17-06-2025, 16:01
Azərbaycana radiasiya təhlükəsi varmı? - Radiasiya İnstutundan cavab
İsrail-İran münaqişəsi regionda geosiyasi tarazılığı pozulmasına səbəb olub. Lakin regional təhlükəsizliyə yaranmış təhdid yalnız bu iki ölkə ilə məhdudlaşmır. Münaqişənin mümkün genişlənməsi və nüvə obyektlərinin hədəf alınması ətraf ölkələr, o cümlədən Azərbaycan üçün potensial radiasiya risklərini gündəmə gətirir.
Radiasiya Problemləri İnstutunun baş direktoru, professor İslam Mustafayev bildirib ki, hazırki vəziyyətdə Azərbaycana ciddi radioaktiv təhlükə yoxdur. Onun sözlərinə görə, İranda ən böyük nüvə obyekti Buşəhrdə yerləşən atom elektrik stansiyasıdır:
“İsrailin atom elektrik stansiyasını vurma ehtimalı çox aşağıdır. Çünki bu obyekt Beynəlxalq Atom Enerjisi Agentliyi tərəfindən qorunur. Belə bir hadisə olsa, regionda ciddi nəticələr meydana gələ bilər. Məsələn, Çernobıl nüvə fəlakətinin təsiri minlərlə kilometr uzağa çatmışdı”.
Professor həmçinin onu da qeyd edib ki, təsirlər insanlar üzərində də ola bilər:
“Məsələn, yaşayış şəraiti pisləşə bilər və ya insanların ərazilərini tərk etməyə məcbur olması mümkündür. Lakin belə bir vəziyyət real görünmür, çünki atom elektrik stansiyası bizdən 1000 km-dən uzaqdadır. Eləcə də, regionda uran zənginləşdirmə kombinatlarının olması faktı da mövcuddur. Bu kombinatlar atom reaktorları üçün yanacaq istehsal edir və eyni zamanda nüvə silahı, atom bombası üçün də istifadə oluna biləcək zənginləşdirilmiş uran hazırlayır. Hazırda bölgədə 17 belə uran zənginləşdirmə kombinatı mövcuddur”.
İ.Mustafayev vurğulayıb ki, belə obyektlərin dağıdılması mümkündür, məsələn, binası və idarəetmə ofisi hədəf alınaraq zərər verilə bilər. Ancaq bu obyektlərin çoxu yerin 80 metr dərinliyində yerləşir və həmin dərinlikdə əməliyyat aparmaq çox çətin və risklidir:
“Bizim bu obyektlərin dəqiq yerini bilmək imkanımız yoxdur. Amma əgər bu kombinatlar Azərbaycanın sərhədlərinə yaxın bir ərazidə yerləşirsə, məsələn, Təbriz, Ərdəbil və ya Xəzər sahilində, o zaman bu obyektlərə hər hansı bir zərbə vurularsa, bizə təsiri ola bilər. Xüsusilə Araz çayı bu əraziləri ayıran təbii sərhəd olduğu üçün, bu amil də nəzərə alınmalıdır. Lakin hazırkı şəraitdə bu barədə dəqiq bir fikir söyləmək çətindir", - deyə o söyləyib.
17-06-2025, 15:33
Ölkəmizdə qızıl istehsalı 64 faiz artıb
Cari ilin yanvar-may aylarında qızıl istehsalı 63,9 faiz artaraq 1297,8 kiloqram təşkil edib.
Dövlət Statistika Komitəsindən bildirilib ki, iyunun 1-i vəziyyətinə hazır məhsul ehtiyatı ötən ilin eyni dövrü ilə müqayisədə 41,6 faiz azalaraq 119,4 kiloqram olub.
Hesabat dövrü ərzində gümüş istehsalı 23,8 faiz artaraq 1686,9 kiloqram təşkil edib.
İyunun 1-i vəziyyətinə gümüş üzrə hazır məhsul ehtiyatı ötən ilin eyni dövrü ilə müqayisədə 14,7 faiz azalaraq 583,6 kiloqram qeydə alınıb.
17-06-2025, 15:20
Ümit Özdağ azadlığa buraxıldı
Türkiyənin Zəfər Partiyasının sədri Ümit Özdağ azadlığa buraxılıb.
Bu barədə NTV məlumat yayıb.
Qeyd edək ki, Ümit Özdağ bu ilin yanvar ayında saxlanılıb. Bir müddət əvvəl prokuror Zəfər Partiyasının sədri Ümit Özdağa 1 il 6 aydan 4 il 6 aya qədər həbs cəzası istəyib.
