13-06-2025, 16:55
Qriqoryan Paşinyan-Ərdoğan görüşünü inkar etmədi
Ermənistan Təhlükəsizlik Şurasının katibi Armen Qriqoryan baş nazir Nikol Paşinyanın yaxın vaxtlarda prezident Rəcəb Tayyib Ərdoğanla görüşmək üçün Türkiyəyə gedəcəyini inkar etməyib.
A.Qriqoryan “Azadlıq” radiosunun sualınını cavablandırarkən görüşün gündəliyini açıqlamayıb.
Armen Qriqoryan səfərin tarixini də dəqiqləşdirməyib və bildirib ki, bu barədə məlumatı baş nazirin dəftərxanası verəcək.
İyunun 5-də baş nazir Paşinyan Türkiyə prezidenti Ərdoğanla telefon danışığı aparıb.
Onlar Ermənistan-Türkiyə münasibətləri və regional hadisələrlə bağlı məsələləri müzakirə edib, dialoqun davam etdirilməsi barədə razılığa gəliblər.
13-06-2025, 16:32
İranın daha bir yüksək vəzifəli generalı öldürüldü
İran İsrail hücumları nəticəsində raket proqramına nəzarət edən general Əmir Əli Hacızadənin öldürüldüyünü təsdiqləyib. Bu barədə İran KİV-ləri xəbər verir.
12-06-2025, 16:03
İran İsrailə qarşı cavab hücumuna hazırlaşır
İranın hökumət üzvləri və hərbi rəhbərliyi İsrailin mümkün hücumu halında cavab tədbirlərini müzakirə etmək üçün toplantı keçirib.
Bu barədə “The New York Times” qəzeti adının açıqlanmasını istəməyən yüksək rütbəli Tehran rəsmisinə istinadla məlumat yayıb.
Nəşrin yazdığına görə, İran artıq İsrailə qarşı cavab zərbəsi planını hazırlayıb. Tehran rəsmisi bildirib ki, plan dərhal həyata keçirilə biləcək və “yüzlərlə ballistik raketin” istifadəsini nəzərdə tutur.
İran İslam İnqilabı Keşikçiləri Korpusunun (SEPAH) komandanı Hüseyn Səlami də mövzu ilə bağlı bəyanatla çıxış edib. Onun sözlərinə görə, İran silahlı qüvvələri “istənilən ssenariyə hazırdır” və SEPAH bu istiqamətdə öz strategiyasına malikdir.
Qeyd edək ki, daha öncə “The Washington Post” qəzeti ABŞ kəşfiyyatının İsrailin İranın nüvə obyektlərinə zərbə endirəcəyindən ehtiyat etdiyini yazıb. “CBS News” isə İsrailin İranda hərbi əməliyyata başlamağa hazır olduğunu bildirib. ABŞ hakimiyyəti bölgədəki vətəndaşlarını regionu tərk etməyə çağırıb.
12-06-2025, 15:53
240 nəfəri daşıyan təyyarə qəzaya uğradı - Hamısı öldü
Hindistanda qəzaya uğrayan “Air India” aviaşirkətinə məxsus “Boeing 787-8 Dreamliner” təyyarəsinin göyərtəsində olan 242 nəfərin hamısı həlak olub.
Bu barədə “News18” telekanalı məlumat yayıb.
Həlak olanlar arasında 10 ekipaj üzvü və bort bələdçiləri var.
Təyyarənin göyərtəsində 169 hindistanlı, 53 Böyük Britaniya vətəndaşı, 7 portuqaliyalı və bir kanadalı sərnişin olub.
İlkin məlumatlara görə, hava gəmisi quşla toqquşub və uçuş üçün optimal sürətə çata bilməyib.
***
14:34
Hindistanın Əhmədabad aeroportu yaxınlığında sərnişin təyyarəsinin yataqxana binasına çırpılması nəticəsində ölənlərin sayı 133-ə çatıb.
Bu barədə “News18” telekanalı məlumat yayıb.
***
13:48
Hindistanda “Air India” aviaşirkətinə məxsus “Boeing 787-8 Dreamliner” tipli təyyarənin qəzaya uğraması nəticəsində 30 nəfər həlak olub.
Bu barədə “News18” telekanalı məlumat yayıb.
