DİN mətbuat xidmətindən verilən məlumata görə, Şəhər Baş Polis İdarəsində Gəncə, Göygöl, Samux, Şəmkir, Ağstafa, Tovuz, Gədəbəy, Qazax, Daşkəsən şəhər və rayonlarından olan sakinləri, eyni zamanda, bölgədə məskunlaşmış Kəlbəcər və Xocalıdan olan bir qrup məcburi köçkünü qəbul edən nazir onların müraciətlərini dinləyib, qaldırılan məsələlərin operativ həll edilməsi üçün tapşırıqlar verib.
Müraciətlərin əksəriyyəti yerindəcə həllini tapıb. Polis fəaliyyətinə aid olmayan ərizələrin aidiyyəti üzrə dövlət orqanlarına göndəriləcəyi və onlara mövcud qanunvericiliyə uyğun şəkildə baxılacağı nəzərə çatdırılıb.
Daha sonra R.Usubov Gəncə BŞPİ Kəpəz Rayon Polis İdarəsinin yeni inzibati binasının açılış mərasimində iştirak edib. Növbətçi hissəyə, xidməti otaqlara, avadanlıq və kompüter sistemi ilə təchiz edilmiş tədris otağına, akt zalına baxıb.
Nazir şəxsi heyətin normal fəaliyyəti üçün lazım olan bütün şəraitin yaradılmasından məmnunluğunu bildirib.
Daxili işlər naziri yeni inzibati binanın akt zalında şəxsi heyətlə görüşüb, əlamətdar hadisə münasibətilə onları təbrik edib, konkret tapşırıq və tövsiyələrini verib.
Tədbirdə Gəncə Şəhər İcra Hakimiyyətinin başçısı Elmar Vəliyev də iştirak edib.