27-02-2024, 14:13
Əsirlərimizin qaytarılması istiqamətində danışıqlar davam edir - Simonyan
Müharibənin proqnozlaşdırılması nankor işdir. Biz hər şeyi etmişik və edirik ki, belə bir təhlükə olmasın, gördüyünüz kimi, müəyyən dərəcədə uğur qazanırıq.
Bunu fevralın 27-də Ermənistan parlamentinin sədri Alen Simonyan jurnalistlərə açıqlamasında bildirib.
Onun sözlərinə görə, Ermənistan əsirlərin qaytarılması məsələsi ilə bağlı danışıqları davam etdirir.
“Hazırda Qarabağın keçmiş liderlərini hesablasaq, Azərbaycanda 25-ə yaxın təsdiqlənmiş əsirimiz var, bu istiqamətdə danışıqlar davam edir”, - Simonyan qeyd edib.
26-02-2024, 22:17
Macarıstanda yeni prezident seçildi
Macarıstanın parlamenti səs çoxluğu ilə Konstitusiya Məhkəməsinin sədri Tamaş Szujoku ölkənin yeni prezidenti seçib.
Bu barədə Macarıstanın "Telex" nəşri yazıb.
Şuyokun namizədliyini 134 deputat dəstəkləyib, beşi əleyhinə səs verib.
Tamaş Szuyok martın 5-də Macarıstan prezidenti vəzifəsinin icrasına başlayacaq. Həmin günə qədər Macarıstan Prezidentinin səlahiyyətlərini parlamentin sədri Laszlo Köver icra edəcək.
Qeyd edək ki, bu gün parlament Macarıstanın əvvəlki prezidenti Katalin Novakı yekdilliklə vəzifəsindən azad edib.
26-02-2024, 21:52
Xocalı soyqırımı İsveç mediasında
“Diplomatic World Sweden” saytında Beynəlxalq Münasibətlərin Təhlili Mərkəzinin şöbə müdiri Vasif Hüseynovun Xocalı soyqırımının 32-ci ildönümünə həsr olunmuş məqaləsi dərc edilib.
“Azərbaycanda Xocalı soyqırımı qurbanlarının xatirəsi anılıb” başlıqlı məqalədə Ermənistan tərəfindən Azərbaycan torpaqlarının işğal edilməsindən, Ermənistan silahlı qüvvələrinin ötən əsrin 90-cı illərinin əvvəllərində həyata keçirdiyi etnik təmizləmədən və 613 nəfərin ölümünə səbəb olmuş Xocalı soyqırımından bəhs edilir.
Müəllif 1992-ci ildə Qarabağdakı separatçı rejimin silahlı qüvvələrinin komandanı olmuş Serj Sarkisyanın 2000-ci ilin dekabrında britaniyalı jurnalist Tomas de Vaala verdiyi müsahibəni xatırladıb, həmin müsahibədən sitat gətirib: “Xocalı hadisəsindən əvvəl azərbaycanlılar bizim onlarla zarafat etdiyimizi düşünürdülər, ermənilərin dinc sakinlərə əl qaldıra bilməyəcəklərini zənn edirdilər. Biz bütün bu stereotiplərə son qoymalı idik. Belə də oldu”.
“Xocalı faciəsi jurnalistlər tərəfindən ətraflı səkildə sənədləşdirilib, daha sonra isə bu faciə barədə insan hüquqları təşkilatları, o cümlədən bu cinayəti “Ermənistan və Azərbaycan arasındakı münaqişədə ən böyük qətliam” adlandıran “Human Rights Watch” tərəfindən məlumat verilib”, – V.Hüseynov yazır.
Məqalədə qeyd olunur ki, Xocalı soyqırımının 32-ci ildönümü 2024-cü ildə Azərbaycanın bütün suveren ərazilərində, o cümlədən erməni işğalından azad edilmiş Xocalı şəhərində ilk dəfə olaraq qeyd edilir.
“Diplomatic World Sweden” saytı İsveçdəki diplomatlar, siyasətçilər, diplomatik korpusların və səfirliklərin əməkdaşları üçün işlənərək hazırlanıb. Saytda əsasən müsahibələr, reportajlar, foto və videokontent materialları yerləşdirilir, əsas diqqət isə milli kommersiya şirkətləri, ictimai təşkilatlar və media qurumları ilə ortaqlığa, həmçinin striminq və sosial media platformalarına ayrılır.