Bildirilir ki, Hindistanın Baş naziri Narendra Modi mülki aviasiya naziri K.Rammohan Naidu ilə hadisənin təfərrüatlarını müzakirə edib. Nazirin özü təyyarə qəzasının baş verdiyi əraziyə gedib.
Londona uçmalı olan təyyarənin göyərtəsində 10 ekipaj üzvü və bort bələdçiləri də daxil olmaqla 242 nəfər olub.
***
Hindistanın qərbində yerləşən Əhmədabad hava limanı yaxınlığındakı yaşayış massivində sərnişin təyyarəsi qəzaya uğrayıb.
Bu barədə yerli mətbuat məlumat yayıb.
Hadisə şahidlərinin sosial şəbəkələrdə yayımlanan videolarında təyyarənin əhalinin sıx məskunlaşdığı bir şəhər ərazisində qəzaya uğradığı görünür.
Qəza yerindən qara tüstü qalxır.
Təyyarənin göyərtəsində 240 nəfərin olduğu bildirilir. Sərnişin və ekipajın taleyi barədə məlumat yoxdur.
İlkin məlumata görə, təyyarə Londona uçurmuş və asfaltda adi əməliyyatlar zamanı qəzaya uğrayıb.
11-06-2025, 22:33
Tramp Maskla barışmaq istəyir
ABŞ Prezidenti Donald Tramp milyarder, iş adamı İlon Maskla barışa biləcəyini deyib.
Bu barədə Tramp “New York Post”da yayımlanan podkastda səsləndirib. Dövlət başçısı vurğulayıb ki, indi onun yeganə funksiyası ölkəni əvvəlkindən daha yüksək səviyyəyə qaytarmaqdır.
İlon Mask da bu gün X hesabında prezidentlə bağlı yazdığı bəzi sözlərə görə təəssüf etdiyini bildirib.
11-06-2025, 22:10
Son 12 ildə Ukraynaya ilk səfər
Serbiya prezidenti Aleksandar Vuçiç çərşənbə günü Ukraynaya səfər edib.
Bu, onun prezident kimi 12 ildə Ukraynaya ilk səfəri olub.
Serbiya prezidentinin ofisi Vuçiçin bir günlük səfəri zamanı Odessada Ukrayna-Cənub-Şərqi Avropa sammitində iştirak edəcəyini açıqlayıb. Qərb mətbuatı sammitdə Cənub-Şərqi Avropanın 12 ölkəsinin yüksək səviyyəli nümayəndələrinin iştirak edəcəyini yazıb.
"Euronews" bildirir ki, Serbiya prezidentinin sammitdə iştirakı Belqradın Aİ-nin Ukraynadakı müharibə ilə bağlı mövqeyinə yaxınlaşdığını göstərir.
Serbiya Rusiyanın Ukraynadakı müharibəsində özünü neytral ölkə kimi təqdim edir, lakin Vuçiçin Qələbə Günü paradında iştirak etmək üçün Rusiya prezidenti Vladimir Putinin dəvəti ilə bu yaxınlarda Moskvaya səfəri Brüsselin kəskin tənqidinə səbəb olub. Aİ rəhbərliyi kəskin şəkildə xəbərdarlıq edib ki, Vuçiçin Moskvaya səfəri Aİ-yə üzvlük kriteriyalarını pozacaq və ölkənin üzvlük prosesinə zərər verə bilər.
Vuçiçin Odessa sammitində iştirakı Brüsselə Aİ-nin Serbiya ilə genişlənməsi üzrə işləri bərpa etməyə və sürətləndirməyə kömək edəcək. Bu çərçivədə Ukrayna Serbiyaya jest olaraq Kosovonu sammitə dəvət etməyib.
11-06-2025, 20:44
Tramp Çinlə razılığa gəldi
ABŞ-la Çin ticarət sazişi ilə bağlı razılığa gəliblər.
Bu barədə ABŞ Prezidenti Donald Tramp məlumat verib.
Bildirib ki, sənəd hər iki ölkə liderinin son təsdiqini gözləyir. Tramp əlavə edib ki, Çin istənilən nadir mineralları təmin etməklə bağlı öhdəlik götürüb.
“Biz isə Çinə razılaşdırdıqlarımızı, o cümlədən çinli tələbələrin bizim kollec və universitetlərimizdən istifadəsini təmin edəcəyik. Biz 55 faiz, Çin isə 10 faiz tarif əldə edəcək. Əlaqələr mükəmməldir”,- deyə Tramp əlavə edib.
