21-09-2024, 15:25
Seçkilərlə əlaqədar 6 müraciət üzrə cinayət işi başlanıb
Mərkəzi Seçki Komissiyası seçkilərin nəticələrinə dair bütün məntəqələrdən daxil olmuş məlumatları ümumiləşdirərək seçki protokolunun təsdiq olunması üçün müvafiq sənədlərlə birgə Konstitusiya Məhkəməsinə təqdim edib.
Bunu parlament seçkiləri ilə bağlı Konstitusiya Məhkəməsi Plenumunun iclasında Konstitusiya Məhkəməsinin hakimi Rövşən İsmayılov deyib.
Eyni zamanda məruzəçi Kamran Şəfiyev bildirib ki, Baş prokurorluq seçkilərlə əlaqədar 6 müraciət üzrə cinayət işi başlanması qərara alıb.
Xatırkadaq ki, Milli Məclisə növbədənkənar seçkilər sentyabrın 1-də 125 seçki dairəsi və 6 min 478 seçki məntəqəsi üzrə keçirilib.
Seçkilərdə 125 deputat mandatı uğrunda 990 namizəd mübarizə aparıb və bütün dairələr üzrə lider namizədlər müəyyənləşib.
21-09-2024, 15:18
Qarabağdakı faydalı qazıntı yataqları ilə bağlı qərar
Nazirlər Kabineti 10 may 2019-cu il tarixli qərarı ilə təsdiq edilmiş “Yerin təkinin (qiymətli və əlvan (o cümlədən nəcib) metallar, qiymətli daş yataqları və təzahürləri istisna olmaqla) istifadəyə birbaşa danışıqlar yolu ilə verilməsi hallarının Siyahısı”na dəyişiklik edib.
Bununla bağlı Baş nazir Əli Əsədov yeni qərar imzalayıb.
Qərara əsasən, işğaldan azad edilmiş ərazilərin yenidənqurma və bərpası ilə bağlı tikinti layihələrinin həyata keçirilməsi üçün həmin ərazilərdə yerləşən ümumi yayılmış faydalı qazıntı yataqları istifadəyə verilməsi, eləcə də faydalı qazıntıların çıxarılması ilə əlaqədar olmayan yeraltı qurğuların tikilməsi və istismarı məqsədilə ayrılan yerin təki sahələri işğaldan azad edilmiş ərazilərdə yerləşdikdə birbaşa danışıqlar yolu ilə istifadəyə verilməsi müddəti daha 2 il artırılaraq 2027-ci il yanvarın 1-nə qədər uzadılıb.
21-09-2024, 15:13
Naxçıvan tezliklə blokadadan xilas olacaq
Naxçıvan Muxtar Respublikası 30 ildən çoxdur blokada şəraitində yaşayır. Naxçıvan əhalisi blokadaya görə 15 ilə yaxın qazsız qalıb, hətta elektrik enerjisi olmayıb. Azərbaycanın əsas hissəsindən gələn enerji xətləri Ermənistan tərəfindən kəsilib.
Naxçıvanı Azərbaycanın əsas hissəsi ilə birləşdirən dəmir yolunun keçdiyi Zəngəzur dəhlizi 1992-ci ildən birdəfəlik bağlanıb. Lakin ötən müddətdə beynəlxalq birlik Naxçıvanın dinc sakinlərinin problemlərinin, eyni zamanda, blokadanın aradan qaldırılması üçün heç bir addım atmayıb və Ermənistana bu məsələdə heç bir təzyiq etməyib.
