20-03-2023, 23:15
Qərb Moskvanın iştirakını nəzərdə tutan prinsiplərə zərbə vurur - Lavrov
"Qərb Ermənistan, Rusiya Federasiyası və Azərbaycan arasında bağlanmış üçtərəfli sazişləri qüvvədən salmağa çalışır, bütün bu işlərə özü nəzarət etməyə can atır və Moskvanın fəal iştirakını nəzərdə tutan əsas prinsiplərə birbaşa zərbə vurur". Bunu Rusiyanın xarici işlər naziri Sergey Lavrov ermənistanlı həmkarı Ararat Mirzoyanla birgə mətbuat konfransında bildirib. "Qarabağ sakinlərinin təhlükəsizliyinin təmin edilməsi, hüquqlarının təmin edilməsi məsələsi Bakının nümayəndələri ilə həll edilməlidir, biz tərəfləri buna təşviq edirik", - deyə Lavrov söyləyib. Mirzoyan həmkarını onun üçün əlverişli vaxtda İrəvana səfərə dəvət edib. Ermənistan XİN başçısı İrəvanın ayrı-ayrı Rusiya vətəndaşlarını, o cümlədən jurnalistləri respublikaya buraxmamaq qərarını şərh etməkdən imtina edib.
20-03-2023, 22:56
Ermənistanda anti-Rusiya əhval-ruhiyyəsi yoxdur
"Ermənistanda anti-Rusiya əhval-ruhiyyəsi yoxdur". Bunu Ermənistan XİN rəhbəri Ararat Mirzoyan Moskvada rusiyalı həmkarı Sergey Lavrovla birgə mətbuat konfransında deyib. Ermənistan xarici işlər naziri müxtəlif siyasi dairələrin İrəvanda vaxtaşırı keçirdiyi anti-Rusiya aksiyaları ilə bağlı sualı cavablandırarkən deyib ki, ölkədə məqsədyönlü anti-Rusiya kampaniyası yoxdur. Mirzoyan vurğulayıb ki, on minlərlə rus Ermənistan ərazisində kifayət qədər dinc və rahat yaşayır, bizneslərini, işlərini aparır və bu kontekstdə heç bir şikayət daxil olmayıb. "Bu fakt heç bir anti-Rusiya əhval-ruhiyyəsinin olmadığını açıq şəkildə göstərir. Nümayiş və aksiyalara gəlincə, Ermənistan Konstitusiyası və onun qanunları sərbəst toplaşmaq azadlığına təminat verir və bu, uzun müddətdir ki, yeni xəbər deyil. İrəvanda da ölkə rəhbərliyinə qarşı nümayişlər çox tez-tez keçirilir", - XİN başçısı söyləyib.
20-03-2023, 22:19
30 ildən sonra Talış kəndi Novruz bayramını qeyd edir
Tərtərin Talış kəndində 30 ildən sonra ilk bayram şənliyi keçirilib. Talış kəndinə yeni köçən ailələr üçün təşkil olunan şənlikdə milli oyunlar, folklor nümunələri sərgilənib. Kəndirbazlar ip üzərində oynayıb, pəhləvanlar qurşaq tutub. Yerli incəsənət adamları müxtəlif musiqi nümunələri ifa ediblər. Daha sonra tədbir iştirakçıları Qarabağ atlarının keçidinə tamaşa ediblər. Bundan başqa, müxtəlif tamaşalar nümayiş olunub. Tədbirin gecə saatlarınadək davam etməsi planlanlaşdırılır. Xatırladaq ki, martın 16-da 20 ailə Tərtər rayonunun işğaldan azad edilmiş Talış kəndinə köçürülüb. Növbəti mərhələdə daha 158 ailənin köçürülməsi nəzərədə tutulur.
