Prezident İlham Əliyev Azərbaycan Respublikasının ərazi bütövlüyü uğrunda döyüş əməliyyatlarında iştirak etmiş şəxslərə “Müharibə veteranı” adının verilməsi ilə bağlı tədbirlər haqqında sərəncam imzalayıb.

Bununla bağlı Prezident.az məlumat yayıb.

Sərəncama əsasən, 2020-ci il sentyabrın 27-dən noyabrın 10-dək olan dövrdə Azərbaycan Respublikasının ərazi bütövlüyü uğrunda döyüş əməliyyatlarında iştirak etmiş şəxslərə “Veteranlar haqqında” Azərbaycan Respublikasının Qanunu ilə nəzərdə tutulmuş qaydada Azərbaycan Respublikası Nazirlər Kabinetinin müəyyən etdiyi kateqoriyalar əsasında 2022-ci il yanvarın 1-dən etibarən “Müharibə veteranı” adının və “Azərbaycan Respublikasının müharibə veteranı” vəsiqəsinin verilməsi, habelə Azərbaycan Respublikası Prezidentinin 2019-cu il 15 aprel tarixli 641 nömrəli Fərmanına uyğun olaraq “Müharibə veteranlarına Azərbaycan Respublikası Prezidentinin təqaüdü”nün təyin edilməsi və ödənilməsi təmin ediləcək.

Bütöv.az

Prezident İlham Əliyev Aztəminatlı ailələrə birdəfəlik maddi yardım verilməsi haqqında sərəncam imzalayıb.

Bununla bağlı Prezident.az məlumat yayıb.

Sərəncama əsasən, 2021-ci il 30 dekabr tarixinə ünvanlı dövlət sosial yardımı alan ailələrin hər birinə 100 manat məbləğində birdəfəlik maddi yardım veriləcək.

“Azərbaycan Respublikasının 2021-ci il dövlət büdcəsi haqqında” Azərbaycan Respublikası Qanununun tətbiqi ilə bağlı bir sıra məsələlər barədə” Azərbaycan Respublikası Prezidentinin 2020-ci il 30 dekabr tarixli 1241 nömrəli Fərmanının 1.6.1.1-ci yarımbəndində Azərbaycan Respublikasının Əmək və Əhalinin Sosial Müdafiəsi Nazirliyi üçün nəzərdə tutulmuş vəsaitdən 4 800 000 manat ayrılır.

Bütöv.az

Mədəniyyət Nazirliyinin Aparat rəhbəri Vasif Eyvazzadə işdən çıxıb.

Bütöv.az xəbər verir ki, o, bu barədə feysbuk səhifəsində məlumat paylaşıb:
"Azərbaycan Yaradıcı Sənayelər Federasiyasının rəhbəri olaraq komandamızla birlikdə ölkəmizdə yaradıcılıq, innovasiya və texnologiyaların uzlaşdığı bir sahənin-yaradıcı sənayelərin real inkişafına, həmçinin ölkəmizin yumşaq güc siyasətinin beynəlxalq müstəvidə həyata keçməsinə müxtəlif platformalar vasitəsilə dəstək olmağa davam edəcəyik".

Qeyd edək ki, o bu vəzifəyə 2020-ci ilin avqustunda təyin edilmişdi.

Bütöv.az

2021-ci il artıq başa çatmaq üzrədir.

Modern.az-ın məlumatına görə, Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili ilin əsas makro-iqtisadi yekunları barədə fikirlərini bölüşüb:

- 2020-ci ildəki - 4.3%-lik ÜDM-in azalmasını dayandırıraq, 2021-ci ildə ÜDM-in 5.5%-dən çox artmasına nail olundu;

- Qarabağ və Şərqi Zəngəzur iqtisadi rayonlarında sürətli bərpa-quruculuq işlərinə başlanıldı. Füzuli Beynəlxalq Aeroportu, Şuşaya aparan Zəfər Yolu istifadəyə verildi;

