Azərbaycan Respublikasının Prezidenti İlham Əliyevin Bakı şəhərində yaşıllıqların salınması və onların genişləndirilməsinə olan diqqət və qayğısının bariz nümunəsidir ki, hər il paytaxtın rayonlarında minlərlə yeni ağaclar əkilir, onlara qulluq göstərilir, yeni-yeni yaşıllıq zonaları, istirahət parkları salınır. Bu işlər çərçivəsində paytaxtın bütün rayonlarında iməciliklər keçirilir. Növbəti iməcilik Bakı şəhərinin Səbail və Qaradağ rayonlarında təşkil olunub.
Bakı Şəhər İcra Hakimiyyətindən AZƏRTAC-a bildiriblər ki, iməcilikdə hər iki rayonun rəhbərliyinin, ictimaiyyətin, idarələrin və təşkilatların nümayəndələrinin, təsərrüfat xidmətlərinin, gənclərin iştirak ediblər. İməcilik Səbail rayonunda Şıx yaşayış massivindəki “Dostluq parkı”nda 200 nəfərin, Qaradağ rayonunda isə Lökbatan dairəsindən Yeni Yasamal yaşayış massivi istiqamətində gedən avtomobil yolunun qərb hissəsində və Lökbatan qəsəbəsində 300 nəfərin iştirakı ilə keçirilib.
İməcliklərdə zamanı ərazində təmizlik işləri görülüb, mövcud ağacların dibi quru otlardan təmizlənib, yeni əkiləcək ağaclarin damcı üsulu ilə suvarılması üçün su xətləri çəkilib, köhnələri isə təftiş olunub.
Hər iki rayonda keçirilən iməclikdə Abşeron yarımadasının iqliminə uyğun 1500 ədəd yeni zeytun və badam ağacları əkilib, əvvəl əkilən ağaclara qulluq göstərilib. İlboyu göstərilən qulluq nəticəsində ötən il əkilmiş ağacların çox böyük əksəriyyətinin boy atdığı müşahidə olunub. Bununla da rayonlarda badam ağacları əkilmiş zolaqların və ərazilərin yaradılmasına başlanılıb.
Paytaxtımızda keçirilən iməclik və ağacəkmə aksiyaları ekoloji tarazlığın bərpası və ətraf mühitin təhlükəsizliyinin, insanların sağlamlığının təmin edilməsi, şəhərimizin daha da gözəlləşməsi istiqamətində görülən işlərin davamı olub.
Mövsüm ərzində Bakı şəhərində ərazilərin yaşıllaşdırılması, yeni ağacların əkilməsi, yaşıllıqlara qulluq və abadlıq işləri ilə bağlı iməcliklər davam etdiriləcək.