2-03-2023, 18:08
İranın Azərbaycandakı səfiri Rusiya səfiri ilə görüşüb
İranın Azərbaycandakı səfiri Seyid Abbas Musəvi Rusiya səfiri Mixail Boçarnikovla görüşüb. Bu barədə İranın Azərbaycandakı səfirliyinin sosial şəbəkə hesabında məlumat paylaşılıb. Diplomatlar Cənubi Qafqaz regionunda baş verən son hadisələri, "3+3" təşəbbüsünü, eləcə də iki ölkə arasında iqtisadi sahədə əməkdaşlığı, eyni zamanda, Şimal-Cənub dəhlizini müzakirə ediblər.
2-03-2023, 18:03
Zəlzələ Türkiyə ixracatına 1,5 milyard dollarlıq ziyan vurub
Türkiyənin fevral ayında ixracatı 6,4 faiz azalaraq 18 milyard 638 milyon dollar olub. Bu barədə ölkənin Ticarət Nazirliyi məlumat yayıb. Məlumatda bildirilib ki, Türkiyə ötən ay 30.8 milyard dollarlıq məhsul idxal edib (əvvəlki illə müqayisədə 10.6% artıb). Nazirliyin məlumatına görə, zəlzələ fevral ayında Türkiyənin ixracatında 1,5 milyard dollarlıq azalmaya səbəb olub. Qeyd edilib ki, Türkiyənin fevral ayında ən çox məhsul idxal etdiyi ölkələr Rusiya Federasiyası (4 milyard 133 milyon dollar), İsveçrə (3 milyard 646 milyon dollar) və Çin (3 milyard 101 milyon dollar) olub.
2-03-2023, 17:59
Belarus və İran arasında saziş imzalanacaq
Belarus və İran tezliklə beynəlxalq avtomobil yükdaşımaları üçün icazələrə ehtiyac duyulmayan prosedurun yaradılması haqqında saziş imzalayacaqlar. Bu barədə ölkənin nəqliyyat və rabitə naziri Aleksey Avramenko danışıb. "Belarus və İran nəqliyyat sahəsində əməkdaşlığı inkişaf etdirir. Yüklərin beynəlxalq avtomobil daşımalarının sadələşdirilmiş prosedurunu müəyyən edən sənəd imzalamağa yüksək səviyyədə hazırıq. Bu, logistika şirkətlərinə Belarus-İran marşrutu üzrə yeni daşıma sxemləri qurarkən avtomobil nəqliyyatının potensialından daha çox istifadə etməyə imkan verəcək. İcazəyə ehtiyac duyulmayan sistemlə bağlı 4 ölkə üçün planlarımız var. İranla danışıqlar apardıq. Düşünürəm ki, yaxın iki həftə ərzində saziş imzalanacaq. İran tərəfi də bu işi tamamlayır” - deyə Aleksey Avramenko bildirib.
2-03-2023, 16:55
Almaniya XİN-dən Rusiyaya çağırış
Almaniyanın xarici işlər naziri Annalena Berbok Hindistandakı G20 sammitində Rusiya XİN başçısı Sergey Lavrovu müharibəni bitirməyə çağırıb. Berbok Moskvanın yürütdüyü siyasəti tənqid edib. Rusiya G20-nin işini iflic edir. Biz çoxtərəfliliyə, çoxtərəfli münasibətlərə inanırıq. Bu müharibəyə son qoyun, beynəlxalq asayişi pozmağı dayandırın", - Berbok deyib. Qeyd edək ki, G20 sammiti Hindistanın Yeni Dehli şəhərində keçirilir.
2-03-2023, 16:52
Podolyak Rusiyanın itkilərinə münasibətini şərh edib
Ukrayna Prezident Ofisi rəhbərinin müşaviri Mixaylo Podolyak Rusiyanın öz itkilərinə münasibətini şərh edib. Müşavir bu barədə tviter səhifəsində yazıb. "Rusiyanın "hərbi taktikaları": Rusiya ölüləri saymaz, yaralıları buraxıb gedər, təzminat ödəməmək üçün meyitləri yandırar. Rusiya Federasiyası üçün insanlar ən ucuz pul vahididir", - o qeyd edib. "Rusiyalılar üçün də bu barədə heç bir problem yoxdur. Onların təhdidi hiss etməsi və doğru sualları verməyə başlaması üçün gündə 5000 ölü olmalıdır?", - deyə Podolyak vurğulayıb. Xatırladaq ki, Rusiya qüvvələri son sutkada Ukrayna ərazisində daha 715 hərbçisini itirib, bununla da Moskvanın müharibə başlayandan bəri ümumi itkilərinin sayı 150 605 nəfərə çatıb.
2-03-2023, 16:50
Sabahın hava proqnozu
Martın 3-də Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Milli Hidrometeorologiya Xidmətindən verilən məlumata görə, gecə bəzi yerlərdə az çiskinli olacağı ehtimalı var. Arabir güclənən şimal-qərb küləyi səhər mülayim cənub küləyi ilə əvəz olunacaq. Havanın temperaturu gecə 3-6° isti, gündüz 8-13° isti olacaq. Atmosfer təzyiqi 770 mm civə sütunundan 762 mm civə sütununa enəcək. Nisbi rütubət 70-80 % olacaq. Azərbaycanın rayonlarında havanın bəzi yerlərdə arabir yağıntılı olacağı, dağlıq ərazilərdə qar yağacağı, gündüz əksər rayonlarda tədricən kəsiləcəyi gözlənilir. Bəzi yerlərdə arabir duman. Mülayim şərq küləyi əsəcək. Havanın temperaturu gecə 4-8° isti, gündüz 12-17° isti, dağlarda gecə 2-7° şaxta, gündüz 3-8° isti olacaq.
