26-11-2021, 11:23
“Yoxlamalar nəticəsində meydana çıxan acınacaqlı mənzərəyə görə AMEA-nın İşlər İdarəsinin sabiq müdiri Fətəli Abdullayev ciddi məsuliyyət daşıyır”.
Azərbaycan Milli Elmlər Akademiyasının (AMEA) prezidenti, akademik Ramiz Mehdiyev bu fikirləri qurumun Elmi İnnovasiyalar və Alternativ Enerji Texnologiyaları üzrə Elmi Şurasının ilk iclasında çıxışı zamanı deyib. O, akademiyanın elmi-tədqiqat müəssisələrində son vaxtlar aparılan yoxlamalar zamanı aşkarlanan ciddi qanun pozuntularını, korrupsiya faktlarını və idarəetmədə hökm sürən hərc-mərcliyi kəskin tənqid edib və qarşıya çıxan problemlərin tezliklə həllinin vacibliyini vurğulayıb.
R.Mehdiyev həmçinin alimlərin sırf elmi işlərlə məşğul olmaları üçün müəyyən şəraitin yaradıldığını və bu məqsədlə bir sıra zəruri addımların atılacağını diqqətə çatdırıb.
Qeyd edək ki, AMEA-nın prezidenti Rəyasət Heyətinin bir neçə gün əvvəl keçirilən iclasında həbslər olacağının anonsunu verib. O bildirib ki, ciddi nöqsanların sayı həddən artıq çoxdur: “Hazırda korrupsiya idarəsində sənədləri hazırlayırlar və bizə də göndərəcəklər. Bu, əlbəttə, bir tərəfdən nəzarətsizliyin nəticəsidir, digər tərəfdən, insanın mənəvi keyfiyyəti məsələsidir. Akademiya nə üçün bu vəziyyətə gəlib düşüb? Kimdir günahkar? Özbaşınalıq baş alıb gedib, heç kim digərindən bir şey soruşmayıb, tələb və nəzarət etməyib və institutlarda belə bir vəziyyət yaranıb. Xəbərdarlıq etmək istəyirəm ki, belə vəziyyətə biz dözməməliyik, şəxsən mən məsuliyyət daşıyıram. Tək mən yox, Rəyasət Heyətinin üzvləri, vitse-prezidentlər. Belə məsuliyyətsizliyi, işə yanaşmanı qəti surətdə qəbul etmirəm”.
Mehdiyev son vaxtlar akademiyanın bir sıra elmi-tədqiqat müəssisələrində yoxlama işlərinin aparıldığı barədə məlumat verib. Qeyd edib ki, bir sıra hallarda sənədlər və digər məsələlər gizlədildiyindən yoxlama işlərinin keyfiyyəti qənaətbəxş olmayıb.
Mərkəzi Nəbatat Bağında aparılmış yoxlamalar barədə danışan və bağın uzun illər baxımsız vəziyyətdə qaldığını deyən Ramiz Mehdiyev müəssisənin ərazisindəki ağacların bir çoxunun quruduğunu, kəsildiyini, kənar şəxslərin orada şəxsi mənzillər tikdiyini diqqətə çatdırıb. Bildirib ki, icra hakimiyyətindən dəfələrlə bağın qaydaya salınması ilə bağlı AMEA-nın keçmiş rəhbərliyinə müraciətlər olunsa da, bu barədə heç bir tədbir görülməyib. Akademik Ramiz Mehdiyev Botanika İnstitutunda da yoxlamaların aparıldığını, ayrılmış büdcənin
xərcləndiyini, lakin heç bir əməli işin görülmədiyini vurğulayıb.
Neft-Kimya Prosesləri İnstitutunda da yoxlamaların aparıldığını bildirən AMEA rəhbəri bir çox sənədlərin gizlədildiyini, müəyyən məsələlərin yenidən araşdırıldığını söyləyib: “Vaqif Abbasov 10 ildən artıqdır ki, Neft-Kimya Prosesləri İnstitutunda direktor işləyir. Vaqif Abbasov xeyli maliyyə vəsaiti qazansa da, institut 1 manat da olsun, akademiyanın büdcəsinə xeyir verməyib. Müəssisəyə müraciətlər olanda isə özünün Yüksək Texnologiyalar Parkındakı şirkətinə tapşırır və pul qazanırlar”. AMEA rəhbəri qeyd edilən məsələlərlə bağlı hüquq-mühafizə orqanlarına müraciət ediləcəyini diqqətə çatdırıb.
