Moskvadakı Azərbaycan İcması Evində Ümumrusiya Azərbaycanlıları Konqresinin (ÜAK) dəstəyiylə Laçın rayonunun Ermənistan Silahlı Qüvvələri tərəfindən işğal olunmasının 24-cü ildönümünə həsr edilən anım mərasimi keçirilib.

Butov.az Modern.az-a istinadən xəbər verir ki, mərasimdə Rusiyada yaşayan azərbaycanlı ziyalılar, jurnalistlər, cəmiyyət rəhbərləri, iş adamları, diaspor nümayəndələri ilə yanaşı Moskvada məskunlaşmış Laçınlılar da iştirak ediblər.
Tədbirin aparıcısı Azərbaycan yazıçılar birliyinin Moskva bölməsinin katibi, Ümumrusiya Azərbaycanlıları Konqresinin müşaviri Nəsib Nəbioğlu tədbir iştirakçılarını salamladı.

Laçının işğalı zamanı şəhid olan, Qarabağ uğrunda canından keçən, Azərbaycanın ərazi bütövlüyü uğrunda gedən döyüşlər zamanı şəhid olanların xatirəsi 1 dəqiqəlik sükutla yad edildi.

Nəsib Nəbioğlu Azərbaycanın ərazi bütövlüyünün qorunmasında mühüm strateji əhəmiyyətə malik olan Laçın rayonunun 24 il əvvəl erməni silahlı qüvvələri tərəfindən işğalı ilə bağlı ətraflı məlumat verdi.

O qeyd etdi ki, Ermənistan hərbi birləşmələri o zaman Xankəndi şəhərində yerləşən 366 -cı Motoatıcı Alayla birləşərək Şuşa və Laçını işğal etdilər. Vahid komandanlığın olmaması, ordunun siyasi qarşıdurmalara cəlb olunması, siyasi aksiyalara qoşulması, cəhbə bölgələrindəki mövqelərimizin nəzarətsiz qalması Laçının və ətraf rayonların işğalıyla nəticələndi. Əhəmiyyətli geostrateji mövqeyə malik olan Laçın və Kəlbəcər mütləq azad olmalı, Azərbaycan ərazilərinin işğaldan azad olması məhz Laçından və Kəlbəcərdən başlamalıdır.

Tədbirdə çıxış edən Ümumrusiya Azərbaycanlıları Konqresinin işraçı direktoru İlqar Hacıyev erməni işğalçılarının Laçına vurduğu ağır zərbələrdən, ermənilərin xalqımıza qarşı törətdikləri insanlığa sığmayan vəhşilikdən danışdı.

Türkiyənin “İhlas” xəbər agentliyinin sabiq Moskva müxbiri,tanınmış jurnalist Fuad Abbasov çıxışı zamanı tədbir müddətində iştirakçılar tərəfindən müzakirə olunan Azərbaycanın haqq səsinin dünya ictimaiyyətinə çatdırılması mövzusuna münasibətini bildirərək, bir sıra təkliflər irəli sürdü.

Tədbir müddətində iştirakçılar bu mövzuda fikir mübadiləsi davam etdirmiş, təkliflər irəli sürüblər/

Ümumrusiya Azərbaycanlıları Konqresinin icraçı direktorunun müavini Rövşən Rəhimov Azərbaycan həqiqətlərinin dünyaya eləcə də Rus ictimaiyyətinə daha dolğun və doğru şəkildə çatdırılmasında diaspora təşkilatlarının bir məqsəd uğrunda birləşməsinin, vacibliyini qeyd etdi.


Tədbirdə Qarabağ müharibəsi döyüşçüsü Mircamal Ağa, Ümumrusiya Azərbaycanlıları Konqresinin nümayəndəsi Rövşən Rəhimov, SSRİ Ali Sovetin sabiq deputatı Yuri Vladimiroviç Karıtin, Azərbaycan mədəniyyətinin inkişafı və intibahı fondunun direktoru-Şamil Tağıyev, Azərbaycan-Slavyan Gəncləri Assosiasiyasının Rusiya nümayəndəliyinin sədri - Toğrul Allahverdili və başqaları çıxış etdilər.

Çıxış edənlər vurğuladılar ki, ölkə Prezidenti, Ali Baş komandan İlham Əliyevin rəhbərliyi altında tezliklə yağı düşmən tapdağı altında olan torpaqlarımız azad ediləcək, şəhidlərimizin qanı yerdə qalmayacaq.