20-03-2023, 14:48
Beynəlxalq Məhkəmənin Putinlə bağlı qərarı rahat qarşılandı - Peskov
"Kreml Beynəlxalq Məhkəmənin Putinlə bağlı qərarını rahat qarşıladı". Bunu Kremlin sözçüsü Dmitri Peskov deyib. O, həmçinin söyləyib ki, Putin və Çin lideri Si Tsinpin arasında görüşün başlaması Moskva vaxtı ilə təxminən saat 16:30-a planlaşdırılıb: "Putin Si Tsinpinlə danışıqlarda Ukrayna böhranının həlli ilə bağlı Rusiya Federasiyasının mövqeyini hərtərəfli izah edəcək; Ukrayna mövzusu, şübhəsiz ki, Putin və Si Tsinpin arasında keçiriləcək danışıqlarda öz əksini tapacaq". "ABŞ Ukraynada hərbi əməliyyatların intensivliyini azaltmağa belə imkan vermir. Kremlin əməkdaşları növündən asılı olmayaraq, şəxsi məlumatları ilə bağlı smartfonlardan istifadə etmirlər. Rusiya Federasiyası Türkiyə ilə qaz qovşağının yaradılması üzərində işi davam etdirəcək, layihə kifayət qədər mürəkkəbdir", - deyə Peskov əlavə edib. Qeyd edək ki, Çin liderini daşıyan təyyarə artıq Moskva aeroportuna eniş edib.
20-03-2023, 14:45
Novruzla bağlı hərbi hissələrdə bayram şənliyi keçirilib
Müdafiə naziri general-polkovnik Zakir Həsənovun təsdiq etdiyi plana əsasən Novruz bayramı ilə əlaqədar Azərbaycan Ordusunun qoşun növləri, Əlahiddə Ümumqoşun Ordu, hərbi birlik və birləşmə, eləcə də xüsusi təyinatlı təhsil müəssisələrində silsilə tədbirlər keçirilib. Bu barədə Müdafiə Nazirliyindən məlumat verilib. Tədbirlərdə ümummilli lider Heydər Əliyevin və Azərbaycanın azadlığı, suverenliyi, ərazi bütövlüyü uğrunda şəhidlik zirvəsinə ucalan Vətən övladlarının əziz xatirəsi bir dəqiqəlik sükutla yad edilib. Hərbi orkestrlərin müşayiəti ilə Azərbaycan Respublikasının Dövlət Himni ifa olunub. Şəxsi heyət tərəfindən şəhidlərimizin məzarları ziyarət olunub, hərbi qulluqçular şəhid və yaralıların ailələrinə baş çəkərək onların qayğı və istəkləri ilə maraqlanıb, bayram sovqatları təqdim ediblər. Görüşlərdə dövlətimiz tərəfindən şəhidlərimizin xatirəsinin hər zaman uca tutulduğu, onların ailə və yaxınlarının yüksək diqqət və qayğı ilə əhatə olunduğu xüsusi qeyd olunub. Bayram tədbirlərində çıxış edənlər yazın gəlişinin ölkəmizdə sevinc, coşqu və təntənə ilə qeyd edilməsindən, Novruz ənənələrinin tarixindən, milli-mənəvi dəyərlərimizdən biri olan Novruz bayramının xalqımız və dövlətimiz tərəfindən yüksək qiymətləndirilməsindən söhbət açıblar. Silsilə tədbirlərdə Həzi Aslanov adına Ordu İdeoloji və Mədəniyyət Mərkəzinin, Gəncə Qarnizonu İdeoloji və Mədəniyyət Mərkəzinin, həmçinin incəsənət nümayəndələrinin, rayon mədəniyyət şöbələri kollektivlərinin iştirakı ilə konsert proqramları təqdim olunub.
20-03-2023, 14:41
Ermənistan və Belarusun baş nazir müavininləri görüşüb
Ermənistan və Belarus baş nazirlərinin müavinləri Mher Qriqoryan və Pyotr Parxomçik arasında görüş olub. Görüş Parxomçikin Ermənistana səfəri çərçivəsində paytaxt İrəvanda keçirilib. Bildirilib ki, görüşdə ölkələr arasında, o cümlədən Aİİ çərçivəsində əməkdaşlığın yeni sahələri müzakirə edilib. Tərəflər kənd təsərrüfatı, maşınqayırma və sənaye sahələrində əlaqələrə, birgə layihələrə diqqət yetiriblər.
