UEFA Çempionlar Liqasının qrup mərhələsinin sonuncu turu bu gün start götürəcək.

Qrup mərhələsinin son turunda meydana ilk olaraq A qrupunun iştirakçıları çıxacaq.

Bakı vaxtı ilə 21:45-də start götürəcək qarşılaşmalarda PSJ “Brügge”ni, “Leypziq” isə “Mançester Siti”ni qəbul edəcək.

ÇL-in bu qrupunda artıq növbəti mərhələyə vəsiqə qazanacaq komandalar (“Mançester Siti” və PSJ) bəllidir. Sonuncu görüş ərəfəsində aktivində 12 xal olan “şəhərlilər”in qrup liderliyi, 8 xallı PSJ-nin ikinciliyi isə artıq təmin olunub. 4 xallı “Leypziq” və “Brügge” bu gün meydana Avropa Liqası vəsiqəsi üçün xal qazanmaq ümidi ilə çıxacaq.

Turun növbəti oyunları saat 00:00-da start götürəcək:

B qrupu

“Milan” - “Liverpul”

“Porto” - “Atletiko

Bu qrupda artıq “Liverpul” 15 xalla növbəti tur vəsiqəsini təmin edib. Son turun nəticəsindən asılı olaraq digər üç komandanın “Porto” (5 xal), “Milan” (4 xal), “Atletiko”nun (4 xal) hər birinin ikincilik şansı qalır.

C qrupu

“Ayaks” - “Sportinq”

“Borussiya” - “Beşiktaş”

C qrupunda “Ayaks” 15 xalla liderlik edir. “Sportinq” 9 xalla ikinci, Dortmund “Borussiya”sı 6 xalla üçüncüdür. Xal qazana bilməyən Türkiyə çempionu “Beşiktaş” qrup sonuncusudur.

D qrupu

“Real” - “İnter”

“Şaxtyor” - “Şerif”

D qrupunda artıq növbəti mərhələyə bütün vəsiqələrin taleyi həll olunub. Madrid “Real”ı ilə Milan “İnter”i arasındakı oyun yalnız qrup liderini müəyyənləşdirmək baxımından önəm daşıyacaq. Sonuncu tur öncəsi ispanlar 12 xalla lider, “İnter” isə 10 xalla ikincidir. Avropa Liqasına vəsiqəni təmin etmiş “Şerif” (6 xal) isə son turda “Şaxtyor”dan (1 xal) xal almaqla tarixində ilk dəfə iştirak etdiyi Çempionlar Liqasının qrup mərhələsində nəticəsini bir qədər də yaxşılaşdırmağa çalışacaq.

H qrupu

“Yuventus” - “Malmö”

“Zenit” - “Çelsi”

Qrupun son qarşılaşmaları “Çelsi” (12 xal) və “Yuventus”un (12) liderlik mübarizəsinə çevriləcək. 4 xala sahib olan “Zenit” isə mübarizəni çox güman ki, Avropa Liqasında davam etdirəcək. Çünki 1 xala sahib “Malmö” Avropa Liqasına vəsiqə uğrunda mübarizədə həm aralarındakı oyun, həm də top fərqi baxımından da Rusiya təmsilçisindən geri qalır.

Bütöv.az

Bu gün bir illik fasilədən sonra güləş üzrə Azərbaycan çempionatına start verilib.

Bütöv.az-ın xəbərinə görə, bu yarışda aparıcı güləşçilərimizdən bəziləri iştirak etməyəcək.

Bunlar yunan-Roma güləşində Eldəniz Əzizli, Rəsul Çunayev, sərbəst güləşdə Hacı Əliyevlə Şərif Şərifovdur.

Qeyd edək ki, Eldəniz Əzizlinin iştirak etməməsinə səbəb onun İranın “Faza” idman klubu ilə klublararası dünya çempionatına qatılmasıdır. Belə ki, Mazandarana məxsus olan klubun üzvü kimi dünya və Avropa çempionumuz Tehrandakı yarışda iştirak edəcək.

Digər üç güləşçimiz isə müxtəlif səbəblərdən son beynəlxalq yarışlara qatılmayıb. Onların karyeralarını bitirəcəyi istisna olunmur.

Koronavirusun vitaminlərlə müalicəsinə həkimlərdən fərqli rəylər; “Müalicədə istifadə olunan dərmanların sayının az, effektinin isə çox olmasına, xüsusilə spesifik terapiyanın vaxtında və düzgün seçilməsinə diqqət olunmalıdır”

Koronavirusun “Omikron” ştammı artıq 40 ölkədə və ABŞ-ın 50 ştatından 16-da aşkar olunub. Lakin ABŞ hökumətinin yüksək səviyyəli səhiyyə rəsmiləri bazar günü deyib ki, onlar bu variantın ona yoluxan insanların sağlamlıqlarına təsirlərinin şiddətindən əmin deyillər.