Yeri gəlmişkən, Biologiya elmləri doktoru Səyyarə İbadullayeva AMEA-nın Botanika İnstitutunun, Natiq Allahverdiyev isə Mərkəzi Nəbatat Bağının baş direktoru vəzifəsinə təsdiqləniblər.
Bu barədə qərar AMEA Rəyasət Heyətinin iclasında qəbul edilib. Tədbirdə çıxış edən Natiq Allahverdiyev AMEA rəhbərliyinin tapşırığı ilə son aylarda Mərkəzi Nəbatat Bağında aparılan yoxlamalardan və mövcud problemlərdən danışıb.
N.Allahverdiyev qeyd edib ki, müəssisənin sabiq rəhbərliyi və Botanika İnstitutunun keçmiş direktorunun birgə iştirakı əsasında bağ üçün ayrılan və ekskursiyadan əldə olunan maliyyə vəsaitləri mənimsənilib, nəticədə Mərkəzi Nəbatat Bağında heç bir quruculuq işləri həyata keçirilməyib, ərazidəki ağaclar və bitkilər baxımsız vəziyyətdə qalıb.
İddialara görə, R.Mehdiyev 2013-2019-cu illərdə AMEA-nın prezidenti olmuş Akif Əlizadənin yerini tutmasından sonra onların arasında münasibətlər gərginləşib. “Köhnə komanda” hətta Mehdiyevin işini əngəlləməyə çalışıb. R.Mehdiyev səbirlə ona qarşı olanların əhatə dairəsini müəyyənləşdirib. Bir il ərzində yerini möhkəmlədəndən və özünə komanda yığandan sonra “köhnə qvardiya” ilə hesablaşmağa başlayıb. R.Mehdiyev hələ açıq şəkildə 87 yaşlı Akif Əlizadənin adını çəkməyib, amma tənqid etdiyi və araşdırdığı dövr sabiq prezidentin vəzifədə olduğu vaxtı əhatə edir. Bunun üçün isə R.Mehdiyevin əlində əlbəttə ki, kifayət qədər faktlar var və korrupsiya və yeyintilərlə bağlı dedikləri gerçəkliyi əks etdirir.
AĞ Partiyanın sədri Tural Abbaslı bu barədə “Yeni Müsavat”a şərhində bildirib ki, əslində məsələnin mahiyyətində, kökündə Azərbaycan elminin vəziyyətindən narahatlıq və ya ağır durumdan çıxarılması istəyi dayanmır. Burada daha çox siyasi məsələlərdən söhbət gedir: “Ramiz Mehdiyevin AMEA-ya rəhbər təyin olunmasından xeyli müddət keçir. Bu qədər müddət ərzində orada hər hansı neqativlər, qanunsuzluqlar, cinayət halları var idisə, yeni rəhbərlik onu həll etməli idi. Artıq bu gün hansısa problemdən danışmaq yox, yeni mərhələdən danışmaq lazım idi. Bəs necə oldu ki, Mehdiyev məhz indi bu qədər sərt açıqlamalar verdi, adlar çəkdi. Ramiz Mehdiyev, məncə, gələcəkdə özünün indiyə qədərki fəaliyyəti barədə araşdırmalar aparılacağını hiss edir. Ona görə də məsələni AMEA səviyyəsinə gətirir. O, ilk vaxtlardan AMEA-nı özünə ictimai qalxan kimi görür. Keçmişdəki fəaliyyəti barədə də kimsə yazan kimi, AMEA-nın mətbuat xidməti dövriyyəyə buraxılır, cavab-cavab dalınca verilir. Mən demirəm ki, AMEA-da Ramiz Mehdiyevdən əvvəl hər şey yaxşı idi. Amma onun gəlişindən sonra AMEA elm ocağından çox siyasi təşkilata bənzəməyə başladı. Ramiz Mehdiyevin ona qarşı olan komandanı cəzalandırmaq planı olduğu da onun verdiyi açıqlamadan hiss edilir. Şübhəsiz ki, qanunsuzluqlara yol verən hər bir şəxs qanuni cəzasını almalıdır. Ancaq əminəm ki, AMEA-nın Ramiz Mehdiyev tərəfindən adıçəkilən institutlarının rəhbərləri həbs olunsa belə, orada vəziyyət düzəlməyəcək. Çünki cəzalandırmada əsl məqsəd başqadır”.