17-06-2025, 15:00
İran yüksək vəzifəli şəxslərə bu avadanlıqlardan istifadəni qadağan etdi
İranın Kibertəhlükəsizlik Komandanlığı məmurlara, rütbəli şəxslərə və onların mühafizə qruplarına ictimai rabitə və telekommunikasiya şəbəkələrinə qoşulmuş bütün avadanlıqlardan istifadə etməyi qadağan edib.
Bu barədə İran mediası məlumat yayıb.
Qeyd edək ki, son bir neçə saat ərzində bəzi İsrail media qurumları Livandakı Hizbullah peycer hadisəsinə və bununla bağlı insidentlərin İranda baş verə biləcəyinə işarə ediblər.
17-06-2025, 14:32
Nikahlar artıb, boşanmalar azalıb - Yeni statistika
Bu ilin ilk dörd ayı ərzində Ədliyyə Nazirliyinin rayon (şəhər) qeydiyyat şöbələri tərəfindən 14 min 953 nikah və 6 min 784 boşanma halları qeydə alınıb.
Bu barədə Dövlət Statistika Komitəsi məlumat yayıb.
Bildirilib ki, ötən ilin müvafiq dövrü ilə müqayisədə əhalinin hər 1000 nəfərinə nikahların sayı 4,1-dən 4,4-ə qədər artıb, boşanmaların sayı isə 2,1-dən 2,0-a düşüb.
17-06-2025, 14:25
Azərbaycan əhalisinin sayı AÇIQLANDI
Ölkə əhalisinin sayı ilin əvvəlindən 11338 nəfər və ya 0,1 faiz artaraq 2025-ci il may ayının 1-i vəziyyətinə 10 milyon 236 min 227 nəfərə çatıb.
Bu barədə Dövlət Statistika Komitəsi məlumat yayıb.
Ölkə əhalisinin 54,4 faizini şəhər, 45,6 faizini kənd sakinləri, 49,8 faizini kişilər, 50,2 faizini isə qadınlar təşkil edir.
17-06-2025, 14:19
Azərbaycandan İsrail rəhbərliyinə mesaj
İsraillə İran arasında münaqişə hər iki tərəfdə mülki obyektlərə və mülki şəxslərə də böyük zərər vurur.
İsrailin hərbi əməliyyatları İranda azərbaycanlıların yaşadığı əraziləri də əhatə edir və belə olduqda, yerli əhali arasında itkilərin, sosial infrastrukturun dağıdılması halları qaçılmazdır.
Azərbaycan müxtəlif kanallarla İsrail rəhbərliyinə İranda azərbaycanlıların yaşadığı yaşayış məntəqələrini hədəf götürməmək, mülki infrastruktura və dinc əhaliyə zərər yetirməməklə bağlı mesaj göndərib.
17-06-2025, 14:12
Kiyevdə matəm günü elan olundu
Rusiya hərbçilərinin Ukrayna paytaxtına kütləvi hücumu nəticəsində həlak olanlar üçün sabah, iyunun 18-də Kiyevdə matəm günü elan edilib.
Qurbanların xatirəsinə ehtiram əlaməti olaraq bütün bələdiyyə binalarında bayraqlar endiriləcək. Bu qaydaya dövlət orqanları və özəl qurumlarda əməl edilməsi tövsiyə olunur.
Bu gün şəhərdə bütün əyləncə tədbirlərinin keçirilməsi qadağandır. Raket zərbələrindən sonra dağıntıların altından insanların çıxarılması davam edir. Hazırda Darnitski rayonunda 3 nəfərin öldüyü təsdiqlənib.
Kliçkonun sözlərinə görə, Solomenski rayonunda axtarış-xilasetmə əməliyyatları davam edir. Yaralıların ümumi sayı artıq 114 nəfərə çatıb.
Qeyd edək ki, iyunun 17-nə keçən gecə Rusiya “Şahed” tipli hücum pilotsuz uçuş aparatları və müxtəlif növ raketlərdən istifadə etməklə Kiyevə kütləvi hücum həyata keçirib.
Gecə ərzində şəhərə 400-dən çox zərbə endirilib, onların əhəmiyyətli hissəsi hava hücumundan müdafiə qüvvələri tərəfindən vurulub, lakin bəzi raketlər hədəflərinə çatıb.