“Belə görünür ki, onun şiddəti yüksək deyil” - ABŞ-ın yoluxucu xəstəliklər üzrə baş eksperti Dr. Antoni Fauçi CNN-də “State of the Union” verilişində bildirib. Lakin o deyib ki, hər hansı bir qərar vermədən bir az gözləməliyik.

Azərbaycanda koronavirusa yoluxanların sayında vəziyyət stabildir. Son statistikaya görə, ölkəmizdə COVİD-19 infeksiyasına 1394 yeni yoluxma faktı qeydə alınıb, 1791 nəfər müalicə olunaraq sağalıb. Nazirlər Kabineti yanında Operativ Qərargahdan verilən məlumata görə, COVİD-19 üçün götürülən analiz nümunələri müsbət çıxmış 20 nəfər vəfat edib.

Yeri gəlmişkən, Lomonosov adına Moskva Dövlət Universitetinin Tibb Mərkəzinin direktor müavini, Rusiya Elmlər Akademiyasının müxbir üzvü Simon Matskeplişvili koronavirus infeksiyası olan xəstələrin müalicəsində təhlükəli səhvi açıqlayıb. O, koronavirusu müalicə edərkən həkimlərin bir çoxunun orqanizmi həddindən artıq vitaminlərlə “yüklədiyini” bildirib: “Belə immunosupressiv terapiya bədənin təbii immun reaksiyalarını boğur və gələcək perspektivdə orqanizmi viruslara qarşı daha da zəiflədir”.

Ümumiyyətlə, bəzi ekspertlər “Delta” ştammı aşkar olunandan sonra müalicə üsulunun dəyişdirildiyini bildiriblər. Hətta el arasında “sistemlə” - venadaxili vurulan vitaminlərin artıq effekt vermədiyini, bunun, əksinə, ziyan verdiyini bildirirlər. Bu gün aparılan müalicə ilə əvvəlki müalicələr arasında çoxmu fərq var? Vitaminlər rusiyalı mütəxəssisin dediyi kimi, zərərlidirmi? Deyilirdi ki, “Delta” ştammında fərqli müalicə tətbiq edilir. Bəs “Omikron” variantı üçün hansı müalicə üsulu seçilib, bu açıqlanıbmı?

Yeri gəlmişkən, ilkin məlumatlara görə, “Omikron” ştammında əsas müşahidə olunan əlamətlər hədsiz dərəcədə süstlük, halsızlıq və şiddətli baş ağrılarıdır. COVİD-19-un digər ştammlarında müşahidə olunan dadbilmə və qoxu bilmənin itməsi, şiddətli sümük ağrıları, temperatur yüksəlməsi “Omikron” ştammı üçün o qədər də xarakterik deyil. Digər ştammlarla müqayisədə yeni ştamma yoluxma zamanı oksigenin düşmədiyi də deyilir.
İnfeksionist-hepatoloq Mərdan Əliyev “Yeni Müsavat”a mövzunu belə şərh edib: “Koronavirusun ”Omikron" ştammı artıq 40 ölkədə aşkar olunub. Ümumdünya Səhiyyə Təşkilatı bunu bildirdi, baxmayaraq ki, noyabrın sonlarında - bir neçə gün öncə Cənubi Afrika aşkar olmuşdu. Göründüyü kimi, çox sürətlə yayılır. Amma bu virusun müalicəsi əvvəlki ştammlarda olduğu kimi eyni qaydada aparılır. “Delta” ştammı ilə də eynidir. Amma vaksinin təsirinin azaldığı bildirilir. Vaksinin təsiri nəzəri cəhətdən azaldığı bildirilir. Çünki vaksin spayk proteininə görə hazırlanıb. Spayk proteinində isə çox böyük mutasiya baş verib. O ki qaldı vitaminlərin xəstələrə verilməsi məsələsinə, həddən artıq vitaminlə yükləmək nəyə deyilir? B qrupu vitamin orqanizmdə halsızlığı aradan qaldırır və orqanizmi bir az qüvvətləndirmək üçündür. D vitamininin xəstələrə verilməsi mütləq göstərişdir, D vitamini bizim əhalidə normadan çox aşağıdır. Həm də artıq məlumdur ki, tək koronavirusda deyil, digər virus infeksiyalarında, hətta “Hepatit”lərdə də D vitamini çatışmazlığı olarsa, xəstəlik ağır gedir. Buna görə mütləq D vitamininin verilməsi lazımdır. B qrup vitamini gündə bir dəfə verilir və D vitamini verilir. C vitamini isə həm təbii anti-oksidantdır, həm də orqanizmin immun sistemini yaxşılaşdıran ən effektiv vitaminlərdən hesab olunur. Biz öz praktikamızda belə istifadə edirik, çox yaxşı da effekt verir. Hətta evdə saturasiyası 80-ə qədər düşən xəstələr olur ki, onları bu vəziyyətdən çıxarırıq. Orqanizmə kömək etmək lazımdır. Çünki koronavirusa qarşı hələ ki dərman yoxdur. Dərman çıxıb, amma bizdə yoxdur. Bəlkə kimsə həddindən artıq vitaminlə orqanizmi yükləyir, o başqa məsələ. Gündəlik vitamin müalicəsi immun sistemini yaxşılaşdırmaq, halsızlığı götürmək, xəstələrin vəziyyətini yaxşılaşdırmaq üçün sistem şəklində verilir. Niyə sistem şəklində? Çünki sistem şəklində onun bioyararlılığı yüksək olur, effektivliyi artır. Bir də sistemdə maye var, maye də orqanizmə çox müsbət təsir göstərir, xəstələrdə, xüsusilə hərarəti olan pasiyentlərdə maye itkisi olur və bu zaman xəstə su da içə bilmir. Bunun qarşısını almaq üçün vitaminlər mütləq sistem şəklində verilir".