Bütöv.az
26-11-2021, 11:10
Bu gün Rusiya Prezidenti Vladimir Putinin təşəbbüsü ilə Azərbaycan Prezidenti İlham Əliyev və Ermənistan baş naziri Nikol Paşinyan Soçidə masaya əyləşəcək.
Bu, 10 noyabr bəyanatından sonra ikinci görüşdür, xatırladaq ki, müharibədən sonra ilk görüş bu ilin 11 yanvarında Moskvada baş tutmuşdu.
Soçi görüşü vacibdir, bu vaciblik liderlərin dekabrın 15-də Brüsseldə keçiriləcək görüşünü formal hala gətirir.
Bununla belə, Brüssel görüşü Soçi görüşünün davamıdır. Yəni Brüssel görüşünün müqəddiməsi Soçidə hazırlanacaq.
Soçidə razılaşdırılacaq məqamlar Brüsseldə Qərbin maraqları ilə uzlaşdırılacaq.
Soçi görüşü sərhəd insidentlərinə son qoymaq üçün yeni sənədi ərsəyə gətirəcək və ya ən azından şifahi razılaşma olacaq.
Ehtimal vermək çətin deyil ki, Soçi görüşündə dəhliz mübahisəsinə son qoymaq üçün Ermənistanın üzərinə sülhəməcburetmə prosesinin tərkib hissəsi olan məcburi öhdəlik qoyulacaq. Söhbət ondan gedir ki, dəhlizin Ermənistandan keçən hissəsinin inşası işlərinin sürətləndirilməsi məsələsi danışıqların predmeti olacaq.
Koridorun açılması üçün qrafik tərtib edilməsi ehtimalları da yüksəkdir. Çünki dəhliz faktoru Rusiya üçün də, Türkiyə üçün də, Qərb üçün də, hətta Çin üçün də aktuallıq kəsb edir.
Ermənistanın isə dirəniş göstərmək və hansısa formada şərt irəli sürmək üçün nə hərbi resursu, nə siyasi iradəsi mövcuddur.
Bütöv.az
25-11-2021, 18:56
Milli Məclisin sədri Sahibə Qafarova MDB Parlament Assambleyasının plenar iclaslarında iştirak etmək üçün Rusiyada işgüzar səfərdədir.
İlk baxışda bu səfəri texniki prosedurların tərkib hissəsi kimi qələmə verə bilərik. Lakin üzdə xırda görünən bir neçə məqamın üzərindən sükutla keçməsək görərik ki, səfərin forması texniki olsa da, məzmununda hansısa hadisələrin olacağı mesajı gizlənir.
Bu tezisi möhkəmləndirəcək arqumentlərə nəzər salaq:
1. Ümumiyyətlə, Azərbaycan dövlətinin VI çağırış Milli Məclis qarşısında qoyduğu prioritetlərdən biri də parlament diplomatiyasının keyfiyyətcə intensivləşməsidir. Sahibə Qafarova beynəlxalq platformalarda Azərbaycan parlamentinin sədri kimi dövlətin maraqlarını ifadə edən bəyanatlar səsləndirir.
2. Fikir verək: 2020-ci ildə Vətən müharibəsi başlamamışdan 4 gün öncə Sahibə Qafarovanın rəhbərlik etdiyi nümayəndə heyəti Rusiyada xarici işlər naziri Sergey Lavrovla görüş keçirmişdi. Bu, müharibə öncəsi Azərbaycan üçün vacib idi.
3. İranda Prezident İbrahim Rəisinin andiçmə mərasiminə Sahibə Qafarova göndərilmişdi, rəsmi Bakı açıq şəkildə ictimailəşdirmədiyi məqamları Sahibə Qafarova vasitəsilə Tehrana çatdırmışdı.
