23-07-2024, 11:53
Rusiya 16 erməni şirkətinin meyvə-tərəvəz ixracına qadağa qoydu
Rusiyanın “Rosselxoznadzor” qurumu 16 erməni şirkətinə Rusiya bazarına meyvə-tərəvəz ixracına qadağa qoyub.
Bu barədə Ermənistan Qida Təhlükəsizliyi Müfəttişliyinin məlumatında bildirilib.
Qərar iyulun 15-dən qüvvəyə minib.
Xatırladaq ki, iyulun 17-də Rusiyanın Baytarlıq və Fitosanitar Nəzarəti Federal Xidməti (“Rosselxoznadzor”) Ermənistandan Rusiyaya ixrac edilən meyvə-tərəvəzin aprel-iyun partiyalarında pozuntular qeydə aldığını bildirmişdi.
Rusiya tərəfinin bildirdiyinə görə, onlar bir ay əvvəl problemlə bağlı məlumat veriblər. Ermənistanın Qida Təhlükəsizliyi Müfəttişliyi isə belə bir məktubu iyulun 17-də, yəni qadağanın tətbiqindən 2 gün sonra aldığını qeyd edir. Yükləri problemli olan təsərrüfat subyektlərinə dərhal məlumat verilib və onlar nəzarət tədbirlərinə, xüsusən də Ermənistan-Rusiya strukturları arasında danışıqlara başlayıblar.
21-07-2024, 17:13
Macarıstanı Aİ sədrliyindən uzaqlaşdırmağa çalışırlar - Ərdoğan
Qərb Macarıstan hökumətinin başçısı Viktor Orbana onun Ukraynada nizamlanma planı ilə bağlı təzyiq göstərir və ona görə də onlar ölkəni Avropa İttifaqına (Aİ) sədrlikdən uzaqlaşdırmağa çalışırlar.
Bu barədə Türkiyə Prezidenti Rəcəb Tayyib Ərdoğan bildirib.
“Keçən həftə Macarıstanın Baş naziri Viktor Orban qonağımız idi. Görüşdən sonra o, Donald Trampla nahar edəcəyini söylədi. O vaxt NATO sammiti keçirilirdi. Ertəsi gün Orban, o cümlədən Moskvaya səfərinə görə çox tənqid olunmağa başladı. Cənab Orban Çinə səfər etdi və eyni şəkildə tənqid edildi. O, Şuşada keçirilən toplantıda da iştirak etdi və yenə tənqid atəşinə tutuldu”, - Türkiyə lideri bildirib.
“İndi onlar Macarıstanı Aİ-yə sədrlikdən necə uzaqlaşdırmağın yollarını düşünməyə çalışırlar. İndi biz səbrli olmalıyıq. Ümid edirəm ki, bu cür səbrlə yeri gələndə birlikdə lazım olan hər şeyi edəcəyik”, - Ərdoğan vurğulayıb.
21-07-2024, 16:31
İlham Əliyevin mövqeyi düzgün və ədalətlidir - Qusman
Azərbaycan Prezidenti İlham Əliyevin Ermənistanın öz konstitusiyasına dəyişikliklər etməli olması ilə bağlı mövqeyi düzgün və ədalətlidir.
Bunu Rusiyanın TASS informasiya agentliyinin baş direktorunun birinci müavini Mixail Qusman Şuşada deyib.
“Konstitusiyasında ölkənizə qarşı ərazi iddiaları olan bir ölkə ilə necə sülh müqaviləsi bağlaya bilərsiniz? Bu, tam ziddiyyətdir”, – o bildirib.
Qusman əlavə edib ki, Ermənistanın Baş naziri Nikol Paşinyanın bunu artıq başa düşdüyünü göstərən məlumatlar görüb: “Bunun bütünlükdə Ermənistan cəmiyyətinin dəstəyini qazanmaması başqa məsələdir. Çünki bu, Ermənistan hakimiyyətinin işidir”.
“Prezident İlham Əliyevin mövqeyi aydındır, bu, tamamilə obyektivdir və beynəlxalq reallıqlara uyğundur”, - deyən Qusman qeyd edib ki, Ermənistan bu addımı atacaq.
