Təhsil Nazirliyi müəllimlərin etiraz aksiyası keçirməsinə rəsmi münasibət bildirib.
Butov.az xəbər verir ki, Nazirliyin mətbuat xidmətinin rəhbəri Cəsarət Valehov AzVision.az-a açıqlamasında bildirib ki, müəllimlərin Təhsil Nazirliyi qarşısında etiraz aksiyası keçirməsi xəbəri düzgün təqdim edilməyib.
“Heç bir etiraz aksiyasından söhbət gedə bilməz. Sumqayıt şəhərində yerləşən 11 saylı məktəbdən 12 müəllim gəlmişdi, biz onlarla söhbət etdik və müvafiq olaraq onların fikirləri dinlənildi. Həmin müəllimlərin işlə təminatı ilə bağlı araşdırıma aparılıb, yaxın vaxtlarda onlara məlumat veriləcək”.
C.Valehov bildirib ki, həmin müəllimlər inklüziv təhsil layihəsi çərçivəsində işlə təmin olunanlar olub.
“Onlar müəllim deyillər, müəllim köməkçisi və ya bu statusda layihə çərçivəsində işləyən insanlar olub. İnklüziv təhsil 2005/2006-ci il və 2015/2016-ci tədris ilini, yəni 10 ili əhatə edən layihə olub. Bu layihə çərçivəsində onlar işə alınıb və layihənin müddəti bitdiyi işdən azad olunublar. Amma onların müvafiq məktəbdə bu və ya digər işlə təmin olunması ilə bağlı özləri ilə fərdi qaydada söhbət aparıldı. Bu sahədə imkanlar araşdırılıb, hansı qaydada qərar veriləcəyi ilə bağlı onlara yaxın vaxtlarda məlumat veriləcək”.