30-08-2023, 16:49
Hər şey Rusiya sülhməramlılarının komandanlığından gələn cavabdan asılıdır
Azərbaycan Qızıl Aypara Cəmiyyətinin Qarabağda yaşayan erməni əsilli sakinlər üçün göndərdiyi 40 ton un yüklənmiş avtomobillər Rusiya sülhməramlı qüvvələrinin Ağdam-Xankəndi yolu üzərində yerləşən postunda gözləyir.
Cəmiyyətin əməkdaşları yükün Xankəndiyə çatdırılmasına şərait yaradılması üçün hazırda Rusiya sülhməramlılarının komandanlığı ilə müzakirələr aparır.
Azərbaycan Qızıl Aypara Cəmiyyətinin əməkdaşları ötən axşam sülhməramlıların Ağdam-Xankəndi yolunun üzərindəki postu ilə üzbəüz istiqamətdə çadırlar quraşdıraraq orada gecələyiblər.
Qarabağın bir qrup erməni sakini Rusiya sülhməramlılarının nəzarət-buraxılış məntəqəsinin qarşısına toplaşıb. Onların məqsədi Bakıdan göndərilən ərzağı Xankəndiyə buraxmamaqdır.
Azərbaycan Qızıl Aypara Cəmiyyəti icraçı katibi Ceyhun Mirzəyev BBC Azərbaycanca-ya deyib ki, gətirlən unun keyfiyyət sertifikatı Rusiya sülhməramlılarına təqdim edilib, hazırda məsələyə baxılmaqdadır. Danışıqlar da rus sülhməramlılarının komandanlığı ilə aparılır.
“Bizim Xankəndiyə mütləq şəkildə giriş icazəmiz olmalıdır ki, real vəziyyəti qiymətləndirib, ehtiyacları müəyyən etdikdən sonra fəaliyyət planı qura bilək. Ondan sonra biz konkret olaraq hansı istiqamətdə yardım edə bilərik – bu, ərzaq olacaq, gigiyenik dəstlər olacaq, müvafiq qiymətləndirmədən sonra onu müəyyən edə bilərik. Qiymətləndirmə üçün də bizim ora mütləq şəkildə girişimiz lazımdır”, - C.Mirzəyev deyib.
Onun sözlərinə görə, hər şey Rusiya sülhməramlılarının komandanlığından gələn cavabdan asılıdır:
“Əgər həmin cavabda giriş izni veriləcəksə, sözsüz ki, biz aparacağıq, giriş izni verilməyəcəksə, artıq bu, Qızıl Aypara Cəmiyyətinin rəhbərliyi ilə müzakirə olunacaq. Ondan sonra mümkün variantlara baxılacaq”.
Bakıdan gedən unla dolu yük maşınlarının nə qədər gözləyəcəyinə gəlincə, Azərbaycan Qızıl Aypara Cəmiyyəti icraçı katibi deyib:
“Biz dünən axşam saatlarında bura çatdıq. Bizə belə bir cavab verildi ki, bu gün cavab olmayacaq, sabahı gözləyin. Bir qeyri-müəyyənlik yarandı. Sözsüz ki, dünən hava soyuq idi və bizə çadırlar lazım idi ki, gecələyək. Ancaq bizim məqsədimiz bu yükü bura gətirmişiksə, burdan da Xankəndinə aparmaqdır. Biz gözləyəcəyik.
Nə qədər lazımdır, o qədər gözləyəcəyik. İşimizi ehtiyatlı tutmuşuq. Su da, yeyəcək də gətirmişik. Yəni, biz hal-hazırda gözləmə mövqeyindəyik. Cavaba görə addımlarımız atılacaq. Mobil nömrəm Rusiya sülhməramlılarının komandanlığında var. Onlardan zəng gözləyirəm. Yəni, yəqin zəng olacaq, ya özləri gələcək burda görüş olacaq. Ona uyğun addımlar atılacaq”.
30-08-2023, 16:34
14 nəfər vətəndaşımız Almaniyadan ölkəyə geri qəbul edildi
“Azərbaycan Respublikası ilə Avropa İttifaqı arasında icazəsiz yaşayan şəxslərin readmissiyası haqqında” Saziş çərçivəsində 29 avqust tarixində 14 nəfər Azərbaycan Respublikası vətəndaşı Almaniya Federativ Respublikasından ölkəyə geri qəbul edilib.
Bu barədə Dövlət Miqrasiya Xidmətindən məlumat verilib.