11-06-2025, 19:50
Donald Tuska etimad göstərildi
Polşa parlamenti Donald Tuskun rəhbərlik etdiyi koalisiya hökumətinə etimad göstərib.
Səsverməni “TVP Info” telekanalı yayımlayıb.
453 deputatdan 243-ü hökumətin işinə etimad göstərib, 210-u isə əleyhinə səs verib.
11-06-2025, 19:28
Ermənistan-Gürcüstan sərhədində problem
Ermənistan-Gürcüstan sərhəd-keçid məntəqəsində problem yaranıb. Ermənistandan gələn yük maşınları Gürcüstana buraxılmır.
Bu barədə Ermənistan Dövlət Gəlirləri Komitəsi məlumat yayıb. Bildirilir ki, gömrük xidmətləri erməni yük maşınlarının Gürcüstana buraxılmasını müvəqqəti dayandırıb. Hazırda hər iki tərəfdə mindən çox yük və minik avtomobili dayanıb.
Qərar son vaxtlar Gürcüstanın keçid məntəqələrində avtomobillərin yığılması nəzərə alınaraq qəbul edilib. Gürcüstan tərəfində problem həll olunduqdan – avtomobillərin buraxılışı tənzimlənəndən sonra keçid açılacaq.
Bu arada Ermənistan tərəfi nəqliyyat vasitələrinin öz ölkələrinin ərazisində növbəyə durmasını təklif edir. Ermənistan İqtisadiyyat Nazirliyi bildirir ki, İrəvan hələ də rəsmi Tbilisidən erməni konyakının Rusiyaya tranziti zamanı sərhəddə baş verən gecikmələrlə bağlı izahat almayıb.
Artıq İrəvanda Gürcüstan səfirliyinin binası qarşısında bir neçə etiraz aksiyası keçirilib.
Qeyd edək ki, iyunun 6-da Gürcüstanın kənd təsərrüfatı naziri Ermənistana səfər etməli idi, lakin son anda səfər ləğv olunub.
Bəzi məlumatlara görə, erməni sürücülər Ermənistana qayıdarkən ucuz qiymətə gürcü konyakı alıb aparırlar. Sonra da bu konyakı Ermənistanda qablaşdıraraq Rusya bazarına erməni konyakı adı ilə göndərirlər.
11-06-2025, 17:49
Tramp İranla müharibə istəmədiyini deyir
ABŞ Prezidenti Donald Tramp İranla silahlı münaqişənin əleyhinə olduğunu, lakin nüvə proqramı ilə bağlı fikir ayrılıqlarını həll etmək üçün Tehranla razılığın mümkünlüyünə şübhə etdiyini deyib.
Donald Tramp bunu “The New York Post” qəzetinin “Pod Force One” podkastının efirində söyləyib.
“İndi bir neçə ay əvvəl olduğum qədər nikbin deyiləm və Tehranla razılaşmanın olacağına əminliyim azalıb. Razılaşma baş tutmasa da İran nüvə silahlarına sahib olmayacaq. Əlbəttə, hər şeyi müharibəsiz, itkisiz həll etmək daha yaxşıdır”, - deyə ABŞ Prezidenti bildirib.
Xatırladaq ki, İran və ABŞ nümayəndələri mayın 23-də Romada Tehranın nüvə proqramı ilə bağlı danışıqların beşinci raundunu keçiriblər. Danışıqlarda vasitəçi qismində çıxış edən Omanın xarici işlər naziri Bədr əl-Busaidi məsləhətləşmələrdə müəyyən irəliləyişə nail olunduğunu açıqlayıb. Onun iranlı həmkarı isə öz növbəsində bir neçə görüşdən sonra Tehran və Vaşinqtonun müsbət nəticəyə ümid etdiklərini vurğulayıb.
İran Xarici İşlər Nazirliyinin məlumatına görə, danışıqların altıncı raundunun iyunun 15-də Omanın paytaxtı Maskatda keçirilməsi planlaşdırılır.
Qeyd edək ki, bir müddət öncə, İranın müdafiə naziri Əziz Nəsirzadə ABŞ-la müharibə olacağı təqdirdə Birləşmiş Ştatların Yaxın Şərqdəki bütün hərbi bazalarının hücuma məruz qalacağını deyib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!