26-02-2024, 21:19
Macarıstan prezidentinin istefası təsdiqləndi
Macarıstan parlamenti Prezident Katalin Novakın istefasını qəbul edib.
Qış fasiləsindən sonra ilk iclasında deputatlar dövlət başçısının istefaya getməsi ilə bağlı bəyanatını yekdilliklə təsdiqləyiblər.
Novak istefasını fevralın 10-da pedofiliya cinayətində iştirak edən şəxsin əfv olunması ilə bağlı qalmaqal fonunda elan edib. O, bağışlanmaz səhv etdiyini bildirib və vəzifəsindən getmək qərarına gəlib. Parlamentin iclasında çıxış edən Baş nazir Viktor Orban ona gördüyü işlərə görə təşəkkür edib.
Onun yerinə Konstitusiya Məhkəməsinin 67 yaşlı sədri Tamaş Şujokun namizədliyi irəli sürülüb. Bazar ertəsi onun namizədliyi ilə bağlı səsvermə keçiriləcək. Macarıstan Prezidenti parlament tərəfindən beş il müddətinə seçilir.
26-02-2024, 20:50
Ordumuzda da Xocalı soyqırımıyla əlaqədar silsilə tədbirlər keçirildi - FOTO
Azərbaycan Ordusunun qoşun növləri, birlik, birləşmə, hərbi hissə və xüsusi təyinatlı təhsil müəssisələrində, eləcə də Azərbaycan Respublikasının xarici ölkələrdəki diplomatik nümayəndəliklərində Xocalı soyqırımının 32-ci ildönümü ilə əlaqədar silsilə tədbirlər keçirilib.
Müdafiə Nazirliyindən bildirilib ki, anım mərasimlərində xalqımızın Ümummilli Lideri Heydər Əliyevin və Azərbaycanın suverenliyi, müstəqilliyi, ərazi bütövlüyü uğrunda şəhid olanların, eləcə də Xocalı soyqırımı qurbanlarının xatirəsi bir dəqiqəlik sükutla yad edilib. Hərbi orkestrin müşayiəti ilə Azərbaycan Respublikasının Dövlət Himni səsləndirilib.
Çıxış edənlər 1992-ci il fevralın 25-dən 26-na keçən gecə erməni silahlı dəstələrinin keçmiş sovet ordusunun Xankəndi şəhərində yerləşən 366-cı alayının iştirakı ilə Xocalı şəhərini yerlə-yeksan etməsindən danışıblar. Qeyd olunub ki, erməni təcavüzkarlarının xalqımıza qarşı törətdiyi növbəti kütləvi qırğın nəticəsində 613 nəfər, o cümlədən 106 qadın, 63 uşaq, 70 qoca xüsusi amansızlıqla qətlə yetirilib, 1275 dinc sakin əsir götürülüb, 150 nəfərin taleyi isə hələ də məlum deyil.
Keçirilən mərasimlərdə Ermənistanın təxribatlarına və hərbi təcavüzünə cavab olaraq Müzəffər Ali Baş Komandanın rəhbərliyi ilə 44 günlük Vətən müharibəsindən qazanılan Qələbədən və Azərbaycan Ordusu tərəfindən həyata keçirilən antiterror əməliyyatından bəhs edilib.
Silsilə tədbirlərdə Xocalı soyqırımının dünyaya tanıdılması istiqamətində Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin, eləcə də Heydər Əliyev Fondunun həyata keçirdiyi məqsədyönlü fəaliyyətlər xüsusi qeyd olunub.
Anım tədbirlərində Həzi Aslanov adına Ordu İdeoloji və Mədəniyyət Mərkəzinin hazırladığı ədəbi-bədii kompozisiyalar, fotosərgilər, videoçarxlar nümayiş etdirilib, Xocalı itkinləri mövzusunda çəkilmiş “13” adlı bədii-sənədli və digər filmlər izlənilib.
Həmçinin hərbi qulluqçular Xocalı soyqırımı abidələrini ziyarət edib, ictimai-siyasi hazırlıq dərslərində mövzuya dair mühazirələr oxunub və faciənin şahidləri ilə görüşlər keçirilib.
26-02-2024, 20:16
Ərdoğan Xocalıya görə İlham Əliyevə başsağlığı verdi
Türkiyə Prezidenti Rəcəb Tayyib Ərdoğan Xocalı soyqırımının ildönümü ilə əlaqədar Azərbaycan Prezidenti İlham Əliyevə və xalqına başsağlığı verib.
