Noyabrın 6-da Əmək və Əhalinin Sosial Müdafiəsi Nazirliyi yanında Dövlət Sosial Təminat Xidmətinin rəisi Çingiz Əliyev keçirdiyi brifinqdə ünvanlı dövlət sosial yardımlarının təyinatı və ödənişinə nəzarətin həyata keçirilməsinin Əmək və Əhalinin Sosial Müdafiəsi Nazirliyinin mühüm fəaliyyət sahələrindən biri olduğunu qeyd edərək bildirib ki, bu sahədə ötən müddətdə yol verilmiş nöqsanların, korrupsiyaya şərait yaradan halların aradan qaldırılması, şəffaflığın təmin olunması istiqamətində nazirliyin yeni rəhbərliyi tərəfindən artıq müvafiq tədbirlərə başlanılıb. Aztəminatlı əhali qrupları bu tədbirlərin müsbət nəticələrini yaxın vaxtlarda hiss edə biləcəklər.

Əhalinin sosial müdafiəsi mərkəzlərinin (ƏSMM) direktorlarının iştirakı ilə nazirlikdə iclas keçirildiyini diqqətə çatdıran Çingiz Əliyev iclasda ünvanlı sosial yardımların təyin olunması və ödənişi işlərində hər hansı neqativ hala yol verilməməsi və şəffaflığın təmin olunması ilə bağlı əmək və əhalinin sosial müdafiəsi naziri Səlim Müslümov tərəfindən mərkəz direktorlarına ciddi tapşırıqlar verildiyini vurğulayıb.


Qeyd olunub ki, korrupsiya əməlinə yol verən əməkdaşlarla bağlı ciddi tədbirlər görüləcək. Eyni zamanda, hüquq- mühafizə orqanları ilə bu sahədə müvafiq nəzarət formalarının tətbiq olunması məqsədilə söhbətlər aparılıb və yardımların təyinatı işlərində qanunsuzluğa yol verən əməkdaşların ifşa olunaraq cəzalandırılması üçün birgə tədbirlər görüləcək.

Çingiz Əliyev bu ay ünvanlı yardım alacaq 134 mindən artıq ailəyə KİV vasitəsilə müraciət edərək, bildirib ki, təyin olunmuş yardımların alınması üçün onlara banklar tərəfindən verilmiş plastik kartları heç bir halda mərkəz əməkdaşlarına verməsinlər .Heç bir əməkdaş vətəndaşları onlara təyin olunmuş yardımı onlarla bölüşməyə təhrik edə bilməz. Belə hallarla üzləşənlər nazirliyin 142 - Qaynar xəttinə, yaxud (012) 595 53 81, (012) 595 04 28 və (012) 595 04 26 nömrəli telefonlara müraciət etməlidirlər.