“Bu, gec-tez baş verəcək. Çünki sülh etmək istədiyiniz ölkəyə qarşı konstitusiyanızda ərazi iddiası ola bilməz. Bu, mümkün deyil. Bu o deməkdir ki, Azərbaycanla Ermənistan arasında sülh olmayacaq və bu, yalnız Ermənistanın özü üçün pisdir. Ermənistan məğlub ölkədir, üstəlik, bütün parametrlərdə: iqtisadi, siyasi, hələ heç hərbi komponenti demirəm, Azərbaycandan çox zəifdir. Bu, 44 günlük müharibə zamanı sübuta yetirildi. Erməni cəmiyyəti uzun müddət mənfi ideoloji təsir altında idi, amma mənə elə gəlir ki, indi artıq ayılma prosesindədirlər”, - TASS-ın baş direktorunun birinci müavini vurğulayıb.
21-07-2024, 14:47
Ərdoğan Ersin Tatarın Zirvə görüşünə qatılmasından danışdı
Şimali Kipr Türk Cümhuriyyətinin (ŞKTC) Prezidenti Ersin Tatarın Şuşada Türk Dövlətləri Təşkilatının qeyri-rəsmi Zirvə görüşünə qatılması son dərəcə anlamlı oldu.
Bunu Türkiyə Prezidenti Rəcəb Tayyib Ərdoğan ŞKTC-dən dönüşdə təyyarədə jurnalistlərə açıqlamasında bildirib.
Rəcəb Tayyib Ərdoğan deyib ki, ŞKTC-nin beynəlxalq aləmdə məruz qaldığı haqsız təcridin aradan qaldırılması istiqamətində səyləri davam etdirirlər: "İslam Əməkdaşlıq Təşkilatı və Türk Dövlətləri Təşkilatı çərçivəsində ŞKTC-nin haq etdiyi yeri alması üçün gərəkəni edirik. Bu baxımdan Ersin Tatarın Şuşada Türk Dövlətləri Təşkilatının qeyri-rəsmi Zirvə görüşünə qatılması son dərəcə anlamlı oldu. İnşaallah, önümüzdəki dövrdə bunu yeni addımlar təqib edəcək. 1974-cü ildə Barış Hərəkatı ilə qurduğumuz, 1983-cü ildə ŞKTC elanıyla əldə etdiklərimizi bütün dünyada tanınan Kipr Türk Dövləti ilə taclandıracağıq”.
21-07-2024, 14:32
Qəzzada ölən fələstinlilərin sayı açıqlandı
Son sutka ərzində Qəzza zolağında 64 fələstinli ölüb, daha 105 nəfər yaralanıb.
Bu barədə Qəzzadakı səhiyyə qurumu məlumat yayıb.
Beləliklə, İsrail Ordusunun 2023-cü ilin oktyabrından Qəzza zolağında həyata keçirdiyi əməliyyatlar nəticəsində ölənlərin sayı 38 983 nəfərə, yaralananların sayı 89 727 nəfərə çatıb.
21-07-2024, 10:43
İsrailin Yəmənə hücumuna İrandan reaksiya
İran Xarici İşlər Nazirliyinin sözçüsü Nasir Kənani İsrailin Yəmənin Qırmızı dənizdə yerləşən Hudeyda şəhərindəki limanına hücumunu pisləyib.
Diplomatın fikrincə, yəmənlilər Qəzza zolağındakı qadın və uşaqları dəstəklədikləri üçün “bədəl ödəməli olurlar”.
“Kənani sionist rejimin (İsrail – red.) Yəmənin Hudeydə şəhərindəki limanına hücumlarını qətiyyətlə pisləyib”, – materialda deyilir.
Bundan başqa, İran Xarici İşlər Nazirliyinin nümayəndəsi insidenti “İsrail iqtidarının aqressiv mahiyyətinin təzahürü” adlandırıb. O, yəhudi dövlətinin hərəkətlərinin eskalasiyasına və bütün Yaxın Şərqdə hərbi əməliyyatların yayılmasına səbəb ola biləcəyini vurğulayıb.
