3-12-2021, 11:38
Xəbər verdiyimiz kimi, bu gün Azərbaycan Ordusunun hərbi qulluqçusu gizir Hüseynov Şahin Şəmsəddin oğlu məzuniyyətdə olarkən bədbəxt hadisə nəticəsində (qayadan yıxılaraq) həlak olub.
"Unikal"ın əldə etdiyi məlumata görə, o, əslən Gədəbəy rayonundandır.
Qeyd edək ki, Ş.Hüseynov Vətən Müharibəsi iştirakçısıdır və Prezident İlham Əliyevin sərəcnamı ilə "Kəlbəcərin azad olunması görə" medalı ilə təltif edilib.
Bütöv.az
3-12-2021, 11:33
Vətən müharibəsində böyük qəhrəmanlıq göstərən Hərbi Hava Qüvvələrinin pilotu, polkovnik Zaur Nudirəliyevin döyüş zamanı hansı şəraitdə şəhid olduğu açıqlanıb.
Bu barədə İTV-nin hazırladığı “Savaş şahini Zaur Nudirəliyev” adlı sənədli filmdə çıxış edən şəhid pilotun döyüş yoldaşı polkovnik-leytenant Reyhun Fərmanov bildirib.
Qeyd edib ki, Zaur Nudirəliyev təkcə düşmən mövqelərinə zərbələr endirməklə kifayətlənməyib:
“Oktyabrın 4-ü təxminən saat 12:15 radələri olardı, düşmənin hava hücumundan müdafiə vasitələrinin qoşulması haqqında kəşfiyyat məlumatı alan kimi, mən ona dedim ki, məhvetmə zonasına girməsin. Amma Zaur uçuşunu davam etdirdi, bizi dinləmədi.
O qədər əzmli idi ki, çətin vəziyyətdə olan quru qoşunlarımızın qarşısı açılsın deyə, təyyarəsi ilə götürdüyü döyüş sursatlarını təyin olunmuş koordinata atdı. Güman edirəm ki, uçuş zamanı düşmən hava hücumundan müdafiə vasitələri ilə onun təyyarəsini zədələdilər. Biz onun təyyarəsini düşmənin artilleriya mövqeyinin içərisində tapdıq. Təyyarəni sağ-salamat geri gətirə bilməyəcəyinə əmin olduqdan sonra, onu düşmənin artilleriya mövqeyinə çırparaq ermənilərə ciddi itkilər verməsinə səbəb oldu”.
Qeyd edək ki, 42 yaşlı Vətən Müharibəsi Qəhrəmanı Cəbrayıl-Füzuli və Ağdərə istiqamətlərində 12 uçuş həyata keçirərək düşmənin dayaq məntəqələrini, canlı qüvvələrini məhv edib, həmçinin Azərbaycan ordusunun qurudan ciddi üstünlüyə sahib olmasını təmin edib.
Bütöv.az
3-12-2021, 11:04
Azərbaycan xarici işlər naziri Ceyhun Bayramov ATƏT-in Nazirlər Şurasının Stokholmda keçirilən iclası çərçivəsində belaruslu həmkarı Vladimir Makey ilə görüşüb.
Bu barədə Azərbaycan Xarici İşlər Nazirliyi məlumat yayıb.
Nazirlər iki ölkə arasında münasibətlərin yüksək səviyyədə olduğunu məmnunluqla qeyd edib.
Tərəflər iki ölkə arasında müxtəlif sahələrdə həyata keçirilən əməkdaşlıq gündəliyini müzakirə ediblər.
Həm ikitərəfli, həm də çoxtərəfli formatlarda əməkdaşlığın davam etdirilməsinin əhəmiyyətini vurğulayıblar.
Ceyhun Bayramov həmkarına bölgədə mövcud olan ən son vəziyyət, üçtərəfli bəyanatların icrası ilə bağlı Azərbaycan tərəfindən atılan addımlar, azad edilmiş ərazilərdə həyata keçirilən bərpa və yenidənqurma işləri barədə məlumatlandırıb.
Vladimir Makey yenidənqurma işlərində iştirak etməyə hazır olduqlarını ifadə edib.
Tərəflər, həmçinin gündəlikdə duran və qarşılıqlı maraq doğuran məsələlər ətrafında fikir mübadiləsi aparıblar.
Bütöv.az
3-12-2021, 11:02
Halallıq geniş anlayışdır, təkcə kolbasa ilə bağlı deyil..
