1-05-2026, 11:39
Prezident Azərbaycan
güləşçilərinin tarixi uğurunu
yüksək qiymətləndirdi
İlham Əliyev Avropa çempionatında komanda hesabında çempion olan Azərbaycan güləşçilərini qəbul edərək onların qazandığı tarixi qələbəni yüksək qiymətləndirib. Dövlət başçısı bildirib ki, milli komandanın Tiranada əldə etdiyi uğur bütün xalqı sevindirib və bir daha sübut edib ki, Azərbaycan güləşi Avropada lider mövqeyindədir. Onun sözlərinə görə, müasir dövrdə güləş üzrə rəqabət daha da güclənsə də, Azərbaycan idmançıları peşəkarlıqları və iradələri sayəsində rəqiblərini ədalətli mübarizədə məğlub edərək böyük nailiyyətə imza atıblar.
Prezident qeyd edib ki, ölkədə güləşin zəngin ənənələri mövcuddur və bu ənənələr uğurla davam etdirilir. O, federasiyanın fəaliyyətini, məşqçilərin əməyini və idmançıların zəhmətini xüsusi vurğulayaraq hər birini təbrik edib.
Dövlət başçısı çıxışında vurğulayıb ki, beynəlxalq arenada Azərbaycan bayrağının yüksəldilməsi xalqda böyük qürur hissi yaradır və bu uğurlar gənc nəslin vətənpərvərlik ruhunda tərbiyəsinə mühüm töhfə verir. Onun sözlərinə görə, idman artıq cəmiyyətin ayrılmaz hissəsinə çevrilib və son illər bu sahədə əldə olunan nailiyyətlər ölkənin ümumi inkişafının göstəricisidir.
İlham Əliyev diqqətə çatdırıb ki, Olimpiya çempionları və tanınmış idmançıların federasiya rəhbərliyində və məşqçi heyətində təmsil olunması idmanın davamlı inkişafını təmin edir. Nəsillərin dəyişməsinə baxmayaraq, Azərbaycan idmanının uğurları davam edir və yeni zirvələr fəth olunur. Prezident əlavə edib ki, bölgələrdə idman infrastrukturunun genişlənməsi və Olimpiya idman komplekslərinin fəaliyyəti gələcək uğurlar üçün mühüm baza yaradır.
Ölkədə idmana dövlət səviyyəsində göstərilən qayğını qeyd edən dövlət başçısı bildirib ki, Azərbaycan həm Olimpiya Oyunlarında, həm də dünya və Avropa çempionatlarında uğurla təmsil olunur. O, qələbələrlə yanaşı, məğlubiyyətlərin də idmanın ayrılmaz hissəsi olduğunu vurğulayaraq əsas amilin idmançılarda güclü qələbə əzmi olduğunu deyib.
Prezident çıxışında həmçinin Azərbaycanın ev sahibliyi etdiyi beynəlxalq idman yarışlarının bu sahənin inkişafına verdiyi töhfələrə toxunub, Avropa Oyunları və İslam Həmrəyliyi Oyunları kimi mötəbər tədbirlərin ölkənin idman potensialını nümayiş etdirdiyini bildirib. Onun sözlərinə görə, regionlarda keçirilən yarışlar da idmanın kütləviliyinin artmasına xidmət edir.
Dövlət başçısı qadın güləşinin inkişafına da diqqət çəkərək bildirib ki, qızların medalçılar sırasında yer alması sevindiricidir və gələcəkdə onların daha böyük uğurlara imza atacağına inam böyükdür. O, milli komandada hökm sürən yüksək ruh və birlik mühitini də xüsusi qeyd edib.
Prezident sonda idmançıların yalnız yarış meydanında deyil, gündəlik həyatda da yüksək mənəvi keyfiyyətlər nümayiş etdirməsinin vacibliyini vurğulayıb. Onun sözlərinə görə, Azərbaycan idmançıları həm qələbə, həm də çətin anlarda ləyaqətli davranışları ilə nümunə olmalıdırlar və bu prinsip ölkəni beynəlxalq arenada layiqincə təmsil etməyin əsas şərtlərindən biridir.
Qeyd edək ki, Avropa çempionatında Abşeron Rayon İxtisaslaşdırılmış Olimpiya Ehtiyatları Uşaq-Gənclər İdman-Şahmat Məktəbinin 5 güləşçisi təmsil olunub. Həmçinin Azərbaycan Respublikasının Prezidenti ilə keçirilən görüşdə məktəbin yetirməsi Jalə Əliyeva da yer alıb.
