9-11-2023, 23:58
“Qarabağ” “Bayer”ə uduzdu
“Qarabağ” UEFA Avropa Liqasının qrup mərhələsində növbəti oyununa çıxıb.
Azərbaycan çempionu H qrupundakı dördüncü matçında Almaniyanın "Bayer" komandası ilə üz-üzə gəlib. Tofiq Bəhramov adına Respublika Stadionunda oynanılan qarşılaşmanı ingiltərəli FIFA referisi Kreyq Pouson idarə edib.
Görüşün taleyini 1 qol həll edib. Əsas vaxta əlavə olunmuş 4-cü dəqiqədə Viktor Bonifeysin penaltidən vurduğu qol qonaqlara qələbə qazandırıb.
85-ci dəqiqədə "köhlən atlar"ın əsas qapıçısı Andrey Lunyov zədələnərək Luka Quqeşaşvili ilə əvəzlənib.
Bu nəticədən sonra xallarını 12-yə çatdıran Leverkuzen təmsilçisi 1/8 finala vəsiqəni təmin edib və qrup liderliyini davam etdirir. Altı xalı olan Ağdam klubu isə ikinci pillədə qərarlaşıb.
Qrupun digər görüşündə isə “Hekken” İsveçdə Norveç “Molde”sini sınağa çəkəcək.
Qeyd edək ki, "Bayer" və "Qarabağ" komandaları arasında Almaniyada keçirilmiş görüş meydan sahiblərinin 5:1 hesablı qələbəsi ilə yekunlaşıb.
9-11-2023, 22:55
Rusiya nüvə sazişindən çıxmasıyla bağlı sərəncüm imzaladı
Rusiya hökuməti nüvə silahlarının ləğvi məqsədilə Yaponiya hökuməti ilə əməkdaşlıq haqqında sazişə xitam verir.
Bununla bağlı sərəncamı Rusiyanın Baş naziri Mixail Mişustin imzalayıb.
“Rusiya Federasiyası hökuməti ilə Yaponiya hökuməti arasında Rusiya Federasiyasında ixtisar edilməli olan nüvə silahlarının ləğvinə kömək etmək və bu məqsədlər üçün Əməkdaşlıq Komitəsinin yaradılması üzrə əməkdaşlıq haqqında 1993-cü il oktyabrın 13-də Tokioda imzalanmış sazişə xitam verilsin, - sərəncamda deyilir.
Rusiya Xarici İşlər Nazirliyinə qərarla bağlı Yaponiya tərəfini xəbərdar etmək tapşırılıb.
Razılaşmanın məqsədi Moskvanın ikitərəfli və ya çoxtərəfli müqavilələrə, eləcə də birtərəfli qərarlara uyğun olaraq azaltmalı olduğu nüvə silahlarının təhlükəsiz şəkildə məhv edilməsini asanlaşdırmaq idi. Bu məqsədlə komitə də yaradılmışdı.
9-11-2023, 22:38
Lavrov: “Biz heç vaxt kiminləsə “dost” deyilik və ya kiməsə qarşı deyilik”
Hazırda aktiv şəkildə Ermənistanla “dostluq” edən Qərb ölkələri Rusiya Federasiyasına qarşı onunla dostluq etmək istəyir.
Bunu Rusiyanın XİN başçısı Sergey Lavrov yerli kanallara müsahibəsində deyib.
Lavrov qeyd edib ki, Ermənistan KTMT-nin üzvü, Rusiyanın ən yaxın müttəfiqi və strateji tərəfdaşı kimi xarici tərəfdaşları ilə münasibətləri necə quracağına özü qərar verməlidir.
“Bizim Ermənistanın xarici tərəfdaşlarına, dostlarına, heç bir qərəzimiz yoxdur. Biz heç vaxt kiminləsə “dost” deyilik və ya kiməsə qarşı deyilik”, - o vurğulayıb.
9-11-2023, 22:22
Paşinyan Fransa Prezidentiylə görüşdü
Ermənistan Baş naziri Nikol Paşinyan Fransaya səfər edib.
