Məşhur “Az-Ya” kitabının müəllifi Oljas Süleymenov belə deyib. “Az-Ya” demişkən. Bu kitab 1975-ci ildə işıq üzü görüb. İki hissədən ibarət olan əsərin birinci bölümündə rus ədəbiyyatının abidəsi sayılan“İqor polku haqqında dastan”dakı türk mənşəli sözlərin sonradan slavyan mənşəli hesab edilən türkizmlərin etimologiyasını araşdırmaqla türk xalqlarının tarixi taleyi ilə bağlı həqiqətləri ortaya qoyub. Təbii ki, bu yuxarı dairələrin xoşuna gəlmədiyindən onların yuxusuna haram qatıb.
1976-cı ildə Sov.İKP MK-nın baş ideoloqu Mixail Andreyeviç Suslovun tələbi ilə SSRİ Elmlər Akademiyasında “Az-Ya” kitabı müzakirəyə çıxarılıb. O zaman bu kitaba görə Oljas Süleymenova “antirus” damğası vurmaq üçün ciddi təzyiqlər edilib. Görkəmli qazax xalqının böyük oğlunu yalnız bir nəfər-Konstantin Simonov müdafiə edib.
Oljas Süleymenov doğrudan da Azərbaycan xalqının dostudur, qardaşıdır. Xalqımızın sevincini öz sevinci, ağrılarını öz ağrıları bilib. 20 Qanlı yanvar faciəsini yada salaq. Mərhum şairimiz Bəxtiyar Vahabzadənin bir zəngi ilə xəstə olmasına rəğmən Bakıya gəlişi, o ağır günlərdə xalqımızın yanında olması, haqq səsini dünyaya çatdırması Oljas Süleymenovun böyüklüyündən, sözün əsl mənasında türk oğlu türk olduğundan xəbər verdi.
18 may. “Az-Ya”, “Türklər tarixdən əvvəl”, “Köçərilər və Rusiya”, “Yazı dili”, “Tanrının təbəssümü”, “Sözün kodu”, “Gil kitab” larının müəllifi, bütün türk dünyasının böyük oğlu, Qazaxıstanın görkəmli şair və yazıçısı, ictimai-siyasi xadim, Azərbaycan xalqının dostu, qardaşı Oljas Süleymenovun 84 yaşı tamam olur. Tanrı Sizi qorusun!




Təyyar Nəsirli