Milli Məclisin deputatı Vüqar İskəndərov bildirib ki, Naxçıvan blokadadan gec-tez xilas olacaq:
"Naxçıvan Muxtar Respublikası Ermənistan və onun havadarlarının destruktiv mövqeyinə görə hələ də blokadada yaşayır. Bu yenilməz diyar insanların qəhrəmanlığı, torpağına, elinə bağlılığı ilə həmişə fərqlənib. Uzun illərdir ki, naxçıvanlılar bütün çətinliklərə sinə gəliblər. 2020-ci il Vətən Müharibəsindəki şanlı qələbəmizdən sonra 10 noyabr üçtərəfli bəyanat imzalandı. Həmin bəyanatın 9-cu bəndi Azərbaycanın əsas hissəsi ilə Naxçıvanı birləşdirən Zəngəzur dəhlizini özündə ehtiva edir. Təəssüflər olsun ki, hələ də Ermənistan bu məsələnin həlli üçün konkret addımlar atmır. Bu da azmış kimi ABŞ, Fransa və Hindistan kimi ölkələrdən hücum silahları almaqdadır. Bu, təbii olaraq, onu deməyə əsas verir ki, Ermənistan Zəngəzur dəhlizinin açılması üçün real addımlar atmır. Amma rəsmi Bakı,dəfələrlə, Ermənistan tərəfə sülh müqaviləsinin imzalanması üçün vacib addımlar atıb, təzyiqlər göstərir. Ermənistan isə bu və ya digər formada hələlik sülh müqaviləsini imzalamaqdan, Zəngəzur dəhlizinin açılmasından yayınmaqdadır. Hələlik orada dəhlizin açılıb Naxçıvanla quru yolu ilə əlaqələrin təmin edilməsi üçün yaxın zamanda real görünmür. Yəni Azərbaycan bu məsələlənin həlli üçün vacib addımlar atır. Dəmir yolu və avtomobil yollarının çəkilməsi istiqamətində addımlar atır və siyasi iradə ortaya qoyur. Mütləq bu yol açılıb, fəaliyyət göstərəcək. Sadəcə olaraq zamanla bağlı problemlər var. Hələlik güclər öz aralarında mübarizə aparmaqdadırlar. Burada İranın anlaşılmaz mövqeyi var. Bu ölkə yalnız özünə qırmızı xətlər çəkməklə məşğuldur. Burada Rusiyanın və ABŞ-nin mövqeyi də mövcuddur. Bu görüşlər bir-birilə kəsişmədiyi üçün hələlik Zəngəzur dəhlizi məsələsində konkret konsensus yoxdur. Hesab edirik ki, bunlar öz həllini tapacaq və burada əsas rolu rəsmi Bakı oynayacaq".
Deputat vurğulayıb ki, Naxçıvan blokadadan çıxdıqdan sonra daha da uğurla inkiaşf edəcək:
"Bizim üçün əsas məsələ dəhlizin açılması Naxçıvanla əsas hissəmizin quru yolu ilə birləşməsidir. Bu quru yolu həm də Türkiyə və digər türk dövlətləri ilə əlaqələrimizin inkişaf etməsi anlamı daşıyır. Bu ideyanın müəllifi olan cənab Prezident İlham Əliyevdir. Bu, ölkəmizin gələcək hərtərəfli inkişafında əvəzsiz rol oynayacaq. Həm siyasi, həm də iqtisadi tərəfdən bu, bizim uğurumuz sayılmalıdır. Gec-tez bu, böyük layihə öz həllini tapacaq. Artıq onda Naxçıvan da blokadadan çıxmış olacaq. Bir tranzit bölgə kimi Naxçıvan uğurla hərtərəfli inkişaf edəcək".
21-09-2024, 15:06
Taliban BRICS-ə nümayəndə göndərir - "ŞƏT və Avrasiya İttifaqında da maraqlıyıq"
2021-ci ildən Əfqanıstanda hakimiyyətdə olan Taliban hökuməti də oktyabrda Kazanda keçiriləcək BRICS sammitində iştirak etmək üçün müraciət edib.
Məktub Rusiya prezidentinin köməkçisi Yuri Uşakova ünvanlanıb.
Taliban BRICS sammitinə baş nazirin müavini vəzifəsində olan qruplaşma nümayəndəsi Əbdül Qani Baradarı göndərmək istədiyini bəyan edib.