“Leş Tofiq” “Səhliyalı” şirkətinə nə qədər ölmüş heyvan cəmdəyi, leş satıb ?
“1000 BƏRƏKƏT HALAL NEMƏT” ət və ət məhsulları ilə Azərbaycan bazarına daxil olan “Səhliyalı” şirkəti 1996-cı ildə fəaliyyətə başlayıb. 2000-ci ildən başlayaraq kolbasa və sosiska istehsalını həyata keçirdi.
Şirkətin reklamından bəlli olur ki, Avstriyadan müasir avadanlıqlar gətirilib, guya şirkətin işçiləri xarici ölkələrdə təcrübə keçiblər.
Bütün bunlar şirkətin özü barəsində ucuz və bayağı reklamdır.
Bəs əslində vəziyyət necədir ?
Birincisi ondan başlayaq ki, son 20-30 ildə “HALAL” adı altında ölkə bazarına o qədər halal olmayan, haram, ölmüş heyvan cəmdəkləri girib ki, Azərbaycan insanını belə reklamla aldatmaq mümkün deyil.
İkincisi, HALALLIQ təkcə ətlə, kolbasa ilə bağlı məsələ deyil. İnsan hər məsələdə halallığı qorumalıdır, yoxsa kolbasa ilə halallıq olmaz.
Üçüncüsü, bəzi şirkətlər Qafqaz Müsəlmanları İdarəsindən guya halallıq sertifikatı alaraq əhaliyə ən iyrənc məhsulları təqdim edirlər.
Elə “Səhliyalı” şirkətinin “Min bərəkət halal nemət” markası ilə satılan kolbasa və sosiskalarının istehsal olunduğu sexlərdən yayılan videolar göstərdi ki, məhsulların içindən siçan nəcisi, heyvan tükü çıxır.
Bunun harası HALAL oldu, cənab Səhliyalı ?
Bir məsələni unutmayın ki, Xırdalanda taxta sexinin ərazisini hasara alıb orada uzun illər gizli olaraq ölmüş heyvan, at, eşşək cəmdəkləri satılırdı və bu məsələyə yüksəkçinli bir polis zabiti “krışa”lıq edirdi. Bax, həmin zaman “Səhliyalı” şirkətinin Xırdalanda 2 kolbasa sexi var idi. Aydın oldumu ?
Təsəvvür edirsiniz, hətta hökumətin rəsmi orqanı olan qəzetlər yazıb ki, “Səhliyalı” kolbasa üçün ərəb ölkələrindən mənşəyi məlum olmayan, üfunət iyi verən heyvan əti gətirir və ətə o qədər ədviyyat, zərərli maddələr vurulur ki, üfunət iyi çəkilsin.
Şirkət hətta öz saytı olan sahliyalı.com-da da ət məhsullarını haradan aldığını göstərmir.
Bəs onda istehlakçı aldığı məhsulun tərkibini, mənşəyini haradan bilsin ?
Hətta mediada şirkətin istehsal etdiyi sosiskadan siçan ətinin çıxmasını göstərən faktlar da var.
Bəli, mediada “Min bərəkət, halal nemət” adlı kolbasaların konkret olaraq leş ətlərdən hazırlandığı barədə ciddi informasiyalar var.
“Səhliyalı”nın çox iyrənc reklamı da var. Guya öz halallığını camaata göstərmək üçün hamını gözünün qarşısında “Bismillah” deyərək xüsusi aparatla heyvanın başı kəsilir. Bu biabırçılıqdır, vəhşilikdir.
Bir məsələni də unutmaq olmaz ki, dünyada onkoloji xəstəliklərin mənbəyi daha çox kolbasadır.
Bir sözlə, Bəşirovlar ailəsinə məxsus olan “Səhliyalı” şirkəti Min bərəkət adı altında min hoqqadan çıxır.
(gundelik baki.com)
Bütöv.az olaraq məqalədə toxunulan iddialarla bağlı qarşı tərəfin mövqeyini dərc etməyə hazırıq!
3-12-2021, 08:39
Hörmətli redaksiya,
Mən, Yardımlı rayon Zevin kənd sakini Bəgəliyev Maqsud Əlisahib oglu ali təhsilli mühəndisəm. 1987-ci ildə AZİ-ni bitirmişəm. Həmin vaxtdan da Yardımlı rayon Elektrik Şəbəkəsində mühəndis vəzifəsində işləmişəm.
