Biləsuvar rayonunda qonşusu tərəfindən döyülən şəxs dünyasını dəyişib. ANS PRESS-in bölgə müxbirinin verdiyi məlumata görə, Biləsuvar rayon “Təyyarə” meydanı adlanan yaşayış massivində 1964-cü il təvəllüdlü Qeybulla Sayad oğlu Şatanov hərbi xidmətdən məzuniyyətə gəlmiş oğlu üçün qonaqlıq məclisi düzəldib. Məclisdə musiqi səsinin yüksək olduğunudan əsəbləşən qonşu İlqar Abbasov Qeybulla Şatanovun evinə gələrək ilk öncə onunla mübahisə edib. Daha sonra mübahisə dava ilə nəticələnib və Qeybulla qonşusu tərəfindən döyülüb.

Döyüldükdən sonra Qeybulla Şatanovun vəziyyəti pisləşdiyi üçün təcilli yardıma müraciət olunub. Həkimlərin səyinə baxmayaraq, Qeybulla Şatanov axşam saatlarında evində dünyasını dəyişib. Daha sonra meyid müayinə olunması üçün Məhkəmə Tibbi Ekspertiza və Pataloji Anatomiya Birliyinin Biləsuvar rayon şöbəsinə aparılıb. Şöbədən verilən məlumata görə, ilkin muayinə zamanı meyitin üzərində zorakılıq əlaməti aşkar olunub. Ölümün dəqiq səbəbləri isə meyitdən götürülmüş nümünələr analiz olunduqdan sonra məlum olacaq.

Qeyd edək ki, hadisəni törətməkdə şübhəli bilinən İlqar Abassov artıq polislər tərəfindən saxlanılıb. Faktla bağlı araşdırma aparılır.