Əfqanıstanın ticarət naziri vəzifəsində olan Taliban nümayəndəsi Nuriddin Əzizi tərəfindən imzalanmış sənəddə deyilir: “Biz yüksək səviyyəli nümayəndə heyətinin, o cümlədən Əfqanıstanın baş nazirinin müavini Əbdül Qani Baradarın, eləcə də mənim digər iştirakçılarla sammitdə iştirak etməkdə maraqlı olduğumuzu bildiririk”.
Nuriddin Əzizi qruplaşmanın sammitdə iştirakının vacibliyinə diqqət çəkib. Məktubun Rusiya hakimiyyətinə göndərilməsini Əfqanıstandakı Rusiya Biznes Mərkəzinin rəhbəri Rüstəm Xabibulin də təsdiqləyib.
Əfqanıstanın Moskvadakı müvəqqəti işlər vəkili Camal Nasir Qarhval iyun ayında “İzvestiya”ya demişdi ki, Taliban BRICS-in tamhüquqlu üzvü olmaqda maraqlıdır. Onun sözlərinə görə, Taliban hökuməti Şanxay Əməkdaşlıq Təşkilatı (ŞƏT) və Avrasiya İqtisadi İttifaqına (Aİİ) da daxil olmaq niyyətindədir.
Qeyd edək ki, əksər dünya dövlətləri tərəfindən terror təşkilatı hesab olunan Taliban qruplaşması 2021-ci ildə Əfqanıstanın BMT səviyyəsində tanınan rəsmi hökumətini silah gücünə devirərək hakimiyyəti ələ alıb və ölkəni "Əfqanıstan İslam Əmirliyi" elan edib.
21-09-2024, 15:00
“Tuğ” Qoruğunun Əsasnaməsi təsdiqləndi
“Tuğ” Dövlət Tarix-Memarlıq və Təbiət Qoruğunun Əsasnaməsi təsdiqlənib.
Bununla bağlı Baş nazir Əli Əsədov qərar imzalayıb.
Qeyd edək ki, Qoruq Azərbaycan Prezidentinin 2023-cü il 16 iyun tarixli 3920 nömrəli Sərəncamı ilə yaradılıb.
21-09-2024, 14:52
Ekologiya və Təbii Sərvətlər Nazirliyində dəyişiklik
Ekologiya və Təbii Sərvətlər Nazirliyinin kollegiyasının tərkibi dəyişib.
Bununla bağlı Baş nazir Əli Əsədov qərar imzalayıb.
Dəyişikliklə ekologiya və təbii sərvətlər nazirinin birinci müavini kollegiyaya əlavə edilib.
Xatırladaq ki, avqustun 15-də Prezident İlham Əliyevin müvafiq fərmanı ilə ekologiya və təbii sərvətlər nazirinin birinci müavini postu yaradılıb.
Həmin vəzifəyə Rəşad Sahil oğlu İsmayılov təyin edilib.
21-09-2024, 14:44
Xaricdən dələduzlar zənglər edirlər - DİN-dən vətəndaşlara müraciət
"Yaxın qohumlarının xəstə, müalicəsinə təcili pul lazım olması adı ilə vətəndaşlara, xüsusən yaşlı nəslin nümayəndələrinə xaricdən ev telefonları vasitəsilə zənglər olunur."
Bu barədə Daxili İşlər Nazirliyi vətəndaşlara çağırış edib.
Bildirilib ki, süni intellekt vasitəsilə səslər eyniləşdirilir və onlara yaxın qohumlarının başına bədbəxt hadisə gəldiyini bildirib, yardım göstərilməsi üçün pul tələb edilir.