Mais Məsimov,
Azərbaycan Respublikasının Əməkdar məşqçisi, SSRİ İdman Ustası,
Abşeron Rayon İxtisaslaşdırılmış Olimpiya Ehtiyatları Uşaq-Gənclər İdman-Şahmat Məktəbinin direktoru
1-05-2026, 07:17
Onkologiya Mərkəzindəki
partlayışı xəstə törədib
Aprelin 30-da saat 14 radələrində Səhiyyə Nazirliyinin Milli Onkologiya Mərkəzində partlayışın baş verməsinə dair Yasamal rayon prokurorluğuna məlumat daxil olub. Bu barədə Baş Prokurorluqdan məlumat verilib. Bildirilib ki, ilkin araşdırmalarla onkoloji xəstə kimi qeydiyyatda olan 1988-ci il təvəllüdlü Mübariz Sahib oğlu Əliyevin qanunsuz olaraq əldə edib saxlayaraq gəzdirdiyi partlayıcı vasitəni qeyd olunan müalicə müəssisəsinin Radiologiya şöbəsində partlatması nəticəsində həkim Asif Akif oğlu Nəsirovu ümumi təhlükəli üsulla qəsdən öldürməyə cəhd etməsinə əsaslı şübhələr müəyyən edilib.
Baş vermiş partlayış nəticəsində Mübariz Əliyev aldığı xəsarətlərdən hadisə yerində ölüb, ağır bədən xəsarətləri alan Asif Nəsirovun isə hazırda vəziyyəti ağır olub, müalicəsi xəstəxanada davam etdirilir.
1-05-2026, 07:11
Evlənənlər azalır
Azərbaycanda ailə quranların sayının kəskin azalması narahatlıq doğurub. Bu barədə politoloq Turab Rzayev qeyd edib.
O, bu ilin yanvar-fevral aylarındakı statistikaya - ailə quranların sayının əhalinin hər 1000 nəfərinə nisbətdə 3,2-yə düşməsinə diqqət çəkib və bunu “demoqrafik fəlakət” adlandırıb. Politoloq bildirib ki, 1000 nəfərə düşən nikah sayı Türkiyədə 6,6, Gürcüstanda 5,9, Ermənistanda 5,1, Macarıstanda 4,9, Almaniyada 4,2, Polşada 3,7, Yunanıstanda isə 3,5-dir. Avropa ölkələri uzun illərdir ki, nikah sayının aşağı düşməsi, əhali azalmasından əziyyət çəkir. Azərbaycan hətta Avropanın bəzi ölkələrində nikah sayında geri qalır.
Qeyd edək ki, daha əvvəl Azərbaycanda bu səviyyədə nikah azalması olmayıb. Ən aşağı göstərici 1942-ci ildə İkinci Dünya müharibəsinin davam etdiyi və 2020 ildə koronavirus pandemiyasının yayıldığı zaman qeydə alınıb. 1942-ci ildə əhalinin hər 1000 nəfərinə nikahların sayı 3,6, 2020-ci ildə isə 3,5 olub.
30-04-2026, 18:33
Əbu Zakarı öldürüldü
HƏMAS təşkilatının İsrail ordusuna qarşı hücum planlaşdıran üzvü zərərsizləşdirilib.
İsrail ordusundan verilən məlumata görə, “İsrail ordusu HƏMAS terror təşkilatının üzvü İbrahim Əbu Zakarı zərərsizləşdirib. O, yaxın vaxtlarda qüvvələrimizə qarşı terror hücumu həyata keçirməyi planlaşdırırdı və müharibə müddətində İsrail ordusu və dövlətinə qarşı bir çox terror əməliyyatlarına rəhbərlik edib.”
30-04-2026, 18:21
Merzdən Hörmüz açıqlaması:
Almaniya dəniz yollarının azadlığını təmin etmək üçün lazım gələrsə, hərbi güc tətbiq etməyə hazırdır.
Bunu bunu Almaniya kansleri Fridrix Merz deyib.
“İranın Hörmüz boğazını blokadaya almasını ən qısa zamanda dayandırmaqda qərarlıyıq. Lazımi şərtlər yerinə yetirilərsə, Almaniya gəmiçiliyin sərbəst fəaliyyətini təmin etmək üçün hərbi əməliyyatlara hazırdır.”
30-04-2026, 14:05
Ərdoğan Ermənistana dəvət olundu
Türkiyə Prezidenti Rəcəb Tayyib Ərdoğan Avropa Siyasi Birliyinin mayın 4-də İrəvanda keçiriləcək 8-ci toplantısına dəvət olunub.
Türkiyə mediasının yaydığı məlumata görə, hələlik Türkiyə tərəfinin rəsmi dəvətə cavabı məlum deyil.
