20-02-2024, 17:16
Dövlət Komitəsi zorakılığa məruz qalan azyaşlıya baş çəkdi
Ailə, Qadın və Uşaq Problemləri üzrə Dövlət
Komitəsi atası tərəfindən zorakılığa məruz qalan azyaşlıya və ailəsinə baş çəkib.
Dövlət Komitəsi və Xəzər RİH-nin Yetkinlik yaşına çatmayanların işləri və hüquqlarının müdafiəsi üzrə komissiyanın əməkdaşları atası tərəfindən fiziki zorakılığa məruz qalan azyaşlı və onun ailəsi ilə görüşüblər.
Şüvəlan UADM-in psixoloqu, sosial iş üzrə mütəxəsis və sosial pedaqoqunun iştirakı ilə zərərçəkmiş şəxsin ailəsinə səfər olunub.
Bildirilib ki, Lalə Məmmədova (şərti ad) həyat yoldaşı Məmmədov Elnur Eltəmas oğlu ilə 2017-ci ildən ailə qurublar. Onların bu nikahdan 3 qız övladı dünyaya gəlib. Zərərçəkmiş uşaqların daimi olaraq ataları tərəfindən fiziki zorakılığa məruz qaldığı haqqında məlumat verib. Dəfələrlə ayrılmaq istəsədə valideynlər buna razılıq verməyib. Hazırda qadın nikahın pozulması üçün məhkəməyə müraciət edəcəyini bildirib.
Mütəxəssislər tərəfindən uşaqlarla ətraflı söhbət aparılıb, psixo-sosial dəstək göstərilib.
Komitənin Şüvəlan UADM tərəfindən uşaqların psixoloji reabilitasiyaya cəlb olunması nəzərdə tutulur.
Qeyd edək ki, fakta görə Cinayət Məcəlləsinin müvafiq maddəsi ilə cinayət işi başlanılıb. E.Məmmədov polis tərəfindən saxlanılıb.
20-02-2024, 17:09
Rusiyada qadın məhbuslar da müharibəyə cəlb edilir
Rusiyada müharibəyə qadın məhbuslar da cəlb olunur.
Bu barədə jurnalistlərə Leninqrad vilayətinin Ulyanovka kəndinin 2 saylı cəzaçəkmə koloniyasının keçmiş məhbusları bildiriblər. Rusiya və Ukraynanın bəzi Teleqram kanalları da belə xəbər yayıb.
Qadınların sözlərinə görə, Müdafiə Nazirliyinin nümayəndələri bir neçə dəfə koloniyaya gəliblər.
Qadın məhbuslara amnistiya vəd edilməklə bir illik müqavilələr, o cümlədən snayperlər kimi müharibəyə getmək təklif edilib.
Deyilənə görə, 20-50 qadın razılaşıb, amma indiyədək onların heç biri koloniyadan götürülməyib.
20-02-2024, 17:00
Messi qazandığı “Qızıl top”u “Barcelona”nın muzeyinə bağışladı
Argentina millisinin futbolçusu Lionel Messi 2023-cü ildə qazandığı “Qızıl top” mükafatını vaxtilə çıxış etdiyi İspaniyanın “Barselona” klubunun muzeyinə bağışlayıb.
37 yaşlı hücumçu bu mükafatın da əvvəlkilərin yanında yer almasını istəyib.
Təcrübəli forvard daha əvvəl 2009, 2010, 2011, 2012, 2015, 2019 və 2021-ci illərdə “Qızıl top”un sahibi olub və onların hər biri hazırda Kataloniya təmsilçisinin muzeyindədir.
Qeyd edək ki, Lionel Messi 2003-2021-ci illərdə "Barselona"da çıxış edib. O, hazırda ABŞ-ın "İnter Mayami" klubunun formasını geyinir.
20-02-2024, 16:53
Papoyan Türkiyəyə bu səbəbdən səfər etdi
Ermənistanın hakim Mülki Müqavilə Partiyasının nümayəndəsi Gevork Papoyan Türkiyəyə səfər edib.
Bu barədə "Sputnik Armenia" məlumat yayıb.
