21-12-2022, 19:03
Yunanıstan təxribatlara davam edir - Hulusi Akar
"Yunanıstan provokativ addımlar atmağa davam edir". Bunu Türkiyənin milli müdafiə naziri Hulusi Akar Azərbaycan və Gürcüstandan olan həmkarları ilə görüşdən sonra keçirilən mətbuat konfransında deyib. "Qonşumuz Yunanıstan destabilizasiyanı körükləyən provokativ hərəkət və bəyanatlarına, irridentist və hücum siyasətinə təəssüf ki, davam edir. Hər keçən gün buna yeni təxribatlar əlavə olunur. Son olaraq Yunanıstan tərəfindən NATO təlimləri zamanı silahsız olaraq uçuş həyata keçirən təyyarələrimizə radar kilidi atılıb", - nazir Yunanıstana xəbərdarlıq edib.
21-12-2022, 18:58
Ermənistan sülhlə bağlı addımlar atmalıdır - Hulusi Akar
"Ermənistan Azərbaycan və Türkiyənin uzatdığı sülh əlini tutmalıdır". Bunu Türkiyənin milli müdafiə naziri Hulusi Akar Azərbaycan və Gürcüstandan olan həmkarları ilə görüşdən sonra keçirilən mətbuat konfransında deyib. "Bu gün Cənubi Qafqazla bağlı vəziyyəti müzakirə etdik. Əməkdaşlığın dərinləşdirilməsinə böyük ehtiyac var", - Akar qeyd edib. Nazir onu da bildirib ki, sülhlə bağlı Ermənistan addımlar atmalıdır.
21-12-2022, 18:51
Sülhməramlılar Qarabağda öz tapşırıqlarını yerinə yetirməyə davam edəcək - Şoyqu
2023-cü ildə Rusiya sülhməramlıları Qarabağda öz tapşırıqlarını yerinə yetirməyə davam edəcək. Bunu Rusiyanın müdafiə naziri Sergey Şoyqu prezident Vladimir Putinin rəhbərliyi ilə keçirilən Müdafiə Nazirliyinin kollegiya iclasında bildirib. "Rusiya ordusu Qarabağda sülhün əsas təminatçısıdır və olmağa davam edəcək",- deyə Şoyqu bildirib. Qeyd edək ki, Rusiya sülhməramlı qüvvələri 2020-ci il 10 noyabr tarixli üçtərəfli bəyanata əsasən 5 il müddətinə Qarabağa yerləşdirilib. Geridə qalan iki il ərzində sülhməramlılar öz missiyalarını yerinə yetirmək əvəzinə, erməni separatçılarına dəstək nümayiş etdiriblər. Bu isə Azərbaycan cəmiyyətinin haqlı etirazına səbəb olub və sülhməramlı qüvvələrin vaxtından əvvəl Qarabağdan çıxarılması tələb olunub. Şoyqu isə bugünkü açıqlaması ilə rus hərbçilərin gələn il də Qarabağda qalacağını rəsmən bəyan etmiş oldu.
21-12-2022, 18:48
“Rusiyaya qarşı bütün NATO ölkələrinin potensialından istifadə olunur” - Putin
"Hərbi komissarlıqların işini təkmilləşdirmək lazımdır". Bunu Rusiya prezidenti Vladimir Putin Müdafiə Nazirliyində keçirilən kollegiya iclasında deyib. O qeyd edib ki, NATO ölkələri Ukraynaya dəstək olur: "Rusiyaya qarşı bütün NATO ölkələrinin potensialından istifadə olunur. Bu məlumdur". Putin ordu rəhbərliyi qarşısında çıxışı zamanı ölkəsinin atdığı addımlardan da danışıb. "Hazırda 300 min səfərbər olunmuş canlı qüvvənin 150 mini poliqonlarda hərbi təlim keçir. Digər yarısı - 150 min nəfər isə döyüş əməliyyatları zonasındadır. Düşünürəm ki, bu kifayətdir. Lakin hərbi komissarlıqların işini təkmilləşdirmək lazımdır", - Rusiya lideri bildirib.
21-12-2022, 18:42
Maliyyələşmə ilə bağlı heç bir məhdudiyyətimiz yoxdur - Putin
"Bizim maliyyələşmə ilə bağlı heç bir məhdudiyyətimiz yoxdur". Bunu Rusiya prezidenti Vladimir Putin Müdafiə Nazirliyində keçirilən kollegiya iclasında deyib. "Mən müdafiə nazirinin, baş qərargah rəisinin və burada təmsil olunan bütün komandirlərin nəzərinə çatdırmaq istəyirəm ki, bizim ordunun maliyyəşdirilməsi ilə bağlı heç bir məhdudiyyətimiz mövcud deyil. Ordu nə istəyirsə, hökumət verir. Ümidvaram ki, cavab olaraq qoyulan bütün müvafiq nəticələrə nail olunacaq", - Putin çıxışında bildirib. Rusiyanın müdafiə naziri Sergey Şoyqu isə əməliyyatlar dövründə 120 şəxsə "Rusiya qəhrəmanı" adının verildiyini açıqlayıb.