Xatırladaq ki, daha əvvəl BMT-nin Baş katibi Antoniu Quterriş İsrailin Yəmənə hava hücumundan narahatlığını ifadə etmişdi.
21-07-2024, 09:52
Yəməndən İsrailə raket zərbəsi
Qırmızı dəniz istiqamətindən İsrailə istiqamətlənən raket vurulub.
Bu barədə İsrail Ordusu məlumat yayıb.
Raketin Yəmən istiqamətindən İsrailə uçduğu bildirilib. Qeyd edilib ki, raket İsrailin hava məkanına daxil olmadan vurulub, lakin qalıqlarının düşmə ehtimalı ilə əlaqədar hava hücumu həyəcanı elan olunub.
21-07-2024, 09:26
ABŞ nüvə başlıqlarının sayını açıqladı
2023-cü ilin sentyabr ayına olan məlumata görə, ABŞ 3 min 748 nüvə başlığına malikdir.
Bu ABŞ Energetika Nazirliyi yanında Milli Nüvə Təhlükəsizliyi Administrasiyasının saytında dərc olunan məlumatlarda göstərilib.
Qeyd olunub ki, ABŞ-nin nüvə silahı ehtiyatları 1967-ci ildən bəri təxminən 88 faiz ixtisar olunaraq 31 255 nüvə başlığına, Berlin divarının çökdüyü 1989-cu ildə isə daha 83 faiz ixtisar edilərək 22 217 başlığadək azaldılıb.
ABŞ 1994-cü ildən 2023-cü ilə qədər ümumilikdə 12 088 nüvə başlığını, o cümlədən 2020-ci ildən bu yana 405 nüvə başlığını məhv edib. Eyni zamanda, təxminən 2 min döyüş başlığı istifadədən çıxarılıb. Həmçinin 1991-ci il sentyabrın 30-dan bəri qeyri-strateji taktiki nüvə başlıqlarının sayı 90 faizdən çox ixtisar olunub.
20-07-2024, 22:08
Ermənistanda partlayış - Ölən var
Ermənistanın Qafan bölgəsində partlayış baş verib.
Hadisə Ermənistan Müdafiə Nazirliyinin atış poliqonuna yaxın zavodun ərazisində qeydə alınıb.
İnsident nəticəsində 64 yaşlı mühafizəçi ölüb.
Partlayışın hansı şəraitdə baş verdiyi məlum deyil.
20-07-2024, 20:22
Türkiyədə yeni hava limanı fəaliyyətə başlayır
Türkiyənin cənubunda yerləşən Çukurova Hava Limanının açılış mərasimi avqustun 10-da Prezident Rəcəb Tayyib Ərdoğanın iştirakı ilə baş tutacaq.
Yeni hava limanı Türkiyənin iki cənub vilayətinin - Adana və Mersin sakinlərinin ehtiyaclarını ödəmək üçün nəzərdə tutulub. Çukurova Hava Limanının tutumu ildə 8 milyon sərnişin olacaq.
Nəqliyyat Nazirliyinin rəhbəri qeyd edib ki, Mersin vilayətində hava limanının tikintisi “Tik-İşlət-Dövlət” dövlət-özəl tərəfdaşlıq modelinə uyğun həyata keçirilib.
Layihəyə 244,5 milyon avro xərclənib və yerin icarəsindən daxil olacaq ödənişlər 25 il ərzində dövlət xəzinəsinə 297 milyon 100 min avro qazandıracaq.
“Mülki aviasiya sektoru ölkəmiz üçün vacibdir. Türkiyədən 4 saatlıq uçuş zamanı 1,4 milyard əhalisi olan 67 ölkə var. 2053-cü ilə qədər biz aktiv fəaliyyət göstərən hava limanlarının sayını 61-ə çatdırmağı planlaşdırırıq”, -deyə türkiyəli nazir bildirib.
Uraloğlu qeyd edib ki, Çukurova Hava Limanı Türkiyənin ikinci ən böyük yük terminalına sahib olacaq ki, bu da Yaxın Şərq ölkələri ilə ticarətə ciddi töhfə verəcək.
O diqqətə çatdırıb ki, yeni hava limanının açılışından sonra 3 min insan işlə təmin ediləcək.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!