Həkim-infeksionist Nicat Əzimli isə koronavirusun müalicəsində vitaminlərin xüsusi effektinin olmadığını bildirdi: “Buna görə də istənilən yolla bədəni geniş vitamin spektri ilə bəsləməyin heç bir məntiqi yoxdur. Vitaminlərin immunsupressiv vəziyyət yaratdığı ifadəsi isə doğru deyil. Sadəcə olaraq, artıq doza vitaminlərin də öz müxtəlif fəsadlarının olması qeyd olunmalıdır. Müalicədə istifadə olunan dərmanların sayının az, effektinin isə çox olmasına, xüsusilə spesifik terapiyanın vaxtında və düzgün seçilməsinə diqqət olunmalıdır. Hansı ki, burada anti-viral preparatlardan söhbət gedir. Hazırda Azərbaycanda geniş tətbiq olunan favipiravir, arbidol kimi dərmanların effektinin olmaması çoxdan artıq öz təsdiqini tapıb. Bu sahədə yeni preparatların axtarışı dünyada davam etməkdədir. Bu yaxınlarda artıq dünyanın bir çox ölkəsi molnupiravir adlı preparatın istehsalına başlamaq qərarını verib. Halbuki vaxtında tətbiq olunarsa, virus infeksiyasından ağırlaşmaları 50% azaldan dərmandan söhbət gedir. Bu cür və bundan daha effektiv dərmanların istifadəyə verilməsinə hazırda xeyli ehtiyac var”.

Yeri gəlmişkən, qəzetimizə 3-cü dozanın vurulması ilə bağlı vətəndaşlar tərəfindən müxtəlif suallar verilir. Vüsalə Hüseynova adlı oxucumuzu narahat edən isə iş yerindən 3-cü doza vaksinin tələb olunmasıdır: “İki doza vaksin olunmuşam. 10 gün idi ki, xəstəxanada idim, koronovirusdan müalicə aldım, amma TƏBİB-dən qeydiyyatdan keçməmişəm. Vəziyyətim ağırlaşdığı üçün xəstəxanaya yerləşdirildim. Amma iş yerindən 3-cü doza vaksin olunmağımı istəyirlər. Bilmək istərdim, mən yenidən koronovirus xəstəsi kimi qeydiyyata düşə bilərəmmi? Bununla bağlı nə edə bilərəm?”
Oxucunun müraciəti ilə bağlı TƏBİB-in İctimaiyyətlə əlaqələr şöbəsinin məsləhətçisi Elnarə Baxış “Yeni Müsavat”a cavab verib. O bildirib ki, vətəndaşın rəsmi qeydiyyatı yoxdursa, onu yenidən sistemə daxil etmək mümkün deyil: “İş yerində xəstələnib, sağaldığını bildirməlidir”.

Qeyd edək ki, Azərbaycanda son sutkada koronavirus (COVİD-19) əleyhinə 27 339 vaksin vurulub. Nazirlər Kabineti yanında Operativ Qərargahdan verilən məlumata görə, bir gündə birinci mərhələ üzrə vaksinasiya olunanların sayı 3 017, ikinci mərhələ üzrə vaksinasiya olunanların sayı 4 363 nəfərdir. Ölkədə vurulan vaksinlərin ümumi sayı 10 702 988, birinci mərhələ üzrə vaksinasiya olunanların ümumi sayı 5 098 541, ikinci mərhələ üzrə vaksinasiya olunanların sayı 4 593 278 təşkil edir, buster doza üzrə vaksinasiya olunanların sayı isə 1 011 169 təşkil edir.


