19-02-2026, 15:48
İran vətəndaşından 25 kq narkotik alan şəxslər həbs edildi - VİDEO
DİN-in Baş Narkotiklərlə Mübarizə İdarəsinin əməkdaşları tərəfindən narkotik vasitələrin qanunsuz dövriyyəsinə qarşı əməliyyatlar davam etdirilir.
Daxili İşlər Nazirliyindən verilən məlumata görə, növbəti tədbirlər zamanı əvvəllər oğurluq və narkotiklərin satışı ilə məşğul olduqlarına görə məhkum olunmuş Namik Şirinov və Əliağa Novruzov saxlanılıblar. Onlardan 25 kiloqram tərkibinə zərərli maddələr əlavə edilmiş marixuana aşkarlanıb.
N.Şirinov və Ə.Novruzovun şəxsiyyəti istintaqla araşdırılan İran vətəndaşı ilə cinayət əlaqəsinə girərək narkotik vasitələri müxtəlif ünvanlara yerləşdirməyi planlaşdırdıqları məlum olub.
Faktlarla bağlı cinayət işləri başlanılıb, saxlanılan şəxslər barəsində məhkəmənin qərarı ilə həbs qətimkan tədbiri seçilib.
19-02-2026, 15:30
Azərbaycanda xarici məhkəmə qətnamələri icra olunur
Xarici məhkəmələrin qətnamələrinin tanınması və icrası barədə işlər üzrə icraat göstəricilərində artım müşahidə olunub.
Bu barədə məlumat Azərbaycan Respublikasının Ali Məhkəməsinin 2025-ci il üzrə fəaliyyətinə dair hesabatında öz əksini tapıb.
2024-cü ildə bu kateqoriya üzrə cəmi icraat 372 iş olduğu halda, 2025-ci ildə bu rəqəm 416-ya yüksəlib ki, bu da 11,8 faiz artım deməkdir. Ötən hesabat dövründən qalıq keçən işlərin sayı 39-dan 49-a çatıb və 25,6 faiz artım qeydə alınıb.
Hesabat dövründə daxil olan işlər 333-dən 367-yə yüksəlib ki, bu da 10,2 faiz artım deməkdir.
Yekunlaşdırılmış işlərin sayı 2024-cü ildə 323, 2025-ci ildə isə 378 olub. Beləliklə, 17 faiz artım qeydə alınıb. Növbəti hesabat dövrünə qalıq keçən işlər isə 49-dan 38-ə enərək 22 faiz azalıb.
Yekunlaşdırılmış 378 iş üzrə qətnamələrin tanınma və icra proseduruna görə təhlil göstərir ki, 324 iş (85,7 faiz) xarici məhkəmə qətnamələrinin tanınması, 54 iş (14,3 faiz) isə həm tanınması, həm də icrası ilə bağlı olub. 2024-cü ildə bu göstəricilər müvafiq olaraq 277 iş (89,4 faiz) və 46 iş (10,6 faiz) təşkil edib.
Bundan əlavə, mübahisələrin mahiyyətinə görə bölgüdə 338 iş və ya 89,4 faiz nikahın pozulması ilə bağlı olub. Aliment tələbi üzrə 11 iş (2,9 faiz), uşağın yaşayış yerinin müəyyən edilməsi üzrə 5 iş (1,3 faiz), uşaqlığa götürmə üzrə 2 iş (0,5 faiz), adın dəyişdirilməsi üzrə 2 iş (0,5 faiz), pul vəsaitinin tutulması üzrə 16 iş (4,2 faiz), vərəsəlik şəhadətnaməsinin verilməsi üzrə 1 iş (0,3 faiz) qeydə alınıb. Ümumi yekunlaşdırılmış işlərin sayı isə 378 olub.
19-02-2026, 15:26
Üç rayonda itkin şəhidlərimiz torpağa tapşırıldı
Fevralın 19-da Birinci Qarabağ müharibəsinin itkin şəhidləri Vüqar Səlim oğlu Babayev Göyçayda, Azad Sabir oğlu Cəlilov Ucarda, Fərman Məhəmməd oğlu Feyzullayev İsmayıllıda dəfn olunublar.
