Şərq Xalçaları üzrə Beynəlxalq Konfransın (İCOC) İcraiyyə Komitəsinin nümayəndə heyəti Bakıda səfərdədir

2017-ci ildə Bakı şəhərində Azərbaycan xalçasına həsr edilmiş V beynəlxalq konqresin keçirilməsi nəzərdə tutulur.

Butov.az-ın Medeniyyet.az-a istinadən xəbərinə görə, konqresin təşkili ilə bağlı Şərq Xalçaları üzrə Beynəlxalq Konfransın (İCOC) İcraiyyə Komitəsinin nümayəndə heyəti paytaxtımızda səfərdədir. Nümayəndə heyətinə qurumun baş katibi Denis Dodds, Akademik Komitənin sədri Alberto Boralevi, komitənin üzvü Yelena Tsaryova və Mədəniyyət və Turizm Nazirliyinin İtaliyada yaşayan eksperti Əsli Səmədova daxildir.
Səfərin məqsədi Bakıda keçiriləcək beynəlxalq konqres zamanı nümayiş olunacaq muzey və şəxsi kolleksiyalarda qorunub saxlanılan tekstil (xalça, xalça məmulatları, parçalar) nümunələrinin tarixi, bədii, elmi məzmununun və inkişafının öyrənilməsi, keçiriləcək sərgilərin məkanlarının müəyyənləşdirilməsi, həmçinin bu işə cəlb ediləcək yerli ekspertlərlə görüşlərin keçirilməsidir.
İCOC İcraiyyə Komitəsinin nümayəndə heyəti İçərişəhər Tarix Memarlıq Qoruğunda yerləşən Azərbaycan rəssamlıq məktəbinin görkəmli nümayəndəsi Kamil Əliyevin ev-muzeyinə, İçərişəhər Ənənəvi İncəsənət Mərkəzinə, Şirvanşahlar Sarayına və Azərbaycan Xalça Muzeyinə baş çəkib, həmçinin xalçaçı-rəssam Eldar Mikayılzadənin qonağı olub.
Dekabrın 11-də Yelena Tsaryova tərəfindən Azərbaycan Milli İncəsənət Muzeyində xalçaçılıq sənəti üzrə mütəxəssislər üçün seminar-təlimin keçirilməsi, habelə səfər çərçivəsində Denis Dodds və Alberto Boralevi tərəfindən də bədii fondları olan muzeylərin əməkdaşları üçün mühazirələrin oxunması nəzərdə tutulub.
Qeyd edək ki, Azərbaycan xalçaçılıq sənəti sahəsində dünyanın aparıcı ölkələrindən biridir. 2010-cu ildə Azərbaycan ənənəvi xalçaçılıq sənəti UNESCO-nun qeyri-maddi mədəni irs üzrə reprezentativ siyahısına daxil edilib.
Bakıda Azərbaycan xalça sənəti üzrə birinci beynəlxalq simpozium 1983-cü ildə keçirilib. 1988-ci ildə ikinci, 2003-cü ildə üçüncü beynəlxalq simpozium təşkil olunub. 2007-ci il Parisdə, UNESCO-nun Baş Qərargahında xalça ustası, Xalq rəssamı Lətif Kərimovun 100 illik yubileyinə həsr olunmuş “Azərbaycan xalça sənəti” mövzusunda dördüncü beynəlxalq simpozium keçirilib.