- Gorus-Qafan yolunda ilk Yanacaq Doldurma Stansiyası istifadəyə verildi;

- Qeyri-neft ÜDM-nin 6.5%-dən çox artmasına nail olundu;

- Qeyri-neft sənayesində artım 20%-i keçdi;

- Strateji valyuta ehtiyatları 53 mlrd dolları keçdi;

- Avropa Bazarlarına ilk dəfə 7 mlrd m3-dan çox qaz ixrac edildi;

- Qeyri-neft ixracımız 44%-dən çox artdı;

- İxrac idxalı 10 mlrd dollardan çox üstələdi;

- Tədiyyə balansının cari əməliyyatlar balansının profisiti 4 mlrd dollara yaxın oldu;

- Əhalinin banklardakı əmanəti 12%-dən çox artaraq 9 mlrd manatı keçdi;

- Minimum əmək haqqı, maaşlar, təqaüdlər orta hesabla 20-40% artırıldı (01 yanvar 2022-ci ildən);

- 2021-ci ilin Dövlət Büdcəsi proqnozdan artıq gəlirlərlə icra edildi;

- Manatın məzənnəsi sabit olaraq qorunub saxlanıldı.

Komitə sədri 2022-ci il üçün isə əsas iqtisadi hədəflər kimi aşağıdakıları qeyd edib:

- ÜDM-in daha 4%-ə qədər artırılması;

- Qarabağ və Şərqi Zəngəzur iqtisadi rayonlarda bərpa və quruculuq işlərini sürətlə davam etdirmək;

- Şərqi-Zəngəzurda ilk yaşayış məntəqəsini istifadəyə vermək;

- Orta illik inflyasiyanın 4%-ə qədər təşkil etməsinə nail olmaq;

- Qeyri-neft sektorunun payının artırılması, qeyri-neft ixracının daha da artırılması;

- Avropa bazarlarına 9 mlrd m3 qaz ixrac etmək;

- Əhalini maddi rifah halının artması üçün əlavə tədbirlər görmək;

- Ələt Azad İqtisadi Zonasının fəaliyyətə başlaması;

- Makro iqtisadi sabitliyi qorumaq;

- İqtisadi islahatları davam etdirmək, sahibkarlığı inkişaf etdirmək;

- Xarici investisiyaların daha çox cəlb olunmasına çalışmaq;

Mövcud iqtisadi resurslarımız, regionda baş verən yeni reallıqlar, dövlət başçısının güclü iradəsi hesabına indiyə kimi olduğu kimi, növbəti ildə də iqtisadi hədəflərimizə çatmaq əzmindəyik".

Bütöv.az

Bütöv.az xəbər verir ki, "Hürriyyət"in redaksiyasına Cəlilabad təhsil işçiləri adından anonim məktub daxil olub. Məktubda qeyd edilir ki, Cəlilabada yeni təyin edilmiş icra başçısı Rafiq Cəlilov məktəblərdə Prezidentə həsr olunmuş kitab və qəzeti məcburi qaydada satdırır. Daha sonra məktubda ölkə başçısının adından istifadə edilərək direktorlardan və müllimlərdən pul yığılması faktı qeyd olunur:

"Cənab prezident, Cəlilabada yeni təyin etmiş olduğunuz icra başçısı Rafiq Cəlilov məktəblərdə sizin kitabınızı və qəzet pulu yığması barəsində xəbəriniz varmı ? Xəbəriniz varmı sizin adınızdan istifadə edilərək direktorlara , direktorlar isə müəllimlərdən pul yığırlar. Rafiq Cəlilov təyin olunduğu ilk gündən məktəblərə pulla direktor müavini təyin etməyindən necə xəbəriniz varmı? Yoxdursa bu barədə sizə məlumat veririk. İnsanlar artıq keçmiş icra başçısının sizi dediyiniz kimi korrupsiya ilə həbs edildiyinə görə deyil, Kərəmin haqq-hesabın vermədiyinə görə tutulduğunu deyir. Cənab prezident xalqın içərisində sizin sözünüzün çəkisini azaldan Rafiq Cəlilov kimi məmurlar haqqında ölçü götürməsəniz, sizin sözünüzə heç kim etimad etməyəcək".

