26-07-2024, 08:52
ŞƏHİD BACISININ ARZUSU…
18 iyul 1979- cu ildə Tovuz rayonunun Bayramlı kəndində anadan olan Yusifov Mehman Musa oğlu 1985-ci ildə elə həmin kəndin indiki Elşad Orucov adına tam orta məktəbində birinci sinfə daxil olub. 1996-cı ildə tam orta təhsilini başa vurduqdan sonra 1989-2000-ci illərdə Azərbaycan Respublikasının Silahlı Qüvvələrinin sıralarında həqiqi hərbi xidmətini yüksək nizam-intizamla başa vurub. 2002-ci ilin yanvar ayında Azərbaycan Respublikası Silahlı Qüvvələrinin "Gizirlik kursu"na daxil olub. Elə həmin vaxtdan etibarən XTQ-də xidmətə davam edib. O, əzmi və dəyanətilə öz üzərində çalışaraq saysız-hesabsız kurslar keçmiş lazımi bacarıq və biliklərə sahib olmağı bacarmışdır. Bir neçə dil bilirdi.
Vətən sevgisinin qüdsiyyəti onu yüksək amal və arzular uğurunda çalışmağa sövq edirdi. Mehman qeyri-adi bir insan, dəyərli qardaş, etibarlı dost, cəsur və qəhrəman vətənpərvər oğul, qayğıkeş ata idi. Böyük fədakarlıqlar və yüksək insani keyfiyyətlərinə və diqqətcilliyinə görə onu tanıyan dost-tanışları arasında "Dayı" ləqəbini qazanmışdır.
Ömrünün, həyatının yarıdan çoxunu vətənin müdafiəsinə həsr edən qardaşım Mehman Yusifov xidməti dövrü ərzində qüsursuz xidmətlərinə görə 5 medal və çoxsaylı Fəxri Fərmanlarla təltif olunub. O, 27 sentyabr 2020-ci ildə başlanan Vətən Müharibəsində Cəbrayılın azadlığı uğrunda gedən döyüşlərdə 5 oktyabr 2020-ci il tarixində şəhadətə ucalmışdır. XTQ-nin Baş giziri qardaşım Yusifov Mehman Musa oğlu şəhidliyindən sonra Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv olunması üzrə qarşıya qoyulmuş döyüş tapşırıqlarını yerinə yetirən zaman göstərdiyi qəhrəmanlıq və şücaət nümunəsinə görə Azərbaycan Respublikasının Prezidenti İlham Əliyevin 09.12.2020-ci il tarixli sərəncamına əsasən "Qarabağ" ordeni ilə təltif olunub. Şəhidimiz həmçinin "Vətən uğrunda" və "Cəbrayılın azad olunmasına görə" medalları ilə təltif edilib.
Ağrısı, acısı və itkisi böyük olsa da mənim üçün iftixarlı və qürurlu bir hissdir ki, vətənimizin azadlığı və bütövlüyü uğrunda canlarından keçərək qanları bahasına Azərbaycan tarixinin şanlı səhifəsinə QƏLƏBƏ İMZASI çəkənlərdən biri də mənəm canım- qardaşım Yusifov Mehman Musa oğludur. Qardaşım Yusifov Mehman Musa oğlunun simasında cəmi şəhidlərimizin müqəddəs ruhu qarşısında dərin hörmət və ehtiramla baş əyirəm. Ruhları şad olsun. Amin, İnşallah!
Qeyd edim ki, qardaşım Yusifov Mehman Musa oğlunun Məhəmməd və Süleyman adlı iki oğlu, Fatimə adlı bir qızı bizlərə əmanət qalıb. Onların simasında bütün şəhid övladlarına gözəl gələcək, sağlam və mənalı bərəkətli ömür diləyirəm. Hər birini əzəmətli və Uca Rəbbim qorusun. Amin!
Şərəfli ömür yolunu vətənə həsr etmiş yüksək "Qarabağ" ordenli XTQ-nin baş giziri şəhid Yusifov Mehman Musa oğlunun adının əbədiləşərək bir məktəbə verilməsi şəhidimizin əzizləri və yaxınları olaraq Dövlətimiz və millətimizdən ən böyük istək və arzumuzdur. Çünki vətən sevgisinin qüdsiyyətindən başı ərşə dayanan şəhid Yusifov Mehman qüsursuz xidmətləri ilə bu ada layiqdir. Onun müqəddəs adının bir elm ocağında əbədiyyən qalıb yaşaması bizlər üçün bu dünyada ən böyük təsəlli olar.