2-03-2023, 16:48
Lavrov G20-dəki çıxışının böyük qismini Qərbin tənqidinə həsr edib
Rusiya XİN başçısı Sergey Lavrov Hindistanın paytaxtı Yeni Dehli şəhərində keçirilən G20 sammitində çıxış edib. Nazir çıxışının əsas hissəsini Qərbin tənqidinə həsr edib. "Bir sıra Qərb nümayəndə heyətləri iqtisadiyyatdakı uğursuzluqlarına görə məsuliyyəti Rusiya Federasiyasının üzərinə atmaq istəyir. Rusiya “Şimal axını”nda törədilən təxribatın tez və doğru şəkildə araşdırılmasında israrlıdır. Rusiya Federasiyası inkişaf etməkdə olan ölkələrin BVF, Dünya Bankı və ÜTT-də rolunun artırılmasının tərəfdarıdır. Qərb Rusiya Federasiyasının kənd təsərrüfatı məhsullarının ixracı üçün maneələr yaradır", - deyə Lavrov söyləyib. "Rusiya BRİCS, ŞƏT, Aİİ çərçivəsində müstəqil ödəniş sistemləri formalaşdırmaq və milli valyutalarda hesablaşmaları genişləndirmək iqtidarındadır", - xarici işlər naziri əlavə edib.
2-03-2023, 15:48
Qərb Rusiyaya “kritik mallar”ın ixracını dayandırmağa çağırdı
Qərb ölkələri Birləşmiş Ərəb Əmirliklərini (BƏƏ) Rusiyaya "kritik mallar"ın ixracını dayandırmağa çağırıb. Bu barədə "Financial Times" (FT) qəzeti yazıb. Nəşr bildirir ki, Qərb BƏƏ-nin tədarük etdiyi elektronika məhsullarının Rusiya tərəfindən hərbi məqsədlər üçün istifadə oluna biləcəyindən ehtiyat edir. Məlumata görə, Birləşmiş Ştatlar, Avropa İttifaqı (Aİ) və Böyük Britaniya rəsmiləri son həftələrdə BƏƏ-yə səfər edib və ölkə rəsmilərinə sanksiyaları pozmamaq üçün təzyiq göstəriblər. Rusiya gömrük məlumatlarına görə, 2022-ci ildə BƏƏ-dən Rusiyaya elektron komponentlərin ixracı yeddi dəfədən çox artaraq təxminən 283 milyon dollara çatıb.
2-03-2023, 15:42
İraq prezidentindən dünyaya çağırış
“Tədbirin təşkili və dəvətə görə Azərbaycan Prezidenti İlham Əliyevə təşəkkür etmək istəyirəm”. Bunu bu gün Bakıda Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşündə iştirak edən İraq Prezidenti Əbdüllətif Camal bildirib. O vurğulayıb ki, İraq qlobal pandemiya böhranından çıxmağa davam edir, infrastruktur, sosial ehtiyaclar, iqtisadi şaxələndirmə və kollektiv tədbirlər vasitəsi ilə bu işləri görməyə davam edir:“İraq hökuməti iqlim dəyişikliyi, ərzaq çatışmazlığı və su resurslarının qıtlığı ilə bağlı məsələlərə də xüsusi diqqət yetirir. Bütün bunlar bizim sosial stabilliyimizə təsir göstərir. Hazırda təhlükəsizliyin təmininə xüsusi diqqət yetiririk. Xüsusi dəstək vasitəsi ilə ölkədə kənd təsərrüfatına və suyun effektiv idarə edilməsinə vəsait qoymalıdır. İqlim dəyişikliyi ilə bağlı riskləri azaltmaq istiqamətində işlər görməliyik”. Əbdüllətif Camal qeyd edib ki, ölkəsi müharibədən, dağıntılardan əziyyət çəkib, indi isə fərqli bir ölkədir: “Biz bu acınacaqlı təcrübədən, silahlı münaqişələrdən sonra anlayırıq ki, ancaq dialoqla sülh quruculuğu mümkündür. Biz konstruktiv dialoqla zorakı ekstremizmin aradan qaldırılmasına çalışırıq. İraq regional tərəfdaşlıqda da müsbət rolunu davam etdirməyə hazırdır. Biz regional təhlükəsizliyə və enerji təhlükəsizliyinə töhfə verməyə hazırıq”. O vurğulayıb ki, yeni İraq qonşuları ilə qarşılıqlı hörmət, diplomatiya, ortaq çağırışları, sərhəd təhlükəsizliyi, eyni zamanda, transsərhəd su resursları, su mənbələrinin adekvat optimallaşdırılması ilə münasibətlər qurmağa davam edir: “Yüksək neft qiymətlərini nəzərə alaraq, İraqda hazırda adekvat səhiyyə, su və təhlükəsizliyi, institusional sahələrdə işlər görülməlidir. İctimai infrastrukturun qurulması da məqsədlərdən biridir. Ətraf mühiti qorumaq və iqtisadiyyatın şaxələndirilməsi ilə bağlı tədbirlər görülməli, İraqın irsinin növbəti nəsillərə çatdırmaq üçün addımlar atılmalıdır”.
2-03-2023, 15:35
Füzulidə insan sümükləri aşkarlanıb
Füzulidə mina axtarışları zamanı insan sümükləri aşkarlanıb. Baş Prokurorluğun Mətbuat xidmətindən bildirilib ki, martın 1-i Füzuli rayonunun işğaldan azad edilmiş Qaraxanbəyli kəndi ərazisində mina-təmizləmə işləri aparılarkən insana məxsus olması ehtimal edilən bir ədəd kəllə sümüyü və digər sümük fraqmentlərinin aşkar edilməsi faktı ilə bağlı Füzuli rayon prokurorluğunda araşdırma aparılır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!