Bütöv.az

Maştağa qəsəbəsində 8 evdən oğurluq edən 3 nəfər saxlanılıb.

Daxili İşlər Nazirliyinin Mətbuat Xidmətindən Bütöv.az-a verilən məlumata görə, Sabunçu rayonu Maştağa qəsəbəsi ərazisində yerləşən Savalan və Daş Karxanası yaşayış massivlərində son bir neçə ay ərzində mənzillərdən silsilə oğurluqlar edən şəxslər saxlanılıblar. Sabunçu Rayon Polis İdarəsinin 14-cü Polis Bölməsinin əməkdaşlarının həyata keçirdikləri əməliyyat zamanı qeyd edilən hadisələri törətməkdə şübhəli bilinən Tuncay Həsənov, Şakir Vahablı və Qurban Məmmədov tutularaq istintaqa təqdim ediliblər. Araşdırma zamanı onların qeyd edilən ərazilərdə müxtəlif vaxtlarda 8 evdən pul və qızıl-zinət əşyaları oğurladıqları müəyyən edilib. Saxlanılan şəxslər törətdikləri oğurluq hadisələrini etiraf ediblər.

Qeyd olunan faktlarla bağlı 14-cü Polis Bölməsində toplanan materiallar araşdırmaların davam etdirilməsi üçün Sabunçu Rayon Polis İdarəsinin İstintaq Şöbəsinə göndərilib. Zəruri istintaq tədbirləri davam etdirilir.

Türkiyədə dekabrın 10-dan etibarən lirənin yenidən dəyər qazanacağı gözlənilir.

Axar.az xəbər verir ki, bu barədə Türkiyə mediası məlumat yayıb.

Bildirilib ki, Prezident Rəcəb Tayyib Ərdoğanın Qətərə səfəri zamanı 12 yeni müqavilənin imzalanacağı bəlli olub. Razılaşmalardan sonra yüksəlişdə olan dolların məzənnəsinə dekabrın 10-dan etibarən böyük zərbə vurulacağı gözlənilir.

Qeyd edək ki, bir neçə gün öncə Türkiyə Prezidenti Rəcəb Tayyib Ərdoğan açıqlamasında məzənnə dalğasının tezliklə məqbul səviyyədə olacağını bəyan edib.

Hazırda Türkiyə lideri Qətərdə rəsmi səfərdədir.

Bütöv.az

Bakı Ağır Cinayətlər Məhkəməsində ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) sabiq icraçı direktoru Vüqar Səfərli, müvafiq vəzifələrdə çalışmış Bünyamin İsmayılov, Ədalət Vəliyev, Nadir Məmmədov, Bəxtiyar Fətullayev, Təmkin Xəlilov, Telman Tahirov, Valeh Orucov, Təhminə Yaqubova, Şahin İbrahimov və Namiq Hacıyevin cinayət işi üzrə məhkəmə prosesi davam etdirilib.

Trend-in məlumatına görə, hakim Azər Paşayevin sədrliyi ilə keçirilən prosesdə təqsirləndirilən şəxslərdən Ədalət Vəliyevin vəkili onun adına olan binanın zərərin ödənilməsi ilə bağlı dövlət nəfinə verilməsi və bunun yüngülləşdirici hal hesab edilməsi barədə məhkəməyə sənəd təqdim edib.

Daha sonra prosesdə dövlət ittihamçısı çıxış edib.

Prokuror Vüqar Səfərlinin 11 il azadlıqdan məhrum edilməsini istəyib.

Həmçinin, V.Səfərli 3 il dövlət orqanlarında vəzifə tuta bilməz.

Prokuror başqa cinayət işi üzrə təqsirləndirilən Nadir Məmmədov, Bünyamin İsmayılov, Telman Tahirov, Ədalət Vəliyev, Namiq Hacıyevin hər birinin 7 il, Təmkin Xəlilov, Valeh Orucov, Şahin İbrahimov və Bəxtiyar Fətullayevin isə 2 il azadlıqdan məhrum edilməsini tələb edib.

Qeyd olunub ki, təqsirləndirilən şəxslər barəsində məhkəmə istintaqı zamanı seçilmiş polisin nəzarətinə verilmə qətimkan tədbiri ləğv edilməli və hər biri məhkəmə zalında həbs edilməlidir.

Prokuror cinayət işi üzrə təqsirləndirilən Təhminə Yaqubovaya isə 6 il şərti cəza verilməsini xahiş edib.