20-03-2023, 14:36
Gürcüstan parlamentinin bir neçə deputatı istefa verir
Gürcüstan parlamentinin hakim “Gürcü arzusu”ndan olan bir neçə deputatı vəzifəsini tərk edir. Söhbət maliyyə və büdcə komitəsinin sədri İrakli Kovzanadze və deputat Vladimir Çaçibaiadan gedir. Bildirilib ki, onlar artıq prosedurla bağlı məsələlər üzrə komitəyə rəsmi müraciət ediblər. Səbəb açıqlanmayıb. Hazırda parlamentin vitse-spikeri, Uşaq Hüquqlarının Müdafiəsi üzrə Daimi Parlament Şurasının sədri David Sergeyenkonun partiyanı tərk edə biləcəyi də müzakirə olunur.
20-03-2023, 14:32
Sabahın hava proqnozu
Azərbaycanda sabaha gözlənilən hava proqnozu açıqlanıb. Martın 21-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, gün ərzində əsasən yağmursuz keçəcəyi gözlənilir. Lakin səhər və axşam yarımadanın bəzi yerlərində az yağış yağacağı ehtimalı var. Şimal-qərb küləyi əsəcək. Havanın temperaturu gecə 6-10° isti, gündüz 15-19° isti olacaq. Atmosfer təzyiqi 761 mm civə sütunu olacaq. Nisbi rütubət 60-70 % olacaq. Azərbaycanın rayonlarında bəzi yerlərdə arabir yağıntılı olacağı gözlənilir. Ayrı-ayrı yerlərdə intensiv olacağı, dağlıq ərazilərdə qar yağacağı ehtimalı var. Bəzi yerlərdə arabir duman olacaq. Mülayim qərb küləyi əsəcək. Havanın temperaturu gecə 6-10° isti, gündüz 15-19° isti, dağlarda gecə 3° şaxtadan 2°-dək isti, gündüz 2-6° isti olacaq.
20-03-2023, 14:28
“Kaşaqan” neft yatağının Aktau-Bakı marşrutu üzrə ilk nəqlinə başlanıldı
Qazaxıstanın “Kaşaqan” yatağından hasil edilən neftin Xəzər dənizi ilə Aktau-Bakı marşrutu üzrə ilk dəfə nəqlinə başlanılıb. Yeni marşrutla neftin daşınması “Azərbaycan Xəzər Dəniz Gəmiçiliyi” QSC-nin (ASCO) Dəniz Nəqliyyatı Donanmasına məxsus “Akademik Xoşbəxt Yusifzadə” tankeri ilə həyata keçirilib. İlk partiyada tankerin anbarlarına ümumilikdə 6 min 900 ton xam neft yüklənib. Qazaxıstanın Aktau limanından yola düşən tanker nefti Azərbaycanın “Səngəçal” terminalına çatdıracaq. Qeyd edək ki, 2022-ci ilin dekabrında Prezident İlham Əliyevin iştirakı ilə istismara qəbul edilən “Akademik Xoşbəxt Yusifzadə” tankerinin ümumi yükgötürmə qabiliyyəti 7 min 800 tondur. Bu tankerlə həm neft, həm də kimyəvi məhsulların daşınması mümkündür.
20-03-2023, 14:24
TÜRKPA Qazaxıstanda keçirilən seçkiləri dəyərləndirdi
TÜRKPA-nın müşahidəçi missiyası Qazaxıstanda keçirilən parlament seçkilərini dəyərləndirib. Missiyanın rəhbəri Recep Şeker bu barədə danışıb. Onun sözlərinə görə, proses boyunca hər şey qaydasında olub. “Deyə bilərik ki, hər şey qaydalara uyğun keçdi, seçki prosesi zamanı bütün lazımi resurslar var idi. Missiya seçki prosesinə hazırlığın səviyyəsindən razı qaldı və bu seçkiləri yüksək qiymətləndirir”, - deyə o bildirib. Qeyd edək ki, dünən Qazaxıstanda parlament seçkiləri keçirilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!