QEYD: Yazıda qeyd edilənlərlə bağlı redaksiya heç bir məsuliyyət daşımır. Bununla yanaşı qarşı tərəfin fikirlərini də dərc etməyə hazırıq.

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə yeni rəisi təyinatı olub. Prezident İlham Əliyevin imzaladığı sərəncamla bu posta Məmməd Aslan oğlu Abbasbəyli təyin olunub. M.Abbasbəyli bu təyinatadək Antiinhisar və İstehlak Bazarına Nəzarət Dövlət Xidmətinin rəis müavini vəzifəsində işləyib.

Qeyd edək ki, Məmməd Abbasbəyli Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyinin İdarə Heyətinin sədri Mustafa Abbasbəylinin qardaşıdır. Bununla da Azərbaycanda yüksək vəzifə daşıyan məmur qardaşların sayı artıb.
Hokm.az mövzunun aktuallığını nəzərə alaraq, dövlət idarəçiliyində mühüm postlar tutan məmur qardaşlarla bağlı araşdırma aparıb.
Başlayaq elə Abbasbəyli qardaşlarından. Dövlət Məşğulluq Agentliyinin sədri Mustafa Abbasbəyli 2004-cü ildə karyera yolunu sığorta sektorundan salıb və “Standard Insurance” sığorta şirkətində baş hüquqşünas kimi əmək fəaliyyətinə başlayıb. Bu şirkətin Departament rəhbəri, İdarə Heyətinin üzvü və sədr müavini vəzifələrini tutub. Ardınca “Toyota Baku” və “Beyli Group” şirkətlərinin baş direktoru, Azərbaycan Sığortaçılar Assosiasiyasının sədri vəzifələrində çalışıb. Son təyinata qədər isə Əmək və əhalinin sosial müdafiəsi nazirinin müşaviri işləyib.
Məmməd Abbasbəyli isə ABŞ-nın Corc Vaşinqton Universitetini bitirib. Əmək fəaliyyətinə 2000-ci ildə ABŞ-nın Nyu-York şəhərində yerləşən “Salans Hertzfeld & Heilbronn” hüquq şirkətində başlayıb, daha sonra firmanın Bakı ofisində işini davam etdirib. 2004-cü ildən “Azpetrol International Holdings B.V.”də, “EUPEC Pipe-Coatings LLC” və “BP Group” kimi bir sıra iri xarici sənaye və investisiya korporasiyalarında hüquqşünas, hüquq bölməsinin rəhbəri və baş menecer vəzifələrini tutub. Azərbaycan Alpinizm Federasiyasının prezidenti, İqtisadiyyat nazirinin müşaviri, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəis müavini olub. Eyni zamanda, Sahibkarlığın İnkişafı Fondunun Müşahidə Şurasının üzvüdür.
Ölkəmizin aparıcı holdinqlərindən olan “PASHA Holding”in baş icraçı direktoru Cəlal Qasımovun qardaşı Balakişi Qasımov İctimai Televiziyanın baş direktorudur. Qardaşların xalası oğlu isə İqtisadiyyat naziri Mikayıl Cabbarovdur. Cəlal Qasımov İngiltərədə “Warwick Business School”da MBA proqramı üzrə məzun olub. “Azpetrol” şirkətində Vergi planlaşdırılması və büdcə nəzarəti departamentinin direktoru, maliyyə direktoru və Direktorlar Şurasının sədr müavini, “Bank of Baku”da İdarə Heyəti Sədrinin müşaviri və İdarə Heyətinin sədri, “Unibank”da icraçı direktor, “PASHA Holding”də Baş icraçı direktorun müavini, Bankinq Qrupun (Banking Group) rəhbəri vəzifələrində çalışıb. Balakişi Qasımov isə “Nə? Harada? Nə zaman?” elitar klubunun oyunçusu, Azərbaycanda “Nə? Harada? Nə zaman?” oyununun aparıcısı və baş prodüsseri, GameTV.az prodüser mərkəzinin rəhbəri, eyni zamanda Breyn rinq üzrə Azərbaycan çempionu, Anar Əzimovun komandasında üç dəfə Cənubi Qafqaz çempionu olub.

