20-03-2024, 14:33
Seçkidə Baydenin Tramla yarışacağı dəqiqləşdi
ABŞ-ın hazırkı prezidenti Co Bayden və keçmiş dövlət başçısı Donald Tramp martın 19-da Demokratlar və Respublikaçıların bir sıra ştatlarda keçirdiyi növbəti partiyadaxili seçkilərdə qalib gəliblər.
Bu barədə “NBC News” məlumat yayıb.
Tramp praymerizdə birdən-birə 5 ştatda qalib gəlib: Arizona (43 nümayəndədən 43-ü), İllinoys (64-dən 64-ü), Kanzas (39-dan 39-u), Ohayo (79-dan 79-u) və Florida (125-dən 125-i). Ümumilikdə bu ştatlarda ABŞ prezidenti vəzifəsinə namizədlərin rəsmi irəli sürülməsi üçün zəruri olan 350 nümayəndə səsi toplanıb.
Martın 19-da Demokrat Partiyası da ilkin seçkilər keçirib. Co Bayden növbəti qələbəsini qazanıb. Səsvermə Arizona, İllinoys, Kanzas və Ohayo ştatlarında keçirilib və ümumilikdə 379 nümayəndə iştirak edib.
Praymeriz eyni gündə Floridada da keçirilməli idi, lakin səsvermə bülletenində Baydendən başqa namizədlər olmadığı üçün ləğv edilib. 224 ştat nümayəndəsinin hamısının səsi dövlət başçısına verilib. Tramp kimi, bir həftə əvvəl Bayden də ABŞ Demokrat Partiyasından prezidentliyə yenidən namizədliyini irəli sürmək üçün lazım olan sayda nümayəndəni (1968) artıq toplamışdı.
İki əsas partiyanın namizədi artıq müəyyən edilsə də, praymerizlər və kokuslar iyunun əvvəlinə qədər davam edəcək. İyul və avqust aylarında Respublikaçılar və Demokratlar partiyaları prezidentliyə namizədlərini rəsmən irəli sürmək üçün milli qurultay keçirəcəklər. 2024-cü il noyabrın 5-də keçiriləcək prezident seçkiləri 1912-ci ildən bəri ABŞ-ın keçmiş prezidentinin hazırkı prezidentlə mübarizə aparacağı ilk seçki olacaq.
20-03-2024, 14:01
Türkiyə Rojda Bilen adlı terrorçunu zərərsizləşdirdi
Türkiyə Milli İstihbarat Təşkilatı (MİT) PKK/KCK terror təşkilatının qondarma liderinin zərərsizləşdirildiyi əməliyyatın görüntülərini yayıb.
Rojda Bilen adlı terrorçu İraqın şimalındakı Süleymaniyyədə zərərsizləşdirilib.
Təhlükəsizlik mənbələrindən əldə edilən görüntülərə görə, "Bişeng Brüsk" kod adlı terrorçu Bilenin içində olduğu ağ rəngli pikap Süleymaniyyə çölündə təqib edilib.
Avtomobil silahlı pilotsuz uçuş aparatı (SİHA) hücumu ilə vurulub və terrorçu Bilen zərərsizləşdirilib.
20-03-2024, 14:01
Türkiyə Rojda Bilen adlı terrorçunu zərərsizləşdirdi
Türkiyə Milli İstihbarat Təşkilatı (MİT) PKK/KCK terror təşkilatının qondarma liderinin zərərsizləşdirildiyi əməliyyatın görüntülərini yayıb.
Rojda Bilen adlı terrorçu İraqın şimalındakı Süleymaniyyədə zərərsizləşdirilib.
Təhlükəsizlik mənbələrindən əldə edilən görüntülərə görə, "Bişeng Brüsk" kod adlı terrorçu Bilenin içində olduğu ağ rəngli pikap Süleymaniyyə çölündə təqib edilib.
Avtomobil silahlı pilotsuz uçuş aparatı (SİHA) hücumu ilə vurulub və terrorçu Bilen zərərsizləşdirilib.
20-03-2024, 11:09
Ermənistan Aİ missiyasına toxunulmazlıq statusu verdi
Ermənistan parlamenti “Ermənistan Respublikası ilə Avropa İttifaqı (Aİ) arasında Aİ-nin Ermənistandakı Missiyasının (EUMA) statusu haqqında” sazişi ratifikasiya edib.