Vida mərasimlərindən sonra Vüqar Səlim oğlu Babayev Göyçay şəhər Şəhidlər xiyabanında, Azad Sabir oğlu Cəlilov Ucar rayonunun Alpoud kəndində, Fərman Məhəmməd oğlu Feyzullayev isə İsmayıllı rayonunun İstisu kənd qəbiristanlığında torpağa tapşırılıb.
Dəfn mərasimlərində hərbi orkestrin müşayiəti ilə Dövlət Himni ifa olunub, yaylım atəşi açılıb. Mərasimdə yerli sakinlər, şəhidlərin ailə üzvləri, qazilər, eləcə də rayon icra hakimiyyətinin, hüquq-mühafizə orqanlarının əməkdaşları, ictimaiyyət nümayəndələri iştirak ediblər.
Qeyd edək ki, Vüqar Səlim oğlu Babayev 1972-ci il aprelin 16-da Göyçayın Qarabaqqal kəndində anadan olub. 1994-cü il fevralın 12-də Kəlbəcər rayonunun Yanşaq kəndi istiqamətində gedən döyüşlər zamanı itkin düşmüş sayılırdı.
Azad Sabir oğlu Cəlilov 1975-ci il fevralın 14-də Ucarın Alpout kəndində anadan olub. 1994-cü il fevralın 6-da Kəlbəcər rayonunun Bağırlı kəndi, Murovdağ silsiləsində gedən döyüşlər zamanı itkin düşmüşdü.
Fərman Məhəmməd oğlu Feyzullayev 1971-ci il aprelin 20-də İsmayıllı rayonunun İstisu kəndində anadan olub. O, 1994-cü ildə Kəlbəcər rayonu, Murovdağ silsiləsində gedən döyüşlər zamanı itkin düşmüş sayılırdı.
Uzun illər itkin hesab olunan hərbçilərimizin nəşlərinin qalıqları müvafiq ekspertiza və eyniləşdirmə prosedurlarından sonra müəyyən edilərək ailələrinə təhvil verilib.
19-02-2026, 15:13
Ucarda zəncirvari qəza - 6 nəfər xəsarət aldı
Ucar rayonunda zəncirvari yol-nəqliyyat hadisəsi qeydə alınıb.
Hadisə günorta saatlarında Bakı–Qazax avtomobil yolunun rayonun Müsüslü kəndi ərazisindən keçən hissəsində baş verib.
İlkin məlumata görə, yolun 217-ci kilometrliyində eyni istiqamətdə hərəkətdə olan minik, yük və mikroavtobus markalı nəqliyyat vasitələri toqquşub. Toqquşmadan sonra minik avtomobili yoldan çıxaraq çökəyə düşüb.
Qəza nəticəsində 6 nəfər Ucar rayon sakinləri - 1975-ci il təvəllüdlü Səidə Mirzalı qızı Baxşəliyeva, 1966-cı il təvəllüdlü Zalikə Mirzalı qızı Salikova, 1973-cü il təvəllüdlü Vəfa Qarapaşa qızı Baxşəliyeva, 1985-ci il təvəllüdlü Şərqiyə Vidadi qızı Rəhimova, 1952-ci il təvəllüdlü Aruza Mustafakamal qızı Məmmədova və 1967-ci il təvəllüdlü Şəfaqət Mirzalı qızı Rəhimova xəsarət alıblar. Yaralılar təcili tibbi yardım avtomobilləri ilə Ucar Rayon Mərkəzi Xəstəxanasına çatdırılıblar.
Faktla bağlı araşdırma aparılır.
19-02-2026, 15:03
Şəhid Nail Dənziyev Lerikdə dəfn edildi - FOTO
Birinci Qarabağ müharibəsində itkin düşmüş hesab olunan Nail Fahil oğlu Dənziyevin nəşinin qalıqları Lerik rayonunda torpağa tapşırılıb.
Lerik rayonunun Mastail kənd sakini, 1974-cü il təvəllüdlü Nail Fahil oğlu Dənziyevin nəşinin qalıqları aparılan araşdırmalardan sonra aşkar edilərək eyniləşdirilib.