O, bu dünyadan 41 yaşında şərəf və ləyaqətlə köç eylədi. Bu gün həyatda olsaydı 45 yaşı tamam olardı. Özləri cavan qalıb yaşları hər il bir pillə qocalan qəhrəman oğulların hər birinin müqəddəs ruhlarına salam-salavatlar müqəddəs zikr və dualar bizlərdən Allah qatında ən gözəl hədiyyə olsun İnşallah!
MÖVLUDUN MÜBARƏK ŞƏHİDİM!
Yaralı köksümdə ey yanan şamım,
Ruhu aram edən, zikri-salamım.
Xisləti pak olan, gözəl məramım.
Ey cənnət sərvəri, cəsur igidim!
Mövludun mübarək olsun şəhidim!
Müqəddəs bir məqam, bayraq zirvəlim,
Ali eşqə sahib, vətən mürsəlim.
Allahın aşiqi, saf əqidəlim.
Ey cənnət sərvəri cəsur igidim!
Mövludun mübarək olsun şəhidim!
Gəlib ziyarətə vətən sevənlər,
Ruhunu yad edir qədir bilənlər.
Üzülüb, kövrəlib Mehman sevənlər...
Ey cənnət sərvəri, cəsur igidim!
Mövludun mübarək olsun şəhidim!
Müşk-ənbər ətirli, behişt bağısan,
Anamın köksündə həsrət dağısan.
Qürur, iftixarsan, həm də ağısan,
Ey cənnət sərvəri, cəsur igidim!
Mövludun mübarək olsun şəhidim!
Zəkiyyə adına qurbandı Mehman,
Gözyaşım lal axan ümmandı Mehman.
Qırx beş il ən gözəl dövrandı Mehman,
Ey cənnət sərvəri, cəsur igidim!
Mövludun mübarək olsun şəhidim!
Zəkiyyə MUSAQIZI
AJB üzvü
26-07-2024, 08:22
TƏBRİK EDİRİK!
Bu gün gözəl ziyalı, uzun illərdi ətraflarda onu tanıyan, yardımına ehtiyacı olan hər kəsə təmənnasız xidmət göstərən Elman həkimin doğum günüdür. Onu bu münasibətlə ailə üzvləri, iş yoldaşları, dostları, doğmaları təbrik edirlər. Sağlamlıq, uzun ömür və fəaliyyətində uğurlar arzulayırlar.
Biz də “Bütöv Azərbaycan” qəzetinin kollektivi olaraq qəzetimizin təəssübkeşi və redaksiyamızla daimi yaradıcılıq əməkdaşlığı edən qələm dostumuzu təbrik edir, ona yeni-yeni yaradıcılıq uğurları diləyirik. Bir də arzu edirik ki, şirin qələmindən süzülən maraqlı, bəzən duzlu-məzəli, bəzən də kəskin satiralarını redaksiyamızın poçtundan əskik etməsin.
Əziz oxucular, fürsətdən istifadə edib öz geniş dünyagörüşü, nümunəvi davranışı və ləyaqətilə hamının rəğbətini qazanmış dostumuzu sizlərlə də tanış etmək istədik:
Rüstəmov Elman Süleyman oğlu 26 iyul 1966- cı ildə Qərbi Azərbaycanın Zəngəzur mahalının Qafan rayonunun Aşağı Girətağ kəndində anadan olub. 1991-ci ildə Azərbaycan Dövlət Tibb Universitetini fərqlənmə diplomu ilə bitirib. 22 il Milli Orduda hərbi provizor kimi müxtəlif vəzifələrdə xidmət edib.
“Xoşbəxt günlərimin açı göz yaşları”, “Başkəsənlər”, “Anama məktub”, “Novruzda açılan atəş”, “Dürmək restoranı”, “Tanrı ürəklərdədir” və s. kitabların müəllifidir. E. Rüstəmovun hekayələri xarici ölkələrdə tərcümə olunaraq çap edilib. 2014-cü ildə “Qafqaz Media”-nın “Nurlu qələm” mükafatına layiq görülüb.
Hərbi Jurnalistlər Birliyinin tədbirlərinin təşkilində fəal iştirakına və göstərdiyi dəstəyə görə “Vətənoğlu” Fəxri Diplomu ilə təltif olunub.
Elman Rüstəmov doğrudan da əsl Vətənoğludur. Vətənoğlu, bir daha təbrik edirik!
25-07-2024, 23:09
Azərbaycanlı jurnalist Türkiyədə vəfat etdi
Türkiyədə yaşayan azərbaycanlı jurnalist Günel Cavadxan vəfat edib.