57 deputat sənədin lehinə səs verib, heç kim əleyhinə çıxmayıb, 27 deputat bitərəf qalıb.
Müxalifətin “Hayastan” fraksiyasının bəzi deputatları bitərəf qalıb, digər müxalif “Mənim şərəfim var” fraksiyası səsvermədə iştirak etməyib.
Müqaviləyə əsasən, müşahidəçilərə diplomatik statusa yaxın status verilir: onlar və onların rəsmi aktivləri, o cümlədən nəqliyyat vasitələri, avadanlıqlar və s. gömrük yoxlamasından keçmək zərurətindən, habelə Ermənistanda standart qeydiyyat və qeydiyyat prosedurlarından azad olacaqlar.
Bundan əlavə, avropalı müşahidəçilər viza və miqrasiya tələblərindən və istənilən miqrasiya nəzarətindən azad edilirlər. Onlara Ermənistanın bütün ərazisində, o cümlədən hava məkanından istifadə etməklə sərbəst və məhdudiyyətsiz hərəkət etmək hüququ verilir.
Müşahidəçilərə öz funksiyalarını yerinə yetirmək üçün hüquqi toxunulmazlıq veriləcək. Nümayəndəliyin yerləşdiyi binalar toxunulmazlıq statusuna malikdir və bu, onlarda axtarışların aparılması imkanını istisna edir.
Missiyanın yazışmaları və arxivləri də toxunulmaz olacaq.
20-03-2024, 11:08
İmana aparan yolun daim işıqlı olsun!
Tamxil Ziyəddinoğlu barəsində çox da geniş məlumat verməyə lüzum duymuram ona görə ki, onu artıq bir insan ömrü qədərdi ki, tamaşacılar, oxucular, Azərbaycan ictimaiyyəti "Azərbaycan Televiziyası"ndan, hazırda isə başçılıq etdiyi "Bütöv Azərbaycan" qəzetindən yaxşı tanıyır. Özünü yaxşı tanıtmaq, çəkini, sanbalını qorumaq, olduğun kimi görünmək, sözün ilə əməlini bir etmək hər kişiyə nəsib olmayan cəhət olsa da bu,Tamxil müəllimin xarizmatik albomudur. Canında, qanında olan əsl ziyalılıq isə Tamxil Ziyəddin oğlu Hacıyevin həyat kredosu, hədəfi isə düzgunlük, dürüstlük, vətənpərvərlik, xəlqilikdir.
Əziz dostum, bu əlamətdar Bahar bayramında, Allahın müqəddəs Ramazan ayında dünyaya xoş gəlmisən. Qoy, bahar nəsimi, bahar təravəti könlündən heç zaman əskilməsin, imanın kamil, imana aparan yolun isə daim işıqlı, ruhun çesmə kimi aşıb-daşsın, ilhamın enerjisi yaradıcılıgından heç əskilməsin. Can sağlığı, can, sağlıgı, yenə də can sağlıgi arzulayıram!
Hörmətlə: Bəradər SƏMƏNDƏRLİ
20-03-2024, 00:22
Şiri İbrahim təltif olunub- Təbriklər!
“İranlı Mühacirlər Cəmiyyəti” İctimai Birliyinin qərargahında “Novruz” şənliyi keçirildiyi və həmin tədbirdə “İranlı Mühacirlər Cəmiyyəti”nin işində fəal və sədaqətlə çalışanların bir qisminin təltif olunduğu barədə məlumat vermişdik. Həmin təltif olunanlar arasında Şiri İbrahim də vardı. “İranlı Mühacirlər Cəmiyyəti” İctimai Birliyinin sədri Firidun İbrahimi Diplomu təqdim edərək bildirdi ki, Şiri İbrahim bu diploma 1945-ci ildə yaranan Azərbaycan Milli Hökuməti dövründə nəşr olunan “Şəfəq” jurnalının bərpasında göstərdiyi fəaliyyətinə görə, təltif edilir.
Əziz oxucular, biz də İbrahim müəllimi təbrik edərək, onun ictimai-siyasi fəaliyyəti haqqında məlumatı diqqətinizə çatdırırıq.