Prezidentin köməkçisi, Prezident Administrasiyasının Hərbi məsələlər şöbəsinin müdiri Məhərrəm Əliyevin qardaşı Adil Əliyev Milli Məclisin sədr müavini və Parlamentin Gənclər və idman komitəsinin sədridir. Məhərrəm Əliyev paytaxtın Nizami, Sabunçu, Xətai, Səbail rayon Polis İdarələrində rəhbər vəzifələrdə çalışıb. 14 il Bakı Şəhər Baş Polis İdarəsinin rəisi olub. Son təyinata qədər isə Azərbaycanın Tacikistanda səfiri, Prezidentin Müdafiə məsələləri üzrə köməkçisi xidmətinin Müdafiə məsələləri şöbəsinin müdiri, Ədliyyə nazirinin müavini postlarını tutub. Adil Əliyev isə əmək fəaliyyətində polis sistemində başlasa da, polkovnik-leytenant rütbəsində təqaüdə çıxıb. 2005-ci ildən Milli Məclisin üzvü və Azərbaycan Kikboksinq Federasiyasının prezidenti olub. Hazırda bu federasiyanın fəxri rəhbəridir.
Xarici İşlər naziri Ceyhun Bayramovun qardaşı Azər Bayramov Maliyyə nazirinin müavinidir. Ceyhun Bayramov “Omni” hüquq şirkətinin rəhbəri, Təhsil Nazirliyi aparatının rəhbəri, Təhsil nazirinin müavini və Təhsil naziri vəzifələrində çalışıb. Azər Bayramov isə Baş Dövlət Vergi Müfəttişliyinin “Beynəlxalq vergiqoyma”, “İri vergi ödəyiciləri ilə iş üzrə” idarələrinin rəisi olub. Maliyyə Nazirliyinin “Vergi Siyasəti və Gəlirlər” Baş İdarəsinin rəisi postlarını tutub.
Prezidentin köməkçisi, Prezident Administrasiyasının Dövlət nəzarəti şöbəsinin müdiri Kərəm Həsənovun qardaşı Malik Həsənov Milli Məclisin deputatıdır. Kərəm Həsənov uzun müddət Əmlak məsələləri Dövlət Komitəsinin sədri işləyib. Malik Həsənov isə üçüncü çağırışdır Cəlilabad seçicilərini ali qanunverici orqanda təmsil edir. Uzun müddət bizneslə məşğul olub. “Azinko Holdinq”in təsisçisi və direktoru olub. Bu gün də qeyri-rəsmi sahibkarlıq fəaliyyəti ilə məşğul olduğu iddia edilir.
Qafqaz Müsəlmanları İdarəsinin sədri, Şeyxülislam Hacı Allahşükür Paşazadənin qardaşı Cavanşir Paşazadə Milli Məclisin deputatıdır. SSRİ xalq deputatı, daha sonra Azərbaycanın millət vəkili olan Şeyx 42 ildə yaxındır ki, Qafqazın dini lideridir. Cavanşir Paşazadə isə uzun müddətdir Milli Məclisin üzvüdür. Hazırda Parlamentin İctimai birliklər və dini qurumlar və Aqrar siyasət komitələrinin üzvüdür.(Hokm.az)

Bütöv.az

“2021-ci ildə Dövlət Sosial Müdafiəsi Fondunun gəlirləri 5 milyard 152 milyon manat həcmində gözlənilir”.