Bu barədə onun yaxınları sosial şəbəkədə paylaşım ediblər.
Onun hansı səbəbdən vəfat etdiyi qeyd edilməyib.
25-07-2024, 22:52
Bakıda 29 yaşlı oğlanı ürəyindən bıçaqladılar
Bakının Xəzər rayonunda dava zamanı 29 yaşlı oğlan ürəyindən bıçaqlanıb.
Hadisə Şüvəlan qəsəbəsində qeydə alınıb.
Belə ki, 1995-ci il təvəllüdlü Babayev Fərrux Ayaz oğlu tanımadığı şəxslə dava zamanı ürəyindən bıçaqlanıb.
Yaralı təcili 26 nömrəli Birləşmiş Şəhər Xəstəxanasına çatdırılıb.
Onun vəziyyəti ağır olduğu üçün F. Babayev Sabunçu Tibb Mərkəzinə göndərilib. Tibb Mərkəzinin həkimləri onu təxminən 2 saat müddətində əməliyyat edib.
Bundan sonra F. Babayev reanimasiya şöbəsinə yerləşdirilib. Hazırda onun vəziyyəti orta ağır kimi qiymətləndirilir.
Faktla bağlı Xəzər Rayon Polis İdarəsinin əməkdaşları araşdırma aparır.
25-07-2024, 18:16
Millimiz Ermənistanı məğlub etdi
Azərbaycanın 18 yaşadək qızlardan ibarət basketbol yığması Avropa çempionatının C divizionunun qrup mərhələsində sonuncu oyununa çıxıb.
Daha əvvəl yarımfinala vəsiqəni təmin edən Evren Alkayanın rəhbərlik etdiyi kollektiv Kosovonun paytaxtı Priştina şəhərində Ermənistanla üz-üzə gəlib. Görüş milli komandanın 68:42 hesablı qələbəsi ilə yekunlaşıb.
C divizionunda mübarizə aparan oğlanlardan ibarət komanda da Ermənistanla qarşılaşacaq. Matç bu gün Bakı vaxtı ilə saat 18:00-da start götürəcək. Anar Sarıyevin yetirmələri ilk oyunda Moldovaya (87:76) qalib gələrək yarımfinala vəsiqəni təmin ediblər.
25-07-2024, 17:48
Elçin Əfəndiyevin qızı da namizəd oldu
Sentyabrın 1-də Milli Məclisə növbədənkənar seçkilər keçiriləcək. Artıq bir çox siyasi partiya nümayəndələri, ayrı-ayrı şəxslər namizədliklərini açıqlayıb.
Namizədliyini təqdim edənlərdən biri də Beynəlxalq Türk Mədəniyyəti və İrsi Fondunun ilk prezidenti, diplomat Günay Əfəndiyevadır.
Məlumatı saytımıza açıqlamasında Günay Əfəndiyevanın atası, Azərbaycan baş nazirinin sabiq müavini, xalq yazıçısı Elçin Əfəndiyev təsdiq edib.
O, qızının 14 saylı Xəzər - Pirallahı seçki dairəsindən namizəd olduğunu bildirib. E.Əfəndiyev qeyd edib ki, Günay Əfəndiyevaya bu gün namizədlik vəsiqəsi təqdim edib.
Elçin Əfəndiyev müasir Azərbaycan ədəbiyyatının tanınmış nümayəndələrindən biri və eyni zamanda ictimai və dövlət xadimidir. 13 May 1943-cü ildə XX əsr Azərbayçan ədəbiyyatının böyük nümayəndələrindən biri, xalq yazıçısı İlyas Əfəndiyevin ailəsində anadan olub. "İstiqlal" ordenli yazıçı 1993–2018-ci illərdə Azərbaycan Respublikası Baş Nazirinin müavini vəzifəsində çalışıb.
Bakıda doğulan və uşaqlıqdan mədəniyyət və incəsənət mühitində böyüyən Günay Əfəndiyeva əvvəlcə Bülbül adına Musiqi məktəbini qızıl medalla bitirib. Daha sonra Azərbaycan Tibb İnstitutunun qırmızı diplomlu məzunu olub. Az bir müddətdə ixtisası üzrə işləyən G.Əfəndiyeva sonra Türkiyədə diplomatik fəaliyyətə başlayıb. Belə ki, o, 2004-cü ildə Azərbaycan Respublikasının İstanbuldakı konsulluğunda işə qəbul edilib və bununla da Günay Əfəndiyevanın diplomat karyerası başlayıb.
G.Əfəndiyeva 4 il (2004-2008) Azərbaycan Respublikasının İstanbuldakı konsulluğunda mədəniyyət məsələləri üzrə müşavir vəzifəsində çalışıb.