Şiri İbrahim Məhəmməd oğlu 1951-ci ildə İndi İran adlanan Qərbi Azərbaycan Vilayətinin Tikantəpə (qədim Şiz) şəhərində anadan olub. Gənclik illərindən ictimai-siyasi fəaliyyətə başlayıb. 1984-cü ildə siyasi fəaliyyətinə görə ölkəni tərk edərək Şimali Azərbaycana (Azərbaycan Respublikasına) mühacirət etməyə məcbur olub.
Ali təhsilli, yazıçı, publisist, tərcüməçi, şair, 1300-dən artıq məqalə və 16 kitab müəllifidir. İranlı Mühacirlər Cəmiyyəti” İctimai Birliyiinin, Azərbaycan Yazıçılar birliyinin, IMC Ədəbi Birliyinin və “Şəfəq” jurnalının redaksiya heyətinin üzvüdür.
20-03-2024, 00:02
Azərbaycan xalqı Novruzu dördüncü ildir Qələbə sevinci ilə qeyd edir
Türk xalqlarının ənənələrindən olan Novruz yazın gəlişinin bayram edilməsidir. Vətən müharibəsindəki zəfərdən sonra Azərbaycan xalqı Novruzu dördüncü ildir Qələbə sevinci ilə qeyd edir.
Azərbaycanlıların Novruz, qırğızların Nooruz, özbəklərin Növroz, başqırd türklərinin Nevruz, tatarların Navruz, çuvaşların Naurus, Krım türklərinin Nevrez, Qərbi trakiyalıların Mevris adlandırdıqları bu bayram Şimal yarımkürəsinin bir çox ölkələrində hər ilin mart ayında el bayramı kimi geniş qeyd olunur.
Bu il Azərbaycana yaz fəslinin gəlişi 20 mart saat 07:06-ya təsadüf edəcək. Həmin vaxt gecə ilə gündüz bərabərləşəcək, Günəş ekliptika üzrə hərəkət edərək ekvatoru kəsəcək və Cənub yarımkürəsindən Şimal yarımkürəsinə keçəcək. Həmin andan Şimal yarımkürəsində yaz fəsli, Cənub yarımkürəsində isə payız fəsli başlayacaq.
Novruz bayramının mənşəyi, onunla bağlı əsatirlər qədimdir. Elmdə Novruzun mənşəyinə dair iki fikir mövcuddur. Birinciyə əsasən, Novruz türklərin ən qədim təbiət bayramı hesab olunur. Çin mənbələrində hunların martın 21-də bahar şənlikləri təşkil etdikləri barədə qeydlərə rast gəlirik. Uyğur türklərinin də müasir adətlərlə eyniyyət təşkil edən yaz mərasimləri olub. Qobustan qayaüstü rəsmlərində isə daha qədim çağlara aid ilin dəyişməsi ayini təsvir olunub. Türklərin “Ərgənəkon” dastanında əski yurda dönüş yazın ilk günü ilə əlaqələndirilir.
İkinci istiqamət əsasən İran əfsanələrindən törəyən mərasimlər toplusudur. XI əsrin yazılı abidələrində, xüsusilə Firdovsinin “Şahnamə”sində “Novruz”dan bəhs edilir. Farslarda məhz bu zamandan sonrakı çağlara aid ədəbiyyatlarda ondan geniş danışılır.
Novruz bayramı Əhəmənilər dövründə eramızdan əvvəl 350-ci ildən qeyd olunsa da, tarixi kökləri zərdüştlükdən əvvələ gedib çıxır. Bayramın bütün əlamətləri — tonqal qalamaq, səməni cücərtmək, Kosa-keçi tamaşaları, günəşi çağırış, qodu ilə qapıları döymək, umu-küsülüyə son qoymaq, dünyadan köçmüşləri yad etmək, yumurta boyamaq, yumurta döyüşdürmək, yeddi növ nemətdən xonça hazırlamaq, evdə, həyət-bacada təmizlik işləri görmək, ocaqda qazan qaynatmaq, papaq atmaq, bacadan xurcun sallamaq, ocağın başına toplaşmaq, qulaq falına çıxmaq təbiət-insan qarşılaşmasının rituallaşması və bayramlaşmasıdır.