Dövlət ittihamçısı cinayət işi ilə bağlı Medianın İnkişafı Agentliyi tərəfindən qaldırılan mülki iddianın da təmin olunmasını istəyib.

Proses dekabrın 14-də davam edəcək.

Qeyd edək ki, ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun vəzifəli şəxslərinin qanunsuz əməllərinə dair Korrupsiyaya qarşı Mübarizə Baş İdarəsində olan cinayət işinin istintaqı yekunlaşdırılıb.

Aparılmış istintaq tədbirləri ilə Fondun sabiq icraçı direktoru Vüqar Səfərlinin müvafiq vəzifələrdə çalışmış Bünyamin İsmayılov, Ədalət Vəliyev, Nadir Məmmədov və digər 7 nəfər şəxslə qabaqcadan əlbir olub vəzifə səlahiyyətlərindən sui-istifadə edərək dövlət satınalmalarına dair qanunvericiliyin tələblərinin pozulması, dövlət vəsaitlərinin təyinatı üzrə istifadə edilməməsi, tikinti normalarına əməl olunmamaqla iş həcmləri və qiymətlərinin şişirdilməsi yolu ilə dövlətə məxsus ümumilikdə 18 milyon 500 min manat məbləğində pul vəsaitinin mənimsəmə və israf etmə yolu ilə talanmasına, rəsmi sənədlərə bilə-bilə yalan məlumatlar daxil etməklə vəzifə saxtakarlığı törədilməsinə, habelə cinayət yolu ilə əldə edilmiş 5 milyon 700 min manat pul vəsaitinin leqallaşdırmasına əsaslı şübhələr müəyyən edilib.

Toplanmış sübutlar əsasında Vüqar Səfərli və digərlərinə müvafiq olaraq Cinayət Məcəlləsinin 179.4 (mənimsəmə- xüsusilə külli miqdarda ziyan vurmaqla törədildikdə), 193-1.3.2 (cinayət yolu ilə əldə edilmiş pul vəsaitlərini leqallaşdırma- külli miqdarda törədildikdə), 308.2 (vəzifə səlahiyyətlərindən sui-istifadə etmə- ağır nəticələrə səbəb olduqda), 313 (vəzifə saxtakarlığı) və digər maddələri ilə ittiham elan edilmiş, Vüqar Səfərli barəsində məhkəmənin qərarı ilə həbs, digər şəxslər barəsində isə polisin nəzarəti altına vermə qətimkan tədbiri seçilib.

İbtidai istintaq zamanı cinayətin törədilməsi nəticəsində vurulmuş maddi ziyanın bir hissəsinin ödənilməsi təmin edilmiş, habelə təqsirləndirilən şəxslərə məxsus olan daşınar və daşınmaz əmlak və bank əmanətlərinin üzərinə həbs qoyulub.

Cinayət işi üzrə Medianın İnkişafı Agentliyi (MEDIA) zərərçəkmiş qismində tanınıb.

Bütöv.az

Prezident İlham Əliyev Fərhad Əsgər oğlu Adıgözəlovun Azərbaycan Respublikasının Dövlət Sığorta Kommersiya Şirkətinin sədri təyin edilməsi haqqında sərəncam imzalayıb.

Bununla bağlı AZƏRTAC məlumat yayıb.



Bütöv.az

Qazax Rayon Polis Şöbəsinin Dövlət Yol Polisi bölməsinə yeni rəis təyin olunub.

Gununsesi.info-nun əldə etdiyi məlumata görə, bununla bağlı Daxili İşlər naziri Vilayət Eyvazov əmr imzalayıb.

Əmrə əsasən, polis kapitanı Baxışov Rəşad Soltan oğlu Qazax Rayon Polis Şöbəsinin Dövlət Yol Polisi bölməsinin rəisi vəzifəsinə təyin edilib.
Bu təyinata qədər Rəşad Baxışov Gəncə şəhər Baş polis İdarəsinin DYPŞ-nin YNH-si baş inspektoru vəzifəsində çalışıb.

Bütöv.az

Milli Məclisin sədri Sahibə Qafarovanın başçılığı ilə parlament nümayəndə heyəti İslam Əməkdaşlığı Təşkilatı Parlament İttifaqının (İƏT Pİ) 16-cı Konfransında iştirak etmək üçün dekabrın 8-də Türkiyənin İstanbul şəhərinə səfər edəcək.

