Dünya-yalan adıyla bəzədilən yeganə gerçək. Kimlər sənin qoynunda var olmadı,kimlər nakam,kimlər yox olmadı kı?! Şanlı və qanlı tarixlər yaşandı. Hər bir canlıya mənzil oldun.Dedilər,dünya dəyişilib.Dəyişilən sən deyilsən məgər. Qoynunda böyüyən fərqli yolları seçən və seçdikləri yolların bəlasına düçar olanlar imiş.
İnkişaf etdikcə,"cılız beyinlər" şər-böhtan atdılar,sənə.Axı, sən nə edə bilərsən. Vəzifən bir-birinin ardınca gecəni yola salıb,gündüzü qarşılamaq deyilmi?Cahilə yol göstərməkdən usanan dünya. Dərdi-səri sinəsinə yığan dünya. Nələr görmədinki?! Ağlayan ana,tərk edilən qadın,unudulan kişi. Soyuq küçələrdə böyüyən kimsəsiz, biçarə körpə. Bizlər fani, sən isə bizlərə nəzər daimisən.Elə deyilmi?! Qısa zaman içərisində sinəndə böyüyən hər bir faniyə ev sahibliyi edirsən. Əzəldən, gələn qonağı qarşılayıb,yola salmaqla vəzifələnmisən. Bizlər gəlirik, böyüyüb,inkişafa qol çəkirik. Bacarıqla addım atıb,mənim dünyam deyərək,irəli gedirik.Əslində gedəcək yerimizdə olduğunu səndən yaxşı bilirik.Hara getsək də, sənin ayrılmaz bir hissən olduğunu dərk edirik. Amma yenə də işlər tərs getdiyi zaman səni və sənə uyğun zəmanəni qınayırıq.Səndə səsiz səmirsiz bizləri dinləyirsən.Sənə məxsus torpağın üstündə xəritələr çəkilir,sərhədlər yaranır,düşüncələr irəli sürülür. Hələ bu da azmış kimi sənə təsəlli olsun deyə şeirlər yazılır. Nəğmələr bəstələnir. Amma kimsə gözündən axan bir damla yaşı görüb,silmir.Gözlərinin önünü kin,nifrət,xəsislik hissi almış adam sənin dərdini necə anlasın axı. Deyirsən, yaxşılarımda var. Elə hey pislərdən yazırsan. Düzdü yaxşılar olmasa,yaşanmaz bu həyat. Amma dünya yaxşılarında ədalətsiz bir dünyadan nə gözləsin.Bax, yenə səni günahlandırdım. Məgər məndə sənin bir zərrən deyiləmmi? Deyirsən mübarizə apar, məni təbliğ elə. Adımla bərabər çəkilən "ədalətsiz" kəlməsini sil yaddaşlardan. İnan bacarmaq çətin olacaq.Bilirsən niyə? Nə qədər ki, körpələr südsüz döşdən süd yalvaracaq, nə qədər ki, səhər tezdən biçarə insanlar küçələrdə intara yol axtaracaq, nə qədər ki, sevgini pul alacaq, nə qədər ki, yardım edib başa qalxılacaq, nə qədər ki, başlar ayaq, ayaqlar baş olacaq və nə qədər ki, təhsili əlimizdən alıb, ərə veriləcək, əzilənlərə arxa durulmayacaq, haqq deyib dil töküləcək. Bax o zaman sənə sevmədiyin sözlə xitab edəcəklər.Ədalət harayını gəzən, ədalətsiz dünya. Yalan adı altında gerçək məkan.

Günel Ağayeva