Novruz gününə aparan yol dörd mərhələdən – çərşənbədən keçir. Bunlar Su, Od, Yel və Torpaq çərşənbələridir. Həmin günlərdə, eləcə də bayram günündə hava qaralana yaxın tonqal qalanır, hər kəs onun üzərindən tullanır və söyləyir: “Ağırlığım, uğurluğum burada qalsın”, “Dərdim, bəlam odda yansın”.
Bu bayramın tarixindən bəhs edərkən miflərin rituallaşmasını qeyd etmək yerinə düşər. Kosa-keçi mifi xüsusi anlam kəsb edir. Qədimdə insanlar hər şeyi kortəbii şəkildə təbiətdən hazır şəkildə götürürdü. Onlar yaz, yay, payız aylarının səmərəsini görür, qışın isə hər şeyi dondurub yoxa çıxardığı qənaətinə gəlirdilər. Deməli, qədim insanların təsəvvüründə qış təbiəti yoxsullaşdırdığı, kosalaşdırdığı üçün düşmən idi. Məhz təbiətin fəlakətlərindən xilas yolları axtarmaları onları rituallara gətirib çıxarıb.
Ritual-mifoloji sistemin aparıcı obrazlarından biri Xızırdır (Xıdır İlyas, Xızır Nəbi). Xızır dirilik, oyanma, bolluq, bərəkət, səadət, xoşbəxtlik gətirən ilahi varlıq statusunu alıb. Bu, türkdilli xalqların, o cümlədən azərbaycanlıların təfəkkürünün məhsuludur. Azərbaycan xalqı müxtəlif funksiyaların daşıyıcısı olan mifik obrazı daha çox xeyirxahlığı ilə fərqləndirib, yardımı əsirgəməyən övliya kimi yaddaşlarda saxlayıb. Lakin son nəticədə ulu ərənlərimiz nəvə-nəticələrinə üz tutub, hər kəsin ancaq özünə güvənməsini tövsiyə ediblər: “Nə dərin suya gir, nə də Xızırı çağır”.
Novruz bayramının təşəkkül tapmasında, inkişaf etməsində xalqımızın mühüm töhfəsi var. Sovet dövründə Novruz bayramının keçirilməsinə sərt qadağalar qoyulsa da, xalqımız onu həmişə qeyd etməyə can atıb. Milli adət-ənənələrimizə, o cümlədən Novruz bayramına yüksək qiymət verən Ulu Öndər deyib: “Novruz xalqımızın əsrlərdən bəri qoruyub saxladığı və bütün dövrlərdə həmişə əziz tutduğu bayramlardan biridir. Onun tarixi də Azərbaycan xalqının tarixi kimi keşməkeşli, enişli-yoxuşlu olmuşdur. Bu ulu bayramın müstəqil respublikamızda dövlət səviyyəsində qeyd edilməsi öz milli köklərimizə, adət-ənənələrimizə, tarixi keçmişimizə dərin ehtiram bəslədiyimizi və sarsılmaz tellərlə bağlı olduğumuzu nümayiş etdirir”.
Bolluğun, bərəkətin və xeyirxahlığın təcəssümü olan Novruz bayramı artıq UNESCO tərəfindən beynəlxalq səviyyədə qeyd olunur. Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın böyük zəhməti nəticəsində bu bayram UNESCO-nun Qeyri-Maddi Mədəni İrs Siyahısına daxil edilib. 2010-cu il fevralın 23-də isə BMT Baş Məclisi martın 21-ni Beynəlxalq Novruz Günü elan edib.
Novruz bayramı bütün dünyada 300 milyondan artıq insan tərəfindən yeni ilin başlanğıcı kimi qəbul olunur. Artıq 3 min ildir ki, Novruz Balkanlarda, Qara dəniz hövzəsi regionunda, Qafqazda, Mərkəzi Asiyada, Yaxın Şərqdə və digər regionlarda qeyd edilir.
Mübaliğəsiz demək olar ki, Novruz bir çox türk xalqları ilə bərabər, Azərbaycan xalqının milli-mənəvi varlığını dolğunluğu ilə əks etdirən, ümumxalq səviyyəsində qeyd olunan, etnik təfəkkürün ayrılmaz funksional səviyyəsinə çevrilən bayramdır. Novruz xalqın ortaq duyğu və düşüncələrini dilə gətirən, türk mədəniyyətinin qorunub yaşadılmasında əhəmiyyətli yeri olan qədim el bayramımızdır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!