"Polis haqqında" Azərbaycan Respublikasının Qanununda edilən dəyişikliklər mayın 13-dən etibarən qüvvəyə minib.


Butov.az Bizimyol.info-ya istinadən xəbər verir ki, mütəxəssislərin fikrincə, dəyişiklik polis əməkdaşlarının xarici dil bilməsinə zərurəti əhəmiyyətli dərəcədə artıracaq.

Ekspert Ərşad Hüseynov sadə misal gətirərək yeni qanun barədə münasibət bildirib.

“Məsələn, bundan sonra Tanzaniyadan Azərbaycana gəlmiş və yalnız bantu dilini bilən şəxs hər hansı hüquq pozuntusuna görə saxlanılarkən polis əməkdaşı ona saxlanılma səbəbini, şübhənin mahiyyətini, müdafiəçinin yardımından istifadə etmək hüquqlarını məhz bantu dilində izah etməlidir”,-deyə Ə.Hüseynov qeyd edib
Ekspert polisin bantu dilini bilmədiyi halda məsələnin izahı üçün dərhal bu dili bilən tərcüməçinin dəvət olunmasının vacibliyini diqqətə çatdırıb.

Qeyd edək ki, Milli Məclis tərəfindən "Azərbaycan Respublikasının Cinayət-Prosessual Məcəlləsində dəyişikliklər edilməsi haqqında" Qanununa uyğunlaşdırmaq məqsədi ilə "Polis haqqında" Qanuna edilən dəyişiklikdə bildirilir: ""Polis haqqında" Azərbaycan Respublikası Qanununun 23-cü maddəsinin I hissəsinin 3-cü bəndində "əsaslarını" sözü "səbəbini, şübhənin mahiyyətini" sözləri ilə əvəz edilsin və həmin bəndə "hüquqlarını" sözündən sonra "ona aydın olan dildə" sözləri əlavə edilsin".