2017-ci il aprelin 11-də həmişəki kimi işə getmişəm və həmin vaxt işdə qəza baş verib. Agır xəsarət almışam, sol ayağım dizdən aşağı qəlpə sınıqlarıdır. Həmçinin başımdan da ağır zədə almışam. Bununla əlaqədar Biləsuvar rayon xəstəxanasında əməliyyat olunmuşam. Vəziyyətim agırlaşdıgından oradan Sumqayıt travmatologiya xəstəxanasına gətirilmişəm. Orada yenidən əməliyyat olunmuşam. Eyni zamanda başımdan da müalicə almışam. Ayagımdakı millər üç ildən bir dəyişdirilməlidir. Onları ömürlük daşımalı olacagam. Xəstəxanada bir il altı ay yatmşam. Orada mənə yeddi ay bülleten pulu verilib.
Xəstəxanadan çıxandan sonra mən "Azərişıga"müraciət etdim ki, mənə dəyən maddi-mənəvi ziyanı ödəsinlər. Lakin rədd cavabı aldım. Məcbur olub Bakı şəhər Nəsimi rayon məhkəməsinə müraciət etdim. Orada iddia qaldırdım ki, mənə verilən əlilliyin yanlış qeyd olunan səbəbi dəyişdirilsin. Məhkəmə iddiamı təmin etmədi və mən apelyasiya məhkəməsinə üz tutdum. Məhkəmə iddiamı qəbul etdi və mənə dəyən maddi və mənəvi ziyanın ödənilməsinin təmin edilməsi barədə qərar çıxardı. Qarşı tərəf qərardan narazı olduğundan, işi Ali Məhkəməyə verdi. Məhkəmə "Azərişıgın" iddiasını rədd edərək apellyasiya məhkəməsinin qərarını qüvvədə saxladı. Lakin "Azərişıq" məhkəmə qərarını saya salmır.
Respublika Əlillərin Bərpa Mərkəzində Cavid həkim mənə bildirdi ki, iddianın təmin olunması üçün "Azərişıq" onlara sorğu göndərməlidir. Onu al gətir. Amma hazırda "Azərişıga"rəhbərlik edən Vüqar Əhmədov və müavini Tanrıverdi Mustafayevə müraciətlərim nəticəsiz qaldı. Mənə bildirdilər ki, sorğu verən deyillər. İndi iki aydır ki, iki idarənin arasında get-gəldə qalmışam.
İdarəni çapıb-talayan Tanrıverdi Mustafayev və Vüqar Əhmədov sadə əmək adamlarının qanuni haqlarını beləcə yeyib üstündən də su içirlər. Onlara bildirəndə ki, dövlət başçısına müraciət edəcəm, cavabında, kimə istəyirsən şikayət elə, biz heç kimdən qorxmuruq.
Hörmətli redaksiya, xahiş edirəm ki, hüquqlarımın müdafiəsi işində, düşdüyüm çətin və mürəkkəb vəziyyətdən çıxmaqda mənə kömək əli uzadasınız.
İmza : Bəgəliyev Maqsud Əlisahib oglu.
15.11.2021-ci il.
3-12-2021, 08:27
12 dekabr tarixinin xalqımız üçün tarixi və ideoliji əhəmiyyəti böyükdür. Həmin gün Güney Azərbaycan Milli Hökumətinin təşkil edilməsi və elə bir ildən sonra həmin gün süquta uğramasıdır.
İndi milli azadlıq uğrunda mübarizə tariximizin qızıl səhifələrindən olan 21 Azər Hərəkatına qara yaxan bədxahlar deyirlər ki, guya bu kommunistlərin siyasi oyunu idi. Fərqi yoxdur kim nə deyir desin. 21 Azər Hərəkatı İranda əsrlərlə mövcud olmuş Azərbaycan dövlətçiliyinin 10 milyonlarla türk toplumunun öz müqəddəratını təyin etməsinin bərpası idi. Geney Azərbaycan Milli Hökumətinin bir illik mövcudluğu xalqa azadlığın və müstəqilliyin necə müqəddəs olmasını sübut etdi.
12 dekabr 1945-ci ildə, Təbriz şəhərində xalqın əzmi ilə Azərbaycan Milli Hökuməti quruldu. Daha cox “21 Azər” Hərəkatı kimi tarixə düşən bu günün əhəmiyyəti çox böyükdür. Seyid Cəfər Pişəvərinin başçılığı ilə qurulan bu hökumət İran şahının 25 ildə görmədiklərini bir ildə etdi.