30-04-2026, 13:50
Nikolu əsəbləşdirən sual
Bəzi Ermənistan KİV Şahin Mustafayevin İrəvana səfəri fonunda onun guya rəqslə qarşılanması ilə bağlı iddialar irəli sürüb. Ermənistanın Baş naziri Nikol Paşinyan isə Azərbaycan nümayəndə heyətinin səfərinin Beynəlxalq Rəqs Günü ilə əlaqələndirilməsinə münasibət bildirib və bunu əsassız yanaşma kimi qiymətləndirib. Baş nazir jurnalistlərin suallarını cavablandırarkən bu cür iddiaları tənqid edib.
Onun sözlərinə görə, səfərin hər hansı bayram və ya tədbirlə əlaqələndirilməsi mövzudan yayındırmaq cəhdidir:
“Bu məntiqlə yanaşsaq, istənilən günü digər hadisələrlə əlaqələndirmək olar. Bu, reallıqla bağlı deyil”.
N. Paşinyan əlavə edib ki, Ermənistan və Azərbaycan arasında münasibətlərin mərhələli şəkildə normallaşması və uzunmüddətli perspektivdə mehriban qonşuluq əlaqələrinin qurulması əsas məqsəd olaraq qalır.
30-04-2026, 12:52
Prezident çempion olan
güləşçiləri qəbul edib
Aprelin 30-da Azərbaycan Respublikasının Prezidenti İlham Əliyev Albaniyanın paytaxtı Tiranada keçirilmiş Avropa çempionatında komanda hesabında Avropa çempionu olan yunan-Roma güləşi və sərbəst güləş, həmçinin qadın güləşi üzrə medal qazanmış idmançıları və onların məşqçilərini qəbul edib.
Prezident İlham Əliyevin təbrik çıxışını təqdim edirik:
İlk növbədə, milli komandamızı Tiranada keçirilmiş Avropa çempionatında qazandığı böyük qələbə münasibətilə təbrik edirəm. Bu qələbə bizim hamımızı sevindirdi. Azərbaycan güləşçiləri bir daha göstərdilər ki, onlar Avropada birincidirlər. Avropa çempionatında komanda hesabında birinci olmaq, əlbəttə ki, böyük nailiyyətdir. Xüsusilə nəzərə alsaq ki, bu gün həm dünyada, həm Avropada güləş üzrə mübarizə daha gərgin keçir, bir çox ölkələrdən olan tanınmış güləşçilər böyük nəticələr göstərirlər və mübarizə də çox gərgin idi. Bəzi yarışları mən də izləmişəm və görmüşəm ki, bizim idmançılarımız öz peşəkarlığını göstərərək rəqibləri ədalətli mübarizədə məğlub etmişlər. Bu, əlbəttə, bütün xalqımızı sevindirir və bir daha göstərir ki, güləşimiz uğurla inkişaf edir. Güləşimizin böyük ənənələri var və biz bu ənənələri yaşadırıq. Şadam ki, tanınmış güləşçilərlə bərabər gənc güləşçilərimiz də böyük nəticələr əldə edirlər. Bu onu göstərir ki, məşq prosesi, seleksiya prosesi düzgün qurulubdur. Bu münasibətlə federasiyanı təbrik edirəm, məşqçiləri təbrik edirəm və əlbəttə ki, ilk növbədə, idmançıları.
30-04-2026, 09:22
XTQ-nin 27 yaşı oldu
Bu gün Azərbaycan Xüsusi Təyinatlı Qüvvələrinin yaradılmasından 27 il ötür. Xüsusi Təyinatlı Qüvvələr 1999-cu il aprelin 30-da yaradılıb. Qüvvələrin formalaşmasında Birinci Qarabağ müharibəsi iştirakçısı olmuş zabit və gizirlər iştirak ediblər.
Azərbaycan Xüsusi Təyinatlı Qüvvələrinin (XTQ) formalaşmasında Türkiyə Silahlı Qüvvələrinin Xüsusi Təyinatlı Qüvvələri müstəsna rol oynayıb. Bundan başqa, Azərbaycan xüsusi təyinatlıları müxtəlif ölkələrin təlim mərkəzlərində keçirilən kurslarda iştirak edib və dəfələrlə ABŞ, Türkiyə və Pakistanda keçirilən yarışlarda yüksək nailiyyətlər qazanıblar. 2016-cı ilin aprelində baş vermiş döyüşlərdə Xüsusi Təyinatlı Qüvvələrin bölmələri iştirak ediblər. Döyüşlər zamanı düşmənin çoxsaylı canlı qüvvəsi və hərbi texnikası məhv edilib. 2020-ci il sentyabrın 27-də başlayan Vətən müharibəsində də Xüsusi Təyinatlı Qüvvələr böyük şücaət göstəriblər. Torpaqlarımızın düşmən tapdağından azad edilməsində XTQ-nin misilsiz xidmətləri olub. Onların qayalara dırmaşaraq Şuşa şəhərini işğaldan azad etməsi dünya hərb tarixinə düşüb.
