8-11-2023, 12:52
Xankəndidə Zəfərin üçüncü ildönümüylə bağlı hərbi parad keçirildi
Noyabrın 8-də Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi parad keçirilib.
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev, birinci xanım Mehriban Əliyeva və oğulları Heydər Əliyev paradda iştirak ediblər.
Zəfər Paradından görüntüləri təqdim edirik:
8-11-2023, 12:43
73 nəfər şuşalı doğma torpağında işlə təmin edildi
Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi keçmiş məcburi köçkün olan 73 nəfər şuşalını doğma torpağında işlə təmin edib.
Nazirlikdən verilən məlumata görə, həmin şəxslər orada tikinti, xidmət və digər sahələrdə çalışır.
Həmçinin Şuşaya qayıdacaq şəxslərlə bağlı da aidiyyəti işlərin görülməsinə başlanılıb. 8 mindən çox ailənin 29 mindən çox üzvünün sosial-demoqrafik, məşğulluq üzrə təhlilləri, məşğulluq imkanlarının qiymətləndirilməsi aparılıb.
Eyni zamanda Şuşada fəaliyyət göstərən işəgötürənlərlə də əməkdaşlıq edilir. Artıq 90-adək müəssisənin işçi qüvvəsinə ehtiyacları və vakansiya tələbləri öyrənilib.
8-11-2023, 11:58
Şimali Kiprdən təbrik paylaşımı
Şimali Kipr Türk Respublikasının Xarici İşlər Nazirliyi 8 Noyabr - Zəfər Günü münasibətilə Azərbaycan xalqını və ordusunu təbrik edib.
Təbrik mətni nazirliyin "X" hesabında paylaşılıb.
"Qardaş Azərbaycan işğal altında olan torpaqlarını azad edib. Qəhrəman Azərbaycan xalqını və ordusunu 8 Noyabr- Zəfər Gününü münasibətilə təbrik edir, bütün şəhidlərimizi rəhmətlə anırıq", - paylaşımda bildirilib.
8-11-2023, 10:57
Şəhid övladları Zəfər Günüylə bağlı danışdı
Bu gün Azərbaycanın hər yerində bayram ab-havası yaşanır. Çünki düz üç il bundan öncə, noyabrın 8-də müzəffər Ali Baş Komandan İlham Əliyevin rəhbərliyi altında Azərbaycan Ordusu Şuşa şəhərini işğaldan azad edərək bizlə şanlı qələbə yaşatdı.
Ancaq bu il Zəfər Günü tamamilə başqa əhval-ruhiyyədə qeyd olunur. 19-20 sentyabr tarixlərində Azərbaycan Ordusunun həyata keçirdiyi lokal xarakterli antiterror tədbirləri ilə Xankəndi, Xocavənd, Xocalı və Ağdərə separatçılardan tam təmizləndi. Beləliklə, Azərbaycanın ərazi bütövlüyü və suverenliyi tam bərpa edildi.
Bu gün məhz tam suveren Azərbaycanın vətəndaşları kimi bu bayramı qeyd edirik.
Bizə bu qələbəni bəxş edən qəhrəman şəhidlərimizin övladları hisslərini bölüşüblər.
Azərbaycanın Milli Qəhrəmanı, Vətən müharibəsi şəhidi polkovnik İlqar Mirzəyevin oğlu Elvin Mirzəyev saytımıza açıqlamasında deyib:
“Bir şəhid övladı olaraq həm kədərliyəm, həm də qürurlu. Allah şəhidlərimizə rəhmət eləsin! Onların sayəsində bugün biz öz doğma torpaqlarımıza qovuşduq. Onların haqları ödənməz. Sözlərim, fikirlərim bu haqda tükənməz, bitməz. Atamın ruhu şaddır. Yaşasın ordumuz, yaşasın xalqımız, yaşasın Cənab Ali Baş Komandan!”
Vətən müharibəsi şəhidi Baş leytnant Azər Şəmilovun oğlu Şəmilov Fədayət Şəmilov:
“Əvvəla bu mövzuya toxunduğunuz üçün təşəkkür edirəm. Düşünürəm ki, bu qəhrəmanlıqlar həmişə mühüm mövzumuz olmalı və gələcək nəsillərə də bu qəhrəmanlıq nümunələri ötürülməlidir. Çox yaxşı yadımdadır ki, 2020-ci il Zəfər çalınanda sevincimizin həddi hüdudu yox idi. Artıq suverenliyimizin tam bərpa olunması ilə bu sevincimiz ikiyə qatlandı. Uzun illər həsrətini çəkdiyimiz torpaqlar Cənab Prezidentimiz, ordumuz, qazi və şəhidlərimiz sayəsində artıq azaddır. Biz atamızla qürur duyuruq, o vətəni sevirdi. Doğulub böyüdüyü torpaq üçün də şəhid oldu. Düzdür, onun yoxluğu həmişə görünəcək, amma biz onunla fəxr edirik və onun arzularını həyata keçirməyə hər an can atırıq. Əminəm ki bunları etsək, onun da ruhu şad olacaq. Allah bütün şəhidlərimizə rəhmət eləsin, Zəfər bayramımız mübarək!”