Qısası, Sahibə Qafarovanın səfərlərinə təkcə sıradan texniki xarakterli məzmun vermək kifayət etmir.
Sahibə Qafarova noyabrın 25-də Sankt-Peterburqda Rusiya Federasiya Şurasının sədri Valentina Matviyenko ilə görüşüb.
Diqqət çəkən məqamlar:
1. Bu görüş Azərbaycan Prezidenti İlham Əliyevin, Rusiya Prezidenti Vladimir Putinin və Ermənistanın baş naziri Nikol Paşinyanın Soçidə keçiriləcək görüşündən bir gün öncəyə təsadüf etdi.
Bu, o deməkdir ki, Rusiya ilə Azərbaycan parlament səviyyəsindəki danışıqlarla qarşılıqlı maraqları uzlaşdırılır.
2. Matviyenko Azərbaycan-Ermənistan sərhədlərinin dəqiq müəyyənləşdirilməsi üçün ən etibarlı istinad nöqtəsinin SSRİ xəritələri olduğunu dilə gətirib və onların Rusiya Müdafiə Nazirliyində saxlanıldığını xatırladıb.
Bu, bir daha Kremlin “sərhədlərin dəqiqləşdirilməsinə digər güclər qoşulmasın” mesajının çatdırılmasıdır.
3. Sahibə Qafarova isə bir daha Bakının mövqeyini ifadə edib: Ərazi bütövlüyünün qarşılıqlı tanınması şərti ilə sərhədlərin delimitasiyası mümkündür. Ermənistan isə yenə də təxribatlardan əl çəkmir.
NƏTİCƏ: Azərbaycan Soçi görüşünə güclü əllə gedir, çünki Rusiyanın “sərhəd ideyaları” əvvəldən Bakının maraqlarına uyğun idi.
İndi deyə bilərik ki, Matviyenko da Soçidə üçtərəfli görüş öncəsi Ermənistana xəbərdarlıq edir.
Üçtərəfli görüş öncəsi belə məqamlar bir tərəfin digəri üzərində psixoloji üstünlük qazanması üçün vacibdir.
Azərbaycan da, Rusiya da Ermənistan üzərində böyük üstünlüklərə sahibdir, amma İrəvandan gələn qeyri-müəyyən mövqe Bakının da, Moskvanın da səbrini daşırır...
Məhz yuxarıda qeyd etdiyimiz Lavrovla görüş məsələsi kontekstindən yanaşsaq, Soçidə də Ermənistanın növbəti güzəştlərə imza atacağı ehtimalları güclənir.
Bütöv.az
25-11-2021, 12:18
“İçərişəhər” Dövlət Tarix-Memarlıq Qoruğu İdarəsi və Lahor Qala Şəhəri Administrasiyası arasında “Dostluq və əməkdaşlıq haqqında Protokol” imzalanıb.
“Report” xəbər verir ki, bu barədə Azərbaycanın Pakistandakı səfiri Xəzər Fərhadov tviterdəki hesabında bildirib.
“İçərişəhərlə Pakistanın Lahor Qala Şəhəri arasında Dostluq və Əməkdaşlıq Protokolu imzalanıb. Bu gözəl anların şahidi olmaq və iştirak etmək mənimçün böyük şərəfdir”, - səfir qeyd edib.
Sənəd hər iki qədim şəhərin idarəetmə aparatı, habelə Azərbaycanla Pakistan arasındakı mədəni, iqtisadi əlaqələri gücləndirəcək.
Qeyd edək ki, “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Əsgər Ələkbərovun rəhbərlik etdiyi nümayəndə heyəti Pakistanda səfərdədir.
Bütöv.az
25-11-2021, 11:20
Türk dövlətlərinin artmaqda olan gücü və siyasi mövqeyi əksər ölkələrin diqqətini çəkməyə davam edir.
Dünyada söz sahibi olan İngiltərənin də Türkiyə ilə münasibətləri bu mənada böyük əhəmiyyət kəsb edir.