Azərbaycan Xüsusi Təyinatlı Qüvvələri dünya müdafiə sənayesinin aparıcı şirkətlərinin istehsalı olan müasir silahlar, döyüş vasitələri və texnikalara malikdir.
30-04-2026, 08:04
Araz üstü şəhərim,
Naxçıvanım...
Necə də doğmadır, necə də əziz.. Hər qarış, hər zərrə torpağı, bir damcı suyu, havası...Əsrlərdir adını qoruyan, əzəmətli diyarım...
Qurban olum torpağına, daşına,
Axar çaylarına, buz bulağına,
Badamlı, Sirabı, o saf suyuna.
Naxçıvan əzəldən belə diyardır,
Adını qorumuş bir laləzardır.
Qəhrəmanlıq tarixi, igid oğulları, qələmiylə şah-əsər yaradan şairləri, nəğməli bəstəkarları ilə iz qoyan Naxçıvan... Havanla solqulanan, suyunla, nemətinlə qidalanan, torpağında doğulub məhz elə torpağında ilk addımını atan neçə -neçə igid oğullar yetişdirdin, şairlər, bəstəkarlar yetişdirdin ki, qəlblərində sənə olan sevgilərini şairlərin misralara, bəstəkarların notlara tökdü... Doğma diyara neçə-neçə müdrik ifadələr işlənmiş, neçə-neçə əsərlər, bəstələr həsr olunmuş ki, sanki, şairlər, bəstəkarlar öz qəlblərində alışıb-yanan Naxçıvan sevgisini əks etdirmişlər. O sevginin heç də sönməyəcək bir atəş olduğunu, xatırlatmış, göstərmişlər!
Əcəmi-sənət çələngi,
Mirzə Cəlil söz nəhəngi,
Bəhruz-rənglərin ahəndi,
Hüseyn Cavid-söz çələngim,
Bəxş eyləyən vətəninə,
Heydər Babəktək öndəri
Naxçıvanım, Naxçıvanım!
Bir əsrin simfoniyası...Enişli-yoxuşlu hadisələr, tarixi anlar, tarixə iz qoyan qəhrəman oğulların və onların qəhrəmanlıq salnamələri, sanki, bir simfoniyanı , ahəngdar olaraq notların düzülüşünü xatırladır, və çətinliklərə baxmayaraq bir əsrdir öz varlığını laiqincə qoruyan Naxçıvan...igidlər, onlar ki, torpaq uğruna candan keçən oğullar!
Baxaq Haçadağa necədə əzəmətli duruşu var, Nuhçıxanın simvolu olması bir təsadüf deyil, əsrlərə, tarixə şahid “Haçadağ”.. Sarsılmaz qala, sarsılmaz Naxçıvanın sinvolu “Əlincə”..Hər qayasında, hər zərrəsində bir tarix yatan diyar..
Səndə tarixlərin çox nişanı var,
Hər daşın köksündə ox nişanı var.
Bəli, bu gün müasir Naxçıvanda belə tarix silinməmiş, yaşamaqdadır. Bu gün də, tarix öz izlərini qoruyur...Qədimdən də qədim şəhərimiz, tarix qoxan torpaq, özündə neçə-neçə hadisələri əks etdirib baxdıqda xəyallarda canlandıran, bizlərə də o tarixiliyi yaşadan abidələr... "Gəmiqaya", "Oğlan qala, qız qala", "Əlincə", "Fərhad evi", "Gülüstan", "Qarabağlar türbəsi" “Möminə Xatun” və.s
Bu gün artıq Naxçıvan qalib dövlətin bir parçasıdır, azaddır, hürdür! Əsrlər də keçsə, illər də keçsə, yenə də xalqı yumruqtək birdir! Bu gün Nuhçıxan, öz sözünü demiş bir Muxtar Respublikadır. Bir əsrdir Muxtariyyətini qoruyan diyar, Naxçıvan...Bu gün, əsrlərin, tarixin şahidi “Haçadağ”, “Əlincə”, bu torpaqlar, Nuhçıxan bir əsrin bitişinə, yeni-yeni əsrlərin gəlişinə şahidlik edir!
Qovmusan başından dumanı, çəni,
Toylu, büsatlıdı qoynunda hər yan.
Qəlbimdən süzülən bu şən nəğməni,
Sənə bəxş edirəm, doğma Naxçıvan!
Araz üstü şəhərim, günəşli diyarım! Necəki günəş Arazın üzərindən doğur və parlayır, səndə yaranışınla bir günəş kimi doğdun və parlayırsan, nəinki bir əsr, sən daim yaşa, var ol, hür ol, parla ey Qüdrətli Naxçıvan!
Nuray Qurbanlı (Nuray Qurban)
Bakı Dövlət Universitetinin Jurnalistika fakültəsinin IV kurs tələbəsi
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!