Nail Dənziyev 1992-ci ilin sentyabrında Sırxavənd istiqamətində gedən döyüşlər zamanı itkin düşmüşdü. 18 yaşında Vətən qarşısında borcunu yerinə yetirərkən itkin düşən hərbçi uzun müddət itkin hesab olunub. 1997-ci ilin fevralında ona rəsmi olaraq şəhid statusu verilib.
Dəfn mərasimində Lerik rayon ictimaiyyətinin nümayəndələri, şəhid ailələri, qazilər, hüquq-mühafizə orqanlarının əməkdaşları və rayon sakinləri iştirak ediblər.
Şəhidin xatirəsi ehtiramla anılıb, ruhuna dualar oxunub. Dövlət Himni səsləndirilib, tabutuna bükülmüş üçrəngli Azərbaycan Bayrağı ailəsinə təqdim olunub.
Şəhidin nəşinin qalıqları yaylım atəşi altında torpağa tapşırılıb.
18-02-2026, 22:45
İsrail parlamentində İrana qarşı mümkün müharibə müzakirə olunur
İsrail parlamentində İrana qarşı mümkün müharibəyə hazırlıq məsələlərinin müzakirə edildiyi bildirilir.
İsrail dövlət televiziyası “KAN”ın məlumatına görə, Knessetin Xarici Əlaqələr və Təhlükəsizlik Komitəsinin iclasında İsrail Ordusunun Daxili Cəbhə Komandanlığının katibi Şai Klapper təhlükəsizliklə bağlı qiymətləndirmə təqdim edib.
Məlumata əsasən, iclas əsasən İsrail ərazisinə raket və pilotsuz uçuş aparatları ilə mümkün hücum ssenariləri üzərində cəmləşib. Yedioth Ahronoth yazır ki, Klapperin komitə üzvləri ilə görüşü məxfi təhlükəsizlik qiymətləndirməsi xarakteri daşıyıb və İran tərəfinin raket və PUA buraxılışına hazırlıq ehtimalları müzakirə edilib.
Komitə sədri, “Likud” partiyasından olan deputat Boaz Bismuth iclasdan sonra verdiyi açıqlamada bildirib ki, İsrail İran məsələsində çətin dövrdən keçir. Onun sözlərinə görə, İsraildə gün ərzində bir neçə dəfə İranla bağlı hücumun nə vaxt başlayacağını düşünməyən vətəndaş demək olar ki, yoxdur.
Bismut iddia edib ki, İsrail cəmiyyəti mümkün ssenarilərə qarşı hazırlıq içindədir və ölkə istənilən vəziyyətə hazır olmağa çalışır.
Digər tərəfdən, xəbərlərdə qeyd olunur ki, İranla ABŞ arasında aparılan danışıqlara baxmayaraq, tərəflər arasında etimad mühiti formalaşmayıb. Bildirilir ki, nüvə məsələsində müəyyən irəliləyiş olsa da, Tehranın ballistik raket proqramı və “vekil qüvvələrə” dəstək mövzusunu müzakirə etməkdən imtina etməsi Vaşinqtonda nikbinliyi azaldıb.
Məlumata görə, Cenevrədə keçirilən ABŞ–İran danışıqlarının uğursuzluqla nəticələnə biləcəyi ehtimalı İsraildə ciddi şəkildə nəzərə alınır. “Kanal 12” İsrailli rəsmi mənbəyə istinadən xəbər verir ki, danışıqlar kritik mərhələyə çatıb və Tel-Əviv mümkün iflas ssenarisinə qarşı hazırlıqlar görür.
Xəbərdə həmçinin qeyd olunur ki, İsraildə belə bir fikir formalaşıb: ABŞ Prezidenti Donald Tramp İrana qarşı hücum variantını gündəmdə saxlayır, lakin hərbi addımı legitimləşdirmək üçün əvvəlcə diplomatik imkanların tükənməsini gözləyir. Bu səbəbdən Tel-Əvivdə diplomatiya üçün vaxtın daraldığı və ölkənin “istənilən an hücum başlaya bilərmiş kimi” hazırlıqlı olması lazım olduğu düşünülür.
18-02-2026, 22:40
Azərbaycanda yeni dövlət qurumu yaradıldı
Azərbaycan Respublikası Maliyyə Nazirliyi yanında Dövlət Müəssisələrinin Monitorinqi Agentliyi yaradılaraq, onun əsasnaməsi təsdiq edilib.