Daha sonra o diplomatik fəaliyyətini Azərbaycanda davam etdirib. Belə ki, o, İstanbuldakı faəliyyətini başa vurub Bakıya qayıdandan sonra YUNESKO üzrə Azərbaycan Milli Komissiyasının birinci katibi vəzifəsinə təyin olunub. O, 2022-ci ilədək Beynəlxalq Türk Mədəniyyəti və İrsi Fondunun prezidenti olub.
Xatırladaq ki, hakim Yeni Azərbaycan Partiyası 14 saylı Xəzər-Pirallahı seçki dairəsindən Rəsulova Vüsalə Elman qızının namizədliyini irəli sürüb. O, 149 nömrəli məktəbin təlim-tərbiyə işləri üzrə direktor müavinidir.
25-07-2024, 17:20
"MTV Azərbaycan"a icraçı direktor əvəzi təyin edildi
"MTV Azərbaycan" telekanalına icraçı direktor əvəzi təyin edilib.
Bu vəzifəyə Fariz Əliyev təyin edilib.
İcraçı direktorun səlahiyyətlərini icra edən Fariz Əliyev yeni vəzifəsində artıq işə başlayıb.
25-07-2024, 17:13
Müdafiə Nazirliyindən Ermənistanın havadarlarına xəbərdarlıq
Azərbaycan Respublikasının Müdafiə Nazirliyi bəyanat yayıb. Bəyanatda deyilir:
"Azərbaycan Respublikasının Müdafiə Nazirliyi son günlərdə Ermənistanın Kəlbəcər istiqamətində ağır silahlar və Tovuz istiqamətində kvadrokopter tətbiq etməklə təxribatlar törətməsi barədə məlumatlar vermişdir.
Qeyd edək ki, Ermənistan tərəfindən bu kimi təxribatların törədilməsi birinci hal deyildir və davamlı xarakter daşıyır. Amerika Birləşmiş Ştatlarının Ermənistanda keçirdiyi hərbi təlimlər, Fransanın Ermənistanı öldürücü silahlarla təchiz etməsi və Avropa İttifaqı tərəfindən "Avropa Sülh Fondu" adı altında Ermənistana ilkin mərhələdə on milyon avro dəyərində hərbi yardımın göstərilməsi işğalçı Ermənistanı bu kimi təxribatlar törətməyə həvəsləndirir və Azərbaycana qarşı növbəti müharibəyə hazırlaşdırılmasına dəlalət edir.
Müdafiə Nazirliyi bir daha xəbərdarlıq edir ki, Ermənistan və onun havadarları Cənubi Qafqaz regionunda yeni müharibə ocağı yaratmaq kimi niyyətlərindən çəkinməlidirlər. Ölkəmizə qarşı bu kimi təxribat əməlləri dayandırılmadığı təqdirdə, Azərbaycan Respublikası Silahlı Qüvvələrinin arsenalında olan bütün vasitələrdən istifadə etməklə özünü müdafiə məqsədilə lazımi cavab tədbirləri görüləcəkdir.
Bildiririk ki, regionda vəziyyətin gərginləşməsinə görə bütün məsuliyyət Ermənistanın hərbi-siyasi rəhbərliyinin və onun havadarlarının üzərinə düşəcəkdir".
25-07-2024, 16:52
Bakının 8 Noyabr prospektinin bir hissəsi təmirə bağlanır
Sabah saat 00:00-dan iyulun 30-u saat 00:00-a qədər Bakının 8 Noyabr prospektində (Sadıqcan küçəsindən Zığ dairəsinə qədər) aparılacaq təmir işləri ilə əlaqədar avtonəqliyyat vasitələrinin hərəkəti tam məhdudlaşdırılacaq.
Bu barədə Azərbaycan Avtomobil Yolları Dövlət Agentliyinə istinadən xəbər verir.
"Sürücülərdən aparılan işlərə anlayışla yanaşmaları, qeyd olunan müddət ərzində hərəkət istiqamətlərinə uyğun alternativ yollardan istifadə etmələri xahiş olunur", - deyə məlumatda qeyd olunub.
25-07-2024, 16:49
Yenidən qurulan Kəlbəcərdən ən son görüntülər - VİDEO
Yenidən qurulan Kəlbəcərdə artıq 201 mənzilin tikintisinə start verilib.
Bu barədə AzTV görüntülər paylaşıb.
İnşa prosesi həyata keçirilən unikal proyekt haqqında layihənin rəhbəri prosesin gedişatı barədə məlumat verib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!