Bütöv.az-ın məlumatına görə, bunu Dövlət Sosial Müdafiə Fondunun sədri Himalay Məmişov “2021-ci ilin yekunlarına dair” mətbuat konfransında deyib.
O bildirib ki, bu 2020-ci ilin gəlirləri ilə müqayisədə 8,5 faiz çoxdur: “Məcburi Dövlət Sosial Sığorta (MDSS) haqları 3 milyard 810 milyon manat gözlənilir ki, bu, 2020-ci illə müqayisədə 7,2 faiz çoxdur”.

H.Məmişov qeyd edib ki, büdcə təşkilatları üzrə daxilolmaların 1 milyard 380 milyon manat, qeyri-büdcə təşkilatları üzrə daxilolmaların isə 2 milyard 430 milyon manat olması gözlənilir.

“Bu il dövlət büdcəsindən transfertin həcmi 1 milyard 313, 3 milyon manat təşkil edir”, - deyə o qeyd edib.

Fond sədri həm də DSMF-nin xərcləri barədə suallara da cavab verib:

“Dövlət Sosial Müdafiə Fondunun 2021-ci il üzrə gözlənilən xərcləri 4 milyard 841 milyon manatdır ki, bu da ötən dövrlə müqayisədə 2,8 faiz çoxdur”.

Onun sözlərinə görə, 2022-ci il DSMF-nin xərclər üzrə proqnozu 5 milyard 307 milyon manat olacaq:

“Bu il əhaliyə ödənişlər 4 milyard 716 milyon manat olub ki, bunun 4 milyard 591 milyon manatı əmək pensiyaları, 125 milyon manatı MDSS üzrə müavinət, 125 milyon manatı digər xərclər üzrə olub. Fondun gələn ilə əhaliyə ödənişlər üzrə proqnozlaşdırılan xərcləri 5 milyard manatdır”.

Dekabrın 27-də Azərbaycan parlamenti “Telekommunikasiya haqqında” Qanuna düzəlişi qəbul edib. Düzəliş virtual məkanda lotereya və idman mərc saytlarına girişi qadağan edir. Qanuna edilən düzəlişə əsasən, internet provayderləri və rabitə operatorları telekommunikasiya xidmətləri vasitəsilə azart oyunların təşkilinin və keçirilməsinin qarşısını almalıdırlar. Buraya azart oyunların təşkili və ya bilet satışı, azart oyunlarda iştirak, o cümlədən xarici lotereya təşkilatçılarına və idman mərc oyunlarının operatorlarına ölkədə virtual mühitə çıxış daxildir.

Ölkə əhalisinin böyük əksəriyyətinin heç bir məlumatı olmadığı virtual qumar oyunlarına girişin qadağan edilməsinin ciddi səbəbləri var. Belə ki, son illər bəzi məmurlar və varlı övladlarının ciddi maraq göstərdiyi bu oyunlarda xeyli pul uduzanlar var.

İddialara görə, bu gün də bəzi tanınan vəzifə sahibləri qumar və mərc oyunlarına ciddi maraq göstərirlər. Onların külli miqdarda pul uduzduqları hakimiyyətə də bəlli olub. Eləcə də varlı övladları internet üzərindəki qumar oyunlarında xeyli pul uduzublar. Sosial şəbəkələrdə və müxtəlif internet portallarında qanunsuz mərc oyunlarının geniş təbliğatı gedir.

Bəxt çarxını fırlatmaq tələsinə internetdəki “Milyonçu olmaq istəyirsən?” “İndi qeydiyyatdan keç, varlan”, “Oyna və qazan” kimi təşviqedici reklamlar üzərindən düşmək su içmək qədər asandır. İnternetdə “1xBet”, “MotsBet”, “Vulkanbet”, “22bet”, “PinUpbet” oyunlarının reklamları yetərincədir. İstifadəçi bu platformalara pul köçürərək, mərc etməyə başlayır. Qalanı isə texniki məsələdir. Pullar xaricdəki hesablara gedir və azart həvəskarı çox vaxt da udmuş olsa belə, hesabında olan pula sahib çıxa bilmir. Təhlükəsizlik məsələləri ilə əlaqəli hesabdan pul çıxarılması bloklanır. Belə saytların internetdə geniş yayılmasının da səbəbi sadədir. Dünyanın dörd bir tərəfindən axan pullar hesabına geniş reklam kampaniyası aparılır, aylıq reklam müqabilində səhifələrə müəyyən məbləğdə pul ödənilir.