Bütöv.az MediaTurk-a istinadən Türk dövlətlərinin Britaniya ilə birgə forumunun keçirilməsi haqqında reportajı təqdim edir.
25-11-2021, 11:15
Kəlbəcərin işğaldan azad edilməsindən 1 il ötür.
Bütöv.az xəbər verir ki, Azərbaycan Ordusunun Ermənistanın 2020-ci il sentyabrın 27-də təcavüzünə qarşı başladığı əks-hücum əməliyyatı 2020-ci il noyabrın 9-da Zəfərlə başa çatıb.
Azərbaycan Ordusu 44 günlük Vətən müharibəsində ümumilikdə 300-dən çox yaşayış məntəqəsini, həmçinin Ağdərə, Murovdağ və Zəngilan istiqamətlərində mühüm strateji yüksəklikləri işğaldan azad edib.
Noyabrın 8-də Şuşanın işğaldan azad edilməsi ilə müharibədə məğlub olduğunu anlayan Ermənistan məcburiyyət qarşısında qalaraq kapitulyasiya aktına imza atıb.
Noyabrın 10-da Azərbaycan Prezidenti İlham Əliyev, Rusiya Prezidenti Vladimir Putin və Ermənistanın Baş naziri Nikol Paşinyan arasında Bəyanat imzalanıb.
Bəyanatın 6-cı bəndinə əsasən, Kəlbəcər rayonu Azərbaycana qaytarılıb. Bəyanatda Kəlbəcərin noyabrın 15-dək qaytarılması nəzərdə tutulsa da, ermənilər rayonu boşaltmaq üçün Rusiya vasitəsilə Azərbaycandan 10 gün vaxt istəyib. Azərbaycan humanizm prinsiplərini əsas götürərək, güzəştə gedib, ermənilərə 10 gün vaxt verib. 2020-ci il noyabrın 25-də Kəlbəcər rayonu Azərbaycana qaytarılıb.
Beləliklə, Kəlbəcərin 27 illik işğalına son qoyulub.
Lakin verilmiş 10 gün möhlət müddətində də ermənilər xislətlərinə uyğun davranaraq, Kəlbəcərdə dağıntılar törədib, 27 il işğalda saxladıqları rayonu tərk edərkən evləri, binaları, tikililəri talan edib, yandırıb, ağacları qırıb, ekoloji terrora əl atıb. Bundan başqa, onlar Kəlbəcəri tərk etməzdən əvvəl rayonunun müxtəlif ərazilərində, yol keçidlərində piyada və tank əleyhinə minalar basdırıblar. Bunun nəticəsində 2021-ci il iyunun 4-də Kəlbəcər rayonunun Susuzluq kəndi ərazisində jurnalistləri daşıyan nəqliyyat vasitəsi tank əleyhinə minaya düşüb, partlayışda “Azərtac”ın müxbiri Məhərrəm İbrahimov, AzTV-nin operatoru Sirac Abışov və Kəlbəcər RİH başçısının Susuzluq kənd inzibati ərazi dairəsi üzrə nümayəndəsinin müavini Arif Əliyev həlak olub, 4 nəfər yaralanıb.
Qeyd edək ki, üçtərəfli Bəyanatın 2-ci bəndinə əsasən, 2020-ci il noyabrın 20-də Ağdam rayonu, 6-cı bəndinə əsasən, dekabrın 1-də isə Laçın rayonu da Azərbaycana qaytarılıb.
Azərbaycan Ağdam, Kəlbəcər və Laçın rayonlarının işğaldan azad edilməsinə heç bir itki vermədən nail olub.
Azərbaycan Prezidenti İlham Əliyev 25 noyabr 2020-ci ildə televiziya ilə müraciətində Kəlbəcər rayonunun işğaldan azad edilməsi münasibətilə Azərbaycan xalqını təbrik edib.
Kəlbəcərin işğaldan azad edilməsi şərəfinə Azərbaycan Respublikasında “Kəlbəcərin azad olunmasına görə” medalı təsis olunub.
Prezident İlham Əliyevin sərəncamı ilə Kəlbəcərin işğaldan azad edilməsi uğrunda döyüş əməliyyatlarında iştirak edərək şəxsi igidlik və şücaət göstərmiş hərbi qulluqçular “Kəlbəcərin azad olunmasına görə” medalı ilə təltif edilib.
