20-06-2024, 18:10
YAP-dan olmayan deputatlardan parlamentin buraxılmasına reaksiya
İyunun 20-də Yeni Azərbaycan Partiyası (YAP) İdarə Heyətinin iclası keçirilib.
İclasda YAP-ı təmsil edən deputatlar altıncı çağırış Milli Məclisin buraxılması və növbədənkənar seçkilərin təyin edilməsi barədə Azərbaycan Prezidentinə müraciət olunması üçün təşəbbüs göstəriblər, bununla bağlı yekdil qərar qəbul edilib.
Bəs parlamentin digər partiyalardan olan deputatları YAP-ın qərarını necə qiymətləndirirlər?
Məsələ ilə bağlı danışan deputat, Demokratik İslahatlar Partiyasının sədri Asim Mollazadə bildirib ki, YAP üzvlərinin növbədənkənar seçkilərlə əlaqədar təşəbbüsünə normal münasibət bəsləyir:
“Yeni Azərbaycan Partiyasının parlamentin buraxılması və növbədənkənar seçkilərin keçirilməsi ilə bağlı müraciətinə normal münasibət bəsləyirəm. Onsuz da gec-tez bu olmalı idi. Yeni Azərbaycan Partiyası parlament seçkilərinin tezliklə keçirilməsini istəyirsə, bizim etirazımız yoxdur”.
Asim Mollazadə seçkilərdə iştirakla bağlı məsələnin partiyada müzakirə olunacağını və müvafiq qərar qəbul olunacağını deyib.
Milli Məclisin bitərəf deputatı Aqil Abbas YAP üzvlərinin təşəbbüsünü dəstəkləyib:
“COP29 tədbirinin keçirilməsi məsələsi var. Bu, böyük tədbirdir. Dünyanın bütün ölkələrindən qonaqlar tədbirdə iştirak edəcəklər. Bununla əlaqədar seçkiləri bir ay qabağa çəkmək istəyirlər. Burada nə var ki? Yeni Azərbaycan Partiyasının bu təklifini dəstəkləyirəm”.
Parlamentin digər üzvü, Milli Cəbhə Partiyasının sədri Razi Nurullayev rəhbərlik etdiyi qurumun məsələyə müsbət yanaşdığını vurğulayıb:
“Ümumiyyətlə, parlament seçkilərinin önə çəkilməsi normal haldır. Onsuz da seçkilər Konstitusiyaya uyğun olaraq 3 noyabrda keçirilməlidir. Belə çıxır ki, dediyiniz düzdürsə, seçki iki ay önə çəkilir və bu problem deyil. Belə olacaqsa, təbii ki, ciddi səbəbləri var ki, önə çəkilir. Rəhbərlik etdiyim Milli Cəbhə Partiyası bu məsələyə normal yanaşır”.
20-06-2024, 18:03
Prezidentdən Polis Akademiyası ilə bağlı fərman
"Azərbaycan Respublikası Daxili İşlər Nazirliyinin Polis Akademiyasının Bayrağının təsviri"ndə dəyişiklik edilib.
Bununla bağlı Prezident İlham Əliyev fərman imzalayıb.
Fərmanla "Azərbaycan Respublikası Daxili İşlər Nazirliyinin Polis Akademiyasının Bayrağının təsviri" aşağıdakı redaksiyada verilir:
"Azərbaycan Respublikası Daxili İşlər Nazirliyinin Polis Akademiyasının Bayrağı ikiüzlü qumaşdan, dəstəkdən və qotazlı qaytandan ibarətdir.
Bayrağın qumaşı Azərbaycan Respublikası Dövlət Bayrağının rənglərinə uyğun üçrəngli, ikiqat ipək faydan hazırlanır, uzunluğu 160 sm, eni 80 sm-dir, kənarları üç tərəfdən qızılı rəngli ipək saçaqlarla köbələnmişdir.