Azərbaycanda qumarxana-kazino biznesi 1998-ci ildən rəsmi şəkildə qadağan olunub. O zamandan sonra ölkədə ara-sıra kazinoların “səsi” eşidilirdi, hüquq-mühafizə orqanları əməliyyat keçirib belə oyunları təşkil edənləri ifşa edirdilər. 2011-ci ildə isə ölkədə ilk və yeganə qanuni idman mərc oyunu “ToPaz” fəaliyyətə başlayıb. “Caspian Tech” QSC-nin ticarət nişanı olan “ToPaz” portalı dövlət təminatlıdır və qanuni hesab olunur. Digər bütün mərc və onlayn platformalardakı oyunlar isə qanundankənardır. Bu gün Azərbaycanda qumar oyunlarında külli miqdarda pul itirənlərin sayı kifayət qədərdir.

Bir neçə gün əvvəl Milli Məclisdə “Turizm haqqında” yeni hazırlanan qanun layihəsinin müzakirəsi zamanı parlamentin Hüquq siyasəti və dövlət quruculuğu komitəsinin sədr müavini Qüdrət Həsənquliyev təklif edib ki, kazinoların Azərbaycanda açılmasına icazə verilsin. Sitat: “Rusiyada bu, müəyyən əraziləri əhatə edir. Azərbaycanda da belə edə bilərik. Məsələn, Qarabağda, Zəngəzurda kazinoların açılmasına icazə verə, bununla da turist cəlb edə bilərik. Digər tərəfdən, Nargin adasında buna icazə verə bilərik. Turist axınını cəlb etmək üçün xidmət sahəsində fəaliyyətlər təkmilləşdirilməlidir”.

Qüdrət Həsənquliyevin bu təklifini süngü ilə qarşılayanlar çoxluqdadır. Deputatın bu təklifindən 1 həftə sonra Azərbaycan parlamentində “Telekommunikasiya haqqında” Qanuna düzəliş edildi. Bəs bu düzəliş nəyi dəyişəcək?

Ümumiyyətlə, qumarxanalar ləğv edilməlidir, yoxsa müəyyən şərtlər daxilində belə oyunlara icazə verilməlidir?

Azərbaycan İnternet Formunun prezidenti Osman Gündüz bu barədə mətbuata açıqlamasında bildirib ki, qanunvericiliyə görə, ölkədə bu tip fəaliyyətlər qadağandır: “Kimlərsə onlayn mühitdə qumar, mərc, müxtəlif kazino oyunları ilə bağlı reklam yayır və təbliğat aparır. İstər onlayn, istərsə də oflayn mühitdə belə hərəkətlər qanunvericiliyə ziddir. Burada cinayət məsuliyyəti yaradan məqamlar var. Xüsusən internet azyaşlılar üçün əlçatan olduğuna görə belə oyunların reklamı daha ciddi məsuliyyət yaradır”.

Osman Gündüz qeyd edib ki, bu məsələ Azərbaycanda bir sıra aidiyyəti qurumlar tərəfindən nəzarətə götürülməlidir: “Azərbaycan Reklamçılar İttifaqı, Daxili İşlər Nazirliyi, Rəqəmsal İnkişaf və Nəqliyyat Nazirliyi, Dövlət Təhlükəsizliyi Xidməti, eləcə də Ailə, Qadın və Uşaq Problemləri üzrə Dövlət Komitəsi monitorinqlər aparmalıdırlar. Xüsusilə Rəqəmsal İnkişaf və Nəqliyyat Nazirliyi monitorinq aparıb nəticəni bəlli qurumlara təqdim etməlidir ki, Azərbaycan qanunvericiliyi ilə belə fəaliyyətlərin qarşısı alınsın. Bu fəaliyyət gizli deyil və aşkar formada aparılır. Hesab edirəm ki, aidiyyəti orqanlar bu cür onlayn oyunların, eləcə də reklamların fərqindədirlər”.