Bu barədə erməni mətbuatı məlumat yayıb.
Bildirilir ki, o, Parisdə Fransa Prezidenti Emmanuel Makronla görüşüb.
Görüş Yelisey sarayında baş tutub.
9-11-2023, 21:45
Qalata qülləsində bayrağımız və Xarıbülbül rəsmləri işıqlandırıldı
İstanbuldakı tarixi Qalata qülləsi Azərbaycanın üçrəngli Dövlət Bayrağı və Xarıbülbül rəsmləri ilə işıqlandırılıb.
Təşəbbüs Azərbaycanın Zəfər Gününün ildönümü və Dövlət Bayrağı Günü münasibətilə baş tutub. Ərazidə olan yerli əhali və turistlərin diqqətini çəkən lazer işıqlandırması bir neçə dəfə təkrarlanıb.
Xatırladaq ki, noyabrın 8-i və 9-u dünyanın ən böyük meqapolislərindən olan İstanbulun iki qitəsini birləşdirən “Fatih Sultan Mehmet” və “15 İyul Şəhidləri” körpülərində də Azərbaycan Bayrağının rəngləri həkk olunub.
İşıqlandırılma Azərbaycanın İstanbuldakı Baş Konsulluğunun təşəbbüsü və Türkiyənin bir sıra dövlət qurumlarının dəstəyi ilə həyata keçirilir.
9-11-2023, 20:10
Qaribaşvili Makronla bir sıra məsələləri müzakirə etdi
Gürcüstanın baş naziri İrakli Qaribaşvili Fransa prezidenti Emmanuel Makronla görüşüb.
Görüş zamanı Avropa İttifaqı (Aİ) Şurasının Gürcüstana Aİ-yə namizəd ölkə statusunun verilməsi ilə bağlı Avropa Komissiyasının qəbul etdiyi qərar müzakirə olunub.
Gürcüstanın baş naziri qeyd edib ki, bu, tarixi qərardır və Gürcüstan 2023-cü ilin dekabrında Avropa İttifaqı Şurasından status almağı gözləyir. O vurğulayıb ki, bu qərar Gürcüstanın Avropa gələcəyini müəyyən edəcək.
Tərəflər iki ölkə arasında əməkdaşlığı, onun müxtəlif sahələrdə dərinləşdirilməsi perspektivlərini müzakirə ediblər.
Görüşdə regionda və dünyada təhlükəsizlik məsələləri də müzakirə olunub.
İki ölkənin liderləri Gürcüstanın Cənubi Qafqazda təhlükəsizlik və sabitliyin təmin edilməsində oynaya biləcəyi müsbət rolu qeyd ediblər.
9-11-2023, 19:41
Özbəkistan Prezidenti Qarabağdan danışdı
"Əminəm ki, tezliklə Qarabağ çox inkişaf edən diyara çevriləcək".
Bunu Özbəkistan Respublikasının Prezidenti Şavkat Mirziyoyev Azərbaycan Respublikasının Prezidenti İlham Əliyevlə Daşkənddə görüşündə deyib.
"Siz Xankəndidə Bayraq qaldırdınız və biz bunun bütün məsələlərə nöqtə qoyduğunu gördük. Güclü Azərbaycan artıq irəliyə doğru addımlayacaq və Azərbaycan xalqının, Azərbaycanın dostlarının, o cümlədən özbək xalqının, Özbəkistanın və Özbəkistan rəhbərliyinin də uzun illər gözlədiyi uğurlara nail olacaq", - Ş.Mirziyoyev bildirib.
Özbəkistan lideri qeyd edib: "Qarabağ gələcəkdə Azərbaycanda çiçəklənən torpaq olacaq, çünki Siz çox işlər görürsünüz. Mən Şuşada və Füzulidə həyata keçirilən bütün işləri öz gözləri ilə görmüş insanam. Çox şadam ki, orada olmuşam. Mən də onların nələr etdiklərini, özlərindən sonra nələr qoyub getdiklərini və Sizin səyləriniz sayəsində görülən işləri danışacağam. Yaxın ölkə olaraq, daha böyük uğurlar diləyirəm. Azərbaycan xalqı kimi, biz də ədalətin onsuz da zəfər çalacağını, Azərbaycan xalqının öz Qələbəsini qazanacağını gözləyirdik".