Qumaşın üz tərəfi "Azərbaycan Respublikası Dövlət Bayrağının təsvirinin təsdiq edilməsi haqqında" Azərbaycan Respublikası Konstitusiya Qanununun tələblərinə uyğun olaraq, Azərbaycan Respublikası Dövlət Bayrağının təsviri ilə eynidir, lakin mavi zolağın ortasında qızılı rəngli ipək sapla "AZƏRBAYCAN UĞRUNDA" sözləri yazılır. Yazıdakı hərflərin hər birinin hündürlüyü 4,5 sm, eni 3,3 sm-dir (Şəkil 1).
Qumaşın arxa tərəfində mavi zolağın ortasında qızılı rəngli ipək sapla "AZƏRBAYCAN RESPUBLİKASININ DAXİLİ İŞLƏR NAZİRLİYİ", yaşıl zolağın ortasında "POLİS AKADEMİYASI" sözləri, qırmızı zolağın ortasında isə Azərbaycan Respublikası Prezidentinin 2004-cü il 30 iyun tarixli 82 nömrəli Fərmanı ilə təsdiq edilmiş "Azərbaycan Respublikası daxili işlər orqanlarının embleminin təsviri"nin tələblərinə uyğun hündürlüyü 35 sm olan Azərbaycan Respublikası daxili işlər orqanlarının emblemi tikilir. Yazılardakı hərflərin hündürlüyü 4,5 sm, eni 3,4 sm-dir (Şəkil 2).
Bayrağın dəstəyi en kəsiyinin diametri 4 sm, uzunluğu 250 sm olan girdə taxtadandır.
Dəstək tünd qəhvəyi boya ilə rənglənir və laklanır, aşağı ucunda metal halqa, yuxarı ucunda nikellənmiş aypara və ulduz şəklində fiqurlu ucluq vardır.
Bayrağın qaytanı eşmədir, qızılı rəngli ipəkdən hazırlanır, hər iki ucunda qotaz var. Qaytanın uzunluğu 200-210 sm-dir".
20-06-2024, 17:55
Milli Məclis Konstitusiyaya görə belə buraxılır - Qanun
Hakim Yeni Azərbaycan Partiyası (YAP) Milli Məclisin buraxılması təşəbbüsü ilə çıxış edib.
YAP İdarə Heyətinin iyunun 20-də keçirilən iclasında təşkilatı təmsil edən deputatlara 6-cı çağırış Milli Məclisin buraxılması və növbədənkənar seçkilərin təyin edilməsi barədə Azərbaycan Respublikasının Prezidentinə müraciət olunması üçün təşəbbüs göstərmələrinin tövsiyə edilməsi barədə yekdil qərar qəbul edilib.
Bu, onunla əsaslandırılıb ki, Azərbaycanda yeni dövrün tələbinə uyğun parlamentin formalaşdırılması vacibdir. Eyni zamanda parlament seçkilərinin vaxtının COP29 sammiti ilə eyni vaxta - noyabr ayına düşməsi növbədənkənar seçkiləri gündəmə gətirib.
Növbədənkənar seçkilər vaxtından 2 ay əvvəl keçirilə bilər.
Milli Məclisin buraxılması Azərbaycan Respublikasının Konstitusiyasında da təsbit olunub.
Konstitusiyanın 98-ci maddəsində deyilir:
I. Azərbaycan Respublikası Milli Məclisinin eyni çağırışı bir il ərzində iki dəfə Azərbaycan Respublikasının Nazirlər Kabinetinə etimadsızlıq göstərdikdə və ya Azərbaycan Respublikası Konstitusiya Məhkəməsinin, Azərbaycan Respublikası Ali Məhkəməsinin və Azərbaycan Respublikası Mərkəzi Bankı İdarə Heyətinin kollegial fəaliyyəti üçün zəruri olan sayda üzvlüyə namizədləri Azərbaycan Respublikasının Prezidenti tərəfindən iki dəfə təqdim edildikdən sonra, qanunla müəyyən edilmiş müddətdə təyin etmədikdə, habelə bu Konstitusiyanın 94-cü və 95-ci maddələrində, 96-cı maddəsinin II, III, IV və V hissələrində, 97-ci maddəsində göstərilən vəzifələrini aradan qaldırıla bilməyən səbəblər üzündən icra etmədikdə, Azərbaycan Respublikasının Prezidenti Azərbaycan Respublikasının Milli Məclisini buraxır.