AMEA-nın Nizami adına Ədəbiyyat İnstitutu Cənubi Azərbaycan Ədəbiyyatı şöbəsinin professoru Vüqar Əhməd S.C. Pişəvərinin həyatı, mühiti və yaradıcılığı" adlı monoqrafiyasında Milli Mübarizə tariximizin ən parlaq simalarından biri olan Pişəvərinin xalqının Milli Mübarizə yolunda fəaliyyəti geniş təhlil olunub.
Ümumiyyətlə, 21 Azər hərəkatının tarixi missiyasi təkcə Azərbaycan üçün yox, eləcə də Şərq aləmi üçün örnək ola biləcək hadisədir. Bu 21 Azər ona görə adlanır ki, İran təqvimi ilə bu hərəkat 21 Azər ayında, 12 dekabrda baş verib.
Milli Hökümət xalqın dəstəyilə mühüm işlər görüb. Belə ki, 19 yanvar 1946-cı ildə Azərbaycan İncəsənət və Rəssamlıq Məktəbinin, 23 mart 1946-ci ildə Dövlət Teatrının , 4 iyul 1946-ci ildə Azərbaycan Radioverilişləri Agentliyinin, 6 iyun 1946-ci ildə Təbriz Dövlət Universitetinin, eləcə də xeyli sayda orta ümumtəhsil məktəblərin açılması, milli teatrın və mili filarmoniyanın yaradılması, milli kitabxanaların istifadəyə verilməsi, yolların çəkilməsi və s. kimi işləri Seyid Cəfər Pişəvərinin başçılıq etdiyi Milli Hökümət reallaşdırdı.
1946-cı ilin sentyabrından – yeni tədris ilindən başlayaraq, bütün məktəblərdə dərslər ana dilində – Azərbaycan türkcəsində aparılmalı idi və bu işin uğurla həyata keçirilməsi Milli hökümətin mədəni islahatları içərisində önəmli yerlərdən birini tuturdu.
21 Azər hərakatı İran Pəhləvi şah rejiminin assimilyasiya siyasətinə qarşı çıxmaq və Azərbaycan milli kimliyini təsdiq etmək məqsədi daşıyırdı. Azərbaycan dilinin yüksək tutulmasına əsaslanan mədəni dəyişikliklər prosesi hətta 1945-ci ilin noyabrından qabaq başlamışdı. Lakin öz rəsmi xarakterini 1946-cı ilin yanvarın 6-da “Dil haqqında Milli Hökümətin Qərarı” ilə aldı. Bu sənəd elan etdi ki, “bu gündən etibarən Azərbaycanda rəsmi dil türk dilidir”. Bu vaxtadək türk dili artıq bir çox məktəblərdə tədris olunurdu və ana dili dərsliklərinin sürətli nəşrinə başlanılmışdı. Qərarın qəbul edilməsi isə bu prosesin tez bir zamanda uğurlu nəticələr verməsinə səbəb oldu.
Güney Azərbaycan Milli Höküməti dövründə aparılan mədəni islahatların mühüm bir qanadını ana dilli mətbu orqanların nəşr edilməsi idi. 1945-1946-cı illərdə Güney Azərbaycanda müxtəlif mətbuat orqanları – “Vətən yolunda”, “Azərbaycan”, “Fəryad”, “Azad millət”, “Qələbə”, “Yeni Şərq”, “Maarif”, “Demokrat”, “Fəlahət” (Təbriz), “Cövdət” (Ərdəbil), “Urmiyyə”, “Qızıl əsgər” (Urmiyə), “Vətən” (Miyana) qəzet, jurnal və məcmuələr nəşr olunmuş, bu mətbuatın səhifələrində ölkənin ictimai-siyasi və ədəbi-kulturoloji həyatı təcəssümünü tapmışdı.
Milli Hökümət sosial və iqtisadi dəyişiklikləri həyata keçirmək məqsədilə bir sıra ciddi islahatlara da başladı. Bu sırada torpaqların kəndlilərə paylanılması, şəhərlərdə və kənd yerlərində xəstəxanaların açılması, yolların çəkilməsi, kənd təsərrüfatının inkişaf etdirilməsi, işsizliyin aradan qaldırılması və s. kimi mühüm məsələlər vardı.
