Vətən! Bu kəlmə bizim dilimizdə ana kəlməsi ilə bir səslənir. Məgər bu iki sözü bir-birindən ayırmaq olarmı? Vətəni anasız, ananı vətənsiz təsəvvür etmək
olarmı? Bu adlar dünyanın, ömrümüzün, mənalı həyatımızın yaraşığı və zinətidir. Bu adlar ürək dolu məhəbbətimiz, şərəfimiz, vicdanımız, vüqarımız və qüvvətimizdir. Vətən anadır. Onun qədrini naxələflər bilməz. Vətəni sevmək, şəhid olmaq vicdanlı adamların işidir. Dünyaya gələndə beşiyimiz, dünyadan köçəndə məzarımızdır Vətən!
Azərbaycan qəhrəmanlar yurdu, igidlər məskənidir. Neçə-neçə ərənlər yetişdirib bu müqəddəs torpaq, bu ulu diyar! Bu torpaq Babəklərin, Cavanşirlərin, Koroğluların vətənidir. Belə qəhrəmanları həmişə yaşatmışdır və daim yaşadacaqdır!
Son dövrlərin narahat dünyası, zorla cəlb edildiyimiz Qarabağ savaşı bir daha göstərdi ki, Azərbaycan igidlər diyarı, qəhrəmanlar ölkəsidir. Bu torpaq halal torpaqdır. Kimlərinsə əlindən alınmayıb, kimlərdənsə zəbt olunmayıb. Halal torpağın övladları qəhrəman olmaya bilməz. Bu torpağın nankor övladını torpaq özü götürməz..
Dünyanı heyrətə salan oldunuz,
Azadlıq uğrunda yanan oldunuz .
Köçüb ürəklərdə qalan oldunuz
Unutmaq olarmı sizi şəhidlər?!

Bəli, bu belədir! Biz heç zaman vətənin hər qarış torpağı uğrunda canından, qanından belə keçən övladlarımızı-şəhidlərimizi unutmuruq və unutmayacağıq!
Biz də onlar kimi canımızdan keçib yurdumuzun bir qarışını belə yağı düşmənə verməməli, onu gələcək nəsillərə büllur və toxunulmaz halda təhvil verəcəyik. Əcdadlarımızın əmanətinə xəyanət etməməliyik!
Xalqımızın böyük faciə qarşısında olduğu zamanlarda imdadımıza çatan Heydər Əliyevin layiqli davamçısı İlham Əliyevin yeritdiyi düzgün siyasəti nəticəsində biz cənnət məkanlı Qubadlı, Zəngilan, təmiz havalı Xocalı, Ağdərə, sənətkarlar diyarı Ağdam, Laçın, Kəlbəcər, musiqi beşiyimiz Şuşa, bərəkətli torpaqlı Füzuli, Cəbayıl rayonlarımıza geri dönəcəyik!
Özünü türk hesab edən hər kəs türkçülüyünü-azərbaycanlı olduğunu sübut etmək üçün canından da şirin olan vətənini qorumalıdır! Əks halda onun bu Vətəndə-Azərbaycanda yaşamağa haqqı yoxdur!

Xəyalə CƏFƏROVA
Zəngilan rayonu 6 saylı tam orta məktəbin
11-ci sinif şagirdi .