Dünən TÜRKPA Baş Katibi ATƏT-in Serbiya Sədrliyinin dəvəti ilə ATƏT-in Vyanada keçirilən Daimi Şurasının iclasında iştirak edib.
Butov.az Modern.aza istinadla xəbər verir ki, Asanov Daimi Şurada çıxış edərək Şura üzvlərinə TÜRKPA-nın fəaliyyəti, gələcək vəzifə və məqsədləri haqqında məlumat verib, eləcə də TÜRKPA-nın qarşılıqlı maraq doğuran məsələlərə diqqət çəkməklə ATƏT və onun orqanları ilə sıx dialoqlarını davam etdirmək niyyətində olduğunu vurğulayıb.
O, həmçinin çıxışında qeyd edib ki, Türk əməkdaşlığının parlament ölçüsü olaraq, Assambleya ATƏT ilə üzv ölkələrdə sabit və davamlı inkişafın təmin edilməsinə yönəlmiş eyni məqsəd və prinsipləri bölüşür.
ATƏT-in Daimi Şurasında çıxışında cənab Asanov TÜRKPA-nın Bakıda keçirilmiş Birinci Avropa Oyunlarına göstərdiyi mənəvi dəstək haqqında danışaraq aşağıdakıları qeyd edib: “Bu, Avropa idman icmaları arasında dostluq və qarşılıqlı əlaqələrin daha da möhkəmlənməsinə dəstək verən dünya miqyaslı gözəl və möhtəşəm idman hadisəsi idi. Yeni inşa edilmiş dövlət incəsənət idman məkanlarında keçirilən Oyunlar 6000-dən çox Avropa atleti və yarışçılarını bir araya gətirdi. Qonaqlar həmçinin ev sahibi ölkənin zəngin mədəni və tarixi irsinə nəzər yetirmək imkanı da əldə etdi. Çox sevindirici haldır ki, qısa zaman kəsiyində TURKPA-nın qurucu üzvlərindən və ATƏT-in fəal iştirakçı dövlətlərindən biri belə böyük və nəcib vəzifənin öhdəsindən gələ bildi”.