28-03-2023, 14:10
İlham Əliyev Laçın rayonuna xüsusi nümayəndə təyin etdi
Prezident İlham Əliyev Şərqi Zəngəzur iqtisadi rayonuna daxil olan Laçın rayonunda Azərbaycan Prezidentinin xüsusi nümayəndəsinin təyin edilməsi haqqında Sərəncam imzalayıb. Sərəncama əsasən, Məsim Əhməd oğlu Məmmədov “Azərbaycan Respublikasında iqtisadi rayonların yeni bölgüsü haqqında” Azərbaycan Respublikası Prezidentinin 2021-ci il 7 iyul tarixli 1386 nömrəli Fərmanı ilə müəyyən edilmiş Şərqi Zəngəzur iqtisadi rayonuna daxil olan Laçın rayonunda Azərbaycan Respublikası Prezidentinin xüsusi nümayəndəsi təyin edilib.
28-03-2023, 14:06
Suraxanı rayonunda insan ölümüylə nəticələnən yanğın baş verib
Bakının Suraxanı rayonunda beşmərtəbəli yaşayış binasının 5-ci mərtəbəsində ümumi sahəsi 78 m² olan 3 otaqlı mənzilin 1 otağında 1 ədəd divan və 1 ədəd kreslo qismən yanıb. Bu barədə Fövqəladə Hallar Nazirliyinin (FHN) Mətbuat Xidmətindən məlumat verilib. Bildirilib ki, yanğın yerinin kəşfiyyatı zamanı 1 nəfərin yanmış meyiti yanğınsöndürənlər tərəfindən aşkar edilərək aidiyyəti üzrə təhvil verilib. Mənzil yanğından mühafizə olunub. Yanğın yanğından mühafizə bölmələri tərəfindən söndürülüb. Hadisə ilə əlaqədar müvafiq qurumlar tərəfindən təhqiqat aparılır.
28-03-2023, 14:03
İranda itkin düşən tələbədən xəbər yoxdur
Fevralın 20-si Almaniyadan İrana səfər edən və sonra barəsində heç bir məlumat olmayan Fərid Səfərlinin anası Dilarə Əsgərova son günlər oğlunun axtarışını İranda davam etdirir. O, oğlunun taleyi barədə hələ hər hansı məlumat əldə edə bilməyib. Bu barədə “Amerikanın səsi”nə danışan D. Əsgərova bildirib ki, Almaniyada Fəridin yaşadığı Yena şəhər polisi oğlunun Tehrandan heç yerə uçmadığını açıqlayıb: “Polis dedi ki, təyyarə şirkətindən Fərid Səfərlinin Tehrandan heç yerə uçmaması ilə bağlı məlumat alıb. Bu səbəbdən Fəridlə bağlı İranın Almaniyadakı səfirliyinə məktub göndəriblər. Amma İran səfirliyi polisə hələ cavab verməyib”. D.Əsgərova oğlunun Yena şəhərində yaşadığı evdə olub: “Fəridin evindən kompüterini, şəxsi əşyalarını götürdüm. Kompüterin kodunu polis açdı. Kompüterdən Fəridin dostu olan qızın telefon nömrələrini, şəklini, adını, soyadının bir hissəsini, iş yerini, yəni bir xeyli məlumat öyrəndilər”. Fərid Səfərlinin anası daha sonra İrana səfər edib.“Mən bundan sonra İrana gəldim və hazırda buradayam. Fəridin dostu olan qızın iki telefon nömrəsi mənə məlum idi. Hər iki telefon nömrəsi bağlıdır. Telefon nömrələri satılan yerdən qızın ünvanını öyrənməyə cəhd etdim. Onun ünvanını vermədilər. Qız Tehranda Tibb Universitetinin sonuncu kursunda oxuyur. Qumda xəstəxanalarda interna keçir. Qabaqcadan interna keçdiyi xəstəxanaların birinə zəng etdim. Dedilər ki, həmin qız iyirmi gündür işə gəlmir, icazə alıb. Həmin 20 gün oğlumun itkin düşdüyü günlə eynilik təşkil edir. Amma biz həmin xəstəxanaya çatanda vəziyyət dəyişdi. Dedilər, ümumiyyətlə, bu qız orada işləməyib. Təxmin etdiyim digər xəstəxanalara da getdim. Qızın adını, fotosunu, telefon nömrələrini polis mənə verib. Şəkillərini göstərdim. Dedim, qızı tanımırsınız, amma fotoda onunla birgə xəstəxananın digər həkimlərinin də şəkilləri var. Onları da tanımırsınız? Elə bil məlumatlı idilər. Bizi xəstəxanaların qapısından qaytarırdılar. Sanki, bizi qovmaq istəyirdilər. Heç bir məlumat vermədilər”, - o qeyd edib. O, İranda vəkil tutaraq onunla birgə hüquq-mühafizə orqanlarına