Orada Papoyan QDİƏT Parlament Assambleyasının iclasında iştirak edəcək. Şayiələrə görə, o, iqtisadiyyat naziri olacaq.
Qeyd edək ki, ötən il Ermənistan parlamentinin sədri Alen Simonyanın rəhbərlik etdiyi nümayəndə heyəti də tədbirdə iştirak edib.
20-02-2024, 16:24
Mərhum siyasətçinin qardaşı axtarışa verildi
Mərhum rusiyalı siyasətçi Aleksey Navalnının qardaşı Oleq axtarışa verilib.
Bu barədə "Novaya Gazeta Europe" məlumat yayıb.
Bildirilib ki, bununla bağlı Daxili İşlər Nazirliyinin axtarış məlumat bazasından məlumat verilib.
Onun hansı iş üzrə axtarıldığı məlum deyil.
20-02-2024, 16:22
Qərbi Azərbaycan torpaqlarını öyrədən xəritənin təqdimatı baş tutdu
Fevralın 20-də Azərbaycan Respublikası Prezidentinin İşlər İdarəsinin Prezident Kitabxanasında “Qafqaz diyarının xəritəsi - Tiflis 1847-ci il” nəşrinin təqdimatı keçirilib.
Nəşri Bakı Beynəlxalq Multikulturalizm Mərkəzi, Azərbaycan Respublikası Prezidentinin İşlər İdarəsinin Prezident Kitabxanası və Qərbi Azərbaycan İcması birgə çap edib.
Azərbaycan Respublikası Prezidentinin İşləri İdarəsinin Prezident Kitabxanasının direktoru Mayıl Əhmədov vurğulayıb ki, xəritə Qərbi Azərbaycan torpaqlarının öyrənilməsində mühüm əhəmiyyət kəsb edir.
Tədbirin moderatoru Bakı Beynəlxalq Multikulturalizm Mərkəzinin icraçı direktoru Rəvan Həsənov bildirib ki, 1847-ci ilin xəritəsi Gürcüstan Hərbi Topoqrafik Baş Qərargahı və Çar Rusiyası tərəfindən hazırlanmış xəritədir. Xəritələr olduğu kimi mənbəyi göstərilməklə çap edilib. Bu zamana qədər Azərbaycan ictimaiyyəti üçün 1903-cü ildə çap edilmiş xəritənin daha məşhur olduğunu diqqətə çatdıran R.Həsənov əlavə edib ki, 1903-cü ildə çap olunmuş xəritədə də istər Qarabağ, istərsə də Şərqi Zəngəzur iqtisadi rayonlarının, eyni zamanda, Qərbi Azərbaycan ərazisində olan toponimlərin mənşələri göstərilmişdi.
“Amma həmin xəritələrdə XX əsrin əvvəllərində ermənilər tərəfindən saxtalaşdırılma, dəyişdirilmə işləri aparılıb. 1847-ci ilin xəritəsində olan toponimlər, hidronimlər və aqronimlərin faiz etibarilə daha çoxu Azərbaycan, türk mənşəllidir. Hamımız bilirik ki, tariximiz illərlə saxtalaşdırılıb, mənbəyi olmayan xəritələr ortaya qoyulub. Ermənilər tərəfindən tarixin saxtalaşdırılması əsrlərdir davam edib. Bu faktlar da həmin xəritənin nəşrində ayrıca olaraq qeyd edilib”.
Rəvan Həsənov diqqətə çatdırıb ki, bu xəritə son deyil. Bu istiqamətdə işlər davam etdirilməlidir.
“Daha əvvəlki tarixlərə dair xəritələr arşdırılıb üzə çıxarılmalıdır. Eyni zamanda bu xəritə təkcə elmi camiyədə yox, bütün dünya ictimaiyyətinə çatdırılmalı, müxtəlif dillərə tərcümə olunmalıdr. Biz artıq bu prosesə başlamışıq. Xəritə rus və ingilis dilinə tərcümə olunur”.