Hücum nəticəsində yaşayış binalarına, infrastruktura və nəqliyyata ziyan dəyib. Xüsusilə, paytaxtın Darnitski, Solomenski və digər rayonları zərər görüb. Rəsmi məlumatlara görə, azı 14 nəfər həlak olub, 100-dən çox insan yaralanıb.
Xilasetmə xidmətləri dağıntıları təmizləməyə və hücumun nəticələrini aradan qaldırmağa davam edir.
17-06-2025, 14:05
ABŞ-ın İrana zərbə endirmək planı yoxdur - Pentaqon
ABŞ İrana zərbə endirmək niyyətində deyil, lakin Vaşinqton regiondakı maraqlarını müdafiə etməkdə qərarlıdır.
Bu barədə ABŞ Müdafiə Nazirliyinin nümayəndəsi Şon Parnell özünün sosial media hesabında yazıb.
Bir müddət öncə, Pentaqon rəhbəri Pit Heqset ABŞ-ın Yaxın Şərq regionuna əlavə qüvvələr yerləşdirdiyini bəyan edib.
Bu arada Birləşmiş Ştatlar Yaxın Şərqə daha bir təyyarədaşıyan gəmi göndərib. “Fox News” telekanalının məlumatına görə, “USS Nimitz” təyyarədaşıyan gəmisinin başçılıq etdiyi zərbə qrupu Cənubi Çin dənizindən Ərəb dənizinə yollanıb. “USS Carl Vinson” təyyarədaşıyan gəmisi isə artıq regiona çatıb.
Xatırladaq ki, iyunun 13-nə keçən gecə İsrail ordusu İrana kütləvi aviazərbələr endirməyə başlayıb. Tehran isə buna cavab olaraq İsrail ərazisinə ballistik raket və PUA hücumu həyata keçirib. Hazırda qarşılıqlı hücumlar davam edir.
17-06-2025, 13:58
Dostunu pul üstündə güllələdi - Təfərrüat
İyun ayının 15-də Gəncədə baş verən qətlin bəzi detalları üzə çıxıb.
42 yaşlı Vüsal Əhmədov tanışı 45 yaşlı Rövşən Hətəmov tərəfindən pul üstündə güllələnərək öldürülüb. Hər iki şəxsin yaxın dost olduğu bildirilir.
Məlumata görə, mərhumla hadisəni törədən şəxs birlikdə sürücü işləyiblər. Araşdırma zamamı məlum olub ki, hadisəni törədən Rövşən Hətəmovun mərhum Vüsal Əhmədova pul borucu olub. Onların arasında bir neçə dəfə pul üstə mübahisə olub. Belə ki, hadisə baş verən gecə Rövşən Hətəmov mərhum Vüsal Əhmədovun Cavadxan qəsbəsində yaşadığı ünvana gəlib. Bu zaman onların arasında yenidən mübahisə düşüb. Mübahisə zamanı Rövşən Hətəmov özü ilə gətirdiyi ov tüfəngi ilə Vüsal Əhmədova iki dəfə atəş açıb. Hər iki şəxs TIR sürücü olub. Hadisədən bir neçə gün əvvəl Vüsal Əhmədova məxsus TIR markalı yük maşının mühərrikində nasazlıq yaranıb. Bundan sonra hadisənin törədən Rövşən Hətəmov mərhum Vüsal Əhmədova bildirib ki, onla daha birlikdə sürücü işləməyəcək.
Qətlə yetirilən Vüsal Əhmədov ailəli olub. Onun 2 qızı və bir oğlu var.
Qeyd edək ki, hadisə iyun ayının 15-də şəhərin Cavadxan qəsəbəsində baş verib. Belə ki,Bakı şəhər sakini 1983-cü il təvəllüdlü Vüsal Əhmədov odlu silahdan açılan güllə yarası ilə xəstəxanasına yerləşdirilib. Lakin həkimlərin tibbi müdaxiləsinə baxmayaraq onun həyatını xilas etmək mümkün olmayıb. Araşdırma zamanı məlum olub ki, qətlə yetirilən 1983-cü il təvəllüdlü Vüsal Əhmədovu Göygöl rayon sakini 1980-ci il təvəllüdlü Rövşən Hətəmov aralarında baş verən mübahisə zamanı ov tüfəngi ilə atəş açaraq öldürüb. Polis əməkdaşları tərəfindən hadisəni törədən 45 yaşlı Göygöl rayon sakini Rövşən Hətəmov saxlanılıb.
Faktla bağlı Gəncə şəhər prokrorluğunda araşdırma aparılır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!