Butov.az xəbər verir ki, "Əsgər Ailələrinə Dəstək" İctimai Birliyinin rəhbəri Mətanət Əsgərqızı öz feysbuk (Facebook) sosial şəbəkəsində belə bir status paylaşıb. Bu statusun aktuallığını nəzərə alıb sizinlə bölüşürük:

"Yəqin bir müddət əvvəl Azərbaycan Respublikasının Prezidenti cənab İlham Əliyevin bu sözləri yadınızdadır: “Mənim köməkçilərim bəzi məlumatları gizlətməyə çalışırlar, amma onlar görürlər ki, mənim xəbərim var. Çünki mən media və saytlar vasitəsilə o məlumatları izləyirəm, oxuyuram. Bu baxımdan əməkdaşlığımızın davam etməsində maraqlıyam”. Kaş cənab İlham Əliyev bu sirri açmayaydı.Çünki yəqin bəzi məmurlar qabaqlayıcı tədbirlər gördülər. Və daha ölkədə olan heç bir hadisə ona çatmır. Belə olmasa xalqın bu qədər məmurlara qarşı edilən etirazlarına qarşı tədbirlər görülər, problemlər aradan qalxardı. Cənab İlham Əliyevə və birinci vitse-prezident xanım Mehriban Əliyevaya açıq məktub yazdım. Sultan ananı ictimailəşdirdim. Tam sükutdur. Elə bil belə şeylər olmayıb. İnformasiyalar onlara çatmırsa bu çox pisdir. Xalqdan xəbəri olmayan ölkə rəhbərləri insanları taleyin ümidinə buraxırlarsa bu, həm də onların öz həyatları üçün təhlükədir. Ölkədə məmur azğınlığı pik həddə çatıb. Ö məmurların xalqın başına turp əkməyi prezidentin və birinci vitse-prezidentin ayağına yazılır. Gələn il seçki ilidir. Bunu ən birinci cənab İlham Əliyev və birinci vitse-prezident xanım Mehriban Əliyeva nəzərə almalıdırlar. Xalqı azğınlaşmış bəzi məmurların əlindən qurtarmalıdırlar. Əksi bu onlar üçün də çox təhlükəli olacaq. Nəhayət, ölkədə köklü dəyişikliklərə start verilməlidir. Yoxsa bir dəstəni geyindirib olmayan nailiyyətlərə əl çaldırmaq ölkəni yürütmək deyil. Bütün bunları deyirik ki, vətənimizin təhlükədə olduğunu hər kəs anlasın. Gürcüstandan və digər bölgələrdən hansı ölkələrəsə "gəlin" teleqramları vurulur. Bu etirazları nəzərə almaq lazımdır. Nəzərə alınmayacaqsa bu, hər şeyin sonu ola bilər. Müstəqilliyimiz nələrin bahasına alındı. Tanrı bu millətə, bu dövlətə bir daha müstəqilliyi itirmək qorxusu yaşatmasın. Bunun üçünsə xalqı nəzərə alıb, yaşayışını yaxşılaşdırmaq lazımdır. Xalq hakimiyyətlə bir olarsa heç bir kənar qüvvə niyyətinə çata bilməz!".