Azərbaycan Dillər Universitetinin rektoru, akademik Kamal Abdulla Azərbaycan həqiqətlərinin üzə çıxarılmasında xəritənin nəşr olunmasının ciddi bir addım olduğunu vurğulayıb. Diqqətə çatdırıb ki, Bakı Beynəlxalq Multikulturalizm Mərkəzi bu istiqamətdə işləri sistemli şəkildə aparır. Mərkəzin “Həqiqətin onomastikası” kitabının birinci və ikinci nəşrinin hazırlanması, kitabların rus və ingilis dillərinə tərcümə olunması da buna sübutdur.
Azərbaycan Respublikası Prezidentinin Administrasiyasının sektor müdiri Fuad Axundov Azərbaycanla bağlı tarixi faktların saxtalaşdırılmasının üzə çıxarılmasının vacibliyini diqqətə çatdırıb.
“Ulu öndər Heydər Əliyev deyirdi: “Öz mədəni irsini qoruyub saxlaya bilməyən xalq nəyə qadir olduğunu heç vaxt sübut edə bilməz”. Bu doğrudan da belədir, son 200 il ərzində ermənilər Azərbaycan tarixinin saxtalaşdırılması istiqamətində çox işlər görüblər və müəyyən məqamlarda buna nail ola biliblər. Bu gün bu saxtakarlıqların üzə çıxarılması və tarixi həqiqətlərin ictimaiyyətə çatdırılması mühüm əhəmiyyət kəsb edir. “Qafqaz diyarının xəritəsi - Tiflis 1847-ci il” nəşrinin çap olunması bu istiamətdə görülən işlərə, atılan addımlara mühüm töhfədir”.
O, nəşrin hazırlanmasında əməyi keçənlərə təşəkkürünü bildirib.
Qərbi Azərbaycan İcmasının sədri, Milli Məclisin deputatı Əziz Ələkbərli vurğulayıb ki, tariximizin sübut olunması milli məsələdir. Biz tarixin saxtalaşdırılması ilə bağlı çürük təfəkkürü ermənilərin beynindən sökməyə nail olmalıyıq və bunun üçün Azərbaycanın tarixini sübut edən xəritələrin yenidən çapına böyük ehtiyac duyulur.
Milli Məclisin deputatı Ceyhun Məmmədov qeyd edib ki, yalanların ifşasına həmişə ehtiyac var.
“Bizim müharibəmiz bitsə də, mübarizəmiz hələ davam edir. Mübarizədə isə bu kimi ciddi faktlara əsaslanan nəşrlərin rolu əvəzsizdir”. O, Azərbaycanın işğaldan azad olunmuş ərazilərində, eləcə də vaxtilə azərbaycanlıların tarixən yaşadığı indiki Ermənistan Respublikası ərazisində azərbaycan toponimlərinin saxtalaşdırlması faktlarının araşdırılıb üzə çıxarılmasının və dünya ictimaiyyətinə çatdırımasının vacibliyini və nəşr olunan xəritənin əhəmiyyətini vurğulayıb.
Digər çıxış edənlər, AMEA Tarix İnstitutunun baş direktoru Kərim Şükürov, Geodeziya və Kartoqrafiya Agentliyinin İdarə Heyətinin sədri Nazim İsmayılov, Qərbi Azərbaycan İcması İdarə Heyətinin üzvü, tarix üzrə fəlsəfə doktoru Nazim Mustafa, Coğrafiya Cəmiyyətinin vitse-prezidenti Müqabil Bayramov, AMEA Şərqşünaslıq İnstitutunun baş elmi işçisi Solmaz Tohidi və Dövlət İdarəçilik Akademiyasının kafedra müdiri Firdovsiyyə Əhmədova nəşrin əhəmiyyətndən bəhs ediblər.
Tədbir müzakirələrlə davam edib.
