Azərbaycan Hərb Tarixi Muzeyi Azərbaycan İstiqlal Muzeyi ilə bigə görkəmli hərbi xadim, tam artilleriya generalı Səməd bəy Mehmandarovun anadan olmasının 160 illik yubileyi münasibətilə tədbir keçirmişdir.
Tədbirdə ulu öndər Heydər Əliyevin, görkəmli hərbi xadim Səməd bəy Mehmandarovun, Vətənimizin azadlığı və ərazi bütövlüyü uğrunda canlarından keçən şəhidlərimizin xatirəsi yad edilib, dövlət himni səsləndirilib.

Mərasimdə çıxış edən Müdafiə Nazirliyinin zabiti,polkovnik Abdulla Qurbani bildirib ki, son bir ildə Prezident İlham Əliyev üç görkəmli sərkərdənin – general Əliağa Şıxlinskinin150, diviziya komandiri Cəmşid Naxçıvanskinin 120 və general Səməd bəy Mehmandarovun 160 illik yubileylərinin keçirilməsi haqqında sərəncamlar imzalayıb. Səməd bəy Mehmandarovun 160 illik yubiley tədbirlərinin keçirilməsinə Gəncə şəhərində start verilib. Müdafiə naziri, general-polkovnik Zakir Həsənovun əmri ilə təşkilat komitəsi yaradılıb və təsdiq olunan tədbirlər planına əsasən, respublika səviyyəsində silsilə mərasimlər keçirilir. Yubiley tədbirləri ilin sonunadək davam edəcək.

Tədbirdə tam artilleriya generalı Səməd bəy Mehmandarovun həyatı və hərbi fəaliyyətinə həsr olunmuş ANS televiziyasının çəkdiyi “Sərdar” adlı sənədli film nümayiş etdirilmiş və Azərbaycan Hərb Tarixi Muzeyinin rəisi e.o.polkovnik Əzizağa Qəni-zadənin, Şəlalə xanım Hüseynovanın, Gülay xanım Ramazanovanın və digərlərinin çıxışları dinlənilmişdir.

Bədii hissədə Həzi Aslanov adına Mərkəzi Zabitlər Evinin nəzdində fəaliyyət göstərən “Mahnı və rəqs ansanblı”nın konserti olmuşdur.