müraciət edib: “Hüquq-mühafizə orqanlarının sistemində Fəridlə bağlı məlumat çıxmadı. Bəzi orqanlar isə sistemə baxmaqdan imtina etdi. Dedilər ki, Fərid yüngül cəza alsa idi sistemdə onun barəsində məlumat olardı. Ağır cinayətlər sistemdə görünmür. Mən soruşdum ki, ağır cinayət nədir? Dedilər ki, casusluq və sair cinayətlərdir. Bir sözlə, indiyədək Fəridlə bağlı hər hansı məlumat ala bilməmişik”. Dilarə Əsgərova Azərbaycanın Təbrizdəki konsulluğuna da müraciət edib. Konsulluqdan da ona məktub göndərdiklərini, İran tərəfinin isə hələ də cavab vermədiyini deyiblər: “Mən onlardan xahiş etdim ki, oğlumun tez bir zamanda tapılması üçün hərəkət etsinlər. Oğlum 26 gündür yoxa çıxıb. Hər dəqiqənin ana üçün nə demək olduğunu bilsinlər. Oğlumun tapılması üçün kömək etsinlər. Mən sizin mətbuat vasitəsilə Azərbaycan Xarici İşlər Nazirliyindən xahiş edirəm ki, notalarına cavab istəsinlər. Yaxud başqa ölkələrin vasitəçiliyindən istifadə etsinlər. Beynəlxalq təşkilatlara müraciət etsinlər. Bəlkə, İran sonsuza qədər susacaq. Biz də sonsuza qədər oturub onun cavabını gözləyəcəyik?! Mən ana kimi oğlumun taleyindən çox narahatam. Hədsiz dərəcədə narahatam. Bəlkə də, burada Tehranda məndən yüz metr aralıda oğlum həbsxanadadır. Amma mən ondan hər hansı məlumat ala bilmirəm. Heç bir yer mənə məlumat vermir”.
28-03-2023, 13:59
İran nüvə sazişinin bərpasına dair Qərblə gizi danışıqlar aparıb
İran hakimiyyətinin nümayəndələri 2015-ci il nüvə sazişinin bərpası və amerikalı məhbusların azad edilməsinə dair Qərb rəsmiləri ilə gizli danışıqlar aparıb. Bu barədə "Middle East Eye" nəşri öz mənbələrinə istinadən məlumat yayıb. Nəşrin mənbələri bildirib ki, son həftələrdə Əli Xamneiyə yaxın şəxslər tərəfindən aparılan danışıqlar barədə İran Prezidenti İbrahim Rəisi hökumətinə məlumat verilməyib. Məlumata görə, Avropada aparılan danışıqlara Həsən Ruhani dövründə xarici işlər nazirinin keçmiş müavini işləmiş Abbas Əraqçi rəhbərlik edib. Hazırda Əraqçi Ali Rəhbərə məsləhət verən İranın Xarici Əlaqələr üzrə Strateji Şurasının katibidir.
28-03-2023, 13:54
Tokayev Türk İnvestisiya Fondunun yaradılması haqqında sazişi təsdiqlədi
Qazaxıstan Prezidenti Kasım-Jomart Tokayev Türk İnvestisiya Fondunun yaradılması haqqında saziş layihəsini təsdiqləyib. Bu barədə Tokayev sərəncam imzalayıb. Fondun məqsədi regiondaxili ticarəti genişləndirmək və iqtisadi fəaliyyətə dəstək verməklə Türk Dövlətləri Təşkilatına (TDT) üzv dövlətlərin iqtisadi inkişafına kömək etməkdir.Türk İnvestisiya Fondunun yaradılması haqqında Saziş martın 16-da Türkiyənin Ankara şəhərində Türk Dövlətləri Təşkilatının (TDT) Fövqəladə Zirvə görüşü zamanı imzalanıb. Fondun Türk dövlətlərinin qurduğu əsas ortaq maliyyə qurumuna çevrilməsi və fondun vəsaitlərinin birgə layihələrin həyata keçirilməsinə yönəldilməsi nəzərdə tutulur. Fond Türk Dövlətləri Təşkilatına üzv dövlətlərin iqtisadi potensialının inkişafına, onlar arasında ticari-iqtisadi əməkdaşlığın gücləndirilməsinə, birgə layihələrin həyata keçirilməsinə yönəldiləcək. Təşkilatın baş qərargahı İstanbulda olacaq. Nizamnamə kapitalı 500 milyon dollardır və hər birinin nominal dəyəri 50 000 ABŞ dolları olan 10 000 səhmə bölünüb. Hər bir TDT üzvü üçün 2 min səhm, hər bir ölkə üçün ödənilən səhmin ümumi nominal dəyəri 70 milyon ABŞ dolları, hər bir ölkə üçün cəlb olunan səhm üzrə ümumi nominal dəyər isə 30 milyon dollar təşkil edir.
