Alla İlçun – dəb dünyasının stil etalonu , həm də dünya şöhrətli dahi fransız modelyeri Kristian Diorun son və ən sevimli ilham pərisi olub. Yəqin ki, qazax türkü olan bu xanımın həyat tarixçəsi kimsəni heyran etməyə bilməz. Çünki o, zamanında adi qabyuyandan əsl podium ulduzuna çevrilməyi bacarıb.
Allanın ailəsi və əcdadları haqqında məlumat elə də çox deyil.Deyilənə görə, onun bəy nəslindən olan atası Juanxal İlçun dəmiryol mühəndisi olur .O, ideyası hələ 1886-cı ildə yaranan Türksibin tikintisində yaxından iştirak edir. Daha sonra Çin şəhəri sayılan , amma vətəndaş müharibəsindən sonra çox sayda rusun məskunlaşdığı Harbinə miqrasiya edir. Məhz bu şəhərdə Juanxal milliyyətcə rus olan gənc opera ifaçısı Tatyana ilə ailə qurur. Cütlüyün Alla adlı qızları anadan olur.
Amma o vaxt sərhəddə yerləşən Harbində həyat öz axarıyla getmirdi. Şəhər tez-tez əldən ələ keçirdi. Buranı çinlilər , yaponlar və bolşeviklər öz hakimiyyəti altına almağa çalışırdı . Bütün bu dəyişikliklər isə dağıntıyla , təcavüzlə müşayiət olunurdu. Bu səbəbdən də İlçun ailəsi Fransaya yerləşməyi qərara alır. Lakin Fransaya təkcə ana ilə qızı yollana bilir .İllər sonra Alla İlçunun oğlunun sözlərinə görə onun babasının QULAQ-a( SSRİ-də xüsusi rejimli islah - əmək düşərgəsi ) düşdüyü və geri dönmədiyi məlum olur . Parisdə məskunlaşan ailə çox çətinlik çəkir. Kasıb yaşadıqlarından Alla həmişə iş axtarışında olur.O hətta Paris restoranlarından birinə qabyuyan kimi işə düzəlir. Həyatından heç bir zaman şikayətçi olmayan bu qız nə zamansa hər şeyin yaxşı olacağına ümid etsə də belə olmur. Çox keçmir ki, II Dünya Müharibəsi başlayır. Fransa faşistlər tərəfindən işğal olunur.Bir müharibədən qaçmış ailə yeni müharibə ilə qarşılaşır.Həmin illərdə gənc Alla Fransa Müqavimət Hərəkatının sıralarında yer alır. Partizanlara qoşularaq , knyaginya Tamara Volkonski və Ariadna Skryabinayla çiyin-çiyinə Fransanın cənub-qərbindəki küçə döyüşlərində iştirak edir.