Bu barədə o, Azərbaycan Prezidenti İlham Əliyevlə fevralın 26-da baş tutan telefon danışığında bildirib.
Dövlət başçısı başsağlığına görə minnətdarlığını ifadə edib.
26-02-2024, 20:07
Macarıstan İsveçin NATO-ya üzvlüyünə “hə” dedi
Macarıstan parlamenti İsveçin NATO-ya üzvlüyü ərizəsini ratifikasiya edib
Deputatların əksəriyyəti qərarı dəstəkləyib.
188 deputat lehinə, 6 deputat əleyhinə səs verib.
Beləliklə, Macarıstan İsveçin alyansa daxil olmaq ərizəsini təsdiqləyən sonuncu NATO üzvü olub.
Sənəd qüvvəyə minməsi üçün Macarıstan prezidenti tərəfindən imzalanmalıdır.
“Mən Macarıstan parlamentinin İsveçin NATO-ya üzvlük ərizəsini ratifikasiya etmək üçün səsverməsini alqışlayıram. Artıq NATO üzvü olan bütün ölkələr bu qərarı təsdiqlədikdən sonra İsveç alyansın 32-ci müttəfiqi olacaq. İsveçin üzvlüyü hamımızı daha güclü və təhlükəsiz edəcək”, - NATO-nun baş katibi Yens Stoltenberq X sosial şəbəkəsində yazıb.
26-02-2024, 20:01
İlham Əliyev türkiyəli həmkarına zəng etdi
Azərbaycan Prezidenti İlham Əliyev fevralın 26-da Türkiyə Prezidenti Rəcəb Tayyib Ərdoğana zəng edib.
Bu barədə məlumatı Azərbaycan Prezidentinin Mətbuat Xidməti yayıb.
Prezident İlham Əliyev Rəcəb Tayyib Ərdoğanı yubileyi münasibətilə təbrik edib, Türkiyənin rifahı naminə fəaliyyətində yeni uğurlar və möhkəm cansağlığı arzulayıb.
Türkiyə dövlətinin başçısı göstərilən diqqətə və təbrikə görə təşəkkürünü bildirib.
Rəcəb Tayyib Ərdoğan Xocalı soyqırımının ildönümü ilə əlaqədar Azərbaycan Prezidentinə və xalqına başsağlığı verib.
Dövlət başçısı başsağlığına görə minnətdarlığını ifadə edib.
Söhbət zamanı İlham Əliyevin prezident seçiləndən sonra ilk rəsmi səfərini Türkiyəyə etməsinin önəmi bir daha qeyd edilərək, bu səfərin əlaqələrimizin daha da möhkəmləndirilməsi işinə töhfə verdiyi vurğulanıb.
Dövlət başçıları Şuşa Bəyannaməsinin əhəmiyyətinə bir daha toxunaraq, bu Bəyannamənin uğurla həyata keçirilməsindən məmnunluqlarını bildiriblər.
Prezident İlham Əliyev və Prezident Rəcəb Tayyib Ərdoğan Azərbaycan-Türkiyə dostluq, qardaşlıq və müttəfiqlik əlaqələrinin bundan sonra da uğurla inkişaf edəcəyinə və möhkəmlənəcəyinə əminliklərini bildiriblər, əməkdaşlığın perspektivləri, gələcək təmaslar və qarşılıqlı maraq doğuran məsələlər barədə fikir mübadiləsi aparıblar.
26-02-2024, 19:22
Macarıstan Azərbaycanla bağlı AŞPA-ya müraciət etdi
Fevralın 22-də Macarıstan Milli Assambleyasının Avropa Şurası Parlament Assambleyasında (AŞPA) nümayəndə heyətinin rəhbəri Jolt Nemet AŞPA-nın sədri Teodoros Rusopulosa qurumun qış sessiyası zamanı Azərbaycan nümayəndə heyətinin səlahiyyətlərinin ratifikasiya olunmamasına dair qəbul etdiyi 2527 (2004) saylı qətnamə ilə əlaqədar məktub ünvanlayıb.
Bu barədə Milli Məclisin Mətbuat və ictimaiyyətlə əlaqələr şöbəsi məlumat yayıb.