Geri qəbul prosesi Nazirlər Kabineti yanında Operativ Qərargahın müəyyən etdiyi qaydalar çərçivəsində həyata keçirilib.
Qeyd edilib ki, fəaliyyəti Dövlət Miqrasiya Xidməti tərəfindən əlaqələndirilən Reinteqrasiya üzrə İşçi Qrupu readmissiya olunan Azərbaycan Respublikası vətəndaşlarının yerli cəmiyyətə reinteqrasiyası və üzləşə biləcəkləri mümkün çətinliklərin həlli istiqamətində müvafiq tədbirlər həyata keçirir.
30-08-2023, 16:26
Yeni tədris ilində təhsil müəssisələri üzrə vahid məktəbli geyimi tətbiq ediləcək
Məlum olduğu kimi, Nazirlər Kabinetinin qərarına əsasən, 2023-2024-cü tədris ilində ölkənin ümumi təhsil müəssisələri üzrə vahid məktəbli geyimi tətbiq ediləcək.
Yeni tədris ilinin başlanmasına sayılı günlər qalarkən valideynlərə bununla bağlı xəbərdarlıq mesajları gəlib.
Sözügedən xəbərdarlıq müəllimlər tərəfindən yaradılmış valideyn qruplarına göndərilib, eyni zamanda məktəblərin sosial şəbəkə hesablarında paylaşılıb.
Vahid məktəbli geyimi ilə bağlı xəbərdarlıqda aşağıdakı nüanslar əksini tapıb:
- Nazirlər Kabinetinin 17.03.2022-ci il tarixli 96 nömrəli qərarına əsasən, ölkənin ümumi təhsil müəssisələrində vahid məktəbli geyimi tətbiq edilir.
- Nazirlər Kabinetinin müvafiq qərarında göstərilən 4 nümunə geyim forması tekstil şirkətləri tərəfindən hazırlanır və satışı onlar tərəfindən təmin edilir.
- Ötən tədris ilində hər bir ümumi təhsil müəssisəsinin Pedaqoji Şurası valideynlərin də rəyini nəzərə alaraq 4 nümunədə geyim formasından birini seçib və bununla bağlı müvafiq qərar qəbul edib.
- Valideynlər övladlarının təhsil aldığı məktəb vasitəsilə məktəbli geyimi barədə ətraflı məlumatlandırılıb.
- Məktəbli formalarını əldə etmək üçün müəyyən olunmuş məntəqələr barədə ictimaiyyətə geniş informasiya verilib, satış məntəqələrinin ünvanları qeyd edilib.
- Paytaxt ərazisində məktəbli formalarını əldə etmək üçün 34 məntəqə mövcuddur.
- Valideynlər özlərinə yaxın olan və ya özlərinin məsləhət bildikləri məntəqədən övladları üçün müvafiq geyimi əldə edə bilərlər.
- Valideynlər öz istəklərinə uyğun olaraq məktəbli geyimini sifarişlə tikdirə də bilərlər.
- Hər bir ümumi təhsil müəssisəsinin Pedaqoji Şurası tərəfindən seçilən müvafiq geyim forması ən azı 3 tədris ili dəyişilməz qalacaq.
- Eyni görünüşə malik məktəbli forması şagirdlər arasında bərabərliyi təşviq edir.
- Vahid geyim forması şagirdlərə məsuliyyət hissi aşılayır və məktəbin özünəməxsus təhsil mühitinin formalaşmasında mühüm amillərdəndir.
30-08-2023, 16:18
Qırmızı Xaç azərbaycanlı itkinlərlə bağlı açıqlama verdi
Beynəlxalq Qızıl Xaç Komitəsinin Azərbaycandakı nümayəndəliyi 30 avqust Beynəlxalq İtkinlər Günü ilə bağlı açıqlama verib.
Nümayəndəliyin açıqlamasında deyilir:
“Münaqişə ilə bağlı Azərbaycanda hələ də 3800-dən çox itkin düşmüş insan var. Onların on minlərlə ailə üzvü isə doğmalarının taleyini bilməməyin ağrısı ilə yaşayır.
Fəaliyyət göstərdiyimiz illər ərzində itkin düşmüş şəxslərin ailə üzvlərindən təqribən 11000-ə yaxın bioloji istinad nümunəsi toplayaraq Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasına təhvil vermişik.