"Həmin vətəndaşların pul vəsaitlərinin ələ keçirilməsi faktları üzrə polis əməkdaşları tərəfindən araşdırmalar aparılıb, bir neçə uğurlu əməliyyat tədbiri həyata keçirilib və şəxslərin saxlanılaraq cinayət məsuliyyətinə cəlb olunması təmin edilib. Qeyd olunanları nəzərə alaraq bir daha çağırış edirik ki, bu hallarla bağlı vətəndaşlar diqqətli olsunlar, daxil olan zənglər üzrə verilən məlumatları dəqiqləşdirsinlər, tanımadıqları şəxslərə qəti şəkildə pul vəsaitləri verməsinlər", - deyə məlumatda qeyd olunub.
21-09-2024, 14:32
Putin Paşinyana təbrikində Rusiya-Ermənistan dostluğundan yazıb
"Rusiya-Ermənistan dostluq və müttəfiqlik münasibətlərinin, eləcə də ümumi inteqrasiya birlikləri çərçivəsində konstruktiv əməkdaşlığın gələcək inkişafı, şübhəsiz ki, xalqlarımızın fundamental maraqlarına uyğundur".
Bu, Rusiya prezidenti Vladimir Putinin Ermənistanın Müstəqillik Gününün 33-cü ildönümü münasibətilə bu ölkənin baş naziri Nikol Paşinyana müraciətində deyilir.
Rusiyanın baş naziri Mixail Mişustin də ermənistanlı həmkarına mesaj göndərib.
Rusiya Nazirlər Kabinetinin rəhbəri qeyd edib ki, Avrasiya İqtisadi İttifaqı çərçivəsində ikitərəfli əməkdaşlığın və çoxtərəfli konstruktiv qarşılıqlı fəaliyyətin genişləndirilməsi "Rusiya Federasiyasının və Ermənistan Respublikasının uzunmüddətli maraqlarına tam uyğundur".
21-09-2024, 14:13
Fransada tələbələrin arxeoloji qazıntısı zamanı nə tapılıb? - FOTO
Fransada tələbələr arxeoloji qazıntı zamanı 200 illik qeyd tapıblar.
Şagirdlər Fransanın şimalındakı Dieppe şəhəri yaxınlığında qazıntıda iştirak edərək Qalli kəndinin qalıqlarını araşdırarkən içərisində mesaj olan gil qabla rastlaşıblar.
Qazıntıların rəhbəri Guillaume Blondel tapıntını açıqlayıb ki, gil qabda 200 il əvvəl arxeoloqun qeydi olan şüşə butulka olub.
Mükəmməl qorunub saxlanılan vərəqdə belə yazılıb: “Dieppedən olan müxtəlif elmi cəmiyyətlərin üzvü P. J. Feret 1825-ci ilin yanvarında burada qazıntı işləri aparmışdır. O, Cite de Limes və ya Sezar istehkamı kimi tanınan bu geniş ərazidə tədqiqatlarını davam etdirir".
P. J. Feret adı Blondelə tanış ad olub. Tapıntını nümayiş etdirərkən o, sevinclə deyib: “Bu, tamamilə sehrli bir an idi. Biz bilirdik ki, burada keçmişdə qazıntılar olub, lakin 200 il əvvələ aid belə bir mesaj tapmaq tamamilə sürpriz idi”.
Dieppe şəhər arxivi ilk qazıntıların burada həqiqətən 200 il əvvəl aparıldığını təsdiqləyib. Blondel izah edib ki, arxeoloqlar belə qeydləri çox nadir hallarda buraxırlar:
“Bəzən ev tikərkən dülgərlərin qoyub getdiyi belə vaxt kapsullarına rast gəlirsən. Ancaq arxeologiyada bu çox nadirdir. Əksər arxeoloqlar artıq bütün işləri gördüyü üçün onların arxasınca heç kimin gəlməyəcəyini düşünməyə üstünlük verirlər”.
Dieppenin şimalındakı qayaların dağıdılması səbəbindən qazıntılar bərpa edilib ki, bu da keçmiş istehkamlı kəndin qorunub saxlanmasına təhlükə yaradır. Onun çox hissəsi artıq su tərəfindən "udulub".