II. Növbədənkənar seçkilərdə seçilən Azərbaycan Respublikası Milli Məclisinin çağırışının səlahiyyət müddəti beş ildən az ola bilər. Bu halda Azərbaycan Respublikasının Milli Məclisinə növbəti seçkilər növbədənkənar seçkilərdə seçilən Azərbaycan Respublikası Milli Məclisinin çağırışının səlahiyyət müddətinin beşinci ilinin noyabr ayının birinci bazar günü keçirilir.
20-06-2024, 17:43
Türklər Kəlbəcərdə qəzaya düşdülər
Göygöl-Toğanalı-Kəlbəcər yolunda avtomobil aşıb, xəsarət alanlar var.
Kəlbəcər rayonunda aparılan yenidənqurma işlərində fəaliyyət göstərən şirkətlərdən birinə məxsus "pikap" tipli avtomobil idarəetmədən çıxaraq aşıb.
Qəza nəticəsində Türkiyə vətəndaşları olduğu bildirilən dörd nəfər xəsarət alıb. Zərərçəkənlər xəstəxanaya çatdırılıb.
Faktla bağlı araşdırma aparılır.
20-06-2024, 17:34
Qəzetlərə də pul ayrıldı - SİYAHI
Azərbaycan Respublikasının Medianın İnkişafı Agentliyi (MEDİA) tərəfindən çap mediası subyektlərinə dəstək layihəsi çərçivəsində elan edilmiş müsabiqənin nəticələri açıqlanıb.
MEDİA-nın yaydığı məlumatda 17 çap mətbuatına yardım göstəriləcəyi bildirilib.
Həmin qəzetlər aşağıdakılardı:
20-06-2024, 17:15
Azərbaycanla Qırğız Respublikası arasında ikiqat vergitutma ləğv edilir
Azərbaycan Respublikası ilə Qırğız Respublikası arasında gəlirlərə görə vergilərə münasibətdə ikiqat vergitutma aradan qaldırılır.
Bu, Milli Məclisin Beynəlxalq münasibətlər və parlamentlərarası əlaqələr komitəsinin bu gün keçirilən iclasında müzakirəyə çıxarılan qanun layihəsində əksini tapıb.
Müzakirələrdən sonra “Azərbaycan Respublikası ilə Qırğız Respublikası arasında gəlirlərə görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında Saziş”in təsdiq edilməsi barədə” qanun layihəsi parlamentin plenar iclasına tövsiyə olunub.
20-06-2024, 16:59
Azərbaycan parlamenti buraxılır, növbədənkənar seçkilər elan edilir - RƏSMİ
İyunun 20-də Yeni Azərbaycan Partiyasının (YAP) İdarə Heyətinin növbəti iclası keçirilib.
Bu barədə partiyanın mətbuat xidməti məlumat yayıb.