1950-ci ildə Güney Azərbaycana səfər edən amerikalı hüquqşünas Uilyam Duqlas yerli camaatın Milli Hökümətin və onun rəhbəri Seyid Cəfər Pişəvərinin xidmətləri kimi xatırlatdığı dəyişiklik və islahatların siyahısını tərtib etmişdi.
1. Azərbaycan Milli Höküməti torpaq islahatını həyata keçirdi;
2. Hökümət iri bankları milliləşdirdi;
3. Sosial proqramın həyata keçirilməsinə başlanıldı, işsizlər işlə təmin olundu;
4. Güney Azərbaycan Milli Ordusu yaradıldı və sairə.
Azərbaycan Milli Hökümətinin fəaliyyət göstərdiyi bir il ərzində həyata keçirmiş olduğu ən mühüm islahatları əsas etibarilə üç kateqoriyaya bölmək mümkündür.
1) Siyasi islahatlar;
2) Mədəni islahatlar;
3) Sosial-iqtisadi islahatlar.
Güney Azərbaycan Milli Hökuməti bizə Azərbaycan Xalq Cümhuriyyəti qədər əzizdir. AXC necə süquta uğradıldısa, AMH də eləcə süquta uğradıldı. AXC qurucusu “Bir kərə ucalan bayraq bir daha enməz”, - dedi. Pişəvəri də deyib ki, Milli Hökumət bir həqiqətdir onu heç kəs dana bilməz. Hökumət süquta uğradıldıqdan sonra dövlət qurucularının bir çoxu Bakıya pənah gətirdilər. Xalq şairi Balaş Azəroğlu, Söhrab Tahir, Əli Tudə, Qulam Yəhya, Lətif Hüseynzadə və başqaları uzun illər Bakıda yaşayıb yaratdılar.
Azərbaycan Radiosunun Cənubi Azərbaycan redaksiyasına rəhbərlik edən Lətif Hüseynzadə də Milli Hökumətin gənclər təşkilatının fəallarından olmuşdur. O dövrün ictimai-siyasi, mədəni həyatını əks etdirən məqalələr yazırdı. “Azərbaycan müəllimi” qəzetində “Cənubdan səslər” rubrikası var idi. Orada Lətif Hüseyn-zadənin “Diqqət, Danışır Təbriz Radiosu!” adlı məqaləsi çap olunmuşdur. Məqalə əsasən Təbriz Radiosu və onun sədr müavini Balaş Azəroğlunun fəaliyyətinə həsr olunmuşdur. Artıq o illər tarixə qovuşmuşdur. Bu günlərdə B.Azəroğlunun 100 yaşı tamam oldu. Böyük şəxsiyyətləri gərək il dönümlərində yox, hər zaman yad edək.
Mehman Şəmistanoğlu
3-12-2021, 07:50
Hərbi jurnalist kimi çalışdığım 26 illik bir zaman kəsiyində ən çox çətinlik çəkdiyim mövzu şəhidlik olub. Çünki şəhidlərimizin valideynlərini, ömür-gün yoldaşlarını, övladlarını danışdırmaq adama çətin gəlir. Elə bil yenidən kövrək xatirələr çözələnir, kimsə şəhidlə bağlı yaddaşında həkk olunan bir epizodu bölüşəndə əziyyət çəkir. Xüsusən də bir şəhid anasını, bir şəhidin ömür-gün yoldaşını danışdırmaq adama əzab verir. Onlar kövrəlib göz yaşına hakim ola bilməyəndə sanki özünü günahkar bilirsən.
Qarşımda saçlarına erkən dən düşən ziyalı bir xanım əyləşib. Vətən müharibəsi şəhidi mayor Elnur Yaqub oğlu Hacıyevin həyat yoldaşıdır. Mənə elə gəldi ki, Elnarə xanımı sorğu-suala tutmaq çətin olmaz, kifayət qədər təmkinli, səbrli qadındır. O da müəyyən epizodları, xatirələrini bölüşəndə özünü ələ almaqda çətinlik duyur. Qeyri-ixtiyari yanağında göz yaşı sellənir, nə edəsən, müharibə doğrudan da dəhşətdir, nə qədər insanı gözü yaşlı, arzuları yarımçıq qoyur.