Baş leytenant İlqar Vəliyevin oğlu Vəli Vəlizadə:
“19-20 sentyabr tarixlərində qəhraman ordumuz Ali Baş Komandanın rəhbərliyi altında Qarabağda keçirilən antiterror əməlyatları nəticəsində suverenliyimizi tam bərpa etdi. Bu gün şanlı Azərbaycan bayrağı Xankəndidə, Xocalıda, bir sözlə bütün Qarabağda ən yüksəklərdə dalğalanır.
Bu gün bizim qalib ordumuz zabit və əsgərlərimizin qanı bahasına xalqımızın 30 illik həsrətinə son qoyub. Bir şəhid övladı kimi daim Şuşaya və işğaldan azad olunmuş digər rayonlarımıza səfər edərkən həm duyğulanıram, həm də qürurlanıram.Qürurlanıram ona görə ki, yol boyu ordumuzun piyada keçdiyi dağları, dərələri, cığırları müşahidə etdikcə, qəhraman ordumuzun necə çətin yollardan keçərək qələbəyə doğru addımladığını görürdüm.
Biz gənclər şəhidlərimizdən bizə əmanət qalan bu şanlı bayrağı layiqincə daşımağı və hər zaman ən yüksəklərdə dalğalandırmağı özümüzə borc bilməliyik.
Bu gün mən fəxr edirəm ki, Azərbaycanlıyam! Bu gün mən fəxr edirəm ki, elə bir Qəhraman atanın övladıyam!”.
8-11-2023, 10:36
Zəfər Günü ilə əlaqədar İkinci Şəhidlər xiyabanı ziyarət edildi
8 Noyabr - Zəfər Günü ilə əlaqədar İkinci Şəhidlər xiyabanı ziyarət edilir.
Azərbaycan xalqı İkinci Şəhidlər Xiyabanına axın edir, torpaqlarımızın qorunması uğrunda canından keçərək şəhidlik zirvəsinə ucalan qəhrəmanlarımızın məzarları ziyarət olunur.
Xalq şəhidlərin məzarları önünə tər güllər düzür, onların əziz xatirəsini yad edirlər.
8-11-2023, 10:21
XİN Başçısından Zəfər Günü paylaşımı
Xarici işlər naziri Ceyhun Bayramov Zəfər Günü ilə bağlı paylaşım edib.
Paylaşımda deyilir:
“Artıq 3-cü ildir ki, təqvimlərimizdəki işğal tarixlərini qələbə günlərilə əvəzləyən Müzəffər Ali Baş Komandanın rəhbərlik etdiyi Şanlı Ordumuzun qazanaraq ədaləti bərpa etdiyi parlaq qələbəni, 8 Noyabr-Zəfər Gününü qeyd edirik. Bayramın Mübarək, Azərbaycan, sənə Zəfər yaraşır!”
8-11-2023, 00:42
Netanyahu: "Qəzza artıq İsrail üçün təhlükə yaratmayacaq”
Qəzza şəhəri mühasirəyə alınıb, biz şəhər daxilində fəaliyyət göstəririk, HƏMAS-a təzyiqi hər saat, hər gün artırırıq.
Bu barədə İsrailin baş naziri Benyamin Netanyahu bildirib.
“Mən xarici liderlərə demişəm ki, İsrail qalib gəlməsə, sırada onların ölkələri olacaq. Amma İsrail qalib gələcək”, - o əlavə edib.
Netanyahu əminliklə vurğulayıb ki, İsrail “HƏMAS-ın hərbi və idarəetmə imkanlarını məhv edəcək: "Qəzza artıq İsrail üçün təhlükə yaratmayacaq”.
8-11-2023, 00:02
Bugün ölkəmizdə Zəfər Günü kimi qeyd olunur
2020-ci il sentyabrın 27-də Ermənistanın növbəti hərbi təcavüzünə cavab olaraq Azərbaycan xalqı işğal altındakı torpaqların azad edilməsi məqsədilə Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə Vətən müharibəsinə başlayıb.
44 gün sürən hərbi əməliyyatlar nəticəsində Müzəffər Azərbaycan Ordusu oktyabrın 3-də Tərtər rayonunun Suqovuşan qəsəbəsini, oktyabrın 4-də Cəbrayıl şəhərini, oktyabrın 9-da Xocavənd rayonunun Hadrut qəsəbəsini, oktyabrın 17-də Füzuli şəhərini, oktyabrın 20-də Zəngilan şəhərini, oktyabrın 25-də Qubadlı şəhərini, noyabrın 8-də isə Şuşa şəhərini işğaldan azad edib, ümumilikdə 300-dən çox yaşayış məntəqəsi, həmçinin Ağdərə, Murovdağ və Zəngilan istiqamətlərində mühüm strateji yüksəkliklər işğaldan azad olunub.
