Azərbaycan Milli Elmlər Akademiyasının (AMEA) Folklor İnstitutunun “Dədə Qorqud” şöbəsinin müdiri, filologiya üzrə elmlər doktoru, professor Ramazan Qafarlının rəhbərliyi ilə Türkiyənin paytaxtı Ankarada II Beynəlxalq elmi araşdırmalar konqresi keçirilib.
Butov.az xəbər verir ki, Folklor İnstitutundan AZƏRTAC-a bildirilib ki, Azərbaycan, Türkiyə, Qazaxıstan, Özbəkistan, Qırğızıstan, Ukrayna, Rusiya və Moldovadan alimlərin iştirak etdiyi beynəlxalq konfransda texniki və humanitar elm sahələrini əhatə edən doqquz bölmə üzrə 98 məruzə dinlənilib, müzakirələr aparılıb.
Konfransda professor Ramazan Qafarlının “Dədə Qorqud” eposunun “Türkmən-lisani” nüsxəsinin struktur-semantik xüsusiyyətləri”, Azərbaycan Dövlət Pedaqoji Universitetinin professoru Həcər Hüseynovanın “Türk dilinin dünya dillərinə təsiri (rus dili)” mövzularında məruzələri maraqla qarşılanıb. Tədbirdə, həmçinin Bakı Dövlət Universitetinin dosenti Güləhməd İmanov və AMEA-nın Folklor İnstitutunun dosenti Aynur Cəlilova məruzələrlə çıxış ediblər.
Konfrans iştirakçılarına R.Qafarlının imzaladığı sertifikatlar təqdim edilib.
Tədbir çərçivəsində gənc alim Əlvan Cəfərovun Türkiyənin İksad nəşriyyatında çap olunan “Azərbaycan Respublikasının Ağdam rayonu dialektlərinin toplanması və linqvistik təhlili” kitabının imza günü keçirilib.
Konfransın yekun iclasında professor Ramazan Qafarlı xüsusi diplomla mükafatlandırılıb.