Həmişə düşünürəm ki, bir hərbçi ailəsi olmaq əsl fədakarlıq, qəhrəmanlıqdı. Axı ömrü-günü müxtəlif bölgələrdə keçən peşə sahibinin illər boyu rahatlığı olmur. Onunla birgə ailəsi də, övladları da çətinlik çəkir. Elnarə xanımdan soruşuram ki, bir hərbçiyə könül bağlayanda ömür yolunuzun çətinliyi sizi qorxutmadı? Yenə xatirələrini dilə gətirir, Elnurla tanış olduğu ilk günlərə “səyahət edir”.
Sonradan qardaşıgil hərbçi ilə ailə qurmağın nə qədər ağır olduğunu izah etsələr də Elnarəni heç kim inadından dönük çıxara bilmir. Bir gün iki sevən gəncin ailə həyatının bünövrəsi qoyulur. Beləcə Elnarə xanım taleyinin hökmü ilə çətin, lakin şərəfli bir yola qədəm qoyur. Narahat, əzablı günləri çox olur, tez-tez bir rayondan başqa rayona köç edirlər. Bir gün onların Hicran adlı qızı anadan olur. Analıq səadətinə qovuşan Elnarə xanım bir müddət həyat yoldaşından uzaqlarda olsa da övladını səbrlə böyüdür, hər əziyyətə qatlaşır.
Vətən müharibəsindən bir qədər əvvəl xidmət müddətinin başa çatmasına görə təqaüdə çıxan mayor Elnur Hacıyev azad, sərbəst ömrünə - mülki həyata qədəm qoyur. Yenə də boş-bekar dayanmır, bir istehsalat müəssisəsində işləməyə başlayır. Artıq əvvəlki narahat günləri arxada qalmışdı, hər axşamını, hər istirahət gününü ailəsi ilə bölüşürdü, canı qədər sevib əzizlədiyi bircə övladını gəzintilərə aparmaqdan yorulmurdu...
Ötən ilin 27 sentyabrında Vətən müharibəsi başlananda ehtiyatda olan əksər hərbi qulluqçularımız kimi Elnura da səfərbərlik xidmətindən çağırış gəlir. Əslində bu günü neçə illər gözləmişdi. Əzəli, əbədi torpaqlarımızın bir hissəsinin yağıların əsarətində olması onu da bir Azərbaycan zabiti olaraq daimi düşündürür, narahat edirdi.
[/center]- Müharibəyə yola düşdüyü gün indiki kimi yadımdadır. Elnarə xanım yenidən kövrək xatirələrini dilə gətirir. - Həmin gün qardaşımgilə getmişdik, elə orada Elnur axşam yola düşəcəyini dedi. Özümü nə qədər ələ almağa çalışsam da qəhər məni boğdu, bir anlığa müharibənin nə demək olduğunu xəyalıma gətirdim. Bilirdim axı bu yolun bir ucu ölüm-itimdir. Elnur bizi Xırdalandakı evimizə gətirdi. Bir qədər sonra əyin-başını sahmana salıb yola düşməyə hazırlaşdı. Çalışdı ki, özünü toxtada bilsin, amma bacarmadı. Hicrandan əlini ayıra bilmirdi, gözləri çox şey deyirdi, qapıya yaxınlaşdı, birdən geri qayıdıb məni bağrına basdı: “Elnarə, sənə çox inanıram, əgər mənə bir şey olsa, yeganə övladımı sənə əmanət edirəm. Onu layiqincə böyüt, oxutdur, qoy ölkəmizin dəyərli bir vətəndaşı olsun”. Alnımdan öpdü, kədərini büruzə verməmək üçün ani bir sürətlə qapıdan uzaqlaşdı. Həmin gün çoxlu şəkillər çəkdirmişdik, sanki hər şeydən xəbərimiz vardı...
Yenə Elnarə xanım sözünü yarımçıq kəsir, qəhər onu danışmağa qoymur. Axı saf bir məhəbbətlə könül bağladığın bir insanın yoxluğuna alışmaq çox çətindi.
Cəbhədə qızğın döyüşlər gedir, şanlı ordumuz bir-birinin ardınca Qarabağın şəhər və kəndlərini işğaldan azad edirdi. Elnur demək olar hər gün ömür-gün yoldaşına zəng edir, qızını soruşur, ondan hal-əhval tutur. Bir döyüşdə yaralansa da bunu heç kimə demir, ailəsindən gizli saxlayır.
- Bəs şəhid olduğunu kimdən eşitdiniz?
