28-08-2022, 20:11
Qardaşlıq belə olur - Azərbaycan Pakistanı çətin gündə tək qoymadı
Son günlər Pakistanda müşahidə olunan güclü yağışlar böyük faciəyə səbəb olub. Ölkədə daşqınlar nəticəsində 1000-ə yaxın insan həyatını itirib, 1456 nəfər isə yaralanıb. Bundan əlavə, 802 min 582 heyvan tələf olub, 682 min 139 evə ziyan dəyib. Çadır düşərgələrinə sığınanların sayı 498 min 833 nəfərə yüksəlib. Ümumilikdə daşqınlardan zərər çəkənlərin sayı 30 milyona çatıb. Bununla da ölkədə fövqəladə vəziyyət elan edilib. Pakistanın fəlakətlə mübarizə tədbirlərinə Azərbaycan dərhal reaksiya verərək, qardaş ölkəyə yardım əlini uzadıb. Belə ki, Azərbaycan Prezidenti İlham Əliyevin tapşırığına müvafiq olaraq, Pakistan İslam Respublikasında çoxsaylı insan tələfatı və irimiqyaslı dağıntılara səbəb olmuş şiddətli yağışların və daşqınların nəticələrinin aradan qaldırılması məqsədilə Azərbaycan hökuməti tərəfindən bu ölkələyə 2 milyon ABŞ dolları məbləğində yardım göstəriləcək. Dövlət başçısı bununla bir daha nümayiş etdirib ki, qardaş Pakistan tək deyil, Azərbaycan hökuməti və xalqı daim onun yanındadır. Bakının çətin gündə Pakistanın yardımına yetişməsinə İslamabad təşəkkür mesajı ilə cavab verib. Pakistan İslam Respublikasının xarici işlər naziri Bilaval Bhutto-Zərdari yardıma görə Azərbaycana təşəkkürlərini çatdırıb. "Pakistanda daşqından zərər çəkənlərə yardım elan etdiyinə görə Azərbaycana təşəkkür edirik",- nazirin sosial şəbəkə hesabındakı paylaşımda deyilir. Pakistanlı siyasi ekspert, Pakistan, Azərbaycan, Türkiyə gənclər forumunun rəhbəri Musavar Hamid Tanoli açıqlamasında ölkəsinin Azərbaycana minnətdar olduğunu deyib. Onun sözlərinə görə, Azərbaycan Pakistana münasibətdə əsl qardaşlıq nümayiş etdirir. “Qardaş Azərbaycan hökuməti çətin gündə bizi tək qoymadı. Hadisə başlayan vaxtdan Azərbaycan xalqı bizə dəstək göstərir. Biz Azərbaycanın göstərdiyi dəstəyə, qayğıya görə təşəkkür edirik. Həm siyasətdə, həm də dar günlərdə qardaş ölkə olduğumuzu bir daha bütün dünya görür. Zərərçəkmiş şəxslər də göstərilən yardıma görə təşəkkür edirlər. Azərbaycan və Pakistan dost, həm də qardaş ölkədir”, - deyə ekspert vurğulayıb.
28-08-2022, 20:07
Maqnit qasırğası gözlənilir
Avqustun 28-i və 29-da maqnit qasırğası baş verəcək. Butov.az xəbər verir ki, Yer kürəsini iki günlük maqnit tufanı bürüyəcək. Qasırğa öz gücü baxımından zəif olacaq. Həmçinin, sentyabrın 3-dən 5-dək daha bir maqnit qasırğası gözlənilir. Sentyabrın 6, 7 və 8-də Günəşin aktivliyi adi haldan bir qədər yüksək olacaq. Onu da bildirək ki, maqnit qasırğaları Günəşin səthindəki partlamalar nəticəsində Yerin maqnit sahəsində yaranan pozğunluqlardır.