9-11-2023, 19:13
Qarabağın uzun illər sonra öz əzəli ərazisinə qovuşduğuna sevinirik - Rəisi
"Biz çox sevinirik ki, Qarabağ uzun illər sonra öz əzəli ərazisinə qovuşdu".
Bunu İran İslam Respublikasının Prezidenti Seyid İbrahim Rəisi Azərbaycan Respublikasının Prezidenti İlham Əliyevlə Daşkənddə görüşü zamanı deyib.
"Bu, Azərbaycandır. Azərbaycan öz ərazi bütövlüyünü bərpa edə bildi. Ümid edirik ki, Qarabağ yenidən qurulacaq və bərpa olunacaq. Biz bu planda əvvəlki kimi, Qarabağın bərpasında Sizə dəstək verməyə, öz xidmətlərimizi, o cümlədən mühəndis-texniki sahədə, təklif etməyə hazırıq", - İran Prezidenti bildirib.
İ.Rəisi qeyd edib ki, İran şirkətləri Qarabağın bərpasına kömək etməyə hazırdır.
9-11-2023, 18:23
Zurabişvili icazəsiz Fransaya səfər etdi
Gürcüstan Prezidenti Salome Zurabişvili Fransaya səfər edib.
O, 10-11 noyabr tarixlərində keçiriləcək Paris Sülh Forumunda iştirak edəcək.
Zurabişvili Avropa İttifaqı Şurasının Prezidenti Şarl Mişel və İsveçrə Prezidenti Alen Berse ilə birlikdə noyabrın 10-da böhranlar və münaqişələrə həsr edilmiş paneldə çıxış edəcək.
Prezidentin səfər üçün hökumətdən icazə almadığı bildirilir. Qeyd edək ki, Zurabişvili bundan əvvəl də icazəsiz xarici ölkələrə səfər edib. Buna görə hökumət onu impiçment etmək istəsə də, uğurlu nəticə əldə edə bilməyib.
9-11-2023, 17:29
Kadırovun oğulları "Vətən şərəfi” ordeni ilə təltif edildi
Çeçenistan rəhbəri Ramzan Kadırovun oğulları - Axmat, Eli və Adam region parlamentinin ali "Vətən şərəfi” ordeni ilə təltif ediliblər.
Bu barədə respublikanın milli siyasət, xarici əlaqələr, mətbuat və informasiya naziri Əhməd Dudayev bildirib.
Bu orden iqtisadiyyatın, elmin, mədəniyyətin, incəsənətin, mənəvi-əxlaqi tərbiyənin, təhsilin, səhiyyənin, ətraf mühitin mühafizəsinin, xeyriyyəçilik və digər ictimai fəaliyyətlərin inkişafında yüksək nailiyyətlərə görə Çeçenistan parlamenti tərəfindən vətəndaşların həvəsləndirilməsinin ən yüksək formasıdır.
“Çeçenistan Respublikasının birinci prezidenti, Rusiya Qəhrəmanı Axmat Kadırovun nəvələri Axmat, Eli və Adam bu ordenlə təltif olundular! Mükafatları Çeçenistan parlamentinin sədri Maqomed Daudov təqdim edib”, - deyə Dudayev Telegram kanalında bildirib.
O, Axmat, Eli və Adamı “gənc nəsil üçün nümunə” adlandırıb. Nazirin sözlərinə görə, onlar çeçen xalqının əsl fəxridir və hər bir hərəkətində vətənlərinin mənafeyinə xidmət etməyə çalışırlar.
“Onları hamı cəsur gənclər kimi tanıyır”, - Dudayev əlavə edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!