Yalnız müharibə bitdikdən sonra Allanın bəxti üzünə gülür. Təsadüfi bir hadisə ona uğur gətirir. Ən yaxın rəfiqəsi çox da tanınmayan modelyer Kristian Diorun elan etdiyi kastinqə qatılır. Lakin bərk xəstələndiyindən Alladan bu seçimdə onu əvəz etməsini xahiş edir.Göstərilən ünvana gələn Alla , burada otaqların təmiri ilə məşğul olan işçi briqadası ilə qarşılaşır. O işçilərlə söhbət edərək moda evini tərk edir. Rəfiqəsinin vaxtı və məkanı səhv saldığını düşünür.Amma bir neçə gündən sonra moda evindən gələn qəfil zəng Allanı təəcübləndirir. Çünki cənab Diorun katibəsi onun seçim turunu keçdiyini söyləyirdi. Alla baş tutmayan kastinqdə iştirak etməmişəm deyə irad bildirsədə, katibə ona gülərək cavab verir:”Müsyö Dior işçilərin arasında olub.” Sən demə bu şərq gözəlinin qeyri-adi fiqurası modelyeri ilk baxışdan ovsunlayır.Beləliklə , Alla İlçun özü də bilmədən K.Diorun qəlbini fəth edir.Eyni zamanda Dior Avropada asiya gözəlliyinə diqqət yetirən ilk modelyer olur.Ondan sonra bu tendensiyanı ispan Kristobel Balensiqa və fransız Yuber de Jivanşi davam etdirir. Söz yox ki, Dior qadın gözəlliyini bütün incəliyiylə duyur və zamanın nəbzini tuta bilirdi. Elə buna görə də o, müharibədən sonra qadınlar üçün , ilk kolleksiyası olan “New look”u təqdim etmək qərarına gəlir. Modelyer optimizmi , romantizmi simvolizə edən bu kolleksiyanın nümayişi üçün yalnız Alla İlçunu uyğun bilir.Çünki onun qeyri-adi incə beli və çox da uzun olmayan boyu buna imkan verirdi.
Təbii ki, yeni kolleksiya dünya moda tarixində bir partlayış yaradır.Bu vaxta qədər heç kimin tanımadığı 42 yaşlı modelyer ani olaraq böyük modanın şahına çevrilir.Onun şan-şöhrəti bütün dünyaya yayılır.Dünyanın ən mötəbər xanımları modelyerin qəbuluna yazılmağa başlayır. Əldə olunan uğurdan sonra Kristian Dior Alla İlçunu özünün ilham pərisi adlandırır. Qazax mənşəli gözəl tezliklə moda nümayişlərinin bəzəyinə çevrilir və kuturyenin yeni kolleksiyalarının yaranmasına səbəb olur.Artıq Alla fransız estrada və kino ulduzlarına cəmiyyət arasına necə çıxmalı olduqlarını diqtə edir. Onun təqdim etdiyi yeni əlbisələri divalar dəfilədən dərhal sonra əldə etməyə can atırlar. Alla həm də “pişik gözü” etalon obrazını yaratmağı bacarır. Məhz onun sayəsində Avropa və SSRİ-də oxvari göz makiyajı dəbi yaranır. Bu tip göz makiyajı bu gün də aktualdır .Sadəcə çox az adam bilir ki, 50-ci illərdə bu qeyri-adi makiyajı ilk dəfə bütün dünyada Alla İlçunun simasında görüblər.

Ümumiyyətlə , Alla İlçun və Kristian Diorun əməkdaşlığı 10 il davam edir. Dahi modelyerin ölümündən sonra isə Alla onun tələbəsi və davamçısı İv Sen Loranla daha 10 il çalışır. Şərq gözəli nə az , nə çox düz 20 il podiumda hökmranlıq edir.Qəribədə olsa bu illər ərzində onun bel ölçüsü cəmi 2 sm artır. ( karsetsiz 47 sm-dən 49 sm-ə qədər)Alladan buna necə nail olduğunu soruşduqda isə yumorla belə cavab verir: “ Mən heç nə yemirəm . Ancaq içirəm.Mənim dietam siqaret və şampandır. Bütün vitaminlər bunlardadır.”
Model koryerasına isə Alla öz simasında yaşıyla bağlı əlamətləri gördüyü zaman son qoyur.Çünki o, sevənlərinin yaddaşında gənc və gözəl qalmaq istəyirdi. Bununlada Alla İlçun moda dünyasını birdəfəlik tərk edir. Bir daha moda jurnallarının üz qabığında görsənmir. Hətta müsahibə verməkdən belə imtina edir. Yalnız 1990-cı ildə tarixçi Aleksandr Vasilyev onunla görüşə bilir. Amma ona belə Allanın şəklini çəkmək qadağan edilir.
Bu xanımın möcüzələrlə dolu həyat yolunun harda və nə zaman bitdiyi bilinmir.O yaşayır ya yaşamır .Heç bir şey məlum deyil .Bircə o məlumdur ki, dünyaca məşhur top-model fotosessiyalardan biri zamanı həyatının məhəbbətini tapır. Polyak fotoqraf Mayk de Dyumenlə ailə quran Allanın iki oğlu dünyaya gəlir.

KÖNÜL SADIQOVA