Həmçinin, biz, ehtimal edilən məzarlıqlar haqqında məlumatları əlaqədar qurumlarla bölüşmüşük və 3 rayonda aparılmış ekshumasiya layihələrinə texniki tövsiyələrimizi verməklə və müxtəlif ləvazimatları ianə etməklə dəstək göstərmişik”.
30-08-2023, 15:29
Türkiyədəki səfirimiz Ərdoğanı bayram münasibətilə təbrik etdi
Azərbaycanın Türkiyədəki səfiri Rəşad Məmmədov Zəfər günü ilə bağlı Prezident Rəcəb Tayyib Ərdoğanı təbrik edib.
Bu barədə səfirliyin “X” hesabında məlumat paylaşılıb.
“Səfir Rəşad Məmmədov Prezident Sarayında keçirilən Zəfər Bayramı mərasimində iştirak edib və Prezident Rəcəb Tayyib Ərdoğana təbrikini çatdırıb”, - paylaşımda qeyd olunub.
30-08-2023, 15:13
Fransadan göndərilən "humanitar yük" Qarabağa buraxılmadı
Fransadan göndərilən "humanitar yük" Qarabağa buraxılmayıb.
Fransanın göndərdiiyi 10 yük maşını iyulun 26-dan sərhəddə gözləyən Ermənistanın “Spayka” avtomobillərinin sırasına düzülüb.
Yük maşınları Paris şəhərinin meri Anna İdalqonun və Strasburq meri Janna Barseqyanın müşayiəti ilə Azərbaycan sərhədinə gəlib.
Qeyd edək ki, “Spayka” avtomobilləri Ermənistan tərəfindən göndərilib, lakin Azərbaycanın razılığı olmadığı üçün həmin vaxtdan orada gözləyir.
30-08-2023, 14:30
Azərbaycan və Türkiyə diasporunun icma toplantısı keçirildi
ABŞ-ın Meyn ştatında Azərbaycan və Türkiyə diasporunun dostluq münasibətlərinə həsr olunmuş icma toplantısı keçirilib.
Meyn Azərbaycanlıları Cəmiyyətinin rəhbəri Tərlan Əhmədov bildirib ki, açıq havada təşkil olunmuş toplantıda bu ştatdakı Azərbaycan və türk icmalarının birgə fəaliyyəti nəticəsində əldə olunan uğurlardan danışılıb, “bir millət, iki dövlət, vahid diaspor” prinsipi əsasında həyata keçirilməsi nəzərdə tutulan gələcək əməkdaşlıq perspektivləri müzakirə edilib.
Tədbir mədəniyyət irsimizi əks etdirən musiqilərin səsləndirilməsi və milli mətbəx nümunələrimizin təqdim olunması ilə yekunlaşıb.
Qeyd edək ki, iki icmanın açıq havada dostluq toplantıları ötən ildən başlayaraq keçirilir.
30-08-2023, 13:55
Vətən müharibəsi şəhidimizin anası dünyasını dəyişdi
Vətən müharibəsi şəhidi Elnur Şirinzadənin anası Gültəkin Şirinova dünyasını dəyişib.
Bu barədə məlumat sosial şəbəkələrdə yayılıb.
Şəhidimizin anası Yevlax rayonunda vəfat edib.
1998-ci il təvəllüdlü Elnur Şirinzadə Memarlıq və İnşaat Universitetinin tələbəsi olub. O, 2020-ci ildə könüllü olaraq ordu sıralarına qoşulub. 44 günlük Vətən müharibəsi zamanı həlak olan hətbçimiz Yevlax rayonunun Şəhidlər xiyabanında dəfn olunub. O, “Vətən uğrunda” və “Suqovuşanın azad olunmasına görə” medalları ilə təltif edilib.
Allah rəhmət eləsin!
30-08-2023, 13:42
Ceyhun Bayramov qardaş ölkəni Zəfər günü münasibətilə təbrik etdi
Azərbaycanın xarici işlər naziri Ceyhun Bayramov qardaş Türkiyəni Zəfər günü münasibətilə təbrik edib.
Bu barədə nazir "X" (twitter) sosial şəbəkə hesabında yazıb.
"Bu gün qardaş Türkiyənin İstiqlal Savaşındakı əzm və qəhrəmanlığı ilə əldə edilmiş şanlı qələbəsinin təcəssümü olan Zəfər Bayramının 101-ci ildönümü qeyd olunur.