Qeyd edək ki, Kəlbəcər rayonu 1993-cü il aprelin 2-də Ermənistan Silahlı Qüvvələri tərəfindən işğal edilmişdi.
Ermənistan işğal müddətində Kəlbəcər şəhərini və rayonun yaşayış məntəqələrini talayıb, darmadağın edib, tarixi, mədəni, dini abidələr, qəbiristanlıqlar yer üzündən silinib.
24-11-2021, 17:14
Ötən gün Paşinyanın keçirdiyi mətbuat konfransı öz-özlüyündə 26 noyabr görüşü öncəsi Ermənistanda ictimai fikir formalaşdırmaq, digər tərəfdən isə informasiya məkanında müəyyən məsələlərdə öncül movqe əldə etmək niyyəti güdürdü.
Bu sözləri Axar.az-a millət vəkili Zahid Oruc 26 noyabrda Soçidə keçirilməsi gözlənilən Rusiya, Azərbaycan və Ermənistan liderlərinin görüşü haqda danışarkən deyib.
“Paşinyan 9 noyabr tarixində təyin olunmuş görüşün təxirə salınmasından sonrakı 13 gün ərzində Ermənistanın rəhbər şəxslərində, onun siyasi elitasında baş verən müəyyən dəyişiklikləri qiymətləndirməyə çalışdı. Vətən Müharibəsinin 1-ci ildönümündən sonrakı zaman kəsiyində Ermənistanda müdafiə naziri dəyişdi, Paşinyan daha açıq mətnlə İrəvanın sülh müqaviləsi imzalamasına hazırlığını mediaya yaydı. Digər tərəfdən, 16 noyabrda sərhəddə baş verən hərbi toqquşmalar ötən 1 ildən sonra ən böyük toqquşma kimi qiymətləndirildi. Bu, öz-özlüyündə həm Rusiyanın, həm beynəlxalq dairələrin reaksiyalarını doğurdu və sübut etdi ki, məsələ qətiyyən lokal olaraq Qarabağla bağlı deyil. Artıq bu mərhələ bitib, Qarabağ münaqişəsi arxada qalıb, amma Ermənistanla Azərbaycan arasındakı gərginlik davam edir”.
Millət vəkili qeyd edib ki, Paşinyanın dünənki müsahibəsində bir neçə məqam var:
“Vurğulandı ki, 26 noyabrda hər hansı bir sənəd imzalanmayacaq, lakin komissiya formalaşdırılması mümkündür. Digər tərəfdən, bu mərhələdə Brüssel görüşü barədə məlumatlar yayıldı. Real mənzərə isə Paşinyanın çevrəsinin sanki Qərb meydanına daha çox özünü meyilli göstərməsi idi. Bu istiqamətdə onların informasiya məkanında geniş təbliğat gedir. Müharibədən sonra Ermənistandakı problemlərin üzərinə ağır iqtisadi problemləri də gəlsək, Paşinyanın 2,6 milyard avronun qazanılması üçün Qərbə doğru özünün ənənəvi manevrlərini etdiyinin səbəbini anlamaq olar. Amma dünənki açıqlamalarda ölkəmizin əleyhinə yenidən 2 mühüm tezisi qabartmağa çalışdı. Birincisi, guya Azərbaycanın Ermənistana ərazi iddiası var və buna görə də bölgə cəngəlliyə çevrilə bilər. İkincisi, əgər Azərbaycan özünü qalib dövlət kimi aparıb “harada istəsəm, orada dayanaram” deyərsə, bu, beynəlxalq sülhün və təhlükəsizliyin ziddinə olar. Niderlandda, Lüksenburqda və bir sıra Qərb dövlətlərində də eyni tezis üzərindən parlamentlərdə qərarlar verilməkdədir. Paşinyanın iki tezisi əleyhimizə yönəltmək istəməsi o deməkdir ki, bu istiqamətdə sistemli işlər aparılır. Halbuki regionu uzun onillər cəngəlliyə çevirməyə çalışan, 7 rayonun bütün mirasını Yer üzündən silən məhz Ermənistan olub”.