Qeyd edək ki, “Qafqaz diyarının xəritəsi - Tiflis 1847-ci il” nəşrinin layihə rəhbərləri Bakı Beynəlxalq Multikulturalizm Mərkəzinin icraçı direktoru Rəvan Həsənov, Qərbi Azərbaycan İcmasının sədri, Millin Məclisin deputatı Əziz Ələkbərli, Ekologiya və Təbii Sərvətlər Nazirliyinin Geodeziya və Kartoqrafiya Agentliyinin İdarə Heyətinin sədri Nazim İsmayılovdur. Layihəyə məsul şəxslər isə Bakı Beynəlxalq Multikulturalizm Mərkəzinin baş məsləhətçisi Araz Qurbanov və Qərbi Azərbaycan İcması aparatının rəhbəri Qalib Qasımovdur. Xəritəni Azərbaycan Coğrafiya Cəmiyyətinin vitse-prezidenti Müqabil Bayramovun rəhbərlik etdiyi qrup tərtib edib. 1847-ci ilin topoqrafik xəritəsində Qərbi Azərbaycanda azərbaycanlıların yaşadıqları məntəqələr, Aleksandropol qəzası üzrə Şörəyel, Pəmbək sahələrindəki yaşayış məntəqələri, Qars paşalığının Zərşad sancağından Ermənistana daxil edilən kəndlər, İrəvan qəzası Sərdarabad, Zəngibasar, Göyçə sahələrindəki, Şərur sahəsinin Vedibasar nahiyəsini əhatə edən yaşayış məntəqələri, Yelizavetpol qəzasının Qazax, Şəmşəddil sahəsindən Ermənistana qatılan yaşayış məntəqələri, Yelizavetpol qəzasının Dərələyəz sahəsindəki yaşayış məntəqələri, Kaspi vilayətinin Zəngəzur sahəsindən, Naxçıvan qəzasının Meğri sahəsindən Ermənistana qatılan yaşayış məntəqələri əksini tapıb.
20-02-2024, 16:07
Ramazan ayı bu tarixdə başlayır
Ramazan ayının ilk günü martın 11-nə təsadüf edəcək.
Bu barədə Qafqaz Müsəlmanları İdarəsinin təqvimində qeyd edilib.
Qədr gecələri 28, 30 mart, 1 və 5 aprelə təsadüf edəcək.
Ramazan bayramı aprelin 10-11-də olacaq.
20-02-2024, 16:04
Prezident vergi Dövlət Vergi Xidməti işçilərini təltif etdi
Azərbaycan Prezidenti İlham Əliyev İqtisadiyyat Nazirliyi yanında Dövlət Vergi Xidməti işçilərinin təltif edilməsi haqqında Sərəncam imzalayıb.
Sərəncamla vergi sisteminin inkişafında xidmətlərinə görə İqtisadiyyat Nazirliyi yanında Dövlət Vergi Xidmətinin aşağıdakı işçiləri təltif ediliblər:
3-cü dərəcəli “Vətənə xidmətə görə” ordeni ilə
Vəliyev İlkin Etibar oğlu
“Dövlət qulluğunda fərqlənməyə görə” medalı ilə
Musayev Orxan Azad oğlu
1-ci dərəcəli “Vergi orqanlarında xidmətdə fərqlənməyə görə” medalı ilə
Abdullayev Vəli Həsən oğlu
Kəngərli Cavid Muxtar oğlu
Musayev Fəxrəddin Binnət oğlu
Süleymanlı Elxan Süleyman oğlu
Şahinzadə Fərman İlham oğlu
2-ci dərəcəli “Vergi orqanlarında xidmətdə fərqlənməyə görə” medalı ilə
Mahmudov Fuad Malik oğlu
Məhərrəmov Ramiz Bulut oğlu
3-cü dərəcəli “Vergi orqanlarında xidmətdə fərqlənməyə görə” medalı ilə
Əhmədov Rəşad Kazım oğlu.
20-02-2024, 15:03
Ədliyyə Nazirliyinin səlahiyyətləri azaldılır
Xəbər verdiyimi kimi, bu gün Milli Məclisin Hüquq siyasəti və dövlət quruculuğu komitəsinin iclasında “Məhkəmələr və hakimlər haqqında” qanuna dəyişikliklər müzakirə olunub.
Qanun layihəsində Ədliyyə Nazirliyinin səlahiyyətlərinin azaldılması öz əksini tapıb.
Belə ki, sözügedən Nazirliyin məhkəmələrlə bağlı bir çox səlahiyyətləri Məhkəmə-Hüquq Şurasına həvalə ediləcək.
