Vətən sevgisi, Qarabağ həsrəti hər bir Azərbaycanlının qeyrətidir.30 ildir ki, Azərbaycan qəlbi Qarabağ həsrəti ilə döyünən yaralı bir Anadır. Doğma vətənimiz artıq bu həsrət sona çatdı. Mərd oğullarımızın sayəsində artıq başımızı dik tuta bilərik, çünki Qarabağ artıq bizimdir.44 günlük haqq savaşında cəngavərlərimiz bütün dünyanı, hər kəsi heyrətə gətirdi. Bu torpaqların hər biri qanla alındı, bəli qanla. Hər bir igidimiz canı, qanı hesabına. Beynimizə, ürəyimizə yazılan 2802 Şəhid qardaşımızın qanı hesabına. Onların hər biri "Xudayar təsnifində" deyildiyi kimi bir Dastana döndülər. Həyat üçün doğulanlar, vətən uğrunda canlarını fəda etdilər. Hər bir Hicrana dözən insan, ən sonunda Vüsala yetirlər. Bəs bizim qəlbi vətən sevgisi ilə döyünən 3 İgid qardaşımız: Heybətov Ağa Əmi Elçin oğlu, Salamov Vüsal Yəhya oğlu və Əliyev İbrahim Nəcəfqulu oğlu, onlar isə Buzovna sakinlərinin qəlbində taxt qurdular. İgidlikləri ilə, cəsurluqları ilə tarix yazıb bizi o tarixin canlı şahidləri etdilər. Onların hər biri Bakı şəhəri Ə.Əliyev adına 125 N li tam orta məktəbin qəhrəman məzunlardır. Sizin taleyinizə şəhidlik zirvəsi yazıldı. Bu şərəfli ada qovuşanda vətən torpaqlarını əyninizə geyinərək sonsuz sevginizlə, vətənpərvərliyinizlə ucaldınız. Yaşadığınız bu qısa ömürdə zəhmətlə , əməyə rəğbətlə böyüdünüz. Taleyinizdə vətən uğrunda vuruşmaq, fədakar olmaq , şücaət , cəsarət , qəhrəmanlıq nümayiş etdirmək də var imiş. Ağa Əminin qəlbinin təmizliyi, Vüsalın səmimi münasibəti, İbrahimin sakit təbiəti onlara hörmət qazandırmışdı. Şəhidlik zirvəsinə ucalmaları sevənlərinin qəlbini göynətsə də, onlara olan ehtiram və sevgini əbədi yaşar etdi.

Şəhidlərimiz! Siz gələcək nəsillər üçün qəhrəmanlıq , şərəf məktəbisiniz. Siz ölməzliyə imza atdınız. Allah Sizə rəhmət eləsin!

Məni belə aciz bilmə qəbirdə,
Qəbirdə də Qarabağın özüyəm!

Sizin hər biriniz bizim qəlbimizdə əbədi olaraq yaşayacaqsınız. Amalları və əməlləri ilə Vətən olmağı bacaranlar, qəhrəmanlarımız daima bizim qürur yerimiz həm də sağalmaz yaramız kimi qalacaqsınız. Bu gün bütün Buzovna sakinlərinin dilində adınız fəxrlə çəkilir, tarix yazan sərkərdələr.Ruhunuz qarşısında baş əyirik. Artıq əzəli- əbədi torpağımız olan Qarabağ azaddır. Ana Vətənə -- Azərbaycana bu qələbəni yaşadan Ali Baş Komandan Prezident İlham Əliyev , qəhrəmanlıq salnaməsi yazan Milli Ordumuz, şəhidlik zirvəsi, xalqımızın sarsılmaz birliyi hamının qürur qaynağıdır.

Mədəniyyətimizin ocağı, qəhrəmanlıq qalamız, musiqimizin beşiyi Qarabağ! Sən bizim düşünən beynimiz , döyünən qəlbimiz, görən gözümüzsən. Sənin həsrətinlə səni yaşatmışıq. Torpağına qovuşmağı çox arzulamışıq. Haqq işi uğrunda apardığımız mübarizə " Qarabağ Azərbaycandır! " şüarını reallığa çevirdi. Qarabağ -- mədəniyyət incisi, təbii sərvətlər diyarı doğma nəfəslərlə isinir. Təbiətin möcüzəsi , gözəlliklər məkanı Qarabağın işğaldan azad olunması hər bir azərbaycanlının fəxarətidir. Qarabağın vətən torpağı olması kifayətdir ki, onun nə qədər əziz və əvəzolunmaz olduğunu dərk edəsən.

Bu diyarın təbiəti elə bir musiqidir ki, sanki ahəngi ilə, füsunkarlığı ilə ürəkləri fəth edir. Bu gün bütün evlərdən Qarabağ şikəstəsinin həzin sədaları eşidilərək ruhumuza axır. Qarabağın xoş günləri qabaqdadır. Bu firavan həyatı birlikdə yaradacağıq. Xalqımızın milli , maddi, mənəvi dəyərlərini yaşatmağa gəlirik. Vətənə vətən övladı olmağa gəlirik. Qarabağa qovuşmağa gəlirik. Qələbən mübarək, Azərbaycan!

Əzizli Fatimə
Bakı Dövlət Universitetinin Jurnalistika fakültəsinin tələbəsi