmin edilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!