2020-ci il oktyabrın 17-də şəhid olmuşdu. Həmin gün Füzuli şəhəri düşməndən azad edilmişdi. Səhər idi, Elnurdan zəng gəldi, tələsik telefonu götürdüm. “Alo” səsini eşitdim, Elnurun özü idi, amma bir anlıq duruxduğunu hiss etdim, sözü yarımçıq kəsildi. Kim bilir, bəlkə də son nəfəsiymiş. Bağışlayın, danışa bilmirəm, dalbadal zəng etdim, amma cavab verən olmadı. Elə istəyirdim ki, son sözlərini, arzularını dinləyim...
Danışa bilmir, mən də kövrəlirəm, otağı tərk edirəm. Ürəyimdə düşmənə nifrətim kükrəyir. Zavallı bir qızcığazın, vəfalı bir bacımızın günahı nəydi ki, nə qədər arzuları, istəkləri yarımçıq qaldı. Elnarə bacım deyir ki, onun yoxluğuna heç cür alışa bilmirəm, nurlu çöhrəsi bir an, bir dəqiqə belə xəyalımdan getmir. Bu yerdə mərhum bir xanəndəmizin həzin, kövrək səslə oxuduğu bir mahnının misralarını düşünürəm.
Bağça saldım, qönçə açdı, gül oldu,
Nədən səni heç unuda bilmirəm...
Əlbəttə, bacım, unutmaq çox çətindir, amma ömür-gün yoldaşınızın ruhunu daim uca tutmaq, yarımçıq arzularını davam etdirmək, yeganə övladınızın varlığı naminə möhkəm olun. İlahidən sizə səbr, dözüm diləyirəm.
Həmişə çətinlikdə qələmə aldığım şəhid haqqında yazılarımı nikbin hisslərlə bitirmək istəyirəm. Elnurun əzizlərinə, anasına, ömür-gün yoldaşına deyiləsi çox sözüm var. Başınızı daim uca tutun. Elnur əsl Vətən oğlu, qəhrəman, fədakar, xalqımıza qələbə sevincini bəxş etmiş igidlərimizdən biri idi. Şəhid mayorumuz 3-cü dərəcəli “Vətənə xidmətə görə” ordeni ilə, “Vətən uğrunda”, “Suqovuşanın azad olunmasına görə” və “Füzulinin azad olunmasına görə” medalları ilə təltif olunub.
Hicran, qızım, arzu edirəm ki, sağ-salamat böyüyüb orta məktəbi bitirəsən, sonra ali məktəbə, nəhayət müstəqil həyata qədəm qoyub gözəl, ismətli bir ana olasan. Bir oğul övladına mütləq atanın adını qoyarsan. İnanıram ki, dəyanətli anan da arzularına yetişməkdə daim sənə yardımçı olacaq...
Arif Pənahlı,
hərbi jurnalist,
ehtiyatda olan polkovnik-leytenant
2-12-2021, 20:29
Bu günə qədər Azərbaycan Qida Təhlükəsizliyi Agentliyi (AQTA) Bakı şəhəri və regionlarda yerləşən 220 məktəbəqədər təhsil müəssisəsində monitorinq keçirib.
Agentlikdən “Report”un sorğusuna cavab olaraq bildirib ki, monitorinqlər zamanı 205 bağçada 1 236 nöqsan aşkar edilərək qanunvericiliklə müəyyən edilmiş qaydada tədbirlər görülüb.
Qeyd olunub ki, AQTA ölkə üzrə fəaliyyət göstərən məktəbəqədər təhsil müəssisələrində yoxlamaları davam etdirir: "Bu ilin oktyabrın 4-dən başlayan yoxlamalar çərçivəsində məktəbəqədər təhsil müəssisələrində qidalanmanın Nazirlər Kabinetinin 103 saylı qərarında göstərilən qida normalarına uyğun təşkil edilməsi, qida təhlükəsizliyi sahəsində texniki normativ hüquqi aktların tələblərinin yerinə yetirilməsi vəziyyətinin qiymətləndirilməsi, həmçinin yeyinti məhsullarının tədarük prosesi, onların saxlanması, daşınması, realizə olunması, markalanma və qablaşdırılmasına dair tələblərə əməl olunması yoxlanılır. Bununla yanaşı, mütəxəssislər tərəfindən bağçalarda yeyinti məhsullarının hazırlandığı və saxlandığı sahələrin sanitar-texniki və sanitar-gigiyenik normalara uyğunluğuna yerində baxış keçirilir.
