Hüseynin həyatı

risk altındadır

Təbriz həbsxanasında saxlanılan Hüseyn Şerbafipurun həyatı təhlükə altındadır.
Etiraz aksiyalarında yaralanan Güney azərbaycanlı fəalın səhhəti ağır olaraq qalır. Güney azərbaycanlı məhbus Hüseyn Şerbafipurun Təbriz həbsxanasındakı sağlamlıq vəziyyətinin ağır olduğu və həyatının təhlükə altında qaldığı bildirilir.
Azərbaycan İnsan Haqları Müdafiəçiləri Təşkilatının yaydığı məlumata əsasən, Hüseyn Şerbafipur 8 yanvar tarixində Təbrizdə keçirilən etirazlar zamanı saçma güllələrinin hədəfinə çevrilib və ağır yaralandıqdan sonra təhlükəsizlik qüvvələri tərəfindən həbs olunub.
Məlumata görə, o, bədənində 200-dən çox saçma qalmasına baxmayaraq Təbriz Kəşfiyyat İdarəsinin təcridxanasına aparılıb və həmin şəraitdə dindirilib.
Aldığı ağır yaralar və öd kisəsində yaranan fəsadlar səbəbindən Hüseyn Şerbafipur 17 aprel tarixində Təbriz həbsxanasından İmam Rza xəstəxanasına köçürülərək təcili əməliyyat olunub. Lakin müalicə prosesi tamamlanmadan, 7 may tarixində təhlükəsizlik qüvvələri tərəfindən yenidən həbsxanaya qaytarılıb.
Hazırda onun ciddi sağlamlıq problemləri, infeksiya və aldığı yaraların yaratdığı ağırlaşmalardan əziyyət çəkdiyi bildirilir. Həbsxanaya qaytarıldıqdan sonra vəziyyətinin pisləşməsi səbəbindən yenidən xəstəxanaya aparıldığı qeyd olunur.
Hüseyn Şerbafipur həmçinin işinin qeyri-müəyyən saxlanılmasına, istintaq dövründə məruz qaldığı işgəncələrə və həbsxana rəhbərliyinin müalicə tələblərinə laqeyd yanaşmasına etiraz olaraq bir neçə dəfə aclıq aksiyası keçirib.

Kreditlər ədalətsiz

bölüşdürülür

Təbriz Ticarət Palatasının sədri dövlət kreditlərinin bölgüsünü tənqid edib.
Butov.az Gunaz.tv-yə istinad edərək xəbər verir ki, Təbriz Ticarət Palatasının sədri Yunus Jaleh Şərqi Azərbaycan Dövlət–Özəl Sektor Dialoq Şurasının iclasında 700 min milyard tümənlik dəstək paketi çərçivəsində kreditlərin bölüşdürülməsini tənqid edərək bu sahədə şəffaflığın təmin olunmasını tələb edib.
Yunus Jaleh bildirib ki, Şərqi Azərbaycandakı bankların likvidlik payı bölgənin iqtisadi potensialına uyğun deyil və bu vəziyyət istehsal sektorunun maliyyələşdirilməsində ciddi problemlər yaradır.
O, əyalətlərdə fəaliyyət göstərən bank filiallarının səlahiyyətlərinin məhdud olmasını istehsalın maliyyələşdirilməsi qarşısındakı əsas maneələrdən biri adlandırıb və bu məsələnin iqtisadiyyat naziri ilə keçiriləcək görüşdə qaldırılmasını təklif edib.
Jaleh vurğulayıb: “İstehsal müəssisələri xammal təminatı və fəaliyyətlərinin davamı üçün hər zamankından daha çox likvidliyə və bank kreditlərinə ehtiyac duyurlar.”
Təbriz Ticarət Palatasının sədri daha əvvəl də İranın bank siyasətlərini tənqid edərək bildirmişdi ki, bəzi banklar topladıqları maliyyə resurslarının cəmi iki faizini Azərbaycanda xərcləyirlər.
İranda dövlət banklarının Güney Azərbaycanda investisiyadan yayınaraq bölgənin maliyyə resurslarını Tehrana yönəltməsi uzun illərdir iqtisadi ayrı-seçkilik kimi tənqid olunur.
Xatırladaq ki, Yunus Jaleh 2022-ci ilin aprel ayında da Şərqi Azərbaycanda xüsusi özəl bankın yaradılmasına İran rəsmilərinin mane olduğunu açıqlamış və onlara “Bu məsələ milli maraqlarla uyğun gəlmir” cavabının verildiyini bildirmişdi.