28-03-2023, 13:46
Özbəkistanda insan ölümü ilə nəticələnən partlayış baş verib
Özbəkistanın Səmərqənd vilayətində partlayış olub. Hadisə vilayətin Kəttəkurqan rayonunda qeydə alınıb. Belə ki, yaşayış binasında partlayışın baş verməsi nəticəsində 4 nəfər həyatını itirib. Araşdırmalarla məlum olub ki, partlayışın səbəbi qaz sızması olub. Qaz sobası yandırılan anda baş verən partlayış yaşlı cütlük və onların iki azyaşlı nəvəsinin həyatına son qoyub. Hazırda araşdırmaların davam etdirildiyi qeyd olunub.
28-03-2023, 13:42
Almaniya Ukraynaya yardımı artırmağı planlaşdırır
Qarşıdakı bir neçə il ərzində Almaniya Ukraynaya hərbi yardımını 3 milyard avrodan 15 milyard avroya çatdırmağı planlaşdırır. Bu barədə “Spiegel” nəşri yazıb. Qeyd olunub ki, Ukraynanın 40-a yaxın Fransa istehsalı olan müasir "Mirage 2000-9" qırıcısı alacağı barədə də məlumatlar var. Almaniyanın müdafiə naziri Boris Pistorius isə Ukraynaya tədarük edilən "Leopard 2" tankları haqqında danışıb: "Söz verildi və çatdırıldı". Nazir bəyan edib ki, Almaniya tankları döyüş meydanında həlledici rol oynayacaq: "Bizə güvənə bilərsiniz".
28-03-2023, 13:39
Mən ABŞ prezidenti seçilənə qədər Ukraynada müharibə davam edəcək - Tramp
ABŞ-ın sabiq prezidenti Donald Tramp Ukraynadakı müharibədən danışıb. Tramp bildirib ki, o, ABŞ prezidenti seçilənə qədər Ukraynada müharibə çətin ki, bitsin. "Bu müddət ərzində nə baş verə biləcəyini təsəvvür edə bilmirəm. Əsas odur ki, müharibə dayandırılmalıdır, çünki Ukrayna məhv edilir”. O, prezident olacağı təqdirdə müharibəni 24 saata dayandıra biləcəyi ilə bağlı bəyanatını təkrarlayıb.“Bu, çox sadə səslənə bilər, lakin mən mahiyyətini açıqlamayacağam, çünki açıqlasam, sonra istifadə edə bilməyəcəm, nəticə verməyəcək”, - Tramp bildirib.
27-03-2023, 21:25
İsrailin ölkəmizdəki səfirliyi müvəqqəti fəaliyyətini dayandırdı
İsrailin Azərbaycandakı səfirliyi məhkəmə islahatları ilə əlaqədar ümummilli tətilə qoşulub. Bu barədə İsrailin Bakıdakı səfirliyi məlumat yayıb. Bildirilib ki, İsrail səfirliyi və konsulluğu növbəti xəbərdarlığa qədər müvəqqəti olaraq işləməyəcək. Qeyd edək ki, İsrailin Histadrut həmkarlar ittifaqı ölkənin xaricdəki diplomatik missiyalarını etirazlara qoşulmağa çağırıb. ABŞ və Gürcüstan daxil olmaqla bir neçə ölkədəki səfirlik çağırışa cavab verib. Xatırladaq ki, ötən ilin dekabr ayında Netanyahu baş nazir postuna qayıdıb və bundan sonra ölkənin hüquq sistemində islahatlar keçirəcəyini bildirib. İslahatlar Ali Məhkəmənin hakimlərinin seçilməsi prosesinə nəzarətin parlament çoxluğuna verilməsini, habelə Ali Məhkəmənin hökumətin qərarlarını ləğv etmək hüququnun əlindən alınmasını nəzərdə tutur. İslahat planı İsrail xalqının etirazlarına səbəb olub, lakin Netanyahu qərarını ləğv etməyib. Dünən Netanyahu islahatlara qarşı çıxan müdafiə naziri Yoav Qalantı vəzifədən azad edib və bu qərar etirazların yenidən alovlanmasına səbəb olub. Gecə boyu aksiyalar davam edib.
27-03-2023, 21:20
Rusiya İrana kibersilahlarla kömək edir - “Wall Street Journal” nəşri
Rusiya pilotsuz uçuş aparatları (PUA) müqabilində İrana kibersilahlarla komək edir. Bu barədə "Wall Street Journal" nəşri yazıb. Nəşriin məlumatına görə, Moskva Tehranı rabitə-nəzarət avadanlığı, dinləmə cihazları, qabaqcıl foto avadanlıqları və yalan detektorları ilə təmin edir. Rusiya çox güman ki, müxaliflərin telefonlarını və sistemlərini sındırmaq üçün İranı daha təkmil proqram təminatı ilə təchiz edib. Nəşrin məlumatına görə, proqram təminatı Rusiyanın Proteus elmi-texniki mərkəzi tərəfindən təchiz edilib. Proteus texnologiyası İran hakimiyyətinə mobil rabitə üzərindən iranlıların mübadilə etdikləri məlumatları ələ keçirməyə imkan verə bilər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!