Bütöv.az
2-12-2021, 20:00
“Həzərat, bu Ramiz Mehdiyev ki, var, deyəsən, akademik dühası o qədər qıcqırıb ki, elə bilir akademiya buna dədəsindən miras qalıb”.
Hurriyyet.az xəbər verir ki, bu sözləri özünün facebook statusunda Hüquq və İnsan Haqları İnstitutunun sabiq şöbə müdiri, elmlər doktoru, Əməkdar jurnalist Xalid Niyazov bildirib.
O, daha sonra statusunda yazıb:
“Adam bu qoca yaşında, ömrünün üzü o yana vədəsində rəhmət qazanmaq əvəzinə, lənətə işləyir.
Xislətində, içində yaratmaq, qurmaq adına “damazlığa” bircə hüceyrənin belə olmadığı bu zat ötən günlərinin heyfini qab-qacaq dükanına girmiş nə bilim nə kimi qarşısına çıxan hər şeyi çığnayıb qırmaqla çıxmaqda qərarlıdır.
Akademiyanın prezidentindən çox özünü bazar müdürü, “girdovoy” kimi aparan “Enveroviç” insanların söz və fikir azadlığını boğmaqla, düz söz deyəni məhz özünəməxsus çirkin, nalayiq, “yaraşır” üsullarla cəzalandırmaqla məşğuldur.
Adam bəndənizə qızıb ki, bəs niyə haqqında bir-iki tərifli şərh yazmışam. O üzdən çağırıb əshabələrinə tapşırıb ki, bu akademiyada ya mən qalmalıyam, ya da Niyazov.
Siz bir təfəkkürə baxın, ağıla baxın, səviyyəyə tamaşa edin!
Adam bu feodal, hətta bir az da irəli gedək, Azıx təfəkkürü ilə 25 il Prezident Administrasiyasında necə oturubmuş?!
Ölkənin elm qərargahına hansı mənəvi haqq və elmi “kapasitə” ilə başçılıq edir?!
Başdan-ayağa, ruslar demişkən, “yeriyən lətifə” olduğunu nə tez unudub?!
Məgər ailəsinin qudurğan əməllərinə görə bütün ölkənin qınağına tuş gələn, eləmə tənbəllik, yerindən duranın “Nə yemisən? Turşulu aş!” “çilədiyi” bu deyildimi?
Adamı göndəriblər ki, get, indiyədək özünə işləmisən, indi də bari, elmin gününə ağla, yaddaqalan bir iş gör akademiya üçün, amma çifayda… Heç görmüsünüzmü ki, yabanı ot qızılgül bitirsin, mişardan çıxmış “beşlik” taxta bəhərə düşsün?!
Azərbaycan elmi bu gündədir, həzərat!
Ümid ya hörmətli Prezidentədir ki, çıxarıb atsın, ya da Allahadır ki, “mələk”lərinə tapşırsın”.
Bütöv.az
2-12-2021, 19:50
Azərbaycan Dövlət Neft Şirkətinin (SOCAR) ölkədə neft və neft məhsullarının topdan və pərakəndə satışı ilə məşğul olan “SOCAR Petroleum” QSC-yə yeni baş direktoru təyin edilib.
“Report”un məlumatına görə, bu vəzifə Rövşən İmran oğlu Həsənova həvalə edilib. O, bu vəzifədə Toğrul Cavad oğlu Seyidovu əvəzləyib.
Faktı “SOCAR Petroleum” QSC-dən təsdiqləyiblər.
Qeyd edək ki, Rövşən Həsənov “Azərneftyağ” Neft Emalı Zavodunun direktoru vəzifəsində çalışıb.
Xatırladaq ki, “SOCAR Petroleum” QSC Azərbaycan ərazisində neft məhsullarının alqı-satqısının təşkil edilməsi və çoxsahəli nəqliyyat infrastrukturuna, beynəlxalq standartlara uyğun, keyfiyyətli təchizat xidmətinin həyata keçirilməsi məqsədilə 2008-ci ildə təsis edilib.
Şirkətin ilk yanacaqdoldurma məntəqəsi 2010-cu ilin mayın 7-də açılıb. Şirkətin 39 yanacaqdoldurma məntəqəsi və 11 neft məhsullarının saxlama terminalı, 1 sıxlaşdırılmış təbii qaz terminalı və 9 CNG stansiyası fəaliyyət göstərir. “SOCAR Petroleum”da 2 000 nəfərdən çox işçi çalışır.
Bütöv.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!