2017-2018-ci tədris ili üçün Bakı şəhərinin ümumi təhsil məktəblərinin 1-ci siniflərinə 46 minə yaxın uşağın qəbul olunacağı proqnozlaşdırılır.
Butov.az xəbər verir ki, Bakı Şəhəri üzrə Təhsil İdarəsindən "Ölkə.Az"a verilən xəbərə görə, ümumi təhsil məktəblərinin və Təhsil Nazirliyinin birbaşa tabeliyindəki lisey və gimnaziyaların I sinfinə şagird qəbulu elektron sistem vasitəsilə həyata keçirilir.

Martın 15-dən sentyabrın 15-dək həyata keçiriləcək I sinfə şagird qəbulu prosesi çərçivəsində elektron sistem vasitəsilə 44 000-dən çox uşağın ərizəsi qeydiyyata alınıb.

BŞTİ-nin tabeliyində 307 ümumi təhsil məktəbi, 3 xüsusi ümumi orta məktəb və 7 əyani-qiyabi axşam məktəbi olmaqla, cəmi 317 məktəb fəaliyyət göstərir. Ümumi təhsil məktəblərində ümumilikdə 28 165 müəllim çalışır. 2016-2017-ci tədris ili ərzində BŞTİ-nin tabeliyində olan ümumi təhsil məktəblərində 387 373, xüsusi ümumi orta məktəblərdə (xüsusi siniflərdə) 2 327, əyani-qiyabi axşam məktəblərində (qruplarında) isə 2 603 şagird olmaqla, ümumilikdə 392 303 şagird təhsil alıb. BŞTİ-nin tabeliyindəki ümumi təhsil məktəblərini IX sinif üzrə 27 708, XI sinif üzrə 19 525, XII sinif üzrə 599 nəfər bitirib.