İclasın gündəliyi barədə məlumat verən YAP Sədrinin müavini-Mərkəzi Aparatın rəhbəri Tahir Budaqov qeyd edib ki, Azərbaycan Respublikasının Prezidenti cənab İlham Əliyevin rəhbərliyi ilə son illər tarixi qələbələr əldə edilmiş, ictimai-siyasi həyatın, dövlət idarəçiliyinin bütün sahələrində çoxşaxəli və məqsədyönlü islahatlar uğurla və ardıcıl şəkildə həyata keçirilmişdir: “Bunun nəticəsi olaraq ölkəmiz özünün keyfiyyətcə yeni inkişaf mərhələsinə qədəm qoymuşdur. 2020-ci ildə Vətən müharibəsində qazanılmış şanlı Zəfər nəticəsində Ermənistanın 30 il davam edən işğalçılıq siyasətinə son qoyulmuş, ölkəmizin ərazi bütövlüyü bərpa edilmiş, beynəlxalq hüququn norma və prinsiplərinin aliliyi təmin olunmuşdur. 2023-cü ilin sentyabrında həyata keçirilmiş antiterror tədbirləri ilə qanunsuz silahlı birləşmələr zərərsizləşdirilmiş, kriminal xunta rejiminin fəaliyyətinə son qoyulmuş, dövlətimizin suverenliyi onun bütün ərazisində bərqərar edilmişdir. Hazırda işğaldan azad olunmuş ərazilərdə genişmiqyaslı quruculuq işləri davam etdirilir, doğma yurd-yuvasından didərgin salınaraq illərlə məcburi köçkün həyatı yaşamağa məhkum olunmuş soydaşlarımız ləyaqətli şəkildə əzəli torpaqlarına qayıdırlar. Müstəqillik tariximizdə ilk dəfə bütün ölkə ərazisində 2024-cü ildə keçirilmiş Prezident seçkiləri milli birlik və həmrəyliyimizin növbəti təzahürü olmuşdur”.
YAP Sədrinin müavini vurğulayıb ki, ölkəmizin dünyada nüfuzunun daha da yüksəlməsinə və beynəlxalq ictimaiyyətin Azərbaycana etimadının daha da güclənməsinə növbəti dəfə 2023-cü ilin dekabrında şahidlik etdik: “Belə ki, Birləşmiş Millətlər Təşkilatının İqlim Dəyişmələri üzrə çərçivə Konvensiyasının Tərəflər Konfransının 29-cu sessiyası - COP29, Kioto Protokolunun Tərəflər Görüşünün 19-cu sessiyası və Paris Sazişinin Tərəflər Görüşünün 6-cı sessiyası kimi mötəbər beynəlxalq tədbirlərin 2024-cü ilin noyabr ayında Azərbaycanda keçirilməsi barədə qərar qəbul edilmişdir. Azərbaycanın qlobal tədbirlərə ev sahibliyi sahəsində böyük təcrübəyə malik olmasını, həmçinin 2024-cü ili "Yaşıl dünya naminə həmrəylik ili" elan edərək iqlim dəyişmələrinə qarşı fəal mübarizə mövqeyi nümayiş etdirməsini nəzərə alaraq, COP29-un da ən yüksək səviyyədə keçiriləcəyinə və yeni uğura imza atılacağına əminik. Bu tədbirlər on minlərlə xarici qonağa Azərbaycanı yaxından tanıtmaq, ölkəmizin bütün dünyada ədalətli sülhə, bərabərliyə, haqqa və hüquqa əsaslanan münasibətləri təbliğ və təşviq edən mövqeyini çatdırmaq üçün əlverişli fürsət olacaqdır”.
Tahir Budaqov əlavə edib ki, BMT-nin İqlim Dəyişmələri üzrə çərçivə Konvensiyasının Tərəflər Konfransının 29-cu sessiyasının və digər mötəbər beynəlxalq tədbirlərin keçiriləcəyi vaxtda - 2024-cü ilin noyabr ayında Azərbaycan Respublikası Konstitusiyasının 981 maddəsinin II hissəsinə əsasən Azərbaycan Respublikasının Milli Məclisinə növbəti seçkilər keçirilməlidir: “Həm seçkilərin, həm də qeyd olunan tədbirlərin yüksək səviyyədə təşkili mühüm əhəmiyyət kəsb edir. Bundan əlavə, həmin dövrdə ölkə parlamentinin tam fəaliyyətdə olmasının məqsədəmüvafiqliyi də nəzərə alınmalıdır. Altıncı çağırış Azərbaycan Respublikasının Milli Məclisi fəaliyyət dövrü ərzində dövlətin daxili və xarici siyasətini qanunvericilik səviyyəsində dəstəkləmək, dövlət idarəetməsinin təşkili və daha da təkmilləşdirilməsi fəaliyyətində yaxından iştirak etmək, yerlərdə seçicilərlə müntəzəm iş aparmaq, həmçinin parlament diplomatiyasının verdiyi imkanlardan səmərəli istifadə olunması sayəsində milli maraqları beynəlxalq məkanda təəssübkeşliklə təmsil etməklə üzərinə düşən vəzifələri layiqincə yerinə yetirməyə çalışmışdır. Hesab edirik ki, indiki şəraitdə də Milli Məclis dövlət maraqlarını üstün tutaraq Milli Məclisin buraxılması və seçkilərin daha erkən keçirilməsi təşəbbüsü ilə çıxış etməlidir”.