Z.Oruc bildirib ki, Azərbaycana iddianı məhz Ermənistan edir:
“Sərhəd məsələsinin bu vəziyyətə gəlib çatması da işğalın nəticəsidir. 30 il ərzində biz hər cür məhrumiyyətləri yaşamışıq. Amma bu işğalın meydana gətirdiyi unikal reallıq ondan ibarətdir ki, gerçəkdən də ortada hətta Qarabağdan kənar ərazilərdə də tam tanınma mövcud deyil. Çünki iki tərəf bir-birini beynəlxalq hüquq subyekti kimi qəbul etməyib”.
Millət vəkilinin sözlərinə görə, Paşinyanın daha iki mövqeyi vardı:
“Bunun üzərində dayanmağa dəyər. Birincisi, o vurğulayır: artıq Ermənistan müdafiə nazirinə tapşırıq verib ki, Sovetlər Birliyi dağılandan sonra ilk dəfə müdafiə nazirləri arasında birbaşa kontaktlar olsun. Halbuki bu, birinci hadisə deyil – sadəcə, biz bundan Paşinyana qarşı istifadə etməyəcəyik, daxili müxalifəti isə istifadə edə bilər. Reallıq isə başqadır. Ermənistan fərqindədir ki, xarici dairələrə sərhədin istənilən nöqtəsində dayanmaları ilə bağlı müraciət etmək mümkün deyil. Belə olan təqdirdə, məcburdur ki, öz nazirlərini Azərbaycanla birbaşa kontakta keçməyə məcbur etsin”.
Z.Orucun sözlərinə görə, Paşinyanın Azərbaycan və Ermənistan MDB çərçivəsində 1991-ci ildə qarşılıqlı şəkildə ərazi bütövlüyünü tanıması ilə bağlı fikri də yanlışdır:
“Bu, 1991-ci ildə deyildi. Paşinyan yanlış söyləyib. Çünki həmin zaman MDB formalaşmamışdı. Azərbaycanın üzvlüyü məhz Heydər Əliyevin ikinci dəfə hakimiyyətə gəlişindən sonra reallaşdı. Bu isə 1993-cü ilin sonuna doğru baş vermişdi. Əlbəttə, MDB-nin üzvlük hadisəsi bu idi ki, dövlətlər müəyyən baza prinsiplərini qəbul ediblər. Bu, əslində dövlətlərin bir-birini tanımasını əvəz edən hadisə deyil. Hanısısa bir beynəlxalq, regional birliyə üzv olursansa, orada götürdüyün müəyyən öhdəliklər var. Avtomatik ikitərəfli qaydada bunu sazişlər, qərarlarla tanımamısansa, Paşinyanın bunu deməyinə heç bir əsas yoxdur”.
Z.Oruc bildirib ki, bu məsələ erməni ictimaiyyətində və mediasında Paşinyan hakimiyyətinin Azərbaycanın ərazi bütövlüyünü tanımağa hazırlaşmasını həzm etdirmək üçün yayılıb:
“Bu, Qarabağla birgə Azərbaycanın vahidliyinin qəbul edilməsi deməkdir. Onlar Azərbaycan ərazilərini işğalda saxlaya bilmədilər. İndi isə bütövlükdə Ermənistanı itirmə qorxusu ilə hərəkət edib, belə addım atacaqlar. Müəyyən milliyyətçi dairələr sayca azlıq təşkil edirlər. Əminik ki, onlar hakimiyyəti devirmək üçün müəyyən xarici qüvvələrin şəbəkələrindən dəstəklənirlər. Hazırda metrostansiyalarda aksiyaların keçirilməsi də bunu sübut edir. Görünən mənzərə odur ki, erməni xalqının mütləq əksəriyyəti Azərbaycanla sülh müqaviləsinin tərəfdarıdır. Hətta onu öz varlığının və siyasi mövcudluğunun əsas şərti kimi görür. Bu səbəbdən Soçidəki görüşü Brüsselə qarşı qoymadan, Avropada aparılacaq danışıqları Moskvanın moderatorluğu ilə keçirilən tədbirin əleyhinə yönəltmədən deməliyik ki, 10 noyabr və 11 yanvar görüşlərindən sonra bu, mühüm hadisədir. Azərbaycanın hərbi qələbəsini diplomatik meydanda davam etdirməsi onu uğurlu sonluğa aparır. Cənab Prezidentin Soçiyə gedişi ərəfəsində 16 noyabr hadisələri, ötən 1 ildəki qələbəmizin beynəlxalq aləmdə doğurduğu reaksiyalar ölkəmizin mövqeyinin yetərincə güclü olduğunu deməyə əsas verir”.