Milli Məclisin Mətbuat və ictimaiyyətlə əlaqələr şöbəsindən Bütöv.az-a verilən məlumata görə, nümayəndə heyətinin tərkibinə Milli Məclisin deputatı Ceyhun Məmmədov, parlament Aparatının rəhbəri Səfa Mirzəyev və digər rəsmi şəxslər daxildirlər.
Milli Məclis sədrinin İƏT Pİ-nin 16-cı konfransında çıxışı gözlənilir. Parlament sədrinin tədbirdə iştirak edən nümayəndə heyətləri rəhbərləri ilə bir sıra görüşləri də nəzərdə tutulub. Görüşlərdə təşkilat çərçivəsində əməkdaşlığın gələcək inkişaf istiqamətləri, parlamentlərarası əlaqələrin dərinləşməsi və tərəfləri maraqlandıran digər məsələlər ətrafında fikir mübadiləsi aparılacaq.

Səfər dekabrın 11-də başa çatacaq.

Sürücülər daim yanacaqdoldurma məntəqələrinin satdığı benzinin keyfiyyətindən narazılıq etsələr də, hələki ölkəmizdə hər hansı yanacaqdoldurma məntəqəsinin ((YDM) adı keyfiyyətsiz yanacaq satmaqda hallanmayıb.

Amma bu günlərdə Azərbaycan Dövlət Neft Şirkətinin (SOCAR) ın ictimaiyyətlə əlaqələr və tədbirlərin təşkili idarəsinin rəis müavini İbrahim Əhmədov jurnalistlərə açıqlamasında YDM-nin məntəqələrinin keyfiyyətsiz yanacaq satdığını təsdiq edib. Onun sözlərinə görə, Azərbaycanda benzin və yanacağın keyfiyyəti dövlət orqanları tərəfindən yoxlanılır, YDM-də aparılmış yoxlamalar zamanı daxili standartlarla bir sıra uyğunsuzluqlar aşkar edilib.
"Bu pozuntular yanacağın saxlanması ilə bağlıdır. İstisna olunmur ki, yanacağa bəzi qatqılar əlavə edilir. Zavodumuzda istehsal olunan Aİ-92 benzini Azərbaycanda mövcud olan norma və standartlara cavab verir".

SOCAR sözçüsünün bu açıqlaması birmənalı qarşılanmayıb. Sosial platformada da keyfiyyətsiz yanacaq satan YDM-nin yanacaqdoldurma məntəqələrinin adlarının ictimaiyyətə açıqlanması tələb olunur.

Benzinə qatqı qatan YDM-lar hansılardır?

İ. Əhmədov Sputnik Azərbaycan-ın sorğusuna cavabında bildirib ki, SOCAR yanacaqdoldurma məntəqələrində satılan yanacağın keyfiyyətinə nəzarət etmir: "Bizə verilən məlumata görə, bəzi YDM-lərdə satılan yanacağın keyfiyyətində, istehsal etdiyimiz məhsuldan fərqli olaraq kənarlaşmalar qeydə alınıb. Amma yoxlamanın təfərrüatlarını bizə açıqlamırlar. Sadəcə təxmin etmək olar ki, bu yanacağın saxlama şəraitinə görə ola bilər".
İ. Əhmədov bildirir ki, yanacaq vahid mərkəzdən bütün YDM şəbəkələrinə paylanılır, lakin hər bir YDM şəbəkəsində yanacağın saxlanma şəraiti və s. ilə bağlı bizim məlumat yoxdur. SOCAR-ın yanacaqdoldurma məntəqələrində isə yanacağın keyfiyyəti məhz SOCAR-ın təşəbbüsü ilə mütəmadi yoxlanılır: " Yəni SOCAR Petroleum istismar etdiyi YDM-lərdə yanacağın keyfiyyətinin hər ay yoxlanılması üçün Dövlət Xidmətinə müvafiq rüsum ödəyir, çünki özü də bunu təsbit etməkdə maraqlıdır. Sözügedən yoxlama digər YDM-lərdə aparılıb, çünki SOCAR-da satılan yanacağın keyfiyyəti onsuz da SOCAR-ın təşəbbüsü və təkidi ilə mütəmadi olaraq, hər ay yoxlanılır".

Həm cibimizə girirlər, həm də...

Nəqliyyat məsələləri üzrə ekspert Elməddin Muradlı Sputnik Azərbaycan-a açıqlamasında bildirib ki, YDM-lər yanacağa qatqılar əlavə etməklə həm cibimizə girir, həmçinin də ekologiyaya ziyan vururlar: "Sürücülər YDM-də avtomobilə yanacağı doldurub evə gəlir, sürməmiş görür ki, dünənki şkala aşağı düşüb. Yaxud da yanacaq vuranda şkala yanacaq çəninin dolu olduğunu göstərsə də, az keçmir aşağı düşür. Məlum olur ki, yanacağa qatılan qatqılar benzinin keyfiyyətini dəyişir və nəticədə mühərrikdə alışma daha sürətli gedir. Bu səbəbdən də benzin tez qurtarır".
E. Muradlı bildirib ki, yanacağa müxtəlif qatqılar qatdıqdan sonra "oktan" qaldıran maddələr də əlavə edir. Bu isə yanacağın tərkibini dəyişir.