28-08-2022, 19:43
Sabah hava küləkli olacaq
Azərbaycanda avqustun 29-na gözlənilən hava şəraiti açıqlanıb. Milli Hidrometeorologiya Xidmətindən verilən məlumata görə, sabah Bakıda və Abşeron yarımadasında hava yağmursuz olacaq. Mülayim cənub-şərq küləyi əsəcək. Havanın temperaturu gecə 19-24° isti, gündüz 33-36° isti, Bakıda gecə 21-23° isti, gündüz 34-36° isti olacaq. Atmosfer təzyiqi norma daxilində 761 mm civə sütunu təşkil edəcək. Nisbi rütubət gecə 60-65 %, gündüz 30-35 % olacaq. Azərbaycanın rayonlarında hava əsasən yağmursuz keçəcək. Mülayim şərq küləyi əsəcək. Havanın temperaturu gecə 18-22° isti, gündüz 35-39° isti, dağlarda gecə 11-16° isti, gündüz 23-28° isti olacaq.
28-08-2022, 19:35
ABŞ və Fransa səfirlərinin əsas niyyəti
Ötən gün Şuşada xarici diplomatlar və hərbi atteşelərin iştirakı ilə beynəlxalq konfrans keçirilib. Butov.az-ın xəbərinə görə, konfransa dəvət edilsələr də, ABŞ və Fransa səfirləri Şuşaya getməkdən imtina ediblər. “ABŞ və Fransa səfirlərinin Şuşaya səfərdən imtina etməsi onların şəffaf siyasət yürütmədiyinin bariz nümünəsidir” – bu fikirləri AzTV-nin efirində millət vəkili Cavanşir Feyziyev səsləndirib.
28-08-2022, 19:18
Laçının girişindəki lövhə söküldü
Laçının gişirindəki erməni dilində “Berdzor” yazılan löhvə sökülüb. Bunu əks etdirən görüntülər sosial şəbəkələrdə yayılıb. Qeyd edək ki, Laçın işğalda olduğu müddətdə ermənilər tərəfindən “Berdzor” adlandırılırdı. Xatırladaq ki, avqustun 26-da Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin tapşırığına əsasən Laçın şəhəri, eləcə də Zabux və Sus yaşayış məntəqələri Azərbaycan Ordusunun bölmələri tərəfindən tam nəzarətə götürülüb.
28-08-2022, 19:15
Dağlıq ərazidəki yanğın söndürüldü
Fövqəladə Hallar Nazirliyi tərəfindən həyata keçirilmiş zəruri və təxirəsalınmaz tədbirlər sayəsində Masallı rayonunun Qəriblər kəndi yaxınlığında mürəkkəb relyefli dağlıq ərazidə baş vermiş yanğın daha geniş sahəyə yayılmasına imkan verilmədən dünən axşam saatlarında söndürülüb. Bu barədə FHN-in Mətbuat Xidmətindən məlumat verilib. Yanğın nəticəsində təxminən 5,5 hektar sahədə kol-kos və ağaclar yanıb. Sıx meşəlik ərazi yanğından mühafizə olunub. Qeyd edək ki, yanğınla mübarizə tədbirlərində FHN-in Dövlət Yanğından Mühafizə Xidməti, Mülki müdafiə qoşunları, Xüsusi Riskli Xilasetmə Xidməti, Cənub Regional Mərkəzinin müvafiq qüvvələri və Aviasiya dəstəsinin 2 ədəd helikopteri, habelə Ekologiya və Təbii Sərvətlər Nazirliyi Meşə Təsərrüfatı Mərkəzi və yerli icra hakimiyyətinin əməkdaşları, bir qrup yerli sakin iştirak edib.
28-08-2022, 19:13
“Qarabağ”ın futbolçusu Fransa klubuna keçir
“Qarabağ”ın futbolçusu İbrahima Vadji Fransanın “Sent Etyen” komandasına transfer olunur. Butov.az xəbər verir ki, seneqallı hücumçu növbəti həftənin əvvəllərində yeni klubu ilə rəsmi müqavilə bağlayacaq. 27 yaşlı forvardın transferinə görə Azərbaycan təmsilçisinə 1 milyon avrodan çox vəsait ödəniləcək. Bura müxtəlif bonuslar daxil deyil. Qeyd edək ki, hazırda Fransa Liqa 2-də mübarizə aparan “Sent Etyen” mövsümə -3 cərimə xalı ilə başlayıb. Klub 5 oyundan 3 xal toplayaraq, mənfi saldonu sıfırlasa da, hazırda sonuncu - 20-ci pillədə qərarlaşıb.