Məktubda deyilir ki, Reykyavik Sammitində yenidən sadiqliyimizi bəyan etdiyimiz Avropa Şurasının Nizamnaməsinə uyğun olaraq, biz hamılıqla paylaşdığımız idealları və prinsipləri qorumaq və həyata keçirmək məqsədilə üzv dövlətlər arasında daha böyük birliyə nail olmağa çalışmalıyıq. Bu birlik və onun gələcək perspektivləri üzv dövlətlərlə və onlar arasında həyata keçirilən dialoq vasitəsilə güclənir. Təəssüf ki, bu gün nümayəndə heyətlərinin qurumdan xaric edilməsi, həmçinin onlarla dialoqun dayandırılması halları bizim birgə səylərimizə zərbə vurduğundan, Macarıstan nümayəndə heyəti adıçəkilən qətnamənin qəbulunda iştirak etməmək qərarına gəlmişdir. Fikrimizcə, bu üsula yalnız bütün mövcud vasitələr tükəndikdə və heç bir nəticə əldə olunmadıqda, son çarə kimi müraciət edilməlidir.
Qeyd olunur ki, bu qərarın qəbul olunması ilə son bir neçə ildə təşkilatla Nazirlər Komitəsi arasında yaradılmış konstruktiv qurumlararası dialoq və ümumi maraq doğuran mövzularda davamlı məsləhətləşmələrin aparılması təcrübəsi də sarsılmış, qurumun iki orqanı arasında inamsızlığın yaranmasına gətirib çıxarmışdır. Bu mənada, biz hesab edirik ki, Azərbaycan nümayəndə heyətinin qurumda iştirakı məsələsi təcili qaydada həll olunmalıdır. Biz əminik ki, aparılan son müzakirələr və Nazirlər Komitəsinin müvafiq qərarı da bu zərurəti əks etdirməkdədir.
Macarıstan nümayəndə heyətinin rəhbəri Jolt Nemet AŞPA sədrini siyasi qruplarla birgə qətiyyətli addımlar atmağa və Azərbaycan parlament nümayəndə heyətinin təcili surətdə Parlament Assambleyasının işinə geri qayıtmasına icazə verməyə çağırıb. Bunun artıq qurumun aprel ayında keçiriləcək sessiyasında baş verməsi arzuolunan hesab edilib. Nemet əminliyini bildirib ki, belə bir addımın atılması Azərbaycana Avropa Şurasının məruzəçilərini ölkəyə dəvət etməyə və onların səfərini təşkil etməyə şərait yaratmaqla yanaşı, həmçinin Parlament Assambleyasını ölkədə keçiriləcək növbəti parlament seçkilərini müşahidə etmək üçün dəvət etməyə də imkan verəcək.
Məktubun sonunda deyilir: “Qeyd olunanların fonunda, qış sessiyasında qəbul edilmiş 2527 (2024) saylı qətnaməyə bir daha etirazımızı ifadə edir, Azərbaycan nümayəndə heyətinin Parlament Assambleyasına geri qaytarılması istiqamətində davamlı səylər göstərmək məqsədilə şəxsən özümün və həmkarlarımın dəstəyini təklif edirəm”.
26-02-2024, 17:57
Xocalı Soyqırımı Memorialı Xocalı-Əsgəran avtomobil yolunun üzərində yaradılacaq
Xocalı Soyqırımı Memorialı Heydər Əliyev Fondu tərəfindən Xocalı-Əsgəran avtomobil yolunun üzərində yaradılacaq.
Bu barədə Azərbaycan Prezidentinin köməkçisi Аnar Ələkbərov dövlət başçısı İlham Əliyevə Xocalı Soyqırımı Memorialı barədə məlumat verərkən deyib.
Qeyd olunub ki, bu memorialın yaradılması bəşəriyyətə qarşı yönəlmiş dəhşətli qətliam haqqında həqiqətlərin dünya ictimaiyyətinə çatdırılması, Azərbaycan xalqının milli yaddaşının qorunması və soyqırımı qurbanlarının xatirəsinin əbədiləşdirilməsi məqsədi daşıyır.
Memorial müxtəlif bölmələrdən ibarət olacaq. Burada 1992-ci il fevralın 25-dən 26-na keçən gecə törədilmiş faciə, həmçinin Xocalının tarixi, coğrafi əhəmiyyəti, dinc əhaliyə qarşı törədilmiş faciədən əvvəl Xocalıdakı həyat barədə faktlar yer alacaq. Memorialda Xocalının coğrafi mövqeyini təsvir etmək məqsədilə rayonun maketi də yer alacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!