Futbol azarkeşləri bilir ki, bir neçə gün əvvəl milli komandamızda yeni təyinat oldu. Nəhayət ki, uzun müddətdən bəri gözlədiyimiz qərar gerçəkləşdi. Təcrübəli mütəxəssis, Avroliqanın qrup mərhələsinə düşərək tarix yazan və Avropanın ən güclüləri ilə uğurla mübarizə aparan "Qarabağ" klubunun məşqçisi Qurban Qurbanov yığmamızın sükanı arxasına keçdi. Şübhəsiz ki, bu, çox sevindiricidir. İlk növbədə ona görə ki, Berti Foksdan, Robert Prosineçkidən fərqli olaraq Qurbanov Azərbaycan oğludur, həmvətənlimizdir. Digərlərində olmayan milli təəssübkeşlik hissi onda var. Təsadüfi deyil ki, yeni qərarla bağlı AFFA-nın İcraiyyə Komitəsinin keçirdiyi iclasda Qurban müəllim dedi ki, mən federasiyanın, federasiya da mənim qarşımda heç bir şərt qoymur. Bir-birimizi illərdir ki, tanıyırıq. Bir-birimizə inanaraq bu yola çıxdıq və çalışacağıq ki, futbolumuzun inkişafı üçün əlimizdən gələn hər şeyi edək.

İkinci bir tərəfdən onun parlaq futbol karyerası çoxlarımıza məlumdur. 2006-cı ildən məşqçiliyə başlayan Qurban Qurbanov bir müddət "Neftçi"nin, sonradan isə "Qarabağ"ın çalışdırıcısı olub. Həmin tarixdən əvvəl isə o, hücumçu mövqeyində müxtəlif klubların şərəfini qoruyub və bacarıqlı bombardirlərdən biri olaraq futbol tariximizə düşüb. Bəlkə də, ən əsası xüsusilə futbolçuları, idman jurnalistləri onun soyuqqanlılığına, təmkininə yaxşı bələddirlər. Çünki o, əsl mütəxəssisdir və çoxdan özü üçün aydınlaşdırıb ki, qələbəyə gedən yolda əsas amil soyuqqanlılıq, həmçinin səhvlərdən məqsədyönlü dərs çıxarmaqdır.
Bayaq qeyd etdiyim icraiyyə komitəsinin iclasında AFFA-nın prezidenti Rövnəq Abdullayev vurğulayıb ki, milli komandamızın əsas heyəti də elə "Qarabağ"ın futbolçularından ibarət olacaq. Əlbəttə, bu da elə-belə deyilməyib. Hamı, o cümlədən də Rövnəq müəllim görür ki, son illər Ağdam təmsilçilərimiz müsbət mənada fərqlənməyi bacarırlar. Çoxları elə düşünür ki, bu klub itirilmiş torpaqlarımızın adını daşıdığına görə ona hansısa əlavə köməkliklər olunur. Buna heyflənmərik. Amma gəlin obyektiv düşünək, çəkilən zəhmətləri görməmək olmaz. Sadəcə Qurban müəllim də, futbolçularımız da öz işlərini kifayət qədər yaxşı bilirlər. Məhz buna görə də Qurbanov millimizin baş məşqçisi seçilib və baza komanda olaraq "ağ-qara"ların oyunçuları müəyyənləşib. Onlara müvəffəqiyyətlər arzulayıram. İnanıram ki, yaxın gələcəkdə çox böyük uğurların şahidi olacağıq. "Qarabağ"ın yazdığı tarixləri indi həm də bütöv Azərbaycan yazacaq ki, bu da şərəfli və qürurvericidir.

Kənan Novruzov
Butov.az