Bütöv.az
24-11-2021, 16:56
Prezident İlham Əliyevin sərəncamı ilə Azərbaycan Respublikasının ictimai-siyasi həyatında fəal iştirakına görə Musa İsa oğlu Quliyev “Şöhrət” ordeni ilə təltif edilib.
Bu barədə AZƏRTAC məlumat yayıb.
Qeyd edək ki, noyabrın 25-də Milli Məclisin deputatı Musa Quliyevin 70 yaşı tamam olur.
Bütöv.az
24-11-2021, 12:00
Azərbaycan Respublikasının Prezidenti İlham Əliyev noyabrın 24-də Rusiya Federasiyasının Baş nazirinin müavini Aleksey Overçuku qəbul edib.
Bu barədə AZƏRTAC məlumat yayıb.
Bütöv.az
24-11-2021, 11:20
1 saylı Xəzinədarlıq İdarəsinin rəisi Dövlət Xəzinədarlıq Agentliyinin rəhbəri olmaq uğrunda mübarizəyə başlayıb
Ötən həftə Prezident İlham Əliyev Azərbaycan Respublikasında bir sıra dövlət orqanlarının strukturunun optimallaşdırılması və idarə edilməsinin təkmilləşdirilməsi ilə bağlı əlavə tədbirlər haqqında fərman imzaladı. Həmin Fərmana əsasən Maliyyə Nazirliyinin Dövlət Borcunun İdarə Edilməsi Agentliyi ləğv edildi və onun funksiyaları Nazirliyin Aparatına verilməklə bərabər, Maliyyə Nazirliyinin Dövlət Xəzinədarlıq Agentliyinin əsasında Azərbaycan Respublikasının Maliyyə Nazirliyi yanında Dövlət Xəzinədarlıq Agentliyi yaradıldı.
AzToday.az-a daxil olan məlumata görə prezident İlham Əliyevin Maliyyə Naziliyi yanında Dövlət Xəzinədarlıq Agentliyinin yaradılması haqqında Fərmanına ən çox sevinən məmur 1 saylı Xəzinədarlıq İdarəsinin rəisi Nadir Qarayev olub.
Belə ki, uzun müddətdir Maliyyə Nazirliyi yanında müstəqil Dövlət Xəzinadarlıq Agentliyinin yaradılmasını intizarla gözləyən Nadir Qarayev adı çəkilən qurumun rəhbəri olmaq istəyi ilə "alışıb yanır”.
Məlumatda bildirilir ki, prezidentin Dövlət Xəzinadarlıq Agentliyinin yaradılması ilə bağlı verdiyi Fəmnadan dərhal sonra Nadir Qarayev və havadarları hərəkətə keçiblər. Çünki adı çəkilən qurumun rəhbərliyinə Maliyyə Naziri Samir Şərifovda öz kadrını gətirtmək istəyindədir. Məhz buna görədə nazir müavini Azər Bayramov və Nadir Qarayev bütün əlaqələrini işə salmaqla rəqiblərini zərərsizləşdirmək istəyirlər.
Nazirlikdəki mənbənin iddasına görə Nadir Qarayevin Dövlət Xəzinadarlıq Agentliyinin rəhbəri vəzifəsinə təyin edilməsi yaxın bir-iki həftədə gerçəkləşə bilər. Bunun üçün Maliyyə naziri Samir Şərifovun da ona "xeyir dua” verməsi lazımdı. Mənbə qeyd edir ki, "Nadir Qarayevin dostları və himayədarları çox güman ki, Samir Şərifovu razı sala biləcəklər və o zaman onun arzusu gerçəkləşəcək.
Bütöv.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!