Sonra YAP Sədrinin müavini Əli Əhmədov, YAP İdarə Heyətinin üzvləri Hikmət Məmmədov, Musa Quliyev, Elşad Mirbəşiroğlu, Kamal Cəfərov, Anar İsgəndərov, Tahir Mirkişili və Bahar Muradova parlament seçkilərinin önə çəkilməsinin məqsədəuyğunluğunu əsaslandıraraq məsələyə münasibət bildiriblər.
Yekunda Yeni Azərbaycan Partiyasını Azərbaycan Respublikasının Milli Məclisində təmsil edən deputatlara altıncı çağırış Milli Məclisin buraxılması və növbədənkənar seçkilərin təyin edilməsi barədə Azərbaycan Respublikasının Prezidentinə müraciət olunması üçün təşəbbüs göstərmələrinin tövsiyə edilməsi barədə yekdil qərar qəbul edilib.
20-06-2024, 16:50
Azərbaycan və Mərakeş arasında viza rejimi ləğv edilir
Azərbaycan və Mərakeş ümumvətəndaş pasportlarının sahiblərini viza tələbindən azad edir.
Bu, Milli Məclisin Beynəlxalq münasibətlər və parlamentlərarası əlaqələr komitəsinin bu gün keçiriləcək iclasının gündəliyinə daxil edilən “Azərbaycan Respublikası Hökuməti ilə Mərakeş Krallığı Hökuməti arasında ümumvətəndaş pasportlarının sahiblərinin viza tələbindən azad edilməsi haqqında Saziş”in təsdiq edilməsi barədə” qanun layihəsində əksini tapıb.
20-06-2024, 16:27
MEDİA müsabiqə nəticələrini açıqladı
Onlayn media subyektlərinə dəstək layihəsi çərçivəsində elan edilmiş müsabiqənin nəticələri açıqlanıb.
Bu barədə Medianın İnkişafı Agentliyi (MEDİA) məlumat yayıb.
Belə ki, müsabiqədə 33 ictimai-siyasi, 6 idman məzmunlu sayt qalib olub.
20-06-2024, 16:15
Regionlarda sertifikasiya imtahanı verəcək müəllimlər
Sabah ölkə ərazisində sertifikasiya imtahanlarının test mərhələsi başlayacaq. İmtahanlar 24 iyun tarixinə qədər davam edəcək.
Sertifikatlaşdırma prosesinin test imtahanları respublikanın 18 şəhər və rayonundakı 27 məktəbdə təşkil olunacaq.
Bu il riyaziyyat, Azərbaycan dili, ingilis dili, rus dili (Azərbaycan bölməsi), rus dili və rus ədəbiyyatı (rus bölməsi), alman dili, fransız dili üzrə müəllimlərin sertifikatlaşdırmadan keçirilməsi nəzərdə tutulur.
Gəncə-Daşkəsən Regional Təhsil İdarəsi üzrə 2284 nəfər sertifikasiyaya cəlb olunacaq. 118 Azərbaycan dili, 917 Riyaziyyat, 822 İngilis dili, 302 Rus dili, 36 Rus dili və ədəbiyyatı, 70 Fransız dili, 19 Alman dili üzrə təhsilverənlər 2024-cü ildə sertifikasiyaya cəlb olunacaqlar.