Bununla belə, Blondel və komandası Qalli yaşayış məntəqəsindən bir neçə artefaktı, o cümlədən təxminən 2000 il yaşı olan dulusçuluq nümunəsini xilas edə bilib.
21-09-2024, 14:05
Azərbaycan mina qurbanları ilə bağlı birgə bəyanatın təşəbbüskarı oldu
Dünən Cenevrədə BMT-nin İnsan Hüquqları Şurasının 57-ci sessiyası çərçivəsində "Mina və müharibənin partlayıcı qalıqlarının insan hüquqlarına təsirlərinə baxılması" adlı birgə bəyanat yayılıb.
Bəyanat Xorvatiyanın nümayəndəsi tərəfindən sənədin təşəbbüskarları qrupu - Albaniya, Azərbaycan, Çili, Mozambik, Panama və Xorvatiya adından səsləndirilib. "İnkişaf hüququ da daxil olmaqla, bütün insan hüquqlarının, mülki, siyasi, iqtisadi, sosial və mədəni hüquqların təşviqi və qorunması" bəndinin müzakirəsi çərçivəsində yayılmış sənəddə qeyd olunur ki, "yerüstü minalar və müharibənin partlayıcı qalıqları geniş insan hüquqları spektri, o cümlədən həyat, sağlamlıq, təhsil, əmək və hərəkət azadlığı hüquqlarına" qarşı həm dərhal, həm də uzunmüddətli mənfi təsirlərə malikdir.
Bundan əlavə, bəyanatda xüsusilə "yerüstü minaların müvəqqəti məcburi köçkünlərin (IDP) təhlükəsiz şəkildə geri dönməsinə də maneə olduğu" vurğulanır. Bununla əlaqədar, bəyanatı imzalayanlar BMT-nin İnsan Hüquqları Şurasına yerüstü minaların və müharibənin partlayıcı qalıqlarının insan hüquqlarına təsiri ilə bağlı məsələlərin həllində mühüm rolun həyata keçirilməsində konkret addımlar atmağla bağlı müraciət ediblər.
Bəyanatda mina partlaması nəticəsində zərər çəkmişlərin insan hüquqlarının pozulmasına görə məsuliyyətin istifadəçi dövlətlərin üzərinə düşdüyü birmənalı şəkildə qeyd edilir: "Dövlətlərin insan hüquqları sahəsindəki öhdəlikləri minaların istifadəsi və mövcudluğu ilə bağlı problemlərin həlli məsələsində milli və beynəlxalq siyasətlərini müəyyən etməlidir".
Bununla yanaşı vurğulanıb ki, mina xəritələrinin mübadiləsi insan hüquqları sahəsində beynəlxalq hüquqda təsbit olunmuş beynəlxalq əməkdaşlığın ən vacib vəzifələrindən biridir və bu da öz növbəsində BMT Baş katibinin sözlərinə görə, "davamlı sülhün və davamlı inkişafın əsaslarından biridir".
Yayıldığı anda bəyanat Avropa, Afrika, Latın Amerikası və Asiyanı təmsil edən 65 ölkədən ibarət geniş regionlararası qrup tərəfindən dəstəklənərək imzalanıb.
Qeyd edək ki, bu mövzuda birgə bəyanat təşəbbüsü ilk dəfə Azərbaycan XİN nümayəndəsi tərəfindən iyunun 27-də BMT-nin Cenevrə qərargahında keçirilmiş "Minasız sülhə doğru irəliləmək və qurbanların hüquqlarını bərpa etmək üçün insan hüquqları sistemindən istifadə" konfransı zamanı səsləndirilib.
Bundan başqa 65 ölkədən ibarət geniş koalisiya tərəfindən dəstəklənmiş sözügedən sənədin hazırlanmasında Azərbaycan diplomatları həmmüəllif qismində çıxış ediblər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!