Çənləri təmizləmək onlara sərf etmir

Ekspert bildirir ki, YDM-lər yanacaq saxlanılan çənləri vaxtı-vaxtında təmizləməlidirlər. Amma bu YDM-lərin gəlirinə təsir etdiyi üçün onlar çənləri təmizləmirlər: "YDM-lər benzinin saxanma qaydalarına əməl etmirlər. YDM-lər çəni yumaq üçün bir neçə gün təmizləmə işləri aparmalıdırlar. Bunun üçün yanacaq çəni boşaldılmalı, bir neçə gün boş saxlanılmalıdır ki, onun içində təmizlik işi aparıla bilsin. Bu da YDM-lərin gəlirinə təsir göstərir. Ona görə də çəndə olan çöküntü təmizlənmir".
Ekspert deyir ki, YDM-lər keyfiyyətsiz yanacağa qatqı əlavə etməklə həm yanacağın həcmini azaldır, həmçinin də avtomobili sıradan çıxardırlar: "YDM-lər bizim cibimizə ikiqat ziyan vururlar. Onlar həm yanacaq satanda yanacağın həcmində bizi aldadır, həmçinin də keyfiyyətsiz yanacaq satmaqla avtomobilin hissələrinin tez sıradan çıxamasına səbəb olurlar. Onların bu əməli cinayətdir. Hüquq mühafizə orqanları YDM-lərdə keyfiyyətsiz yanacaq satışının üstünə ciddi düşməli, bunu araşdırıb həmin şirkətlərin rəhbərlərini məsuliyyətə cəlb etməldirlər".

Sürücülər nəyi bilməlidirlər?

Nəqliyyat eksperti Eldəniz Cəfərov isə Sputnik Azərbaycan-a açıqlamasında bildirib ki, Azərbaycana əsasən yüksək keyfiyyətli Aİ 95 markalı benzin xaricdən idxal olunur. Ölkədə benzin istehlakının 90 faizindən çoxu Aİ-92 markalı benzinin payına düşür. Aİ -92 markalı benzin isə ölkəmizdə istehsla olunur.
Ekspert deyir ki, yanacağın keyfiyyətindən sürücülər də narazıdır:
"SOCAR sözçüsünün açıqlaması isə sürücülərin haqlı olduğunu təsdiqləyir. Ona görə də benzinin standartını ölçən, həmin şirkətlərdə yoxlama aparan dövlət qurumları nəticəni ictimaiyyətə açıqlamalıdırlar. Sürücülər də bilməlidir ki, yanacağa hansı qatqılar qatılır,bunu hansı YDM-lar edir. Çünki, keyfiyyətsiz yanacaq səbəbindən avtomobillər nasaz vəziyyətə düşüb qəza şəraiti yaradır".

Ekspert bildirir ki, satılan yanacağın keyfiyyəti daim diqqətdə saxlanılmalıdır.

Hər həftə şikayət var

Azad İstehlakçılar Birliyinin sədri Eyyub Hüseynov Sputnik Azərbaycan-a açıqlamasında bildirib ki, istehlakçılardan AİB-ə YDM-lərlə bağlı hər həftə bir neçə şikayət daxil olur. Əsas şikayətlər isə yanacağın həcminin az vurulması və keyfiyyətinin aşağı olması ilə bağlıdır. E. Hüseynov deyir ki, hazırda Azərbaycanda yanacağın tərkibinin yoxlanılması üçün özəl laboratoriyalar yoxdur: "Əgər vətəndaş hansısa YDM-in yanacağından narazıdırsa, bunu ancaq dövlət ekspertizasından keçirdərək öyrənə bilər. Bizim həmin yanacağın tərkibini xarici ölkələrdə təhlil etmək imkanlarımız var. Amma məhkəmələr xarici ölkələrdə, həmçinin özəl laboratoriyalarda aparılan yoxlamanın nəticəsini hüquqi sənəd kimi qəbul etmir".