Milli Məclisin plenar iclasına tövsiyə edilən layihəyə görə, məhkəmə statistikasının aparılması, məhkəmələrdə kargüzarlığın təşkil edilməsi, hakimlərin əmək və sosial hüquqlarının təmin edilməsi, məhkəmələrdə icra və əmək intizamına riayət edilməsi üçün tədbirlər görmək, birinci və apelyasiya instansiyası məhkəmələrində bu sahələr üzrə işin təşkili vəziyyətini yoxlamaq, həmçinin birinci instansiya məhkəmələrində sədr və sədr müavini vəzifələri vakant olduqda onların vəzifələrinin icrasını müvəqqəti olaraq həmin məhkəmənin hakimlərindən birinə həvalə etmək, birinci instansiya məhkəmələrinin hakimlərini onların razılığı ilə digər məhkəməyə ezam etmək, onlara məzuniyyət vermək, həmin məhkəmələrin aparatlarının strukturunu və ştat cədvəlini təsdiq etməklə bağlı hüquqlar Məhkəmə-Hüquq Şurasına aid ediləcək.
Müvafiq icra hakimiyyəti orqanının hakimlər barəsində intizam icraatının başlanılması barədə müraciət etməsi imkanı və hakimlərin həmin orqana ezam edilməsi qanundan çıxarılır. Hakimlərin öz razılığı ilə Məhkəmə-Hüquq Şurasının Aparatına ezam müddəti isə 1 ilədək müddətə azaldılır. Bundan başqa, layihədə Məhkəmə-Hüquq Şurasının hər hansı müraciət olmadan qanunla müəyyən edilmiş hallarda bütün instansiya məhkəmələrinin hakimləri barəsində intizam icraatı başlamaq vəzifəsi qeyd olunur.
Dəyişikliklərin 2024-cü il iyunun 1-dən qüvvəyə minməsi təklif olunur.
Qanun layihənin Milli Məclisin növbəti plenar iclasında müzakirə ediləcəyi gözlənilir.
20-02-2024, 14:35
Xocalı şəhərinin içməli su təchizatı yaxşılaşdırılır - VİDEO
Azərbaycan Dövlət Su Ehtiyatları Agentliyi Xocalı şəhərinin içməli su təchizatı yaxşılaşdırır.
Bu barədə quruma istinadən xəbər verir.
Məlumata görə, Prezident İlham Əliyevin tapşırıqlarına əsasən işğaldan azad olunmuş ərazilərdə içməli və tullantı su sistemlərinin yaradılması layihəsinin icrası intensiv qaydada davam etdirilir. Böyük Qayıdış Proqramından irəli gələn vəzifələrin icrasını təmin etmək məqsədilə Xocalının su təchizatının yaxşılaşdırılması üçün yeni su mənbəyi yaradılır. Proqramın icrası nəticəsində şəhərdə məskunlaşmanın və içməli suya tələbatın artacağı nəzərə alınaraq 2 yeni subartezian quyusunun qazılmasına qərar verilib. Artıq quyulardan biri istismara hazır vəziyyətə gətirilib, digər quyunun qazıntısı işləri davam etdirilir. Yeni subartezian quyuları gələcəkdə şəhəri 24 saat fasiləsiz içməli su ilə təmin etməyə imkan verəcək. Xocalının içməli su təchizatı məqsədilə mənbədən götürülən su həcmi 500 kubmetr olan anbara ötürüləcək və buradan şəhərə paylanacaq.
Xocalıda mövcud içməli və tullantı su şəbəkələrinin genişləndirilməsi işləri də həyata keçirilir. Yeni inşa edilən fərdi yaşayış evlərinin şəbəkələrə qoşulmasını təmin etmək məqsədilə içməli və tullantı su xətləri çəkilir.
Xocalının bir hissəsində mərkəzləşdirilmiş paylayıcı su şəbəkəsi mövcuddur. Kanalizasiya şəbəkəsi isə şəhərin kiçik bir hissəsini əhatə etməklə istismara yararsız vəziyyətdədir. Hazırda şəhərə, eləcə də rayonun bir neçə kənd və qəsəbəsinə Xocalı Sukanal İdarəsi xidmət göstərir.
[media=https://youtu.be/Pypo0dc2GcY]
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!