Prezident İlham Əliyev 2020-ci il dekabrın 3-də Azərbaycan Respublikasında Zəfər Gününün təsis edilməsi haqqında Sərəncam imzalayıb.
Sərəncama əsasən, Şuşanın işğaldan azad edildiyi gün - 8 Noyabr Azərbaycan Respublikasında Zəfər Günü kimi təntənəli şəkildə qeyd edilir. Zəfər Günü ilə əlaqədar noyabrın 8-də bir sıra tədbirlərin keçirilməsi nəzərdə tutulur.
Son üç il ərzində Prezident İlham Əliyev və birinci xanım Mehriban Əliyeva dəfələrlə Şuşa şəhərində səfərdə olublar, orada həyata keçirilən təmir, bərpa və yenidənqurma işləri ilə tanış olublar.
2023-cü il sentyabrın 19-20-də Azərbaycan Ordusunun Qarabağda həyata keçirdiyi lokal xarakterli antiterror tədbirlərindən sonra ərazilərimiz separatçılardan təmizlənib, Azərbaycanın ərazi bütövlüyü və suverenliyi tam təmin olunub.
Dövlət başçısı oktyabrın 15-də Xankəndi şəhərinə, Xocavənd, Şuşa, Xocalı, Ağdərə rayonlarına səfər edib, Əsgəran qalasında olub və orada Azərbaycan bayrağını qaldırıb.
Zəfər Günü ilə əlaqədar olaraq, bu ilin sentyabr ayında separatçılardan təmizlənən Xankəndi şəhərində hərbi parad keçiriləcək. Ali Baş Komandan, Prezident İlham Əliyevin qəbul edəcəyi paradda nümunəvi hərbi bölüklərin iştirakı nəzərdə tutulur.
8 noyabr ölkədə qeyri-iş günüdür.
7-11-2023, 23:23
TÜRKSOY-dan Zəfər Günüylə bağlı təbrik paylaşımı
Beynəlxalq Türk Mədəniyyəti Təşkilatı (TÜRKSOY) 8 Noyabr-Zəfər Günü ilə bağlı paylaşım edib.
Təbrik mesajı təşkilatın rəsmi sosial şəbəkə hesablarında yayımlanıb.
Mesajda “Azərbaycan Zəfər Günün mübarək!” İfadəsi yer alıb.
7-11-2023, 21:48
XİN Başçısı serbiyalı nazirlə bu mövzuları müzakirə etdi
Azərbaycanın xarici işlər naziri Ceyhun Bayramov Serbiya Respublikasına rəsmi səfəri çərçivəsində Serbiyanın əmək, məşğulluq, veteran və sosial məsələlər naziri, habelə Azərbaycan Respublikası ilə Serbiya Respublikası arasında ticarət və iqtisadi əməkdaşlıq üzrə Hökumətlərarası Komissiyanın həmsədri Nikola Selakoviç ilə görüşüb.
Bu barədə Azərbaycan Xarici İşlər Nazirliyindən bildirilib.
Görüşdə Azərbaycan və Serbiya arasında çoxşaxəli əməkdaşlıq gündəliyində duran məsələlər, habelə bölgədə və dünyada mövcud vəziyyət müzakirə olunub.
Səfər müddətində göstərilən yüksək qonaqpərvərliyə görə təşəkkür edən nazir Ceyhun Bayramov, Serbiyaya rəsmi səfərindən məmnunluq duyduğunu qeyd edib. Nazir bundan öncə Serbiyanın xarici işlər naziri kimi çalışan həmkarının 2021-ci ildə ölkəmizə səfərini və keçirilmiş görüşləri xatırlayaraq, bu kimi sıx təmasların iki ölkə arasında strateji tərəfdaşlıq münasibətlərinin inkişafında müstəsna rol oynadığını qeyd edib.
Azərbaycan və Serbiya arasında müxtəlif, o cümlədən iqtisadiyyat, ticarət, investisiyalar, enerji təhlükəsizliyi, humanitar və s. sahələri əhatə edən qarşılıqlı faydalı əməkdaşlıq gündəliyinin inkişafında mövcud müqavilə-hüquq bazasının genişləndirilməsindən bəhs olunub. Bu istiqamətdə ötən il iki ölkənin müxtəlif dövlət qurumları arasında bir sıra sənədlərin imzalanmasının təqdirəlayiq olduğu vurğulanıb.
Qarşı tərəf post-münaqişə dövründə bölgədə mövcud vəziyyət, Azərbaycan tərəfindən işğaldan azad olunmuş ərazilərdə aparılan bərpa və quruculuq işləri, o cümlədən Azərbaycan və Ermənistan arasında münasibətlərin normallaşması prosesinin irəlilədilməsi istiqamətində göstərilən səylər barədə ətraflı məlumatlandırılıb.
Nazir Azərbaycan və Serbiya arasında ənənəvi dostluq və əməkdaşlıq münasibətlərinin inkişafında səylərinə görə həmkarına təşəkkür edib, əlaqələrin daha da genişləndirilməsinə daim töhfə verməyə hazır olduğunu bildirib.
Görüş zamanı, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!