Dövlət Xidməti SOCAR rəsmisinin sözünü təkzib edir

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətindən isə Sputnik Azərbaycan-ın sorğusuna cavabda bildirilib ki, Xidmətin tabeliyində olan “Azərbaycan Standartlaşdırma İnstitutu” publik hüquqi şəxsin Neft-Qaz və Neft-Kimya məhsullarının sınaq laboratoriyası tərəfindən “SOCAR-Petroleum” QSC-yə məxsus yanacaqdoldurma məntəqələrindən mütəmadi olaraq sınaqların aparılması üçün yanacaq nümunələri götürülür. Sınaqlar, ГОСТ 2517-2012 "Нефть и нефтепродукты. Методы отбора проб" dövlətlərarası standartın 4.4-cü bəndinin tələblərinə uyğun müntəzəm olaraq dizel, A-92, A-95 və A-98 markalı benzin yanacaqlarından nümünələri götürülməklə, AZS 376-2009 "Dizel yanacağı. Texniki şərtlər", AZS 059-2001 “Etilsiz avtomobil benzinləri. Texniki şərtlər", AZS 388-2011 "Motor yanacaqları. Etilsiz benzin. Texniki şərtlər" dövlət standartlarının tələblərinə uyğun yanacaqların keyfiyyətinin yoxlanılması üçün aparılır.
Cari il ərzində “SOCAR-Petroleum” QSC-yə məxsus müxtəlif yanacaqdoldurma məntəqələrindən dizel, A-92, A-95 və A-98 markalı benzin yanacaqları üzrə götürülən nümunələrdə hər hansı nöqsan və qatqı aşkar edilməyib.
Qurumdan həmçinin sorğumuza verilən cavabda qeyd olunub ki, yanacağın saxlanılmasına, keyfiyyətinə və təhlükəsizliyinə dair tələbləri müəyyən edən altı dövlət standartı və digər normativ aktlar mövcuddur:
1. AZS 059-2001 «Etilsiz avtomobil benzinləri. Texniki şərtlər.»
2. AZS 072-2001 «İlkin emal benzini. Texniki şərtlər.»
3. AZS 388-2011 «Motor yanacaqları. Etilsiz benzin. Texniki şərtlər.»
4. AZS 376-2009 «Dizel yanacağı. Texniki şərtlər.»
5. AZS 380-2011 «Dizel yanacağı. Texniki şərtlər.»
6. AZS 381-2011 «Avro dizel yanacağı. Texniki şərtlər.» dir.

Sürücülər sınadıqları YDM-a üstünlük verir

Qeyd edək ki, dövlət qurumu rəsmi sorğumuza verdiyi cavabda yoxlamalar zamanı nöqsanların aşkarlanmadığını bildirsə də, sürücülər bunun əksini söyləyirlər. Hətta sürücülər daha keyfiyyətli yanacaq almaq üçün bəzən uzaq məsafə qət edirlər.
Sürücü Fəxriyyə Kazımova Sputnik Azərbaycan-a açıqlamasında bildirib ki, paytaxtda fəaliyyət göstərən YDM-lardan iki adda YDM-nın yanacağı qismən keyfiyyətlidir:
"Mən avtomobilimə yanacaq vurmaq üçün yaxında yerləşən və yolumun üstündəki YDM-nı yox, keyfiyyətli yanacaq satanı seçirəm. Bakıda iki YDM nisbətən daha keyfiyyətli yanacaq satır. Elə YDM-lar var ki, nəinki yanacağı keyfiyyətsizdir, həcmdə də aldadır. Ona görə məcbur olub sınadığım YDM-a gedirəm".

Sürücü bildirir ki, yanacağın keyfiyyətini avtomobilin işləməsindən bilir: "Çöküntüsü çox olan yanacaq vurduqda avtomobil yaxşı işləmir. Ona görə sınadığım uzaq olsa da, YDM-a gedirəm ki, keyfiyyətli benzin alım".

36 YDM-nın adı niyə ictimaiyyətə açıqlanmır?

Xatırladaq ki, bu ilin fevral ayında Antiinhisar və İstehlak Bazarına Nəzarət Dövlət Xidmətinin apardığı monitorinqin nəticəsi olaraq avtomobil yanacağının keyfiyyətində problemlər aşkarlanıb. Dövlət Xidmətinin rəis müavini Məmməd Abbasbəyli yanacağın keyfiyyəti ilə bağlı çoxsaylı müraciətlərin daxil olduğunu söyləyib:
"Tərəfimizdən aparılan monitorinqlərə əsasən, bu şikayətlər əsaslıdır. Monitorinqin nəticəsi olaraq yanacağın keyfiyyətində problemlər aşkarlanıb. Tərəfimizdən 36 yanacaqdoldurma məntəqəsində (YDM) müşahidələr aparılıb və onların əksəriyyətində kənarlaşmalar müşahidə edilib. Yeni standart hazırlanır. Bu standarta yanacağın istehsalından və yaxud idxalından tutmuş istehlakçıya qədər olan bütün keyfiyyətə nəzarət prosesləri daxil olacaq. Hazırda yeni standart razılaşdırılmanın son mərhələsindədir və bu yaxında onun tətbiqi nəzarətin gücləndirilməsinə səbəb olacaq".

Bütöv.az