Sözügedən agentliyin yaradılması barədə qərar fevralın 18-də Azərbaycan Respublikası Maliyyə Nazirliyində keçirilən növbəti Kollegiya iclası zamanı qəbul olunub.
Bundan başqa nazirliyin və strukturuna daxil olan digər qurumların əsasnamələrinə yeni səlahiyyətlərin əks etdirilməsi üçün müvafiq dəyişikliklər edilib.
18-02-2026, 19:14
Temperatur 4-6 dərəcə enəcək, bəzi yerlərdə qar yağacaq
Fevralın 19-u Azərbaycanın şimal və qərb rayonlarından başlayaraq 20-si səhərədək bəzi yerlərdə hava şəraitinin arabir yağıntılı olacağı, dağlıq ərazilərdə qar yağacağı gözlənilir.
Bu barədə Milli Hidrometeorologiya Xidməti məlumat yayıb.
Məlumata əsasən, ayrı-ayrı yerlərdə yağıntıların intensiv olacağı ehtimalı var.
Havanın temperaturu ötən günlərlə müqayisədə tədricən 4-6 dərəcə enəcək. Böyük və Kiçik Qafqazın bəzi çaylarında sululuğun artacağı ehtimalı var.
18-02-2026, 18:58
On şagirdin zəhərləndiyi məktəb bufeti BAĞLANDI
Göygöldə 10 şagirdin zəhərləndiyi məktəbin bufeti bağlanıb.
Bu barədə Qida Təhlükəsizliyi Agentliyi məlumat verib.
Qeyd olunub ki, Göygöldə baş verən hadisə ilə əlaqədar AQTA-nın Gəncə-Daşkəsən Regional Bölməsi tərəfindən rayonun Aşıqlı kənd məktəbinin daxilində fəaliyyət göstərən bufetdə plandankənar yoxlama keçirilib.
"Satılan məhsullardan laborator müayinələr üçün nümunələr götürülüb. Bufetin fəaliyyəti müvəqqəti olaraq dayandırılıb", - deyə məlumatda vurğulanıb.
18-02-2026, 18:41
İranla müharibənin başlama ehtimalı ÇOX BÖYÜKDÜR
ABŞ-ın İrana qarşı hərbi əməliyyata başlama ehtimalı 90 faiz qiymətləndirilir.
Bu barədə "Axios" nəşri Ağ Evdəki anonim mənbəyə istinadla məlumat yayıb.
Mənbənin sözlərinə görə, ABŞ yaxın həftələrdə İrana qarşı genişmiqyaslı hərbi əməliyyata başlaya bilər. Ağ Ev daxilində bəzi rəsmilər ABŞ prezidenti Donald Trampı belə addımdan çəkindirməyə çalışsalar da, ehtimal yüksək qiymətləndirilir. Bildirilir ki, son 24 saat ərzində ABŞ Yaxın Şərqə 50 ədəd F-35, F-22 və F-16 qırıcı təyyarəsi göndərib.
Nəşrin yazdığına görə, mümkün əməliyyat bir neçə həftə davam edə və miqyasına görə tammiqyaslı müharibəyə bənzəyə bilər. Bu, son on ildə ABŞ-ın Yaxın Şərqdə ən böyük hərbi müdaxiləsi ola bilər.
Mənbələr əməliyyatda İsrailin də iştirak edə biləcəyini istisna etmirlər. İsrailli iki rəsmi ölkənin yaxın günlərdə müharibəyə hazırlaşdığını bildirib. Qeyd olunur ki, mümkün zərbələrin nəticələri 2025-ci ilin iyununda ABŞ və İsrailin İranın nüvə obyektlərinə qarşı keçirdiyi əməliyyatdan daha geniş və ciddi ola bilər.
Xatırladaq ki, fevralın 17-də İran və ABŞ arasında Omanın vasitəçiliyi ilə keçirilən danışıqların ikinci raundu başa çatıb. Hər iki tərəf müəyyən irəliləyiş olduğunu bildirsə də, ABŞ rəsmiləri Vaşinqtonla Tehran arasında fikir ayrılıqlarının aradan qaldırılmasının çətin olacağını vurğulayıblar.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!