Bu münasibətlə təbriklərimi çatdırır, şəhidlərimizin müqəddəs xatirəsini dərin ehtiramla anıram", - paylaşımda qeyd olunub.
Qeyd edək ki, Türkiyədə 30 avqust Zəfər bayramı və Silahlı Qüvvələr Günüdür.
30-08-2023, 13:31
Azad edilmiş ərazilərdəki kütləvi məzarlıqlardan 500-ə yaxın insan qalığı tapılıb
Azərbaycan Respublikasının Əsir və İtkin Düşmüş, Girov Götürülmüş Vətəndaşlarla əlaqədar Dövlət Komissiyasının İşçi qrupunun topladığı şahid ifadələri və materiallar əsasında Xocavənd rayonunun Edilli kəndində aşkar edilən kütləvi məzarlıqda Ermənistan silahlı qüvvələri tərəfindən işğal dövründə girovluqda saxlanılarkən qətlə yetirilmiş 15-20 nəfər azərbaycanlı mülki şəxsin nəşinin 3 metr dərinlikdə basdırıldığı məlum olub. Eləcə də Edillidə tapılmış məzarlıqda basdırılmış Azərbaycan hərbi qulluqçularının əl və ayaqlarının məftil və ya kəndirlə bağlanması kimi faktlar aşkarlanıb.
Bu faktlar Azərbaycanın İnsan Hüquqları üzrə Müvəkkili (ombudsman) Səbinə Əliyevanın Birinci Qarabağ müharibəsi dövründə itkin düşmüş azərbaycanlılarla bağlı hazırladığı hesabatda öz əksini tapıb.
Qeyd edilib ki, bu istiqamətdə aparılmış növbəti tədbirlər zamanı Xocalı rayonu ərazisindəki Fərrux yüksəkliyində bir neçə insana aid naməlum meyit qalıqları aşkarlanıb. Fərrux kəndi yaxınlığında tapılmış qalıqların ekspertizası nəticəsində Ermənistan tərəfinin iddialarının əksinə olaraq, insanların heç bir qəbirüstü abidə və ya tanınma lövhəsi olmadan dəfn edildiyi və antropoloji təhlilə əsasən həmin insan qalıqlarının Azərbaycan türklərinə aid olduğu üzə çıxıb.
Əsir və İtkin Düşmüş, Girov Götürülmüş Vətəndaşlarla əlaqədar Dövlət Komissiyasında 62 nəfər Azərbaycan hərbçisi Birinci Qarabağ müharibəsi zamanı 1992-1993-cü illərdə Fərrux yüksəkliyi uğrunda döyüşlərdə itkin düşmüş şəxs kimi qeydiyyata alınıb. Eyni zamanda, toplanmış məlumatlara əsasən, Fərrux yüksəkliyinin yaxınlığında yerləşən, Xocalı rayonunun Pirlər kəndində 46, Ağdam rayonunun Əliağalı kəndində 11 nəfər Azərbaycan hərbçisi itkin düşüb.
Şuşada da bu günədək bir neçə kütləvi məzarlıq aşkarlanıb. Xüsusilə Şuşa həbsxanası ərazisində aşkarlanmış məzarlıqlarda insanlara işgəncə verilməsinin izləri aşkarlanmış, baş və bədənin ayrı basdırılması, qarın boşluğunda mismarların olması və sair kimi hallar məlum olub. İnsan qalıqlarının tapıldığı bu cür kütləvi dəfn yerlərindən sonuncusu isə çirkab quyusunda aşkarlanıb.
Ümumilikdə, azad edilmiş ərazilərdə aşkar edilmiş kütləvi məzarlıqlardan 500-ə yaxın insan qalığı tapılıb. Bu günədək aparılmış eyniləşdirmələr nəticəsində 4000-ə yaxın itkin düşmüş hesab edilən şəxsdən 15 nəfərin şəxsiyyəti müəyyən edilmiş, onların qalıqları ailələrinə təhvil verilərək adətlərə uyğun şəkildə dəfn mərasimləri keçirilib. Kütləvi məzarlıqlarda aşkar edilmiş qalıqlardan 4-ü mülki şəxslərə, qalanlar isə hərbi qulluqçulara aid olub. Aşkar olunmuş kütləvi məzarlıqlar və insan qalıqları Birinci Qarabağ müharibəsində ermənilərin törətdiyi cinayətlərin bariz nümunəsidir və Ermənistanın azərbaycanlılara qarşı apardığı soyqırımı siyasətini bir daha sübut edir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!