28-08-2022, 18:47
Türkiyədə qalan terrorçuların sayı açıqlandı
29 oktyabr 2023-cü ildə Cümhuriyyətin 100-cü ildönümündə Türkiyəni terrordan təmizləyəcəyik. Bunu Türkiyə daxili işlər naziri Süleyman Soylu deyib. "Hazırda Türkiyədə 120 terrorçu qalıb. Bir dənə də olsun terrorçu buraxmadan ölkəmizi təmizləyəcəyik. “Zeytun budağı” əməliyyatı zamanı Amerika “buraya girə bilməzsiniz” dedi. Bütün Avropa paytaxtları “Afrinə girə bilməzsiniz” dedi. Bizim problemimiz Hakurk idi. İraqın Hakurk bölgəsi. Həmin ərazini terror dəhlizinə çevirəcəkdilər. Rəcəb Tayyib Ərdoğan cəsarətli olmasaydı, biz ora girə bilməzdik", - Soylu bildirib.
28-08-2022, 18:41
Türk PA-dan Laçın bəyanatı
Türk Dövlətləri Parlament Assambleyasının (TÜRKPA) Katibliyi 9/10 noyabr 2020-ci il tarixli üçtərəfli bəyanatın müddəalarına uyğun olaraq davam etməkdə olan prosesin bir hissəsi kimi, Laçın şəhərinin, Zabux və Sus kəndlərinin Azərbaycana qaytarılmasını təqdir edir. Butov.az xəbər verir ki, təşkilatın bu münasibətlə yaydığı bəyanatda deyilir: "TÜRKPA qardaş Azərbaycanın ərazi bütövlüyü və suverenliyinə sadiqliyini bir daha xatırladaraq, Azərbaycan və Ermənistan arasında əlaqələrin normallaşması üçün səylərə dəstəyini ifadə edir və bu prosesin Cənubi Qafqazda davamlı sülh, sabitlik və dayanıqlı inkişafa nail olunmasına töhfə verəcəyinə inanır".
28-08-2022, 18:37
Nərimanovda 5 mərtəbəli bina alovlandı
Fövqəladə Hallar Nazirliyinin “112" qaynar telefon xəttinə Bakı şəhəri, Nərimanov rayonu, X.Abbasov küçəsində yerləşən beşmərtəbəli yaşayış binasında yanğın baş verməsi barədə məlumat daxil olub və dərhal FHN-in Dövlət Yanğından Mühafizə Xidmətinin müvafiq qüvvələri çağırış ünvanına cəlb olunub. Butov.az xəbər verir ki, hadisə yerində əməliyyat şəraiti qiymətləndirilərkən yanğının beşmərtəbəli binanın beşinci mərtəbəsində vətəndaş Rüstəmova Xatirə İslam qızına məxsus üçotaqlı mənzilin eyvanında baş verdiyi və hər an mənzilə, eləcə də qonşu mənzillərə keçmə riskinin yüksək olduğu müəyyən edilib. Əməliyyat şəraitinə uyğun olaraq xüsusi təyinatlı texnikanın - avtonərdivanın tətbiqi ilə yanğınsöndürənlərin operativ müdaxiləsi sayəsində yanğın qısa müddətdə söndürülərək mənzilə keçməsinin qarşısı alınıb. Yanğın nəticəsində mənzilin eyvanının lambirindən ibarət üzlük hissəsi və əşyaları 3kv.m sahədə yanıb, yüksək temperaturdan eyvanın qapısı və eyvanda quraşdırılmış kombi aparatı qismən əriyib. Mənzil yanğından mühafizə edilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!