Özbəkistan Xarici İşlər Nazirliyinin dəstəyi və Kulinariya Assosiasiyasının təşkilatçılığı ilə Daşkənd vilayətinin Bostanlıq rayonunda "Mənim sevimli özbək mətbəxim" adlı festival keçirilib. Festivalda Qazaxıstanla yanaşı, Rusiya, İndoneziya, Çin, Azərbaycan, ABŞ və s. ölkələr öz guşələrini təqdim ediblər.

Butov.az xəbər verir ki, Mədəniyyət və Turizm Nazirliyindən AZƏRTAC-a bildirilib ki, tədbirdə iştirakçı ölkələr öz mətbəxləri, şirniyyatları ilə yanaşı, bir özbək yeməyi hazırlayıb və bu yemək münsiflər heyəti tərəfindən qiymətləndirilib.

Özbəkistanın xarici işlər nazirinin müavini Abduraxim Xocayev tədbirin ölkəsinin müstəqilliyinin əldə etməsinin 25 illiyinə həsr edildiyini söyləyib. Bildirib ki, əsas məqsəd Özbəkistanın milli mətbəxinin təbliğ edilməsidir. O, tədbirdə iştirakçı ölkələrin öz mətbəxlərini nümayiş etdirmək üçün əlavə imkan qazandıqlarını söyləyib.

Bu ölkədəki səfirliyimiz və onun nəzdindəki Heydər Əliyev adına Mədəniyyət Mərkəzi festivalda Azərbaycan guşəsini təqdim edib və guşə iştirakçıların marağına səbəb olub. Guşədə milli mətbəximizi özündə əks etdirən özbək dilində çap edilən "Azərbaycanın mədəni irsi" kitabı təqdim olunub və iştirakçılara paylanılıb.

İştirakçılar Azərbaycan milli mətbəximizə aid dolma, çığırtma, kükü, habelə şəkərbura, paxlava və s. şirniyyatlara qonaq ediliblər. Milli stendimizdə özbək milli mətbəxinə aid "Gülxanım" yeməyi hazırlanıb. Azərbaycan təmsilçiləri tərəfindən hazırlanan özbək yeməyi iştirakçıların böyük marağına səbəb olub.

Festivalın sonunda mükafatlandırma mərasimi keçirilib. Mərasimdə Rusiya, Azərbaycan, İndoneziya səfirliklərinin nəticələri yüksək qiymətləndirilib və birinci mükafata layiq görülüb. Mükafat Azərbaycanın Özbəkistandakı səfiri Hüseyn Quliyevə təqdim edilib.

Festivalda Azərbaycan səfirliyinin nəzdindəki Heydər Əliyev adına Mədəniyyət Mərkəzinin "Azərbaycan qızları" rəqs ansamblının çıxışı maraqla qarşılanıb.