DİA.AZ-ın məlumatına görə, “Bakı” Hüquq Şirkətinin rəhbəri Natiq Ələsgərov “Yeni Müsavat”a deyib ki, Prezidentin 25 oktyabr 2016-cı il tarixli, 1086 saylı fərmanının icrası ilə bağlı mütəmadi olaraq monitorinqlər aparılır: “Bildiyim qədər bu monitorinqləri Daxili İşlər Nazirliyi aparır və Azərbaycanda akkreditasiya olunmadan idman mərc oyunlarını təşkil edən şəxslər ətrafında tədbirlər həyata keçirilir. İnternet şəbəkəsində akkreditasiya olunmadan idman mərc oyunlarını təşkil edən şəxslər müəyyən edildikdə barələrində Cinayət Məcəlləsinin Lotereyaların və idman mərc oyunlarının təşkili və ya keçirilməsi qaydalarının pozulması maddəsi ilə cinayət işi başlanır. Bu maddənin 1.2-ci bəndinə əsasən, qanunla müəyyən edilmiş qaydada akkreditasiya olunmadan idman mərc oyunlarının təşkili və ya keçirilməsi fiziki və ya hüquqi şəxslərə, yaxud dövlətə xeyli miqdarda ziyan vurduqda, habelə xeyli miqdarda gəlir əldə etməklə törədilirsə, məsuliyyətə cəlb olunmuş şəxs cinayət nəticəsində vurulmuş ziyanın (əldə edilmiş gəlirin) 3 misli miqdarında cərimə və ya 1 ildən 5 ilədək müddətə azadlıqdan məhrum etmə ilə cəzalandırılır”.

Hüquqşünas deyir ki, internet üzərindən kazino oyunları təşkil edən saytların serverləri xarici ölkələrdə yerləşir və internet üzərindən idarə olunur. Bu baxımdan həmin oyunları təşkil edənlərin cəzalandırılması çətin məsələdir: “Qanuna edilən düzəlişlərdən sonra ”Lotereyaların və idman mərc oyunlarının təşkili və ya keçirilməsi qaydalarının pozulması" maddəsində cərimələrin miqdarı kəskin şəkildə artırılıb. Qumar oyunlarının təşkilinə və keçirilməsinə görə inzibati xətanın törədilməsinə alət olmuş predmet, habelə qumar oyunlarına qoyulmuş pul vəsaitləri və ya digər əmlak, uduş fondu, həmçinin qumar oyunu nəticəsində əldə edilmiş gəlir müsadirə edilməklə fiziki şəxslər 5 min manat məbləğdə, vəzifəli şəxslər 10 min manat məbləğdə, hüquqi şəxslər 50 min manat məbləğdə cərimə ediləcək. Azərbaycan Respublikasının ərazisindən qumar oyunlarında iştirak üçün imkanın yaradılması, o cümlədən qumar oyunlarının oynanıldığı virtual mühitə çıxışın təmin edilməsinə görə fiziki şəxslər 5 min manat, vəzifəli şəxslər 10 min manat, hüquqi şəxslər 50 min manat məbləğdə cərimə ediləcək. Qumar oyunlarında iştirak üçün biletlərin (və ya biletə bərabər tutulan digər iştirak hüququnun) satışının təşkili və (ya) satışına görə fiziki şəxslər 5 min manat məbləğdə, vəzifəli şəxslər 10 min manat məbləğdə, hüquqi şəxslər 50 min manat məbləğdə cərimə ediləcək. Qumar oyunlarında iştirak üçün mərclərin qəbul edilməsi, pul vəsaitlərinin, əşyaların və qeyri-maddi əmlak nemətlərinin qəbulu, köçürülməsi, ödənilməsi, uduşların, mükafatların və ya digər gəlirin verilməsi, bunların təşkili və bunlarla əlaqədar xidmətlərin göstərilməsinə görə fiziki şəxslər 5 min manat məbləğdə, vəzifəli şəxslər 10 min manat məbləğdə, hüquqi şəxslər 50 min manat məbləğdə cərimə ediləcək. Qumar oyunlarının təşkili, keçirilməsi, iştirak üçün biletlərin (və ya biletlə bərabər tutulan digər iştirak hüququnun) satışı, qumar oyunlarında iştirakla bağlı müştərinin ödəniş tapşırıqlarının və ya bank hesabı üzrə digər əməliyyatlarının bank əməliyyatları aparan şəxslər tərəfindən icrasına (aparılmasına) görə fiziki şəxslər 5 min manat məbləğdə, vəzifəli şəxslər 10 min manat məbləğdə, hüquqi şəxslər 50 min manat məbləğdə cərimə ediləcək".