21-12-2022, 18:39
Ukraynanın silahlandırılmasında 27 ölkə iştirak edib - Şoyqu
"Ukraynanın silahlandırılmasında 27 ölkə iştirak edib". Bunu Rusiyanın müdafiə naziri Sergey Şoyqu MN-də keçirilən kollegiya iclasında deyib. Onun sözlərinə görə, bu vaxta qədər Ukraynanın silahla təmin olunması üçün 97 milyard ABŞ dolları xərclənib. Şoyqu, həmçinin Ukraynada 500 NATO peykinin çalışdığını iddia edib. "Ukrayna cəbhəsində NATO-nun qərargah zabitləri, artilleriyaçıları fəaliyyət göstərir", - deyə nazir qeyd edib. O həmçinin bildirib ki, qismən hərbi səfərbərlik çərçivəsində 830 min insan iqtisadiyyatın dəstəklənməsi məqsədilə çağırışdan azad olunub.
21-12-2022, 18:34
Vasif Talıbovun oğlu atasıyla bağlı danışmaqdan imtina etdi
“Atamla bağlı heç bir şey danışmaq istəmirəm. Mən Bakıda yaşayıram və öz işimlə məşğulam”. Bunu açıqlamasında Dövlət Miqrasiya Xidmətinin baş idarə rəisi Rza Talıbov Naxçıvan Ali Məclisinin sədri postundan kənarlaşdırılan atası Vasif Talıbovun istefası barədə suala cavabında deyib. Rza Talıbov istefadan sonra atası ilə əlaqə saxlamadığını bildirib: “Hazırda danışmamışam. Heç bir məlumatım yoxdur”. “Atanızın uzun illər tutduğu postdan getməsini necə qarşıladınız” sualına isə Rza Talıbov: “Hər kəsin öz işi var”, - deyərək, əlavə şərh verməkdən imtina edib.
21-12-2022, 18:31
Ukraynanın müdafiə nazirinə sui-qəsd təşkil edildi
Ukraynanın müdafiə naziri Oleksey Reznikova qarşı sui-qəsd təşkil olunub. Bu barədə ölkənin Dövlət Təhlükəsizlik Xidməti məlumat yayıb. Bildirilib ki, həmçinin Ukraynanın kəşfiyyat orqanının rəhbəri Kiril Budanova qarşı da oxşar təxribata cəhd edilib. Məlumata görə, bu cəhdlərin qarşısı alınıb və hər iki dövlət xadimi fəaliyyətini davam etdirir. Qeyd olunub ki, sui-qəsd cəhdlərinin Rusiya xüsusi xidmət orqanları tərəfindən təşkili ehtimal edilir.
21-12-2022, 18:27
“Qarabağ məsələsində Azərbaycana dəstək olduğumuza görə bizə qarşı çıxanlar var” - Ərdoğan
Türkiyə prezidenti Rəcəb Tayyib Ərdoğan növbəti dəfə ölkə müxalifətini tənqid edib. Ərdoğan bəzi müxalif qüvvələrin Qarabağ mövzusunda hakim partiyaya qarşı çıxdığını bildirib. "Qarabağ məsələsində Azərbaycana dəstək olduğumuza görə bizə qarşı çıxanlar var", - deyə Türkiyə prezidenti söyləyib. Qeyd edək ki, II Qarabağ müharibəsi zamanı Türkiyə parlamentində Azərbaycana dəstəklə bağlı imzalanan ortaq bəyanata AKP, MHP, həmçinin müxalif partiyalar olan CHP və İYİ Partiya imza atsa da, Xalqların Demokratik Partiyası (HDP) bundan imtina etmişdi.
21-12-2022, 18:23
“Taliban” hakimiyyətindən qadın hüquqlarını pozan addım
Əfqanıstanda “Taliban” hakimiyyəti qadın müəllimlərin və qız şagirdlərin məktəblərə buraxılmaması ilə bağlı göstəriş verib. Məlumatı TASS yayıb. Bildirilib ki, dekabrın 21-də ölkə paytaxtı Kabulun məktəblərin bir sıra məktəblərinin rəhbərliyinə qadın müəllimlərin işə gəlməmələri ilə bağlı “Taliban”ın əmri göndərilib. Valideynlər bildiriblər ki, onların qızlarını silahlı yaraqlılar məktəblərə buraxmayıb. Məlumata görə, “Taliban” hökuməti əvvəllər ibtidai sinfin qız şagirdlərinin dərslərdə iştirakına icazə versə də, indi onlara qadağa qoyub. Qeyd olunub ki, dekabrın 21-də silahlı radikallar səhər saatlarında Kabul Universitetinin qapısında toplaşaraq qız tələbələrin təhsil müəssisəsinə buraxılmamasını yoxlayıblar. “Taliban” hökuməti növbəti bildirişə qədər universitetlərdən qız tələbələr üçün dərslərin dayandırılmasını tələb edib. Onlar bu məhdudiyyətləri ölkədə “uyğun İslam mühiti”nin yaradılmasının “zəruriliyi” ilə izah edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!