Şəki-Zaqatala Regional Təhsil İdarəsi üzrə 1820 müəllim sertifikasiyaya cəlb olunacaq. 755 İngilis dili, 711 Riyaziyyat, 157 Rus dili, 82 Rus dili və ədəbiyyat, 32 İbtidai sinif, 24 Alman dili, 24 Azərbaycan dili və ədəbiyyat, 20 Azərbaycan dili və 15 Fransız dili üzrə təhsilverənlər 2024-cü ildə sertifikasiyaya cəlb olunacaqlar.
Quba-Xaçmaz Regional Təhsil İdarəsi üzrə 1078 nəfər sertifikasiyaya cəlb olunacaq. 65 Azərbaycan dili, 412 Riyaziyyat, 378 İngilis dili, 135 Rus dili, 38 Rus dili və ədəbiyyatı, 5 Fransız dili, 14 Alman dili, 31 İbtidai sinif üzrə təhsilverənlər 2024-cü ildə sertifikasiyaya cəlb olunacaqlar.
Dağlıq-Şirvan regionundan 616 nəfər təhsilverən sertifikasiyaya cəlb olunacaq. Onlardan 255 nəfər riyaziyyat, 225 nəfər ingilis dili, 67 nəfər rus dili, 25 nəfər fransız dili, 1 nəfər alman dili, 7 nəfər rus dili və ədəbiyyatı, 1 nəfər Azərbaycan dili (rus bölməsi üzrə), 19 nəfər Azərbaycan dili və ədəbiyyat, 16 nəfər isə ibtidai sinif müəllimi fənni üzrə iştirak edəcəklər.
Qazax-Tovuz bölgəsində 1 425 təhsilverən sertifikasiyaya cəlb olunacaq. 601 Riyaziyyat, 435 İngilis dili, 254 Rus dili, 32 Azərbaycan dili və ədəbiyyat, 29 İbtidai sinif, 12 Rus dili və ədəbiyyatı, 30 Fransız dili, 12 Azərbaycan dili və 20 nəfər isə Alman dili üzrə təhsilverənlər 2024-cü ildə sertifikasiyaya cəlb olunacaqlar.
Qarabağ bölgəsində 1 425 təhsilverən sertifikasiyaya cəlb olunacaq. İdarədən bildirilib ki, 659 Riyaziyyat, 985 İngilis dili, 136 Rus dili, 44 Azərbaycan dili və ədəbiyyat, 45 İbtidai sinif, 4 Rus dili və ədəbiyyatı, 7 Fransız dili, 1 Azərbaycan dili və 1 nəfər isə Alman dili üzrə təhsilverənlər 2024-cü ildə sertifikasiyaya cəlb olunacaqlar.
Mərkəzi Aran bölgəsində 1703 təhsilverən sertifikasiyaya cəlb olunacaq. 677 Riyaziyyat, 665 İngilis dili, 210 Rus dili, 35 Azərbaycan dili və ədəbiyyat, 35 İbtidai sinif, 27 Rus dili və ədəbiyyatı, 26 Fransız dili, 26 Azərbaycan dili və 13 nəfər isə Alman dili üzrə təhsilverənlər 2024-cü ildə sertifikasiyaya cəlb olunacaqlar.
Naxçıvan Muxtar Respublikasında 376 təhsilverən sertifikasiyaya cəlb olunacaq. 71 Riyaziyyat, 84 İngilis dili, 9 Rus dili, 8 Alman dili, 62 Azərbaycan dili və ədəbiyyat, 134 İbtidai sinif, 8 nəfər isə Fransız dili üzrə təhsilverənlər imtahanda iştirak edəcəklər.
Şərqi Zəngəzur Regional Təhsil İdarəsi üzrə 1112 təhsilverən sertifikasiyaya cəlb olunacaq. İdarədən bildirilib ki, 476 Riyaziyyat, 493 İngilis dili, 81Rus dili, 24Azərbaycan dili və ədəbiyyat, 35 İbtidai sinif, 3 nəfər isə Fransız dili üzrə təhsilverənlər imtahanda iştirak edəcəklər.
Lənkəran-Astara Regional Təhsil İdarəsi üzrə 1930 təhsilverən sertifikasiya imtahanda iştirak edəcəklər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!