Hüquqşünas deyir ki, cərimələrin artırılması belə oyunlara marağı azaltmır: “Deputat Qüdrət Həsənquliyevin kazinoların müəyyən məkanlarda açılması təklifinə neqativ yanaşılması cəmiyyətin buna hazır olmaması ilə əlaqəlidir. Dünyada bir çox turizm sahələri olduğu kimi qumar turizmi də var. Yəni varlı insanlar var ki, dünyanın gəzməli-görməli yerlərini görmək arzusu ilə azartlı oyunlara maraqlarını bir arada həyata keçirmək istəyirlər. Qonşu Gürcüstanda bu istəklər nəzərə alınır və müəyyən şərtlər daxilində kazinolara icazə verilir. Əgər ölkədən bu istiqamətdə pul axınının qarşısını almaq istəyiriksə, bu məsələyə bir qədər fərqli yanaşma ortaya qoyulmalı idi. Cərimələr, qadağalar vəziyyətdən çıxış yolu deyil, üstəlik, müəyyən mənada ziyanlı tərəfləri də var. Məmurlar, onların övladları qumar oynamaq istəyirlərsə, niyə Gürcüstana getməli və orada uduzmalıdırlar? Bu baxımdan məsələyə bir daha baxılması zərurəti var”.

Qeyd edək ki, ölkədə bəzi mərc saytları bloklansa da, hazırda “MostBet” və “1xBet” kimi geniş istifadəçi kütləsi olan saytların girişinə heç bir məhdudiyyət yoxdur.

Bütöv.az

Vətən müharibəsi qazisi Denis Quzlayevlə Azərbaycanın Milli Qəhrəmanı Yuri Kovalyovun qızı Regina Kovalyova ailə həyatı qurmağa hazırlaşırlar.

Axar.az xəbər verir ki, bu barədə sosial şəbəkədə məlumat paylaşılıb.

Qeyd edək ki, Denis Quzlayev 1999-cu ildə Bakıda anadan olub. O, Vətən müharibəsi zamanı Füzuli, Cəbrayıl, Hadrut və Xocavənd rayonlarının azad edilməsi uğrunda döyüşlərdə iştirak edib.

Xocavənd istiqamətində gedən döyüşlər zamanı ağır yaralanıb.

Denis Quzlayev “Füzulinin azad edilməsinə görə” medalı ilə təltif edilib.

Xatırladaq ki, Reginanın atası Milli Qəhrəman Yuri Kovalyov da Göyçayda anadan olub. O, 1991-ci ildə Xocavənddən növbəti tapşırıqdan qayıdanda içində olduğu avtomobilin ermənilər tərəfindən atəşə tutulması nəticəsində şəhid olub. Bakıda Şəhidlər xiyabanında dəfn olunub.




Bütöv.az